Ku Pfuna Vana Lava Feriweke

A swi olovi ku byela munhu lonkulu leswaku un’wana wa vanhu lava a va toloveleke u lovile. Kambe ehleketa hi n’wana, u nga n’wi byerisa ku yini?

VANA vo tala swa va tshikilela ku feriwa hi xirho xa ndyangu kumbe munghana. A swi olovi leswaku vatswari va chavelela n’wana loko ku ri ni rifu endyangwini, kasi na vona va le ku rileni. Phela na vona va lava ku chaveleriwa.

Vatswari van’wana va ringeta ku chavelela vana hi ku va byela leswaku munhu la feke u endzele kun’wana. Kambe leswi i vukanganyisi. Xana u nga n’wi byerisa ku yini n’wana hi rifu?

Renato na Isabelle va langutane na xona xiyimo lexi. Endzhaku ka loko ku fe Nicolle, ku nga xinhwanyetana xa vona lexi a xi ri ni malembe manharhu ni hafu, va boheke ku pfuna Felipe, xijahana xa vona lexi a xi ri ni malembe ya ntlhanu leswaku xi langutana ni leswi nga endleka.

Xalamuka!: Mi n’wi byerise ku yini Felipe leswaku Nicolle u lovile?

Isabelle: Hi vone swi antswa ku n’wi byela ntiyiso. Hi n’wi byele leswaku a hi vutisa swivutiso naswona minkarhi hinkwayo a hi ringeta ku swi hlamula hi ndlela leyi n’wana la ringanaka na yena a nga swi twisisaka ha yona. Nicolle u dlayiwe hi tibaktheriya leti tlulelaka, kutani hi byele Felipe leswaku ku ni xitsongwatsongwana lexi ngheneke emirini wa Nicolle naswona madokodela ma tsandzekile ku xi dlaya.

Xalamuka!: Xana mi n’wi byerile leswi mi swi pfumelaka malunghana ni rifu?

Renato: Hi Timbhoni ta Yehovha naswona a hi swi tiva leswaku ku n’wi byela swi ta n’wi chavelela. Bibele a yi bi mariri loko yi hlamusela xiyimo xa vafi—yi dyondzisa leswaku vafi a va tivi nchumu. (Eklesiasta 9:5) Hi vone leswaku ku bula na yena hi mhaka leyi swi ta susa ku chava kun’wana ni kun’wana loku a nga ha vaka na kona. Hi xikombiso, ku tshama a ri swakwe ni nivusiku.

Isabelle: Hi hala tlhelo, Bibele yi dyondzisa leswaku vafi va ta pfuxiwa leswaku va ta hanya eparadeyisini leyi nga ta va laha misaveni. Leswi ha swi tshemba naswona hi xiye leswaku swi ta n’wi pfuna swinene Felipe. Kutani hi bule na yena hileswi Bibele yi swi dyondzisaka. Hi bule na yena hi rungula ra Yesu loko a pfuxa Yayiro, xinhwanyetana lexi a xi ri ni malembe ya 12. Hi byele Felipe leswaku Nicolle na yena u ta pfuxiwa. Leswi hi swona leswi Bibele yi swi dyondzisaka.—Marka 5:22-24, 35-42; Yohane 5:28, 29.

Xalamuka!: Xana mi vona onge Felipe u swi twisisile swilo leswi hinkwaswo?

Renato: Hi tshemba tano. Vana va ti twisisa kahle timhaka ta rifu loko va byeriwa ntiyiso hi ndlela yo olova. A ku na xivangelo xo va tumbetela. Rifu i ra xiviri naswona lexi twisaka ku vava hileswaku hi boheka ku langutana na rona. Kutani vatswari va fanele va dyondzisa vana va vona ndlela yo langutana ni ku feriwa, hilaha hi tlheleke hi endla hakona hi ku famba ka nkarhi eka Vinicius.a

Xalamuka!: Xana mi fambe na yena Felipe eswilahlweni?

Renato: Endzhaku ko kambisisa vuyelo lebyinene ni byo biha lebyi nga ha vaka kona, hi vone swi antswa leswaku a sala. Vana lava ringanaka na yena va hatla va khumbeka swinene. I ntiyiso leswaku vatswari van’wana va nga famba ni vana va vona, naswona vana va langutana ni swiyimo swo hambana-hambana hi tindlela to hambana. Loko n’wana a ta ya eswilahlweni, swi nga va swinene ku va a rhanga a hlamuseriwa leswaku ku ta endleka yini.

Xalamuka!: Rifu ra Nicolle ri fanele ri mi tshikilerile swinene. Xana a swi mi karhata ku va Felipe a mi vona mi rila?

Isabelle: Nikatsongo! Hambi ku ri Yesu u “[humese] mihloti” endzhaku ka loko ku fe munghana wakwe. (Yohane 11:35, 36) Kutani a ku na lexi chavisaka hi ku va a hi vona hi rila. Entiyisweni, sweswo swi n’wi kombe leswaku ku rila a swi bihanga. Swi kombisa ndlela leyi hi titwaka ha yona. A hi lava leswaku na yena a phofula ndlela leyi a titwaka ha yona, ku ri ni ku va a fela endzeni.

Renato: Loko ndyangu wu weriwa hi khombo, vana va titwa va nga ha sirhelelekanga. Kutani loko hina tanihi vatswari hi ngheneka naswona hi nga chavi ku va kombisa ndlela leyi hi titwaka ha yona, swi ta va olovela ku tiphofula. Endzhaku ko rhiya ndleve malunghana ni leswi va karhataka, hi ta swi kota ku va tiyisa naswona hi hunguta ku chava loku va nga na kona.

Xalamuka!: Xana van’wana va mi pfunile?

Renato: Ina, swirho swa le vandlheni swi hi seketerile swinene. Ku hi endzela ka swona, ku hi fonela ni makhadi lawa swi hi tsaleleke wona swi kombe Felipe ndlela leyi swirho swa vandlha swi hi rhandzaka ha yona ni leswaku swa khathala hi hina.

Isabelle: Swirho swa mindyangu ya hina na swona swi hi pfunile swinene. Endzhaku ka rifu ra Nicolle, Tatana a a ta ekaya ra hina leswaku a ta fihlula na hina masiku hinkwawo. A a kombisa ndlela leyi a hi seketelaka ha yona. Naswona Felipe swi n’wi chavelerile swinene ku va ni kokwa wakwe.

Renato: Eminhlanganweni ya Vukreste a hi chaveleriwa swinene hi tlhelo ra moya. A hi tikarhata leswaku hi nga xwi eka yona, hambileswi minkarhi yin’wana a hi pfa hi rila. Ku ya eminhlanganweni a swi hi tsundzuxa swilo swo tala hi Nicolle. Kambe a hi swi tiva leswaku hi fanele hi ringeta, ngopfu-ngopfu ku endlela leswaku Felipe a ta vuyeriwa.

[Nhlamuselo ya le hansi]

[Bokisi/Swifaniso leswi nga eka tluka 14]

Broxara ni tibuku leti nga laha hansi, leti kandziyisiweke hi Timbhoni ta Yehovha ti nga chavelela vanhu lava feriweke hi varhandziwa va vona.

EKA LAVAKULU:

Xana Bibele Yi Dyondzisa Yini Hakunene?

Ndzima 6: Lava Feke Va Kwihi?

Ndzima 7: Ntshembo Wa Xiviri Hi Varhandziwa Va Wena Lava Feke

EKA VANA LAVATSONGO:

Buku Yanga Ya Timhaka Ta Bibele

Dyondzo 92: Yesu A Pfuxa Mufi

EKA VANA LAVA SE VA KULEKENYANA:

Dyondza Eka Mudyondzisi Lonkulu

Ndzima 34: Xana Ku Ta Humelela Yini Loko Hi Fa?

Ndzima 35: Hi Nga Pfuka Eku Feni!

Ndzima 36: I Vamani Lava Nga Ta Pfuxiwa Eku Feni? Xana Va Ta Tshama Kwihi?

EKA VANTSHWA:

Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1

Ndzima 16: Xana I Swinene Ku Rila Hi Ndlela Leyi Ndzi Rilaka Ha Yona?

[Bokisi/Xifaniso lexi nga eka tluka 15]

NDLELA YO PFUNA

● Va khutaze leswaku va vutisa. Vana la nghenekaka leswaku n’wana wa wena a ta titwa a ntshunxekile ku vulavula hi rifu ni hi leswi ri vulaka swona.

● Papalata mavunwa. Hi xikombiso, u nga byeli n’wana leswaku munhu la feke u endzele kun’wana.

● Hlamusela rifu hi ndlela leyi twisisekaka. Van’wana va namba va vula leswaku u etlele naswona a nge he pfuki.

● Byela n’wana leswi nga ta endleka eswilahlweni; n’wi byele leswaku munhu la feke a nge he swi koti ku vona kumbe ku twa.

● U nga chavi ku kombisa ndlela leyi u titwaka ha yona. Xisweswo, ni n’wana wa wena u ta swi vona leswaku ku rila i swa ntumbuluko.

● Tsundzuka leswaku a ku na ndlela yo karhi leyi munhu a faneleke a rila ha yona loko a feriwile. Vana va hambana; kasi ni swiyimo swa hambana.

[Xihlovo Xa Kona]

Rungula leri ri huma eka www.kidshealth.org

[Xifaniso lexi nga eka tluka 15]

Ku suka eximatsini ku ya exineneni: Felipe, Renato, Isabelle na Vinicius