Ku Feriwa Loku Vavaka Swinene

Nicolle a a ri xinhwanyatana lexi hanyeke kahle. Siku rin’wana ni madyambu u rile hi ku pandziwa hi nhloko naswona vatswari vakwe va n’wi tsutsumisele exibedlhele. Hi madyambu lama landzeleke loko va ri karhi va n’wi kambela, va kume leswaku u ni vuvabyi bya mbilu. Loko va ya emahlweni va n’wi kambela va kume leswaku u ni xitsongwatsongwana lexi hangalakeke ni mahahu, tinso ni mbilu. Nicolle u file ku nga si hela tiawara ta 48. A a ri ni malembe manharhu ntsena.

KU FERIWA hi munhu loyi hi n’wi rhandzaka i swin’wana swa swilo leswi vavaka leswi vanhu va langutanaka na swona. Minkarhi yin’wana rifu ri nga ha tikomba ri nga tiyiseleleki. Isabelle mana wakwe u ri, “Ndzi n’wi kumbuka swinene Nicolle. Ndzi tsundzuka ndlela leyi a ndzi angarha ha yona, nun’hwelo wakwe ni rirhandzu rakwe. Ndzi tsundzuka ndlela leyi a a ndzi nyika xiluva ha yona siku ni siku. Nicolle u tshama a ri emianakanyweni ya mina.”

Xana na wena u feriwe hi munhu loyi u n’wi rhandzaka, ku nga ha va n’wana, munghana wa vukati, makwenu, mutswari kumbe munghana lonkulu? Loko swi ri tano, u nga langutana njhani ni gome ra wena?