Loko Vutomi Byi Tika

Hi xikombiso, Sally,a loyi a tshamaka eUnited States loyi a lahlekeriweke hi swilo swo tala endzhaku ka loko ku ve ni xidzedze xa hurricane, u ri: “A ndzi twa onge a ndzi nge he swi koti ku tiyisela. Mikarhi yo tala a ndzi twa onge ndzi nga lahla thawula.”

Xiphiqo xin’wana i ku feriwa hi munhu loyi u n’wi rhandzaka. Janice, wa le Australia, u ri: “Loko vana va mina vambirhi va majaha va lova, a ndzi dya nhlomulo ndzi xeva hi mangava. Ndzi kombele Xikwembu ndzi ku: ‘A ndza ha swi koti ku tiyisela! Ndzi tshike ndzi fa kunene. A ndza ha swi lavi ku hanya.’”

Daniel, na yena a tshikilelekile hikwalaho ka leswi nsati wa yena a nga tshembeki. U ri: “Loko nsati wa mina a vula leswaku u rhandzana ni wanuna un’wana, a swi fana ni loko ndzi tlhaviwa hi mukwana embilwini. A ndzi twa ku vava loku nga pimanisiwiki na nchumu naswona swi teke tin’hweti to tala ndzi titwa hi ndlela yoleyo.”

Magazini lowu wa Xihondzo xo Rindza wu ta hlamusela ndlela leyi swi nga swa nkoka ha yona ku hanya hambiloko

• U weriwa hi timhangu ta ntumbuluko

• U feriwile

• Nkataku a nga tshembeki

• U ri ni vuvabyi lebyi nga ni khombo

• Vutomi byi tika

Xo sungula, hi nga tiyisela njhani loko hi weriwe hi timhangu ta ntumbuluko?