Loko U Feriwile

“Loko buti wa mina a lova a ku nga ri na lexi ndzi nga xi endlaka, ndzi titwe ndzi nga pfuni nchumu. Hambiloko ku hundze tin’hweti a lovile, a ndzi n’wi tsundzuka naswona sweswo a swi ndzi hlomula mbilu, a swi fana ni mukwana lowu ndzi tlhavaka embilwini. Mikarhi yin’wana a swi ndzi hlundzukisa. Hikwalaho ka yini a file? Kutani ndzi titwe nandzu hikwalaho ka leswi ndzi nga hetangiki nkarhi wo tala ndzi ri na yena loko a ha hanya.”—Vanessa, wa le Australia.

LOKO u feriwile, u nga ha va u titwe hi tindlela to hambanahambana: u nga ha va ni mabibi ya mbilu, xivundza ni ku titwa u nga pfuni nchumu. Kumbe u nga ha va u hlundzukile, u titwa nandzu ni ku khomiwa hi rhumbyana. U nga ha va u tivutisile leswaku kasi ndzi hanyela yini!

Tiyiseka leswaku a swi bihanga ku khomiwa hi gome hambiloko swo ku tekela nkarhi wo leha leswaku u hlakarhela. Ku titwa hi ndlela yoleyo i xikombiso xa leswaku a wu n’wi rhandza. Hambiswiritano, xana swi kona leswi nga ku pfunaka leswaku u hlula gome?

LESWI PFUNEKE VAN’WANA LESWAKU VA TIYISELA

Loko u vona onge gome leri u nga na rona a ri nge heli, u nga ha chaveleleka loko wo tirhisa swiringanyeto leswi landzelaka:

TINYIKE NKARHI WO HLAKARHELA

Vanhu va langutana ni gome hi tindlela to hambanahambana naswona va nge hlakarheli hi nkarhi wun’we. Ku rila swi nga ku pfuna leswaku u hunguta mabibi ya mbilu. Vanessa, loyi a tshahiweke eku sunguleni, u ri: “A ndzi rila leswaku ku vava loku ndzi ku twaka ku hunguteka.” Sofia, loyi a ha ku loveriwaka hi sesi, u ri: “Swa vava ku ehleketa hi leswi nga endleka, swi fana ni ku hlantswa xilondza. Ku vava ka kona ku dyisa mbitsi, kambe ku endla leswaku xilondza xolexo xi hola.”

PHOFULA NDLELA LEYI U TITWAKA HA YONA

Swa twisiseka leswaku mikarhi yin’wana u nga ha lava ku va wexe kambe gome a hi matlangwana, u nge ri hluli u ri wexe. Jared, loyi a nga ni malembe ya 17, loyi a feriweke hi tatana, u ri: “A ndzi celelanga mhaka ehansi, ndzi phofulele van’wana ndlela leyi ndzi titwaka ha yona. Hambileswi a ndzi vona onge leswi a ndzi swi vula a swo fana ni ku ba ndlopfu hi xibakele, kambe ku tiphofula swi ndzi pfunile.” Janice, loyi ku vulavuriweke ha yena eka xihloko xo sungula, u hlamusela ndlela leyi ku tiphofula swi n’wi pfuneke ha yona, u ri: “Ku va ndzi tiphofurile a swi vanga nyuku wa mbyana, swi ndzi chavelerile. Ndzi xiye leswaku vanhu van’wana va yi twisisa ndlela leyi ndzi titwaka ha yona naswona a ndzi nga ri na xivundza.”

AMUKELA LOKO VA KU PFUNA

Dokodela un’wana, u ri: “Loko munhu la feriweke a pfumela leswaku vanghana ni maxaka ya yena va n’wi pfuna, swi ta n’wi olovela ku tiyisela gome leri a nga na rona.” U nga feli ndzeni, byela vanghana va wena leswi va nga swi endlaka ku va va ku pfuna, swi nga endleka va swi lava ku ku pfuna kambe va nga swi tivi leswaku u lava ku pfuniwa hi yini.—Swivuriso 17:17.

TSHINELA EKA XIKWEMBU

Tina, u ri: “Loko nuna wa mina a lova hikwalaho ka vuvabyi bya khensa, a ndzi nga ha ta kota ku tiphofula eka yena kutani a ndzi byela Xikwembu hinkwaswo! Siku ni siku a ndzi xi kombela leswaku xi ndzi pfuna ndzi kota ku tiyisela. Ndlela leyi xi ndzi pfuneke ha yona a yi hlamuseleki.” Tarsha, loyi a ri ni malembe ya 22 loko mana wakwe a lova, u ri: “Ku dyondza Bibele siku ni siku swi ndzi chavelerile, swi ndzi pfune ku anakanya hi swilo leswinene.”

VONA KU PFUXIWA KA VAFI HI MAHLO YA MIANAKANYO

Tina, u ya emahlweni a ku: “Eku sunguleni timhaka ta ku pfuxiwa ka vafi a ti nga ndzi tovi helo hikuva a ndzi lava nuna wa mina ni majaha ya mina a va lava tata wa vona hi nkarhi wolowo. Endzhaku ka malembe ya mune, ndzi sungule ku tshemba leswaku vafi va ta pfuxiwa. Ku va ndzi twisise mhaka leyi swi endle leswaku ndzi kota ku tiyisela. Loko ndzi anakanya hi ku tlhela ndzi vona nuna wa mina swi ndzi nyika ku rhula ni ntsako!”

Swi nga ha ku tekela nkarhi ku hlakarhela. Ntokoto wa Vanessa wu nga ku chavelela. U ri: “U nga ha anakanya leswaku a wu nge ri hluli gome kambe hi ku famba ka nkarhi u ta ya u hlakarhela.”

Tsundzuka leswaku hambiloko mabibi ya mbilu ma nga suki, vutomi i bya nkoka. Xikwembu xi nga ku pfuna leswaku u tiphina hi ku va ni vanghana lavanene ni ku hanya vutomi lebyi nga ni xikongomelo. Ku nga ri khale Xikwembu xi ta pfuxa lava feke. Xi lava leswaku u tlhela u vona varhandziwa va wena. Hi nkarhi wolowo mabibi ya mbilu ma ta va ma lo nkwee!

Tindzimana Ta Bibele Leti Nga Ku Pfunaka

Xikwembu xa khathala hi wena.

Mutsari un’wana wa Bibele u byele Xikwembu a ku: “Chela mihloti ya mina eguleni ra wena ra dzovo. Xana a yi kona ebukwini ya wena?”—Pisalema 56:8.

Phofulela Xikwembu ndlela leyi u titwaka ha yona.

“Ndzi hambete ndzi phofula mhaka leyi ndzi karhataka emahlweni ka [Xikwembu] . . . Ndzi kombele mpfuno eka wena, Wena Yehovhaa.”—Pisalema 142:2, 5.

U ta va ni ntshembo.

“Ku ta va ni ku pfuxiwa.”—Mintirho 24:15.

Xikwembu xi tshembisa leswaku xi ta pfuxa vanhu va timiliyoni lava feke naswona xi tiyimisele ku endla tano.b—Yobo 14:14, 15.

a Yehovha i vito ra Xikwembu hilaha ri kombisiweke hakona eBibeleni.

b Leswaku u kuma rungula leri engetelekeke malunghana ni ku pfuxiwa ka vafi, vona ndzima 7 ya buku leyi nge, I Yini Leswi Hi Nga Swi Dyondzaka eBibeleni? leyi kandziyisiweke hi Timbhoni ta Yehovha naswona ya kumeka eka website ya www.jw.org/ts.