Loko Nkataku A Nga Tshembeki

“A ndzi twa onge misava yi ngo ndzi mita kunene loko nuna wa mina a ndzi byela leswaku u lava ku ya tshama ni wansati laha riki muntshwa. Swi ndzi twise ku vava, ngopfungopfu loko ndzi tsundzuka leswaku ndzi titsone swo tala hikwalaho ka yena.”—Maria, Spain.

“Loko nsati wa mina a ndzi tshika a ndzi twa onge ndzi tlhaviwe hi mukwana. Tipakani ta hina, milorho ya hina ni leswi a hi swi kunguhatile swi xaxile. Mikarhi yin’wana a ndzi twa onge a swa ha ndzi vilerisi kambe loko ndzi ku swi khumbu, a ndzi titwa ndzi tshikilelekile.”—Bill, Spain.

EVUKATINI loko vanhu va nga tshembeki swi twisa ku vava. Mikarhi yin’wana van’wana va nga ha n’wi rivalela munghana wa vukati loko a cinca kutani va tikarhatela ku lunghisa vukati bya vona.a Ku nga khathariseki leswaku vukati bya vona bya humelela kumbe a byi humeleli, loyi a nga riki na nandzu u sala ni xilondza lexikulu. Xana lava twisiweke ku vava va nga xi tiyisela njhani xiyimo xexo?

TINDZIMANA TA BIBELE LETI NGA KU PFUNAKA

Ku nga khathariseki ku vava loku va ku tweke, vatekani lava va tshameke va tshembekile va chaveleleka loko va hlaya Matsalwa. Va dyondze leswaku Xikwembu xa ku vona ku vava loku va ku twaka naswona xi va twela vusiwana.—Malakiya 2:13-16.

“Loko miehleketo ya mina leyi ndzi karhataka yi tele endzeni ka mina, nchavelelo wa wena wu sungule ku vukarha moya-xiviri wa mina.”—Pisalema 94:19.

Bill, u ri: “Loko ndzi ri karhi ndzi hlaya ndzimana leyi, a ndzi twa onge Yehovha wa ndzi vukarha, ku fana ni tatana la nga ni rirhandzu.”

“U ta n’wi endla hi vutshembeki loyi a tshembekeke.”—Pisalema 18:25.

Carmen, loyi nuna wa yena a nga tshembeki ku ringana tin’hweti to tala, u ri: “Nuna wa mina a ndzi jolela, kambe ndzi tshame ndzi tshembele eka Yehovha hikuva a nge pfuki a ndzi khomise tingana.”

“Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina.”—Vafilipiya 4:6, 7.

Sasha, u ri: “Ndzi hlaya ndzimana leyi hi ku phindhaphindha. Loko ndzi phikelela exikhongelweni Xikwembu xi ndzi nyika ku rhula.”

Hinkwavo lava boxiweke exihlokweni lexi va tshame va twa onge va nga lahla thawula. Kambe va titshege hi Yehovha Xikwembu naswona va kume matimba eRitweni rakwe. Bill, u te: “Ripfumelo ri ndzi pfune ndzi vona nkoka wo hanya hambileswi swilo a swi ndzi fambela ximatsi. Hambileswi ndzi fambeke nkarhi wo leha ‘enkoveni wa ndzhuti lowukulu,’ Xikwembu a xi ri na mina.”—Pisalema 23:4.

a Loko u lava ku tiva loko swi fanerile ku rivalela munghana wa wena wa vukati kumbe u nga n’wi rivaleli, vona nhlokomhaka ya Xalamuka! ya May 8, 1999, leyi nge, “Loko Nkataku A Nga Tshembeki.”

Ndlela Leyi Van’wana Va Hluleke Ha Yona

Anakanyisisa hi matsalwa lama nga ku chavelelaka.

Bill, u ri: “Ndzi hlaya buku ya Yobo ni ya Tipisalema, ndzi ri karhi ndzi khwatihata matsalwa lama fambisanaka ni xiyimo xa mina. Ndzi xiye leswaku vatsari va Bibele va tshame va twa ku vava va tlhela va vilela ku fana na mina.”

Tiphyuphyise hi vunanga.

Carmen, u ri: “Loko vurhongo byi nga phahi ni vusiku, a ndzi yingisela vuyimbeleri. A swi ndzi chavelela swinene.” Daniel, u ri: “Ndzi dyondze ku chaya katara naswona a swi ndzi chavelela, swi ndzi endla ndzi titwa ndzi phyuphyile.”

Tiphofule.

Daniel, u ri: “A ndzi nga swi rhandzi ku tiphofula kambe ndzi ni vanghana lava ndzi khutazaka naswona a ndzi va byela ndlela leyi ndzi titwaka ha yona siku ni siku. Ndzi phofule ndlela leyi ndzi titwaka ha yona hi ku tsala kumbe hi ku burisana na vona. Sweswo swi ndzi pfunile hakunene.” Sasha, u ri: “Ndlela leyi va le kaya va ndzi seketeleke ha yona yi ndzi pfunile. Mama a ndzi seketela mikarhi hinkwayo. A ti nyika nkarhi wo ndzi yingisela loko ndzi tiphofula. Papa na yena a endla ndzi titwa ndzi sirhelelekile naswona u ndzi pfune leswaku ndzi hatla ndzi hlakarhela.”

Khongela nkarhi na nkarhi.

Carmen, u ri: “Ndzi khongele hi ku phindhaphindha. Ndzi titwe ndzi ri ekusuhi ni Xikwembu, xi ndzi yingisela ni ku ndzi pfuna. Hambileswi hi nkarhi wolowo a ndzi koka exilogweni, ndzi tshinele eka Xikwembu.”