“Ndzi Hlayisile Ku Pfumela”

HI KU VULA KA VANGHANA VA BRUNELLA INCONDITI

“MUGQIVELA a ri ri siku leri nonokaka ni ra xivundza lexikulu. A ndzo va ndzexe ekamareni, ndzi ri ni gome. A swi languteka onge ndzi famba ephacisini. Hinkwaswo a swi famba kahle, kutani hi xitshuketa, un’wana u pfale rivanti emahlweni ka mina, naswona a ndzi nga swi koti ku huma, hambi leswi ndzi ringeteke hi matimba.”

Brunella Inconditi wa malembe ya 15 hi vukhale a a hele matimba swinene. Siku ra nkoka swinene evuntshweni byakwe a ri ri karhi ri hundza. Eku sunguleni ka lembe rero, rirhandzu rakwe leri kulaka hi Yehovha ni Bibele ri n’wi susumetele ku nyiketela vutomi byakwe eka yena. Hi July 1990 a a fanele ku khuvuriwa eNtsombanweni wa Muganga wa “Ririmi Leri Tengeke” wa Timbhoni ta Yehovha eMontreal, le Canada. Kambe, ku nga ri kungani Brunella a a ta langutana ni ndzingo wa ripfumelo rakwe lowu a wu ta heta vutomi bya yena hinkwabyo.

Masiku mambirhi a nga si kombisa ku tinyiketela kakwe hi nkhuvulo wa mati, Brunella u kume leswaku a a ri ni khensa ya tisele ta ngati. Madokodela ya le xibedlhele xa vana xa kwalaho ma lave ku sungula ku n’wi tshungula hi xihatla, hikwalaho Brunella u sale exibedlhele.

Marito Ya Yena N’wini Ma Hlamarisa Madokodela

Brunella a a swi tiva leswaku ngati yi kwetsimile eka Yehovha Xikwembu. (Levhitika 17:11) Vatswari vakwe, Edmondo na Nicoletta, va lerise leswaku mpompelo wa ngati a wu fanelanga wu tirhisiwa eku tshunguleni ka n’wana wa vona. Tata wakwe wa tsundzuka: “Brunella a a lava leswaku madokodela ma twa hi yena n’wini, hambi leswi a a ha ri n’wana. Hi xivindzi u va byele leswaku a nga ma lavi matshungulelo lama a ma ta lwisana ni xileriso xa Bibele xo ‘papalata ngati.’”—Mintirho 15:20.

Hi July 10, 1990, madokodela manharhu ni mukondleteri va hlangane ni vatswari va Brunella ni vatirheli vambirhi va le vandlheni ra kwalaho ra Timbhoni ta Yehovha. Minkambelo yi kombise leswaku Brunella a a ri ni khensa ya tisele ta ngati. Madokodela ma hlamusele kungu ra wona ro lwisana ni vuvabyi lebyi. Va hlamusele hi vukheta leswaku a swi ta nonon’hwa swinene ku byi tshungula. Nkulu un’wana wa le vandlheni wa tsundzuka: “Mahanyelo ya Brunella ni ku tiyimisela ku yingisa Xikwembu ma hlamarise madokodela ni mukondleteri. Va nyanyuriwe hi rirhandzu ra vatswari vakwe ni nseketelo wa vanghana va le vandlheni ra Vukreste. Va tlhele va tlangela ndlela leyi hi twisiseke ni ku xixima xikhundlha xa vona ha yona.”

Madokodela ma kunguhate ku papalata mpompelo wa ngati. Brunella a a ta kuma vutshunguri lebyikulu bya tikhemikhali, kambe a byi ta tika ku tlula lebyi tolovelekeke. Leswi a swi ta hunguta ku onhaka ka tisele takwe ta ngati loku a ku ta vangiwa hi vutshunguri lebyi. Nicoletta wa hlamusela: “Madokodela ma xixime swilaveko swa Brunella swa miri, swa mintlhaveko ni swa moya. Loko hi va kombele ku vonana ni dokodela la nga ni ntokoto mayelana ni vutshunguri bya tisele ta ngati ta xihlangi lebyi nga riki na ngati, va pfumerile.” Brunella u endle vunghana lebyikulu ni vatirhi va le xibedlhele.

Tipakani Ta Moya

Hambi leswi matshungulelo layo sungula ma veke ni mihandzu leyinene, ndzingo wa Brunella a wo ho sungula. Hi November 1990 vuvabyi byakwe a byi antswa, kutani handle ko hlwela u khuvuriwile. Loko a anakanya hi tin’hweti ti nga ri tingani leti hundzeke, Brunella u te: “A swi nga olovi nikatsongo. U lava matimba lamakulu, naswona u fanele ku ehleketa hi ndlela leyinene. . . . Ripfumelo ra mina ri ringiwile, kambe ndzi tshame ndzi tiyile, naswona ndza ha kunguhata ku va ni ntirho-vutomi wo tirha tanihi phayona ra nkarhi hinkwawo [mutirheli wa nkarhi hinkwawo].”

Eku sunguleni ka 1991, vuvabyi bya Brunella a byi tinyike matimba. U lave ku fa loko a ri karhi a endliwa vutshunguri bya tikhemikhali, kambe lexi hlamariseke un’wana ni un’wana ni ku n’wi tsakisa hi leswi a hlakarheleke. Hi August a titwa kahle lerova a heta n’hweti leyi hinkwayo evutirhelini bya le rivaleni tanihi phayona ra nkarhinyana. Vuvabyi byakwe byi tlhele byi vuya nakambe, naswona hi November 1991, miri wakwe a wu ri ni khensa etindhawini to hlayanyana. Xipano xin’wana xa madokodela exibedlhele xin’wana xi sungule ku n’wi tshungula hi ku tirhisa miseve yo hisa.

Hambi a ri ehansi ka swiyimo swo tano swo nonon’hwa, Brunella u tshame a tiyile ni ku tivekela tipakani ta moya. Loko a byeriwa hi ta vuvabyi byakwe bya khensa ya tisele ta ngati ro sungula u tivisiwe leswaku a nga hanya tin’hweti ta tsevu ntsena. Sweswi, kwalomu ka lembe ni hafu endzhaku, Brunella a a ha tivekela tipakani ta nkarhi lowu taka. Nkulu wa vandlha u ri: “A nga hetanga nkarhi hi ku lwela ku fikelela tipakani takwe. Ripfumelo ra Brunella eka Paradeyisi leyi tshembisiweke hi Xikwembu ri n’wi tiyise endzingweni wakwe hinkwawo. U vile Mukreste la vupfeke hambi leswi a ri ntsongo hi malembe. Mahanyelo ni langutelo rakwe swi khutaze vandlha ni ku khumba timbilu ta lava a va n’wi tiva, ku katsa ni vatirhi va le xibedlhele.” Mana wakwe wa tsundzuka: “A a nga tshameli ku vilela. Loko un’wana a n’wi vutisa leswaku u titwa njhani, a a hlamula a ku, ‘Ndzi pfukile,’ kumbe a ku ‘Ku hava xo karhata, ndzi ngo vutisa wena?’”

Vumundzuku Lebyi Tiyeke

Brunella a a kunguhate ku va kona eNtsombanweni wa Muganga wa “Vabyarhi va ku Vonakala” wa Timbhoni ta Yehovha hi July 1992. Hambi swi ri tano, hi nkarhi wa ntsombano, Brunella a a ri exibedlhele, naswona vutomi byakwe a byi nga ha tshembisi. Hambi swi ri tano, u ye entsombanweni a ri exitulwini xa swigulana hi ku navela ku vona drama leyi nge: Ku Endla Leswi Lulameke eMahlweni Ka Yehovha.

U tlhelele ekaya emasikwini ma nga ri mangani yo hetelela ya vutomi byakwe. Nicoletta u ri: “Ku fikela eku heteleleni, a a khumbeka swinene hi van’wana ku tlula yena n’wini. A a va khutaza ku dyondza Bibele, a ku ka vona, ‘Hi ta va swin’we eParadeyisini.’”

Brunella u fe hi July 27, 1992, a ri ni ntshembo lowu tiyeke wa ku pfuxiwa ka vafi va tlhelela evuton’wini eParadeyisini emisaveni. A a ha ku sungula ku landzelela tipakani takwe, kambe u kunguhate ku ya emahlweni ni ndlela yakwe endzhaku ka ku pfuxiwa kakwe eku feni. Masiku ma nga ri mangani ntsena a nga si fa, Brunella u tsale papila leri landzelaka, leri nga hlayiwa enkosini wa yena.

“Eka Vanakulorhi:

“Ndza khensa ku ta ka n’wina. Vukona bya n’wina byi vula swo tala eka vandyangu wa ka hina.

“Eka vanhu lava a hi ri vanghana lavakulu—hi vile swin’we nkarhi wo tala. Hi vile ni minkarhi yo tala leyo biha, kambe ni leyinene a yi ri kona. A ku ri nyimpi leyi tekeke nkarhi, yo nonon’hwa, kambe a ndzi titwi ndzi hluriwile. Hi laha Matsalwa ma vulaka ha kona, ‘Ndzi lwile nyimpi leyinene, ndzi hetile mpfhuka wa mina wa ku tsutsuma, ndzi hlayisile ku pfumela.’—2 Timotiya 4:7.

“Ndzi tlhele ndzi dyondza swo tala, ndzi kule swinene, naswona vanghana va mina ni lava a va ri kusuhi na mina va vone ku cinca. Ndzi rhandza ku nkhensa vanhu hinkwavo lava ndzi seketeleke.

“Loyi a pfumelaka emafambiselweni lamantshwa, ni le ka Yehovha, wa swi tiva leswaku ku ta va ni ku pfuxiwa ka vafi, hi laha Yohane 5:28, 29 yi vulaka ha kona. Hikwalaho tshamani mi tiyile entiyisweni, kutani hi ta tlhela hi vonana nakambe.

“Ndzi rhandza ku nkhensa vanhu lava tivaka leswi ndzi humeleleke. Hinkwenu ka n’wina ndza mi vukarha ni ku mi ntswontswa. Ndza mi rhandza hinkwenu.”

Brunella a nga pfumelelanga vuntshwa kumbe vuvabyi byakwe byi hlwerisa ku tinyiketela kakwe eka Xikwembu. Xikombiso xakwe xa ripfumelo kumbe ku tinyiketela xi khutaza lavantshwa ni lavakulu hi ku fanana leswaku va nga pfumeleli nchumu wu va sivela ku tsutsuma mphikizano wa vutomi.—Vaheveru 12:1.