Bibele—I Buku Leyi Nga Ni Vuprofeta Lebyi Pakanisaka—Xiyenge 7

XANA swa ku hlundzukisa swinene loko tihulumendhe leti nga ni vukanganyisi ti tshikilela ni ku dyelela vaaka-tiko? Xana swa ku karhata loko u vona khampani leyikulu yi dyelela swisiwana leswaku yi fuwisa swigwili? Xana swa ku hlundzukisa ku vona vafundhisi va dyela valandzeri va vona mali kumbe va va dyondzisa tidyondzo ta mavunwa? Loko swi ri tano, swi nga ha ku tsakisa ku tiva leswaku Bibele na yona ya swi sola swiendlo sweswo swo biha. Xihloko lexi xi ta kambisisa (1) vuprofeta bya Bibele lebyi profeteke hi ta ku herisiwa ka vubihi hinkwabyo ni vanhu vo homboloka ni (2) leswaku ha yini hi fanele hi byi tshemba hi ku helela vuprofeta lebyi.

Ku Herisiwa Ka Vuhomboloki

Xihloko lexi hundzeke xa nxaxamelo lowu xi tlhuvutse swiyenge swa xikombiso lexi Yesu a vulavuleke ha xona, lexi kombisaka leswaku makumu ya mafambiselo lawa ya swilo ma tshinele. Xikombiso xexo xi katsa ku chumayeriwa ka mahungu lamanene ya Mfumo wa Xikwembu emisaveni hinkwayo, ku nga hulumendhe ya Xikwembu leyi nga ta fuma misava hinkwayo ku nga ri khale. (Daniyele 2:44; Matewu 24:3, 14) Yesu u vule leswaku loko ntirho wolowo wo chumayela wu hetiwa, ‘makumu ma ta fika.’ Swi nga ha ku hlamarisa ku tiva leswaku nchumu wo sungula lowu Xikwembu xi nga ta wu herisa i vukhongeri bya mavunwa, lebyi dyondzisaka mavunwa malunghana na xona. EBibeleni, vukhongeri bya mavunwa byi fanekiseriwa hi nghwavava leyi vuriwaka “Babilona Lonkulu.”—Nhlavutelo 17:1, 5; hlaya bokisi leri nge “Ku Hlamuseriwa Ka Babilona Lonkulu,” eka tluka 13.

Vuprofeta byo sungula:

‘Makhombo ya Babilona Lonkulu ma ta n’wi fikela, rifu ni ku kolola ni ndlala, naswona u ta hisiwa hi ndzilo a hela, hikuva Yehovha Xikwembu, la n’wi avanyiseke, u ni matimba.’—Nhlavutelo 18:2, 8.

Ku hetiseka ka byona: Bibele yi kombisa leswaku hi nkarhi wa Xikwembu lowu xi wu vekeke, xi ta susumetela vafumi va tipolitiki va misava leswaku va hlasela Babilona Lonkulu ivi va n’wi lovisa. Va ta n’wi “hlakata ni ku [n’wi] swerisa” naswona va ta “dya tinyama ta [yena].” (Nhlavutelo 17:16) Hi marito man’wana, va ta paluxa swiendlo swakwe leswi khomisaka tingana ni ku phanga rifuwo rakwe ro tala. U ta lovisiwa hi xihatla ni hi ku helela lerova ku hava masalela yakwe lama nga ta sala.—Nhlavutelo 18:21.

Vafumi va tipolitiki va nga ha ehleketa leswaku leswi va swi endleke swi huma emianakanyweni ya vona. Hambiswiritano, ku hetiseka ka vuprofeta lebyi byo hlamarisa ku ta tiyisekisa leswaku ku lovisiwa ka Babilona entiyisweni a ku huma eka Xikwembu. Xi ta va xi ‘swi nghenise etimbilwini ta vona leswaku va endla miehleketo ya xona.’—Nhlavutelo 17:17.

Vuprofeta bya vumbirhi:

“Emasikwini ya tihosi teto Xikwembu xa le tilweni xi ta veka mfumo. . . . Wu ta pfotlosa kutani wu herisa mimfumo leyin’wana hinkwayo [ya vanhu], kambe wona wu ta tshama hilaha ku nga riki na makumu.”—Daniyele 2:44.

Ku hetiseka ka byona: Endzhaku ka loko Xikwembu xi lovise vukhongeri bya mavunwa, xi ta lovisa minhlangano yin’wana, ku nga minhlangano ya tipolitiki, ya mabindzu swin’we ni vanhu vo homboloka. (Swivuriso 2:22; Nhlavutelo 19:17, 18) Ku fana ni n’wini wa yindlu loyi a hlongolaka vanhu lava hirheke endlwini yakwe hileswi va onhaka nhundzu yakwe, Xikwembu xi ta “lovisa lava onhaka misava.” Xi ta lovisa lava vangaka madzolonga swin’we ni lava va endlaka swiendlo leswi nyumisaka swa rimbewu.—Nhlavutelo 11:18; Varhoma 1:18, 26-29.

I vamani lava nga ta pona? Bibele yi ri: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11; 72:7.

Xana hi nga byi tshemba vuprofeta bya Bibele? Xana hi nga swi tshemba leswaku Xikwembu xi ta herisa vubihi ni maxangu ivi xi ponisa vanhu vo lulama? Ina!

Vuprofeta Bya Bibele Bya Tshembeka

Timbhoni ta Yehovha ti pfumela leswaku Yehovha Xikwembu i Mutsari wa Bibele nileswaku hinkwaswo leswi a swi tshembiseke u ta swi hetisisa. (2 Timotiya 3:16) Xana swa twala ku tshemba mhaka leyi?

Loko a wu ri ni munghana loyi ku nga khale mi ri vanghana loyi a ku rhandzaka swinene naswona a nga si tshamaka a ku hembela, xana a wu ta n’wi tshemba loko o ku tshembisa ku ku endlela nchumu wo karhi lowunene naswona leswi a ku tshembisaka swona swi ri ematimbeni yakwe? A swi kanakanisi leswaku a wu ta n’wi tshemba. Xikwembu xa tshembeka swinene ku tlula munghana wihi ni wihi loyi hi nga ha vaka na yena. “Xikwembu a xi hembi!”—Tito 1:2, Bibele ya Contemporary English Version.

Hakunene Muvumbi u ta byi herisa vukhongeri bya mavunwa, tihulumendhe leti tshikilelaka ni fambiselo ra misava ra mabindzu leri sekeriweke eka makwanga. Xana u nga swi tsakela ku tiva leswi engetelekeke malunghana ni leswi nga ta endleka endzhaku ka loko ku humelele swiendlakalo sweswo? Nkandziyiso lowu landzelaka wa Xalamuka! wu ta ku pfuna. Wu ta va ni xihloko xo hetelela xa nxaxamelo lowu.