Leswi Ku Humelela Ka Xiviri Swi Vulaka Swona

A KU na nchumu lowu vavaka ku fana ni ku tsandzeka. Ku humelela loku nga riki ka xiviri. Loko wo tshuka u tsandzeka ku endla swilo swo karhi, u nga teka magoza yo karhi leswaku u lulamisa xiyimo. U ta dyondza eka swihoxo swa wena kutani u tiyimisela ku endla kahle enkarhini lowutaka.

Ku humelela loku nga riki ka xiviri ku nga ku pfala mahlo. U nga ha tibyela leswaku swilo swi famba kahle kasi entiyisweni a swi le ku fambeni. Kambe loko u ta sungula ku xiya leswaku swilo a swi le ku fambeni kahle, ku ta va ku nga ha ri na nkarhi wo swi lulamisa.

Xiya xikombiso lexi landzelaka. Yesu Kreste u tshame a vutisa a ku: “Swi ta n’wi pfuna yini munhu loko a pindzula misava hinkwayo kambe a lahlekeriwa hi moya-xiviri wakwe?” (Matewu 16:26) Xivutiso lexi xi khumba vanhu lava hlongorisaka rifuwo, ku nga xikombiso lexinene xa ku humelela loku nga riki ka xiviri. Mutsundzuxi wa vanhu loko swi ta etimhakeni ta ntirho, Tom Denham u tsale a ku: “Ku ehleketa ntsena hi ku kuma xikhundlha xa le henhla, ku kuma mali yo tala kumbe ku kuma swilo swo tala, a swi endli lewaku munhu a eneriseka. Ku vula leswaku u humelerile hikwalaho ka mali leyi u nga na yona a hi vutlhari naswona hi ku famba ka nkarhi u ta titwa u nga enerisekanga.”

Vanhu vo tala namuntlha va nga pfumela leswaku marito lawa i ntiyiso. Eka ndzavisiso wun’wana lowu endliweke eUnited States, “ku va ni mali yo tala” ku ve exiyin’weni xa vu-20, eka 22 wa “swilo leswi endlaka munhu a vula leswaku u humelerile evuton’wini.” Swin’wana swa swilo leswi nga exiyin’weni xo sungula, a ku ri ku va ni rihanyo lerinene, ku va ni vuxaka lebyinene ni vanhu van’wana swin’we ni ku tirha ntirho lowu u wu rhandzaka.

Handle ko kanakana, vanhu vo tala loko va vutisiwa va nga swi kota ku hambanisa exikarhi ka ku humelela ka xiviri ni ku humelela loku nga riki ka xiviri. Kambe a swi olovi ku endla xiboho lexi kombisaka langutelo lerinene malunghana ni ku humelela.