Mesiya

Xana vanhu a va ta n’wi tivisa ku yini Mesiya?

Hi ku ya hi vuprofeta bya Bibele, Mesiya kumbe Kreste a a ta endla mintirho yimbirhi, leyi a a ta yi endla hi minkarhi leyi hambaneke ni leyi leheke.a Ntirho wakwe wo sungula, a a ta va munhu wa nyama. Leswaku vanhu va ta kota ku n’wi tiva hi ku olova, vatsari va Bibele va profete swilo swo tala leswi a a ta swi endla ni vutirheli byakwe. Entiyisweni, ‘vumbhoni malunghana na Yesu’ hi byona lebyi ku vulavuriwaka ha byona swinene eka vuprofeta bya le Bibeleni.—Nhlavutelo 19:10.

LESWI BIBELE YI SWI VULAKA

Mesiya a a ta . . .

• Va ntukulu wa Hosi Davhida.—Esaya 9:7; Luka 3:23-31.b

• Velekiwa emutini wa Betlehema.—Mikiya 5:2; Luka 2:4-7

• Va muchumayeri loyi a titsongahataka wa “mahungu lamanene.”—Esaya 61:1; Luka 4:43.

• Vengiwa ni ku khomiwa handle ka nandzu.—Esaya 53:3; Matewu 26:67, 68.

• Xengiwa hi swiphemu swa silivhere swa 30.—Zakariya 11:12, 13; Matewu 26:14, 15.

• Miyela emahlweni ka vahehli vakwe loko va ri karhi va n’wi gwevela rifu.—Esaya 53:6, 7; Matewu 27:12-14.

• Va gandzelo ra “xinyimpfana,” lexi a xi ta susa xidyoho ni ku endla leswaku vanhu va va lava baseke emahlweni ka Xikwembu.—Esaya 53:7; Yohane 1:29, 34, 36.

• Dlayiwa handle ko va ku tshoviwa ni rin’we ra marhambu yakwe.—Pisalema 34:20; Yohane 19:33, 36.

• Lahliwa ni vanhu lava fuweke.—Esaya 53:9; Matewu 27:57-60.

• Pfuxiwa hi siku ra vunharhu.—Matewu 16:21; 28:5-7.

Yesu u byi hetisise hinkwabyo vuprofeta byebyo swin’we ni byin’wana byo tala. Nakambe u horise lava vabyaka ni ku pfuxa lava feke. A nga nyikelanga vumbhoni bya leswaku hi yena Mesiya ntsena kambe u tlhele a endla leswaku ripfumelo ra hina ri va leri tiyeke eka switshembiso swa le Bibeleni leswi a nga ta swi hetisisa hi ndlela leyikulu enkarhini lowu taka. (Luka 7:21-23; Nhlavutelo 21:3, 4) Endzhaku ka ku pfuxiwa kakwe, Yesu u tshame ‘evokweni ra xinene’ ra Xikwembu, a rindzela nkarhi lowu a nga ta hetisisa ntirho wakwe tanihi Mesiya.—Pisalema 110:1-6.

“Loko Kreste a fika, a nge endli masingita yo tala ku tlula leswi endliweke hi munhu loyi, a hi swona ke?”—Yohane 7:31.

Xana Mesiya u ta wu hetisisa njhani ntirho wakwe?

Vayuda va le nkarhini wa Yesu a va rindzele Mesiya leswaku a va tshunxa emfun’weni wa Varhoma kutani a fuma emfun’weni lowu vuyeteriweke wa Israyele. (Mintirho 1:6) Valandzeri va Yesu va Vayuda va swi twisise hi ku famba ka nkarhi leswaku a a ta hetisisa ntirho wakwe a ri etilweni tanihi xivumbiwa xa moya lexi nga ni matimba lexi nyikiweke vulawuri lebyikulu.—Matewu 28:18.

LESWI BIBELE YI SWI VULAKA

Eka ntirho wakwe wa vumbirhi, Mesiya u ta . . .

• Fuma tanihi Hosi ya Mfumo wa Xikwembu, ku nga hulumendhe ya misava hinkwayo.—Daniyele 7:13, 14; Nhlavutelo 11:15.

• Katekisa vanhu hinkwavo lava kombisaka ripfumelo eka yena.—Genesa 22:17, 18; Pisalema 72:7, 8.

• “Chavisa matiko yo tala” ni vafumi va wona loko a va lovisa hikwalaho ka leswi va n’wi kanetaka.—Esaya 52:15; Nhlavutelo 19:19, 20.

• Ponisa “ntshungu lowukulu” wa vanhu vo lulama lowu humaka ematikweni yo hambanahambana kutani wu nghena emisaveni leyintshwa yo rhula.—Nhlavutelo 7:9, 10, 13-17.

• Tirha na Yehovha Xikwembu ku pfuxa vanhu lava feke leswaku va hanya eParadeyisini laha misaveni.—Luka 23:43; Yohane 5:21, 28, 29.

• Dyondzisa vanhu lava fumiwaka hi yena hi tindlela ta ku rhula ka ntiyiso.—Esaya 11:1, 2, 9, 10.

• Herisa xidyoho, ku nga xona lexi vangaka vuvabyi ni rifu.—Yohane 1:29; Varhoma 5:12.

• Herisa mintirho hinkwayo ya Sathana kutani a endla leswaku vanhu va va ni vun’we loko va fumiwa hi Yehovha Xikwembu.—1 Vakorinto 15:25-28; 1 Yohane 3:8.

Yesu u hetisise ntirho wakwe wo sungula tanihi Mesiya. Nakambe u ta hetisisa ntirho wakwe wa vumbirhi. Hikokwalaho, lavo tlhariha va dyondza eka yena, hikuva Yesu u te: “Hi mina ndlela ni ntiyiso ni vutomi.”—Yohane 14:6.

“Emasikwini ya yona lowo lulama u ta hluka, ni ku rhula ku ta andza ku fikela n’weti wu nga ha vi kona. Yi ta fuma . . . ku ya emakumu ka misava.”—Pisalema 72:7, 8.