Ndlela Yo Kombela Ku Rivaleriwa

NTLHONTLHO

Wena ni nkataku a mi ri ku holoveni. Kutani u tibyela u ku: ‘A ndzi nge kombeli ku rivaleriwa. A hi mina ndzi nga sungula mhaka leyi!’

Hambileswi u swi tshikeke swi hundza, ma ha tshwukiselana mahlo. U anakanya hi ku kombela ndzivalelo, kambe swa ku tikela ku vula leswaku, “ndzi rivalele.”

LESWI ENDLAKA SWI TIKA

Ku titlakusa. Wanuna loyi a vuriwaka Charlesa u ri: “Minkarhi yin’wana swa tika ku vula leswaku, ‘ndzi rivalele’ hikuva u twa onge sweswo swi ta ku chicha xiyimo.” Ku titlakusa swi nga ku endla leswaku u nga xi voni xihoxo xa wena.

Ndlela leyi u swi tekaka ha yona. U nga tibyela leswaku loyi a faneleke a kombela ku rivaleriwa hi loyi a nga endla xihoxo. Wansati loyi a vuriwaka Jill u ri: “Loko ndzi swi tiva leswaku hi mina ndzi nga endla xihoxo, swa ndzi olovela ku vula leswaku ‘ndzi rivalele.’ Kambe loko havumbirhi bya hina hi vulavule hi ndlela leyi nga riki yinene, swa ndzi tikela. Ndzi tibyela leswaku, a ndzi nge kombeli ndzivalelo hikuva hinkwerhu hi endle xihoxo.”

U nga ha vona u nga fanelanga ku kombela ku rivaleriwa, ngopfungopfu loko u tiyiseka leswaku nkataku hi yena a endleke xihoxo. Wanuna loyi a vuriwaka Joseph u ri: “Loko u khorwiseka leswaku a wu endlanga xihoxo, u tala ku miyela u nga kombeli ku rivaleriwa leswaku swi tikomba leswaku a hi wena u endleke xihoxo.”

Ndlela leyi u kurisiweke ha yona. Swi nga endleka leswaku u kulele endyangwini lowu a wu nga tolovelanga ku kombela ndzivalelo. Loko swi ri tano, swi nga endleka u nga dyondzanga ku amukela swihoxo swa wena. Loko u nga titolovetanga ku kombela ndzivalelo wa ha ri ntsongo, a swi nge ku oloveli loko se u kurile.

LESWI U NGA SWI ENDLAKA

Anakanya hi munghana wa wena wa vukati. Tsundzuka siku leri munhu un’wana a nga kombela leswaku u n’wi rivalela ni ndlela leyi u titweke ha yona. Ha yini u nga endli leswaku munghana wa wena wa vukati a titwa hi ndlela yoleyo? Hambiloko u nga endlanga xihoxo, u fanele u kombela ku rivaleriwa hikwalaho ka leswi swiendlo swa wena swi n’wi twiseke ku vava. Marito wolawo ma nga vohlisa mbilu ya nkataku.—Nawu wa Bibele: Luka 6:31.

Anakanya hi vukati bya n’wina. Teka ku kombela ndzivalelo ku ri leswi sirhelelaka vukati bya n’wina ku nga ri ku va u hluriwile. Swivuriso 18:19 yi vula leswaku munhu loyi a tshamaka a hlundzukile ‘a nga sirhelelekanga ku tlula muti lowu tiyeke.’ Swa tika ku va u kondletela ku rhula loko wa ha hlundzukile. Kasi loko u kombela ku rivaleriwa u sivela leswaku xiphiqo xi nga nyanyi ku biha. Hi ndlela yoleyo, u rhangisa vukati bya n’wina emahlweni.—Nawu wa Bibele: Vafilipiya 2:3.

Hatla u kombela ku rivaleriwa. I ntiyiso leswaku a swi olovi ku kombela ku rivaleriwa, loko ku nga ri wena u nga endla xihoxo. Kambe xihoxo xa nkataku a xi fanelanga xi va xivangelo xa ku va u hlundzuka. Hikokwalaho, hatla u kombela ku rivaleriwa, u nga tibyeli leswaku swi ta hundza. Loko u kombela ku rivaleriwa swi nga endla leswaku ni nkataku swi n’wi olovela ku endla tano. Loko u titoloveta ku kombela ku rivaleriwa, swi ta ku olovela ku endla tano.—Nawu wa Bibele: Matewu 5:25.

Kombisa leswaku u tiyisile. Ku tiyimelela a swi fani ni ku kombela ku rivaleriwa. Loko u ku: “A ndzi rivele leswaku u ni ximbilwambilwana, ndzi khomele,” sweswo a hi ku kombela ku rivaleriwa! Pfumela leswaku u endle xihoxo ni leswaku u twise nkataku ku vava, hambiloko u vona onge a swi nge pfuni nchumu.

Langutana ni mhaka. Titsongahate, u swi amukela leswaku na wena u ta swi endla swihoxo. Hinkwerhu ha swi endla swihoxo! Hambiloko u anakanya leswaku a wu endlanga xihoxo, tsundzuka leswaku mavonelo ya wena swi nga endleka ma hoxile. Bibele yi ri: “Lowo sungula enandzwini wakwe u lulamile; munhu-kulobye wa fika kutani a n’wi lavisisa hakunene.” (Swivuriso 18:17) Loko u tsundzuka leswaku na wena wa swi endla swihoxo, swi ta ku olovela ku kombela ku rivaleriwa.