Xana Bibele Yi Ri Yini Hi Ku Va Vanhu Va Rimbewu Leri Fanaka Va Endla Timhaka Ta Masangu?

Hambileswi Bibele yi nga vulavuriki hi ku tekana ka vanhu va rimbewu leri fanaka, xivutiso xa nkoka hileswaku, xana yi ri yini hi ku va vanhu va rimbewu leri fanaka va endla timhaka ta masangu?

Hambiloko va nga si yi hlaya Bibele, vanhu vo tala va anakanyaka leswaku va yi tiva nhlamulo ya xivutiso lexi, kambe tinhlamulo ta vona ta kanetana! Van’wana va vula leswaku Bibele a yi swi amukeli leswaku vanhu va rimbewu leri fanaka va endla timhaka ta masangu. Van’wana va vula leswaku xileriso xa Bibele lexi nge “rhandza warikwenu” xi seketela mixaka hinkwayo ya timhaka ta masangu.​—Varhoma 13:9.

XANA BIBELE YI RI YINI?

Hi xihi eka swivulwa leswi landzelaka lexi u nga vulaka leswaku i ntiyiso?

1. Bibele a yi swi amukeli leswaku vanhu va rimbewu leri fanaka va endla timhaka ta masangu.

2. Bibele ya swi amukela leswaku vanhu va rimbewu leri fanaka va endla timhaka ta masangu.

3. Bibele yi khutaza leswaku vanhu lava endlaka timhaka ta masangu ni vanhu va rimbewu leri fanaka va vengiwa..

TINHLAMULO:

1. I NTIYISO. Bibele yi ri: “Vavanuna lava etlelaka ni vavanuna-kulobye . . . va nga ka va nga yi dyi ndzhaka ya mfumo wa Xikwembu.” (1  Vakorinto 6:9, 10) Mhaka leyi yi tirha ni le ka vavasati.—Varhoma 1: 26.

2. I MAVUNWA. Bibele yi dyondzisa leswaku timhaka ta masangu ti fanele ti endliwa ntsena hi wanuna ni wansati lava tekaneke.—Genesa 1:27, 28;Swivuriso 5: 18, 19.

3. I MAVUNWA. Hambileswi Bibele yi nga swi amukeliki leswaku vanhu va rimbewu leri fanaka va endla timhaka ta masangu kambe a yi swi khutazi leswaku va vengiwa kumbe va xanisiwa.—Varhoma 12:18.^[1]

Timbhoni Ta Yehovha Ti Pfumela Yini?

Timbhoni ta Yehovha ti pfumela leswaku i swa nkoka ku hanya hi milawu ya Bibele ya mahanyelo naswona ti hlawula ku hanya hi milawu yoleyo. (Esaya 48:17)^[2] Leswi swi vula leswaku Timbhoni ta Yehovha ti papalata mixaka hinkwayo ya ku tikhoma ko biha hi timhaka ta masangu ku katsa ni vusodoma.a (1 Vakorinto 6:18)^[3] Yoleyo i ndlela leyi Timbhoni ta Yehovha ti hanyaka ha yona naswona ti ni mfanelo yo endla tano.

Hi nkarhi lowu fanaka Timbhoni ta Yehovha ti tikarhatela ku ‘lavisisa ku rhula ni vanhu hinkwavo.’ (Vaheveru 12:14) Hambileswi Timbhoni ta Yehovha ti nga byi amukeliki vusodoma, a ti sindzisi vanhu leswaku va pfumela leswi ti swi pfumelaka naswona a ti ngheneleli eku hlaseriweni ka vasodoma kumbe ti tsaka loko titwa hi ta ku xanisiwa ka vona. Timbhoni ta Yehovha ti tikarhatela ku yingisa Nawu wa Nkoka hi ku khoma van’wana hi ndlela leyi na tona ti lavaka ku khomiwa ha yona.—Matewu 7:12.

Xana Bibele Ya Xi Seketela Xihlawuhlawu?

Vanhu van’wana va nga ha vula leswaku Bibele yi seketela leswaku vasodoma va vengiwa. Va vula leswaku, ‘Bibele yi tsariwe hi nkarhi lowu vanhu a va nga lavi ku twa mavonelo ya van’wana. Namuntlha hi amukela vanhu va tindzimi hinkwato, matiko hinkwawo ni lava endlaka mixaka yo hambanahambana ya timhaka ta masangu.’ Eka vona ku venga vusodoma swi fana ni ku venga vanhu va rixaka rin’wana. Xana sweswo swa twala? Doo! Ha yini?

Ku ni ku hambana exikarhi ka ku venga vusodoma ni ku venga vanhu lava byi endlaka. Bibele yi khutaza Vakreste leswaku va xixima vanhu va mixaka hinkwayo. (1 Petro 2:17)^[4] Kambe sweswo a swi vuli swona leswaku Vakreste va fanele va amukela mikhuva hinkwayo ya mahanyelo.

Anakanya hi xikombiso lexi: A hi nge u teka ku dzaha ku ri nchumu lowu nga ni khombo wu tlhela wu nyenyetsa. Ku vuriwa yini loko u tirha ni munhu loyi a dzahaka? Xana hi nga vula leswaku a wu lavi ku twa mavonelo ya van’wana hi leswi vonelo ra wena ri hambaneke ni ra yena? Leswi u nga dzahiki kambe yena a dzahaka, swi vula leswaku wa n’wi venga? Loko mutirhi yoloye a ku sindzisa leswaku u cinca vonelo ra wena hi ku dzaha, xana sweswo a swi kombisi leswaku a nga khathali hi mavonelo ya van’wana?

Timbhoni ta Yehovha ti hlawula ku hanya hi milawu ya le Bibeleni. A ti ma amukeli mahanyelo lama nga sekeriwangiki eBibeleni. Kambe a ti va vungunyi kumbe ku va khoma hi ndlela yo biha vanhu lava swiendlo swa vona swi hambanaka ni swa tona.

Xana Leswi Bibele Yi Swi Vulaka Swa Tika?

Ku vuriwa yini hi vanhu lava titwaka va navela ku endla vusodoma? Xana va velekiwe va ri tano? Loko swi ri tano, xana swi ta va swi kombisa tihanyi ku vula leswaku swi hoxile ku va va endla hi ku pfumelelana ni ku navela ka vona?

Bibele a yi boxi leswaku ku ni vanhu lava velekiweke va ri vasodoma. Kambe yi vula leswaku loko hi lava ku tsakisa Xikwembu, hi fanele hi papalata mahanyelo yo biha ku katsa ni vusodoma.—2 Vakorinto 10:4, 5.

Van’wana va nga ha vula leswaku leswi Bibele yi swi dyondzisaka swa tika. Vonelo ra vona ri sekeriwe eka leswaku hi fanele hi endla hi ku pfumelelana ni ku navela ka hina kumbe leswaku ku navela ka vona ko endla timhaka ta masangu i ka nkoka lerova a swi koteki ku ku lawula. Hambiswiritano, Bibele yi vula leswaku hi nga swi kota ku hlula ku navela koloko. Ku hambana ni swiharhi, vanhu va nga swi kota ku papalata ku lawuriwa hi ku navela ka vona.—Vakolosa 3:5.^[5]

Anakanya hi xikombiso lexi: Vakambisisi van’wana va vula leswaku mikhuva yin’wana ya mahanyelo yo tanihi ku va ni nkani, yi nga ha vangiwa hi xitekela. Bibele a yi vuli leswaku ku ni vanhu lava velekiweke va ri ni nkani, kambe ya pfumela leswaku vanhu van’wana va ‘tala ku hlundzuka’ naswona va ‘kariha ngopfu.’ (Swivuriso 22:24; 29:22) Kambe yi tlhela yi ku: “Tshika ku hlundzuka, siya vukarhi.”—Pisalema 37:8; Vaefesa 4:31.

Van’wana va nga ha ala mhaka yoleyo kumbe ku vula leswaku Bibele a yi na ntsetselelo eka lava hatlaka va hlundzuka. Hambileswi vakambisisi volavo va pfumelaka leswaku ku hlundzuka ku nga ha vangiwa hi xitekela, va tirha hi matimba leswaku va pfuna vanhu lava nga ni mukhuva wolowo.

Hilaha ku fanaka, Timbhoni ta Yehovha ti tiyimisele ku lwisana ni mikhuva hinkwayo leyi nga pfumelelaniki ni Bibele. Sweswo swi katsa ni ku va wanuna ni wansati lava nga tekanangiki va endla timhaka ta masangu. Hi ku kongoma Bibele yi ri: “Leswaku un’wana ni un’wana wa n’wina a tiva ndlela yo lawula xibya xakwe hi ku kwetsima ni ku xiximeka, ku nga ri hi ku navela ka ku lava vuxaka bya rimbewu.”—1 Vatesalonika 4:4, 5.

“Hi Leswi Van’wana Va N’wina A Mi Ri Swona”

Lava a va lava ku va Vakreste hi nkarhi wa vaapostola a va huma eka mindhavuko yo hambanahambana naswona a va hanya vutomi lebyi hambaneke, kambe van’wana va vona va cince hi ku helela. Hi xikombiso, Bibele yi vulavula hi ‘timbhisa, vagandzeri va swifaniso swa hava ni vaoswi,’ naswona yi engetela yi ku: “Hi leswi van’wana va n’wina a mi ri swona.”—1 Vakorinto 6:9-11.

Loko Bibele yi vula leswaku “hi leswi van’wana va n’wina a mi ri swona,” xana yi vula leswaku lava tshikeke vusodoma a va ha ri na kona ku navela koloko? A swi tano, hikuva yi tlhela yi ku: “Hambetani mi famba hi moya kutani a mi nge ku hetisisi ku navela ka nyama nikatsongo.”—Vagalatiya 5:16.

Xiya leswaku Bibele a yi vuli swona leswaku Mukreste a nge vi na kona ku navela loku nga basangiki. Kambe, yi vula leswaku u ta ku papalata ku navela koloko. Vakreste va dyondza ku lawula ku navela ko tano leswaku va nga anakanyisisi ha kona lerova va ti kuma va endle xidyoho.—Yakobo 1:14, 15.^[6]

Xisweswo, Bibele yi hambanisa ku navela ni swiendlo. (Varhoma 7:16-25) Munhu loyi a navelaka ku endla vusodoma a nga swi kota ku lawula leswi a anakanyaka ha swona, hilaha a ta swi endlisa xiswona loko a lava ku papalata ku navela ko karhi ko biha, ku katsa ni hlundzuka ngopfu, ku endla vuoswi ni makwanga.—1 Vakorinto 9:27; 2 Petro 2:14, 15.

Hambileswi Timbhoni ta Yehovha ti namarhelaka milawu ya Bibele ya mahanyelo, kambe a ti sindzisi van’wana leswaku va pfumela leswi ti swi pfumelaka, kumbe ku ringeta ku cinca milawu leyi sirhelelaka timfanelo ta vanhu lava mahanyelo ya vona ma hambanaka ni ya tona. Rungula leri Timbhoni ta Yehovha ti ri dyondzisaka i ra nkoka, naswona ti tikarhatela ku ri byela hinkwavo lava lavaka ku ri twa.—Mintirho 20:20.