Ndlela Yo Kombisa Xichavo

NTLHONTLHO

Nuna u ri: “Loko haha ku tekana, mina ni nsati wa mina a hi ri ni mavonelo lama hambaneke loko swi ta emhakeni ya ku kombisa xichavo. Leswi a swi vuli swona leswaku mavonelo ya hina a ma hoxile kumbe a ma nga hoxanga kambe a ma lo hambana. A ndzi anakanya leswaku nsati wa mina u fanele a kombisa leswaku wa ndzi xixima loko a vulavula na mina.”

Nsati u ri: “Ndhavuko wa ka hina wu katsa ku vulavulela ehenhla, ku cincacinca xikandza loko u ri karhi u vulavula ni ku va u nghena munhu enon’wini loko a ri karhi a vulavula. A hi nga swi teki ku ri ku delela sweswo. Kambe ndhavuko lowu nuna wa mina a kuleleke eka wona wu hambanile swinene ni wa mina.”

Xichavo i mfanelo leyi munhu a faneleke a yi kombisa minkarhi hinkwayo evukatini. U nga swi kombisa njhani leswaku wa n’wi xixima nkataku?

LESWI U FANELEKE U SWI TIVA

Vavanuna va lava ku kombisiwa xichavo. Bibele yi byela vavanuna yi ku: “Un’wana ni un’wana wa n’wina a a rhandze nsati wakwe hilaha a tirhandzaka hakona.” Kambe yi tlhela yi ku: “Wansati u fanele ku va ni xichavo xo enta eka nuna wakwe.” (Vaefesa 5:33) Hambileswi vavasati ni vavanuna va lavaka ku titwa va rhandziwa ni ku xiximiwa, kambe lexi vavanuna va xi lavaka ngopfu i ku xiximiwa. Wanuna loyi a vuriwaka Carlos u ri: “Vavanuna va lava ku tshembiwa leswaku va nga swi kota ku tlhantlha swiphiqo ni ku khathalela ndyangu.”a Loko wansati a xixima nuna wakwe hikwalaho ka swilo leswi a kotaka ku swi endla, yena ni nuna wa yena va vuyeriwa. Wansati loyi a vuriwaka Corrine u ri: “Nuna wa mina u ya a ndzi rhandza ngopfu loko ndzi kombisa leswaku ndza n’wi xixima.”

Vavasati na vona va lava ku xiximiwa. Leswi i ntiyiso hikuva wanuna loyi a nga xiximiki nsati wakwe a nge swi koti ku kombisa leswaku wa n’wi rhandza. Daniel u ri: “Ndzi fanele ndzi xixima mavonelo ni swiringanyeto swa nsati wa mina. Ndzi fanele ndzi tlhela ndzi xixima ndlela leyi a titwaka ha yona. Loko ndzi nga swi twisisi leswaku hikokwalaho ka yini a titwa hi ndlela yo karhi, a swi vuli swona leswaku ndzi fanele ndzi honisa ndlela leyi a titwaka ha yona.”

Vanhu va kombisa xichavo hi tindlela leti hambaneke. Mhaka a hi leswaku wena u vona onge wa n’wi xixima nkataku kambe xa nkoka i ndlela leyi yena a titwaka ha yona. Leswi hi leswi wansati loyi a boxiweke eku sunguleni, ehansi ka xihlokwana lexi nge, “Ntlhontlho” a swi dyondzeke. U ri: “Hambiloko ndzi nga swi xiyi leswaku a ndzi le ku kombiseni ka xichavo, kambe loko nuna wa mina a vona onge a ndzi n’wi xiximi ndzi fanele ndzi cinca maendlelo ya mina.”

LESWI U NGA SWI ENDLAKA

• Tsala swilo swinharhu leswi u swi rhandzaka hi nkataku. Timfanelo leti u tirhandzaka eka nkataku ti nga endla leswaku swi ku olovela ku n’wi xixima.

• Ku ringana vhiki, tikambisise ku vona loko ku ri ni laha u faneleke u antswisa kona, (ku nga ri laha nkataku a faneleke a antswisa kona.)

Ndlela leyi u vulavulaka ha yona. Ndzavisiso wun’wana lowu endliweke eka vatekani, wu kume leswaku “vatekani lava tshamaka va tsakile, loko va tlhantlha swiphiqo va papalata ku kombana hi tintiho loko un’wana a endle xihoxo. Ku hambana ni sweswo, vatekani lava hetelelaka va dlaye vukati va kombana hi tintiho loko un’wana a endle xihoxo.”b—Nawu wa Bibele: Swivuriso 12:18.

Tivutise: ‘Xana ndlela leyi ndzi vulavulaka ha yona ni nkatanga yi kombisa leswaku ndza n’wi xixima? Xana ndzi tshamela ku solasola kumbe ndza bumabumela? Loko ndzi ri ni mhaka leyi ndzi karhataka xana ndzi vulavula njhani ni nkatanga?’ Xana nkataku a ta pfumelelana ni tinhlamulo ta wena?—Nawu wa Bibele: Vakolosa 3:13.

Ringeta leswi: Tivekele pakani yo bumabumela nkataku siku ni siku. Xiringanyeto: Tlhela u kambisisa timfanelo leti u ti rhandzaka hi nkataku leti u ti tsaleke. Swi endle mukhuva ku byela nkataku hi swilo leswi u swi rhandzaka hi yena.—Nawu wa Bibele: 1 Vakorinto 8:1.

Swiendlo swa wena. Wansati loyi a vuriwaka Alicia u ri: “Ndzi heta nkarhi wo tala ndzi endla mintirho ya le kaya, naswona loko nuna wa mina a kombisa leswaku wa swi tlangela leswi ndzi swi endlaka hi ku va a tihlantswela swibya leswi a swi tirhisa sweswo swi endla ndzi xiya leswaku nuna wa mina wa ndzi twela naswona u ndzi teka ndzi ri wa nkoka.”

Tivutise: ‘Xana ndlela leyi ndzi khomaka nkatanga ha yona ya swi kombisa leswaku ndza n’wi xixima? Xana ndzi heta nkarhi wo tala ndzi ri ni nkatanga?’ Xana nkataku a ta pfumelelana ni tinhlamulo ta wena?

Ringeta leswi: Tsala tindlela tinharhu leti u nga tsakelaka ku kombisiwa ha tona leswaku wa xiximiwa. Nkataku na yena a endle hilaha ku fanaka. Cincanani maphepha lawa mi tsaleleke eka wona ku endlela leswaku ha un’we wa n’wina a ta kota ku vona laha a faneleke a antswisa kona. Tikambisise ku vona laha u nga antswisaka kona leswaku u xixima nkataku. Loko u kombisa xichavo ni nkataku swi ta n’wi olovela leswaku a ku xixima.