I Yini Lexi Nga Endlaka Ndyangu Wa Wena Wu Tsaka?—Xiyenge 1

Vanhu lava ha ku tekanaka va navela ku tshama va tsakile vutomi bya vona hinkwabyo ku fana ni ndlela leyi a va tsake ha yona hi siku ra mucato. Sweswo swi nga koteka. Vakreste lava nga ni nkarhi wo leha va tekanile naswona va tirheke hi matimba leswaku va tirhisa xitsundzuxo xa le Bibeleni va swi tiva leswaku sweswo swa koteka.

1. Hi xihi xitsundzuxo lexi Bibele yi xi nyikaka vavanuna?

Yehovha u nyike wanuna vutihlamuleri bya ku va nhloko ya ndyangu. (Hlaya Vaefesa 5:23.) Yehovha u lava leswaku a endla swiboho leswi nga ta pfuna ndyangu wakwe. Bibele yi byela vavanuna yi ku: “Rhandzani vasati va n’wina.” (Vaefesa 5:25) Sweswo swi vula yini? Wanuna la nga ni rirhandzu u khoma nsati wakwe hi musa, loko va ri ekaya ni loko va ri evanhwini. Wa n’wi sirhelela a tlhela a tikarhatela ku n’wi hlayisa ni ku khathala hi ndlela leyi a titwaka ha yona. (1 Timotiya 5:8) Xa nkoka swinene, u n’wi pfuna leswaku a va ni vuxaka lebyikulu na Yehovha. (Matewu 4:4) Hi xikombiso, a nga khongela a tlhela a hlaya Bibele ni nsati wakwe. Loko wanuna a khathalela nsati wakwe hi ndlela ya rirhandzu, u tshama a ri munghana wa Yehovha.—Hlaya 1 Petro 3:7.

2. Hi xihi xitsundzuxo lexi Bibele yi xi nyikaka vavasati?

Rito ra Xikwembu ri vula leswaku wansati “u fanele a va ni xichavo xo enta eka nuna wakwe.” (Vaefesa 5:33) A nga swi endlisa ku yini sweswo? A nga ehleketa hi vumunhu lebyinene bya nuna wakwe ni matshalatshala lawa a ma endlaka leswaku a khathalela yena swin’we ni vana va vona. A nga tlhela a kombisa xichavo hi ku seketela swiboho leswi nuna wakwe a swi endlaka, a vulavula na yena kahle ni ku tlhela a vulavula kahle hi yena eka van’wana hambiloko a nga gandzeli Yehovha.

3. Vatekani va nga byi tiyisa njhani vukati bya vona?

Bibele yi vula leswi hi vatekani: “Lavambirhi va ta va nyama yin’we.” (Matewu 19:5) Leswi swi vula leswaku va fanele va lwisana ni nchumu wihi ni wihi lowu nga endlaka leswaku va nga ha rhandzani ngopfu. Sweswo va swi endla hi ku tinyika nkarhi wa ku va swin’we nkarhi ni nkarhi ni hi ku va va byelana ndlela leyi va titwaka ha yona va tshunxekile. A va pfumeleli nchumu kumbe munhu wo karhi, handle ka Yehovha, a va wa nkoka swinene ku tlula munhu loyi va tekaneke na yena. Va tlhela va papalata ku tolovelana swinene ni munhu loyi va nga tekanangiki na yena.

ANAKANYISISA

4. Vavanuna, rhandzani vasati va n’wina mi tlhela mi va khathalela

VHIDIYO: Vavanuna, Rhandzani Vasati Van’wina Hilaha Mi Tirhandzaka Ha Kona (9:53)

• Hi tihi tindlela tin’wana leti wanuna a nga kombisaka ha tona leswaku u rhandza nsati wakwe naswona wa n’wi khathalela?

Hlaya Vakolosa 3:12, ivi mi bula hi xivutiso lexi:

• Wanuna a nga swi endla njhani leswi boxiweke eka tsalwa leri evukatini byakwe?

5. Vavasati, rhandzani vanuna va n’wina mi tlhela mi va xixima

Bibele yi khutaza wansati ku xixima nuna wakwe, hambi u gandzela Yehovha kumbe doo! Hlaya 1 Petro 3:1, 2, ivi mi bula hi swivutiso leswi:

• Loko u ri ni nuna loyi a nga gandzeliki Yehovha, a swi kanakanisi leswaku u lava a n’wi gandzela. U ehleketa leswaku hi yihi ndlela leyinene yo n’wi pfuna, i ku tshamela ku n’wi chumayela kumbe i ku va ni mahanyelo lamanene u tlhela u n’wi xixima? Hikwalaho ka yini u vula tano?

Nuna ni nsati va nga swi kota ku endla swiboho leswinene swin’we. Kambe, mikarhi yin’wana wansati a nga pfa a nga pfumelelani na xona xiboho xa nuna wakwe. Loko swi va tano, a nga byela nuna wakwe leswi a swi ehleketaka a rhurile ni hi ndlela ya xichavo, kambe u fanele a tsundzuka leswaku Yehovha u nyike nuna wakwe vutihlamuleri bya ku endlela ndyangu swiboho leswi nga wu pfunaka. U fanele a tikarhatela ku seketela swiboho swa nuna wakwe. Ku endla tano, swi ta endla leswaku ndyangu hinkwawo wu tsaka. Hlaya 1 Petro 3:3-5, ivi mi bula hi xivutiso lexi:

• Yehovha u titwa njhani loko nsati a xixima nuna wakwe?

6. U nga swi kota ku tlhantlha swiphiqo evukatini bya wena

VHIDIYO: Ku Tiyisa Vuxaka Bya Vatekani (5:44)

• Eka vhidiyo leyi, i yini leswi a swi kombisa leswaku rirhandzu ra vatekani lava a ri horile?

• I yini leswi va swi endleke leswaku va tiyisa vukati bya vona?

Hlaya 1 Vakorinto 10:24 na Vakolosa 3:13. Endzhaku ko hlaya tsalwa ha rin’we, bulani hi xivutiso lexi:

• Ku tirhisa xitsundzuxo lexi, swi nga byi tiyisa njhani vukati?

Bibele yi vula leswaku hi fanele hi xiximana. Ku xixima swi katsa ku khoma munhu hi musa ni hi xichavo. Hlaya Varhoma 12:10, ivi mi bula hi swivutiso leswi:

• Xana nuna kumbe nsati u fanele a rindzela lowun’wana leswaku a rhanga a n’wi xixima? Hikwalaho ka yini u vula tano?

NKATSAKANYO

Nuna ni nsati va nga tsaka loko va rhandzana, va xiximana va tlhela va tirhisa misinya ya milawu ya Bibele.

Mpfuxeto

• Wanuna a nga endla yini leswaku yena ni nsati va tsaka?

• Wansati a nga endla yini leswaku yena ni nuna va tsaka?

• Loko u nghenele vukati, hi wihi nsinya wa nawu wa le Bibeleni lowu nga tiyisaka vukati bya n’wina?

KUMA LESWI ENGETELEKEKE

Twana swiringanyeto leswi nga mi pfunaka leswaku mi tsaka endyangwini wa n’wina.

U Nga Va Ni Ndyangu Lowu Tsakeke (broxara)

Hlalela vhidiyo ya vuyimbeleri leyi kombisaka mikateko leyi vaka kona evukatini loko vatekani va tirhisa ndzayo leyi humaka eka Xikwembu.

Ndza Ku Rhandza (4:26)

Kambisisa leswi vulaka swona ku va wansati a xixima vunhloko bya nuna wakwe.

“Vavasati, Ha Yini Mi Titsongahatela Vunhloko?” (Xihondzo xo Rindza, May 15, 2010)

Vatekani vanʼwana va swi hlule njhani swiphiqo evukatini bya vona, leswi katsaka ku dlaya vukati bya vona?

Hi Pfuxete Vukati Bya Hina Hi Ku Pfuniwa Hi Xikwembu (5:14)