1. Xana Loko Hi Xaniseka Hi Fanele Hi Sola Xikwembu?

Lexi Endlaka Swi Va Swa Nkoka

Vanhu vo tala va sola Xikwembu hikuva va anakanya leswaku hi xona xi endlaka leswaku hi xaniseka.

Mhaka Yo Anakanyisisa Ha Yona

Varhangeri vo tala va vukhongeri va dyondzisa leswaku Xikwembu hi xona xi endlaka leswaku hi xaniseka. Hi xikombiso, van’wana va ri:

• Timhangu ta ntumbuluko i nxupulo lowu humaka eka Xikwembu.

• Vana va fa hikwalaho ka leswi Xikwembu xi xotaka hi tintsumi etilweni.

• Xikwembu xa katseka eka tinyimpi—hi swona swi endlaka leswaku ku va ni ku xaniseka lokukulu.

Xana swa koteka leswaku leswi varhangeri va vukhongeri va swi dyondzisaka hi Xikwembu swi va mavunwa? Kambe ku vuriwa yini loko ku ri hileswaku Xikwembu a xi va amukeli?

Leswi Bibele Yi Swi Vulaka

Xikwembu a hi xona xi endlaka hi xaniseka.

Loko ku ri hi leswaku hi xona xi endlaka hi xaniseka sweswo a swi ta va swi hambane kule ni vumunhu bya xona lebyi hlamuseriweke eBibeleni. Hi xikombiso:

‘Tindlela ta Xikwembu hinkwato i vululami. . . . Xi ni vululami naswona xi hava xisandzu.’ —DETERONOMA 32:4.

“A swi ve ekule swinene ni Xikwembu xa ntiyiso leswaku xi endla hilaha ku hombolokeke, Ni Lowa Matimba Hinkwawo ku endla hilaha ku nga lulamangiki!”—YOBO 34:10.

“Lowa Matimba Hinkwawo a nga byi soholoti vuavanyisi.”—YOBO 34:12.

Xikwembu a xi byi amukeli vukhongeri lebyi vulavulaka mavunwa hi xona.

Leswi swi katsa vukhongeri lebyi dyondzisaka leswaku Xikwembu hi xona xi endlaka hi xaniseka ni lebyi katsekaka eka tinyimpi ni madzolonga.

“Vaprofeta, va profeta mavunwa hi vito ra mina. A ndzi va rhumanga, hambi ku ri ku va lerisa kumbe ku vulavula na vona. Va mi byela xivono xa mavunwa ni . . . ku kanganyisa ka mbilu ya vona, hi ndlela ya vuprofeta.”—YEREMIYA 14:14.

Yesu u tshinye vukhongeri lebyi nga ni vukanganyisi.

“A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni. Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.’” —MATEWU 7:21-23.