Rhandza Vanhu Van’wana

Xiphiqo

Ku tshika xihlawuhlawu a hi matlangwana. Leswaku munhu a hola eka vuvabyi byo karhi u fanele a tirha hi matimba, swi tano na hi xihlawuhlawu. U nga endla yini leswaku u tsuvula xihlawuhlawu embilwini ya wena?

Nawu Wa Le Bibeleni

Swifaniso: 1. Wanuna wa le Asia a pfulela wanuna wa muntima loyi a khomeke tiya. 2. Wanuna loyi wa muntima a nwa tiya ni vatirhikuloni ku katsa ni wansati luya wa Muindiya la boxiweke eku sunguleni.

“Ambalani rirhandzu hikuva ri endla leswaku vanhu hinkwavo va va ni vun’we hilaha ku heleleke.”—VAKOLOSA 3:14.

Hi dyondza yini eka ndzimana leyi? Ku endlela van’wana leswinene swi endla leswaku mi va ni vun’we. Loko u ya u rhandza vanhu van’wana, a wu nge vi na xihlawuhlawu. Rirhandzu ri ta endla leswaku u nga zondhi vanhu van’wana.

Leswi U Nga Swi Endlaka

Swifaniso: 1. Mudyuhari a ri karhi a pfuniwa hi wansati wa Muindiya leswaku a khandziya switepisi a n’wi khomele swakudya. 2. Mudyuhari a tisela makhelwani swibakiwa ku nga wanuna wo huma eAsia loyi a boxiweke eku sunguleni.

Ehleketa hi swilo swin’wana leswi u nga swi endlelaka vanhu va rixaka leri a wu ri tekela ehansi ku kombisa leswaku wa va rhandza. A swo boha ku va endlela swilo leswikulu. Ringeta ku endla xin’we kumbe swin’wana swa swilo leswi landzelaka:

Ku endlanyana swilo switsongo leswi kombisaka rirhandzu swi nga ku pfuna leswaku u tshika xihlawuhlawu

U nga va komba vumunhu hi ku va komba ndhawu yo karhi loko va lahlekile kumbe u nyiza va tshama exitulwini xa wena loko mi khandziye swin’we na vona xo famba xa mani na mani.
Hambiloko va nga ri koti kahle ririmi ra wena, ringeta ku bula na vona.
Va lehisele mbilu loko va endla swilo leswi u nga swi twisisiki.
Kombisa leswaku u va twela vusiwana loko va ku byela swiphiqo swa vona.