Lexi Nga Pfunaka Ku Hlula Xihlawuhlawu

Vanhu va timiliyoni va tirhise swiringanyeto leswi nga eka tinhlokomhaka leti hundzeke naswona va yi lwile nyimpi yo susa xihlawuhlawu etimbilwini ta vona va tlhela va yi hlula. I ntiyiso leswaku a swi olovi ku tshika xihlawuhlawu hi ku helela hi nga ha vi na xona. Xana leswi swi vula leswaku xihlawuhlawu a xi nge heli?

Mfumo Lowu Nga Ta Tlhantlha Xiphiqo Lexi

Mifumo ya vanhu ya tsandzeka ku tshikisa vanhu xihlawuhlawu. Kambe xana leswi swi vula leswaku a wu kona mfumo lowu nga ta xi susa?

Mfumo lowu nga ta susa xihlawuhlawu wu fanele wu

1. 1. Pfuna vanhu va cinca ndlela leyi va ehleketaka ni ku titwa ha yona hi vanhu van’wana.

2. 2. Thova timbilu ta vanhu lava vonaka onge swa fanela ku va va nga rhandzi vanhu vo karhi hi leswi vanhu volavo va va zondhaka.

3. 3. Va ni varhangeri vo tshembeka lava khomaka vaakatiko ku fana.

4. 4. Endla leswaku vanhu va tinxaka hinkwato va va ni vun’we.

Bibele yi hi byela leswaku Xikwembu xi veke mfumo lowu nga ta endla swilo leswi. Mfumo wolowo wu vitaniwa “Mfumo wa Xikwembu.”—Luka 4:43.

Xiya leswi mfumo wolowo wu nga ta swi endla.

1. Wu Ta Dyondzisa Vanhu Ku Hanya Hi Ndlela Leyinene

“Vaakatiko va [ta] dyondza vululami.”—ESAYA 26:9.

“Ku ta va ni ku rhula hikwalaho ka ku lulama loku nga ta va kona, naswona mihandzu ya ku lulama ku ta va ku rhula ni nsirhelelo.”—ESAYA 32:17.

Tindzimana leti ti vula yini? Mfumo wa Xikwembu wu ta dyondzisa vanhu ku endla leswinene. Loko vanhu va dyondzisiwa ku hambanisa leswinene eka leswo biha, ku ta va ni ku lulama naswona vanhu a va nge he langutani hi tihlo ro tshwuka. Vanhu hinkwavo va ta swi tiva leswaku va fanele va rhandza vanhu va tinxaka hinkwato.

2. Wu Ta Herisa Swilo Hinkwaswo Swo Biha

Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona. Swilo swo sungula swi hundzile.”—NHLAVUTELO 21:4.

Ndzimana leyi yi vula yini? Mfumo wa Xikwembu wu ta herisa swilo hinkwaswo leswi hi twisaka ku vava. Lava tshameke va twisiwa ku vava hikwalaho ka xihlawuhlawu a va nge he vi na xona xivangelo xo lava ku rihisela.

3. Ku Ta Va Ni Mufumi Lonene

“A nge avanyisi hi ku ya hi leswi a swi vonaka, kumbe a tshinya hi ku ya hi leswi a swi twaka. U ta avanyisa swisiwana hi ndlela leyinene, naswona u ta tshinya hi vunene ku pfuna lavo rhula emisaveni.”—ESAYA 11:3, 4.

Ndzimana leyi yi vula yini? Yesu Kreste loyi a nga Hosi ya Mfumo wa Xikwembu wa le tilweni u ta fuma hi ndlela leyinene misava hinkwayo. Yesu Kreste a nga rhandzi tiko ro karhi a venga ro karhi, u ta endla leswaku vanhu hinkwavo va yingisa milawu yakwe.

4. Ku Ta Va Ni Vun’we

Mfumo wa Xikwembu wu dyondzisa vanhu “ku va ni mianakanyo yin’we, [ku] va ni rirhandzu leri fanaka, [ku] va ni vun’we ni ku ehleketa hi ndlela leyi fanaka.”—VAFILIPIYA 2:2.

Ndzimana leyi yi vula yini? Vanhu lava nga ta fumiwa hi Mfumo wa Xikwembu va ta va ni vun’we. Sweswo swi ta koteka hikuva va ta rhandzana hi mbilu hinkwayo.