KU LANGUTANA NI KU TLAKUKA KA MINXAVO

Vana Ni Ntshembo

Xana etikweni leri u tshamaka eka rona, swilo swi durha ku tlula mali leyi u yi holaka? Xana u vilerisiwa hileswaku u ta tikhathalela njhani wena ni ndyangu wa wena? Loko swi ri tano, u nga ha vilerisiwa hi leswi nga ta endleka enkarhini lowu taka. Kambe hambi ku ri eka swiyimo swo tano swo tika, ku va ni ntshembo i swa nkoka.

HIKWALAHOKAYINI SWI RI SWA NKOKA KU VA NI NTSHEMBO?

Vanhu lava nga ni ntshembo a vo navela ntsena leswaku swilo leswinene swi va endlekela. Ntshembo wu va pfuna ku endla swo karhi leswaku va antswisa xiyimo lexi va nga eka xona. Hi xikombiso, vulavisisi byi kombisa leswaku vanhu lava nga ni ntshembo . . .

va kota ku tiyisela swiyimo swo tika
va kota ku fambisana ni swiyimo
va endla swiboho leswinene swa vutomi ku katsa ni leswi va pfunaka va antswisa rihanyo ra vona

LESWI U NGA SWI ENDLAKA

Xo sungula, xiya ndlela leyi Bibele yi nga ku pfunaka hayona namuntlha. Bibele yi ni swiringanyeto leswi nga ta ku pfuna u langutana ni ku tlakuka ka minxavo. Swiringanyeto leswi, hi swin’wana swa leswi nga endlaka u swi xiya leswaku u wa nkoka ni ku lunghekela ku langutana ni mitlhontlho ya nkarhi lowu taka.

“Mianakanyo leyinene yi ta ku sirhelela, u ta hlayisiwa hi ku twisisa.”—Swivuriso 2:11, Bibele—Mahungu Lamanene.

Xa vumbirhi, xiya leswi Bibele yi swi vulaka hi vumundzuku. Loko u byi teka byi ri bya nkoka vutlhari lebyi kumekaka eBibeleni, u ta lava ku swi kambisisa kahle leswi buku leyi yi swi vulaka hi vumundzuku. Hi xikombiso, u ta dyondza leswaku Xikwembu a xi lavi u va ni “vumundzuku” ntsena kambe xi tlhele xi ku nyika ni xivangelo lexi twalaka xo va u va ni ntshembo. (Yeremiya 29:11) Xivangelo xolexo i Mfumo wa Xikwembu.

I YINI MFUMO WA XIKWEMBU NASWONA WU TA ENDLA YINI?

Mfumo wa Xikwembu i hulumendhe leyi nga ta fuma misava hinkwayo. (Daniyele 2:44; Matewu 6:10) Wu ta fuma wu ri etilweni naswona wu ta herisa maxangu ni vusweti, wu siva swilo leswi hi ku rhula ni ku endla vanhu va kuma swilo hinkwaswo leswi va swi lavaka leswaku va tsaka hilaha matsalwa lama landzelaka ma kombisaka hakona.

“U ta tsaka naswona swi ta ku fambela kahle.”—Pisalema 128:2.

“A va [lava fumiwaka hi Mfumo wa Xikwembu] nge he tirheli swa hava.”—Esaya 65:23.

“Ku ta va ni ndzalo ya mavele emisaveni.”—Pisalema 72:16.

Vanhu va timiliyoni va swi tshemba switshembiso leswi hikuva va swi tiva leswaku Xikwembu ‘a xi hembi.’ (Tito 1:2) Hikwalahokayini u nga tikambisiseli Bibele hi wexe? Ntshembo lowu yi vulavulaka ha wona wu ta ku nyika matimba yo tiyisela swiyimo swo tika swa ikhonomi ni ku endla leswaku u byi langutela hi mahlongati vumundzuku.