Dyondzo 34
Swifaniso Leswi Fanelekaka
1, 2. Hi ku komisa kombisa leswi swifaniso swi swi endlaka eka nkulumo.
1 Loko xivulavuri xi tirhisa swifaniso, kahle-kahle xi nghenisa swifaniso leswi tirhaka emianakanyweni ya vayingiseri va xona. Swifaniso swi pfuxa ku tsakela ni ku kandziyisa mianakanyo ya nkoka. Swi pfuxa maehleketelo ya munhu ni ku endla swi olova ku khoma mianakanyo leyintshwa. Swifaniso leswi hlawuriweke kahle swi pfuxa mianakanyo ni mintlhaveko. Vuyelo hi leswaku rungula ri hundziseriwa emianakanyweni hi matimba lawa hakanyingi ma nga kotekiki eka tinhlamuselo leti olovaka ta mhaka. Kambe leswi swi tano ntsena loko swifaniso swi faneleka. Swi fanele swi fanela mhaka ya wena.
2 Minkarhi yin’wana, xifaniso xi nga tirhisiwa ku hlula mianakanyo leyi bohiweke ka ha ri emahlweni kumbe leyi pfumeriwaka swinene. Xi nga susa minkaneto, dyondzo ya ntiyiso yi nga si paluxiwa. Hi xikombiso, u nga ha ku, “Ku hava tatana la nga vekaka voko ra n’wana wa yena exitofini lexi hisaka leswaku a n’wi xupula.” Xifaniso xo tano lexi nghenisaka dyondzo ya “tihele,” hi xihatla xi nga endla leswaku dyondzo ya vukhongeri bya mavunwa hi “tihele” yi nga amukeleki, ivi xisweswo yi bakanyeriwa etlhelo hi ku olova.
3-6. Swifaniso swi nga ha tekiwa eka swihlovo swihi?
3 Swifaniso swi nga ha va hi swiyimo swo tala. Swi nga ha va mimfananiso, mindzinganyeto, ku hambana, swihlambanyiso, swigego, mintokoto ya munhu hi xiyexe ni swikombiso. Swi nga hlawuriwa eka swihlovo swo tala. Swi nga vulavula hi swilo swa ntumbuluko leswi hanyaka kumbe leswi nga hanyiki. Swi nga sekeriwa eka mintirho ya vayingiseri, eka mikhuva kumbe mahanyelo ya vanhu, swilo swa ndyangu kumbe swilo leswi endliweke hi vanhu swo tanihi tindlu, swikepe ni swin’wana. Hambi swi ri tano, ku nga khathariseki leswaku i xifaniso xihi lexi tirhisiwaka, xi fanele xi hlawuriwa hikwalaho ka xiendlakalo ni mhaka, ku nga ri hikwalaho ka leswi xi nga xifaniso lexi tsakeriwaka ngopfu hi xivulavuri.
4 Rito ra xitsundzuxo. U nga lungi ngopfu nkulumo hi swifaniso swo tala. Swi tirhise, kambe u nga swi tirhisi ku tlula mpimo.
5 Ku tirhisiwa lokunene ka swifaniso i vutshila. Swi lava vuswikoti ni ntokoto. Kambe swa humelela swinene. Leswaku u dyondza ku tirhisa swifaniso, u fanele u dyondza ku anakanya hi ku ya hi swifaniso. Loko u ri karhi u hlaya, xiya swifaniso leswi tirhisiwaka. Loko u languta swilo, anakanya hi swona hi ku ya hi vutomi bya Vukriste ni vutirheli. Hi xikombiso, loko u vona xiluva lexi byariweke exibyeni, lexi vonakaka xi omile, naswona xi vunile, u nga ha anakanya leswaku, “Vunghana byi fana ni ximilana. Leswaku xi kula kahle xi fanele xi cheletiwa.” Vanhu van’wana namuntlha va languta n’weti wu hlangane ni ku famba empfhukeni ntsena. Vakriste va wu languta tanihi lowu endliweke hi Xikwembu, xikwekwetsi-mpfhuka lexi tumbuluxiweke hi xona, nchumu lowu tshamaka hi laha ku nga heriki, nchumu lowu khumbaka vutomi bya hina bya siku na siku, wu vangela magandlati ya lwandle ku tlhela ni ku khuluka.
6 Loko u lunghiselela nkulumo, loko swifaniso leswi olovaka swi nga tsundzukeki hi xihatla, kambisisa mhaka leyi yelanaka eka tibuku ta Sosayiti ya Watch Tower. Vona loko swikombiso swi tirhisiwa kwalaho. Anakanya hi marito-nkulu enkulumeni ni swifaniso leswi ma swi tisaka emianakanyweni ya wena. Aka eka swona. Kambe tsundzuka, xifaniso lexi nga fanelekiki xi tlula hi loko ku nga ri na xifaniso nikatsongo. Loko u kambisisa “Swifaniso swi fanelekela mhaka,” leyi xaxametiweke eka fomo ya Ndzayo ya Nkulumo, ku na swivumbeko swo hlayanyana swa mhaka leyi leswi faneleke swi tsundzukiwa.
7-9. Ha yini swifaniso leswi olovaka swi humelela swinene?
7 Swa olova. Xifaniso lexi olovaka swa olova ku xi tsundzuka. Xi seketela nhlamuselo ematshan’wini yo onha hikwalaho ka ku rharhangana ka xona. Swifaniso swa Yesu hakanyingi a swi komile. (Hi xikombiso, vona Matewu 13:31-33; 24:32, 33.) Leswaku xi olova, marito lama tirhisiwaka ma fanele ma twisiseka. Loko xifaniso xi lava nhlamuselo yo tala, i ndzhwalo lowukulu swinene. Xi tshike kumbe u xi olovisa.
8 Yesu u tirhise swilo switsongo ku hlamusela swilo leswikulu, a tirhisa swilo swo olova ku hlamusela swilo swo nonon’hwa. Xifaniso xi fanele xi voniwa hi mahlo ya mianakanyo hi ku olova, ku nga ri na swilo swo tala leswi nyikeriwaka hi nkarhi wun’we. Xi fanele xi kongoma ni ku nyika nhlamuselo yin’we. Swifaniso swo tano a swi tali ku tirhisiwa hi laha ku hoxeke.
9 Xifaniso i xinene loko xi fambisana kahle ni mhaka leyi xi kunguhateriweke ku yi hlamusela. Loko xivumbeko xin’wana xa xifaniso xi nga fanelanga, swi nga ha antswa xi nga tirhisiwi. Un’wana u ta anakanya hi swivumbeko swa xona leswi nga fanelangiki, naswona xi ta lahlekeriwa hi matimba ya xona.
10, 11. Kombisa mhaka leyi ku tirha ka swifaniso ku faneleke ku vekiwa erivaleni ha yona.
10 Ku tirha ka swona ku anekiwa erivaleni. Loko xifaniso xi nga endliwi xi tirha, van’wana va nga ha yi twisisa yinhla kambe vo tala a va nge yi twisisi. Xivulavuri xi fanele xi xi twisisa kahle xifaniso xa xona naswona xi tiva xikongomelo xa xona. Xi fanele xi swi kota ku vula hi ku olova laha ntikelo wa xifaniso wu nga kona. (Vona Matewu 12:10-12.)
11 Xifaniso xi nga tirhisiwa hi tindlela to tala. Xi nga tirhisiwa ku simeka nsinya wa nawu lowu vekiweke hi ku olova emahlweni kumbe endzhaku ka xifaniso. Xi nga tirhisiwa hi ku kandziyisa vuyelo bya mhaka leyi hlamuseriwaka hi xifaniso. Kumbe xi nga tirhisiwa hi ku kokela nyingiso ntsena eka ku fana ka tinhla ta xifaniso ni mhaka.
12-14. I yini lexi nga ta pfuna ku vona xifaniso lexi fanelekaka?
12 Tinhla ta nkoka ti kandziyisiwa. U nga tirhisi xifaniso hi mhaka ya leswi u xi anakanyeke hi xitshuketa. Kambisisa nkulumo leswaku u tiva tinhla-nkulu ivi u hlawula swifaniso swo pfuna ku ti aneka erivaleni. Loko swifaniso swa matimba swi tirhisiwa eka tinhla letitsongo, vayingiseri va nga ha tsundzuka tinhla letitsongo ematshan’wini ya letikulu. (Vona Matewu 18:21-35; 7:24-27.)
13 Xifaniso a xi fanelanga xi fihla nhlamuselo. Xi nga ha va leswi vayingiseri va nga swi tsundzukaka, kambe loko xifaniso xi tsundzukiwa, ni yinhla leyi a ku kandziyisiwa yona yi fanele yi tsundzukiwa. Loko swi nga vi tano, xifaniso xi fihle mhaka.
14 Loko u lunghiselela nkulumo ni ku hlawula swifaniso, pima ntikelo wa xifaniso ni tinhla leti faneleke ku kandziyisiwa. Xana xi tiyisa tinhla leti? Xana xi ti endla ti xiyeka? Xana xi endla tinhla ti olova ku ti twisisa ni ku ti tsundzuka? Loko swi nga ri tano, xifaniso a xi faneleki.
**********
15, 16. Hlamusela mhaka leyi swifaniso swi faneleke swi fanelekela vayingiseri ha yona.
15 Swifaniso a swi fanelanga swi fanela mhaka ntsena kambe swi fanele swi fanela ni vayingiseri va wena. Leswi swi xaxametiwe etlhelo eka fomo ya xitsundzuxo tanihi “Swifaniso swi fanelekela vayingiseri.” Loko Natani a vitaneriwe ku ololoxa Davhida eka xidyoho xa yena na Batixeba, u hlawule xifaniso xa xisiwana ni xinyimpfana xa xona xin’we. (2 Sam. 12:1-6) Xifaniso lexi a xi nga ri xa vutlhari ntsena, kambe a xi fanela Davhida, tanihi leswi a a ri murisi. U twisise yinhla hi ku hatlisa.
16 Loko vanhu vo tala eka vayingiseri va ri lava dyuhaleke, swifaniso leswi nga ta tsakisa lavantshwa ntsena a swi fanelanga swi tirhisiwa. Kambe eka ntlawa wa swichudeni swa kholichi, swifaniso swo tano swi nga ha fanela kahle. Minkarhi yin’wana swifaniso swi nga tirhisiwa hi malangutelo mambirhi lama hambanaka ya vayingiseri, tanihi vanhu lava dyuhaleke ni lavantshwa, vavanuna ni vavasati.
17-19. Leswaku swifaniso swi tsakisa vayingiseri va wena, swi fanele swi tekiwa kwihi?
17 Swi kumiwa eswiyin’weni leswi tolovelekeke. Loko u tirhisa swilo leswi nga ekusuhi ku endla swifaniso, swi ta va leswi tolovelekeke eka vayingiseri va wena. Yesu u swi endlile leswi. Eka wansati exihlobyeni u fanise timfanelo ta yena leti nyikaka vutomi ni mati. U tirhise swilo leswitsongo evuton’wini, ku nga ri leswi hlawulekeke. Swifaniso swa yena hi ku olova swi hundzisele xifaniso emianakanyweni ya vayingiseri va yena, kumbe hi xihatla swi va tsundzuxe ntokoto wo karhi wa munhu hi xiyexe evuton’wini bya vona vini. U tirhise swifaniso leswaku a dyondzisa.
18 Swa fana ni namuntlha. Vavasati va mindyangu va nga ha ti tiva timhaka ta bindzu, kambe u endla kahle loko u kombisa nhlamuselo ya wena hi swilo leswi nga evuton’wini bya vona bya siku na siku, vana va vona, mintirho ya vona ya le kaya ni swilo leswi tirhisiwaka ekaya.
19 Swin’wana leswi humelelaka i swifaniso leswi sekeriweke eka xo karhi lexi nga xa kwalaho hi ku helela, kumbexana xi tolovelekile eka ndhawu yoleyo ntsena. Swiendlakalo swa nkarhi wolowo leswi tiviwaka kahle hi vanhu, tanihi leswi nga mahungu ya kwalaho, na swona swa faneleka loko swi amukeleka.
20-22. Boxa swihoxo swin’wana leswi faneleke ku papalatiwa eku tirhiseni ka swifaniso.
20 Swa amukeleka. Xifaniso xihi na xihi lexi tirhisiwaka, xi fanele xi fanela bulo ra Bibele. Kavula, swifaniso a swi fanelanga swi va “leswi kanakanisaka,” malunghana ni mahanyelo. Papalata swivulwa leswi nga ni tinhlamuselo timbirhi loko swi ta hlamuseriwa hi ndlela yin’wana. Ndlela leyinene yo yi landzela hi leyi: Loko xi kanakanisa, xi tshike.
21 Swifaniso a swi fanelanga swi hlundzukisa munhu wihi na wihi swi nga fanelanga eka vayingiseri va wena, ngopfu-ngopfu lava ha ku sungulaka ku hlanganyela. Hikwalaho ka leswi, a swi nge vi swinene ku pfuxa timhaka ta dyondzo yo karhi kumbe leti hambaneke leti kahle-kahle ti nga riki mphikamakaneta ebulwini ra wena. Hi xifaniso, a wu nge tirhisi xikombiso xo tanihi mpompelo wa ngati kumbe ku losa mujeko loko sweswo swi nga ri yinhla ya nkoka ya nkulumo. Un’wana a nga ha hambukisiwa kumbe a khunguvanyeka. Loko yinhla ya nkulumo ya wena yi bula hi timhaka to tano, sweswo hi swin’wana. Kutani u na nkarhi wo anakanyisisa ha tona ivi u khorwisa vayingiseri va wena. Kambe u nga onhi xikongomelo xa wena hi ku tshika swifaniso swa wena swi sivela vayingiseri va wena ku vona mintiyiso ya nkoka leyi u bulaka ha yona.
22 Kutani tirhisa vutlhari eku hlawuleni ka swifaniso swa wena. Tiyiseka leswaku swa faneleka. Swi ta faneleka loko swi fanela mhaka ya wena ni vayingiseri va wena.