Dyondzo 36
Ta Rhole Ra Nsuku
MANANOO! Xana vanhu lava a va endla yini? A va gandzela rhole! Ha yini va endle tano?
Loko Muxe a tshame nkarhi wo leha entshaveni, vanhu va te: ‘A hi tivi leswaku ku endleke yini hi Muxe. A hi tiendleleni xikwembu lexi nga ta hi rhangela xi hi humesa etikweni leri.’
Aroni, makwavo wa Muxe, u te: ‘Swi lulamile. Hluvulani swingwavila swa n’wina swa nsuku mi swi tisa eka mina.’ Loko vanhu va swi tisile, Aroni u swi n’okisile kutani a endla rhole ra nsuku. Hiloko vanhu va ku: ‘Lexi i Xikwembu xa hina, lexi hi rhangeleke xi hi humesa aEgipta!’ Kutani Vaisrayele va endle nkhuvo lowukulu, va gandzela rhole ra nsuku.
Loko Yehovha a vona sweswo, u karihe ngopfu. Hiloko a byela Muxe a ku: ‘Hatlisa u rhelela. Vanhu va endla swilo swo biha. Va rivale milawu ya mina naswona va nkhinsamela rhole ra nsuku.’
Muxe u rhelele entshaveni hi ku hatlisa. Kutani loko a fika ekusuhi, hi leswi leswi a swi vonaka. Vanhu a va yimbelela ni ku cina va rhendzele rhole ra nsuku! Muxe u hlundzuke ngopfu lerova u cukumete swiphepherhele swimbirhi swa maribye ehansi kutani swi fayeka. Hiloko a teka rhole ra nsuku a ri n’okisa. Kutani a ri sila ri va mapa.
Vanhu a va endle nchumu wo biha swinene. Kutani Muxe u byele vavanuna van’wana leswaku va teka matlhari ya vona. Muxe u te: ‘Vanhu vo biha lava gandzeleke rhole ra nsuku va fanele ku dlayiwa.’ Hiloko vavanuna va dlaya vanhu va 3 000! Hakunene leswi swi kombisa leswaku hi fanele ku gandzela Yehovha ntsena ku nga ri swikwembu hambi swi ri swihi swa mavunwa!