Swivutiso Swa Vahlayi

Leswi Yehovha a nga byi laviki vugandzeri bya swifaniso, ha yini a nga n’wi xupulanga Aroni loko a endle rhole ra nsuku?

Loko Aroni a endle rhole ra nsuku hilaha ku tsariweke hakona eka Eksoda ndzima 32, u tlule nawu wa Xikwembu malunghana ni ku gandzela swifaniso. (Eks. 20:3-5) Hikwalaho, ‘Yehovha u hlundzukele Aroni ngopfu ku fikela laha a a lava ku n’wi dlaya; kambe Muxe u kombelele Aroni hi nkarhi wolowo.’ (Det. 9:19, 20) Xana xikombelo xa wanuna wo lulama Muxe xi ve ni “matimba lamakulu” emhakeni ya Aroni? (Yak. 5:16) Ina. Swi tikomba onge Yehovha u xi hlamurile xikhongelo xa Muxe naswona a nga n’wi xupulanga Aroni hikwalaho ka xikombelo xexo ni hikwalaho ka swivangelo swin’wana swimbirhi.

Swi tikomba onge xivangelo xin’wana a xi fambisana ni rhekhodo ya ku tshembeka ka Aroni. Loko Muxe a lerisiwe ku ya eka Faro ni ku ya humesa Vaisrayele aEgipta, Yehovha u hlawule Aroni leswaku a famba na Muxe a tlhela a va muvulavuleri wa yena. (Eks. 4:10-16) Vavanuna lavambirhi va ye eka hosi ya le Egipta minkarhi yo tala, va boheka ku langutana na Faro wa mbilu yo nonon’hwa. Hikwalaho, loko a ha ri aEgipta, Aroni a a tiviwa hi ku tshembeka ni ku tiyimisela ku tirhela Yehovha.—Eks. 4:21.

Nakambe xiya leswi endleke leswaku Aroni a endla rhole ra nsuku. Muxe a a ri eNtshaveni ya Sinayi ku ringana masiku ya 40. Loko “vanhu va vona leswaku Muxe a a heta nkarhi wo leha ku rhelela entshaveni,” va kucetele Aroni leswaku a va endlela xifaniso. Aroni u pfumerile kutani a va endlela xifaniso xa rhole ra nsuku. (Eks. 32:1-6) Hambiswiritano, leswi Aroni a swi endleke endzhaku ka sweswo swi kombisa leswaku a a nga pfumelelani na yona mhaka yo gandzela xifaniso. Swi tikomba onge a a tshikileriwile. Hi xikombiso, loko Muxe a herisa mhaka ya ku gandzela swifaniso, vana hinkwavo va Levhi—ku katsa na Aroni—va yime na Yehovha. Vagandzeri va swifaniso vo ringana 3 000 lava a va ri na vutihlamuleri eku endliweni ka xifaniso xexo va dlayiwile.—Eks. 32:25-29.

Endzhaku ka sweswo Muxe u byele vanhu a ku: “Mi endle xidyoho lexikulu.” (Eks. 32:30) Hikwalaho, Aroni a ku nga ri yena ntsena loyi a a ri ni nandzu lowukulu. Yena swin’we ni vanhu van’wana va pfunekile hikwalaho ka tintswalo ta Yehovha letikulu.

Endzhaku ka mhaka ya ku endliwa ka rhole ra nsuku, Yehovha u lerise leswaku Aroni a va muprista lonkulu. Xikwembu xi byele Muxe xi ku: “U fanele u ambexa Aroni tinguvu to kwetsima u n’wi tota ni ku n’wi hlawulekisa, hikwalaho u ta va muprista wa mina.” (Eks. 40:12, 13) Swi le rivaleni leswaku Yehovha a a rivalele Aroni hikwalaho ka xihoxo xa yena. Embilwini ya yena Aroni a a ri museketeri la tshembekaka wa vugandzeri bya ntiyiso, ku nga ri muxandzuki la gandzelaka swifaniso.