Va Endle Ku Rhandza Ka Yehovha

Muxe Na Aroni—Vatwarisi Va Rito Ra Xikwembu Lava Nga Ni Xivindzi

ANAKANYA xivono lexi: Muxe wa malembe ya 80 hi vukhale ni makwavo Aroni, va yime emahlweni ka wanuna wa matimba swinene emisaveni—Faro wa Egipta. Eka Vaegipta wanuna loyi a ngo va muyimeri wa swikwembu ntsena. Va tshemba leswaku i xikwembu hi yexe. U langutiwa a ri Horus loyi a nga tlhela a tswariwa nakambe, xikwembu lexi nga ni nhloko ya xikhozana. Horus na Isis swin’we na Osiris, va vumba vunharhu-un’we lebyikulu exikarhi ka swikwembu na swikwembu-kati swa Egipta.

Un’wana ni un’wana loyi a tshinelelaka Faro u ta xi vona kahle xifaniso xa nhloko ya xivatlankombe lexi nga ni khombo lexi vonakaka exikarhi ka harhi yakwe ya vuhosi. A ku tshembiwa leswaku, nyoka leyi yi nga humesa ndzilo ni ku lovisa valala vahi na vahi va Faro. Sweswi Muxe na Aroni va te emahlweni ka hosi leyi nga xikwembu ni xikombelo xa vona lexikulu—leswaku a ntshunxa Vaisrayele lava nga evuhlongeni leswaku va ya endlela Yehovha, Xikwembu xa vona nkhuvo.—Eksoda 5:1.

Ana Yehovha a vhumbile leswaku Faro u ta nonon’hwisa mbilu yakwe. Hikwalaho, Muxe na Aroni a va hlamarisiwanga hi nhlamulo yakwe leyi tlhontlhaka: “Yehova i mani leŝaku nḍi yingisa rito ra yena, nḍi ṭhika Israel a famba? Yehova a nḍi ṅwi tiv̌i, na Israel nḍi nga ka nḍi nga ṅwi ṭhiki a famba.” (Eksoda 4:21; 5:2) Xisweswo, xiteji xi lulamisiwile leswaku ku ta va ni xivono xa njhekanjhekisano lowukulu. Eka nhlangano lowu tlhandlamaka, Muxe na Aroni va nyikele vumbhoni lebyi hlamarisaka eka Faro bya leswaku va yimela Xikwembu xa ntiyiso ni xa matimba hinkwawo.

Singita Ri Humelela

Hi laha a leteriweke ha kona hi Yehovha, Aroni u endle singita leri kombiseke vukulukumba bya Yehovha eka swikwembu swa Egipta. U hoxe nhonga yakwe emahlweni ka Faro, naswona hi ku hatlisa yi hundzuke nyoka leyikulu! Hi ku hlamarisiwa hi singita leri, Faro u vitane vangoma vakwe lava endlaka masingita.a Hi ku pfuniwa hi matimba ya mademona, vavanuna lava va kote ku endla leswi fanaka hi tinhonga ta vona.

Hambi leswi Faro ni vangoma vakwe va tidzuniseke, a ku ri mhaka ya xinkarhana. Anakanya ku languteka ka tinghohe ta vona loko nyoka ya Aroni yi mitetela tinyoka ta vona, ha yin’we yin’we! Hinkwavo lava a va ri kona va kote ku vona leswaku swikwembu swa Vaegipta a swi ringani na Yehovha, Xikwembu xa ntiyiso.—Eksoda 7:8-13.

Kambe, hambi ku ri endzhaku ka leswi, Faro u hambete a nonon’hwisa mbilu yakwe. Hi le ndzhaku ka loko Xikwembu xi tise makhombo ya khume lama dlayaka, kumbe mintungu, ehenhla ka Egipta laha eku heteleleni Faro a byeleke Muxe na Aroni a ku: “Sukani tikweni ra mina, ṅwina ni v̌ana v̌a Israel, mi ya tirela Yehova hi laha mi nga v̌ula ha kona.”—Eksoda 12:31.

Leswi Hi Dyondzaka Swona

I yini lexi pfuneke Muxe na Aroni leswaku va kota ku tshinelela Faro wa matimba wa Egipta? Eku sunguleni, Muxe u phofule ku ka a nga titshembi eka vuswikoti bya yena, a vula leswaku “[u ni] nomu wo tika, ni ririmi ro nonoṅhwa.” Hambi endzhaku ko va a tiyisekisiwile hi nseketelo wa Yehovha, u komberile: “Ruma loyi u ranḍaka ku ṅwi ruma.” Hi marito man’wana, Muxe u kombele leswaku Xikwembu xi rhuma munhu un’wana. (Eksoda 4:10, 13) Hambi swi ri tano, Yehovha u tirhise Muxe la titsongahataka, a n’wi nyika vutlhari ni matimba lama lavekaka leswaku a endla ntirho wa yena.—Tinhlayo 12:3.

Namuntlha, malandza ya Yehovha Xikwembu na Yesu Kreste ma nyikiwe xileriso xa ku “[ya] eka vamatiko hinkwavo, [ma] va endla vadyondzisiwa.” (Matewu 28:19, 20) Leswaku hi endla xiphemu xa hina eku hetisiseni ka xileriso lexi, hi fanele hi tirhisa vutivi bya Matsalwa ni vuswikoti lebyi hi nga na byona hi ndlela leyinene. (1 Timotiya 4:13-16) Ematshan’weni yo langutisisa ku tsana ka hina, a hi amukeleni xiavelo xin’wana ni xin’wana lexi hi nyikiwaka xona hi Xikwembu hi ku tshembeka. Xi ta hi letela ni ku hi tiyisa leswaku hi endla ku rhandza ka xona.—2 Vakorinto 3:5, 6; Vafilipiya 4:13.

Tanihi leswi Muxe a a boheka ku lwisana ni nkaneto wa vanhu ni wa mademona, entiyisweni a a lava mpfuno wa matimba yo tlula ya munhu. Xisweswo, Yehovha u n’wi tiyisekisile: “V̌ona, nḍi ku v̌ekile Šikwembu e ka Faro.” (Eksoda 7:1) Ina, Muxe a a ri ni matimba ni nseketelo wa Xikwembu. Hikwalaho ka leswi a ri ni moya wa Yehovha, Muxe a a nga fanelanga a chava Faro kumbe vaseketeri va yena lava tikurisaka.

Na hina hi fanele hi tshembela eka moya wa Yehovha lowo kwetsima, kumbe matimba lama tirhaka, leswaku hi hetisisa vutirheli bya hina. (Yohane 14:26; 15:26, 27) Hi nseketelo wa Xikwembu hi nga phindha marito ya Davhida, loyi a yimbeleleke a ku: “Nḍi ṭhemba Šikwembu, a nḍi tšhav̌i ntšhumu; v̌anhu v̌a nga nḍi endla yini šana?”—Pisalema 56:11.

Hikwalaho ka tintswalo ta yena, Yehovha a nga n’wi tshikanga a ri yexe Muxe exiavelweni xa yena. Ku ri na sweswo, Xikwembu xi te: “Arone, makwenu, o ta v̌a muprofeta wa wena. U ta v̌ula hikwaŝo leŝi nḍi nga ta ku lerisa ŝona, yena Arone makwenu o ta byela Faro.” (Eksoda 7:1, 2) Mawaku rirhandzu leri Yehovha a ri kombiseke hi ku endla hi ku pfumelelana ni leswi Muxe a a ta kota ku swi endla!

Xikwembu xi hi nyika Vakreste-kulorhi lava hi nga hlanganyelaka na vona lava amukelaka mphikamakaneta ya ku va Timbhoni ta Yehovha, la Tlakukeke Swinene. (1 Petro 5:9) Hikwalaho, ku nga khathariseki swihinga leswi hi nga ha langutanaka na swona, a hi veni lava fanaka na Muxe na Aroni—vatwarisi va rito ra Xikwembu lava nga ni xivindzi.

[Nhlamuselo ya le hansi]

[Xifaniso lexi nga eka tluka 25]

Muxe na Aroni va yimele Yehovha hi xivindzi emahlweni ka Faro