Dyondzo 53
Xitshembiso Xa Yefta
XANA u tshame u endla xitshembiso kutani hi ku famba ka nkarhi u kuma swi tika ku xi hetisisa? Wanuna loyi a nga laha xifanisweni u endle tano, hi yona mhaka leyi a twaka ku vava. Wanuna loyi i muavanyisi la nga ni xivindzi wa le Israyele la vuriwaka Yefta.
Yefta u hanye enkarhini lowu Vaisrayele a va nga n’wi gandzeli Yehovha. Nakambe a va endla swo biha. Kutani Yehovha u pfumelele Vaamone va va xanisa. Sweswo swi endle leswaku Vaisrayele va rila eka Yehovha va ku: ‘Hi ku dyoherile. Hi kombela u hi ponisa!’
Vanhu a va tisola hikwalaho ka vubihi lebyi va byi endleke. Va kombise leswaku va tisola hi ku tlhela va gandzela Yehovha. Kutani Yehovha u tlhele a va pfuna.
Yefta u hlawuriwe hi vanhu leswaku a lwa ni Vaamone vo biha. Yefta a a swi lava hi mbilu yakwe hinkwayo leswaku Yehovha a n’wi pfuna ku lwa. Xisweswo u tshembise Yehovha a ku: ‘Loko wo endla leswaku ndzi hlula Vaamone, munhu wo sungula la nga ta huma endlwini ya mina a ta ndzi hlanganisa loko ndzi vuya enyimpini ndzi ta ku nyika yena.’
Yehovha u yingise xitshembiso xa Yefta kutani a n’wi pfuna leswaku a hlula. Loko Yefta a vuyela ekaya, xana wa swi tiva leswaku i mani loyi a humeke ku sungula a ta n’wi hlanganisa? A ku ri n’wana wakwe wa nhwanyana la tswariweke a ri swakwe. Yefta u rile a ku: ‘Oho n’wananga! Kunene u ndzi khomise gome. Kambe ndzi endle xitshembiso eka Yehovha naswona a ndzi nge swi koti ku tlhelela endzhaku.’
Loko n’wana wa Yefta a twa xitshembiso xa tata wakwe, na yena u khomiwe hi gome. Sweswo swi vula leswaku a a fanele a sukela tata wakwe ni vanghana va yena. Nakambe a a ta heta vutomi bya yena hinkwabyo a tirhela Yehovha etabernakeleni ya le Xilo. Hiloko a byela tata wakwe a ku: ‘Loko u endle xitshembiso eka Yehovha, u fanele u xi hetisisa.’
Xisweswo n’wana wa Yefta u ye eXilo naswona u tirhele Yehovha vutomi byakwe hinkwabyo etabernakeleni. Vavasati va le Israyele a va n’wi endzela masiku ya mune lembe ni lembe, naswona a va tsaka na yena. Vanhu a va n’wi rhandza n’wana wa Yefta hikuva a a ri nandza lonene wa Yehovha.