U Tsakise Tata Wakwe Swin’we Na Yehovha

Xana wa n’wi vona nhwanyana loyi a nga exifanisweni?— I n’wana wa nhwanyana wa wanuna la vuriwaka Yefta. Bibele a yi hi byeli vito rakwe, kambe ha swi tiva leswaku u tsakise tata wakwe swin’we na Yehovha. A hi dyondzi ha yena swin’we ni tata wakwe Yefta.

Yefta a a ri wanuna lonene naswona u hete nkarhi wo tala a ri karhi a dyondzisa n’wana wakwe wa nhwanyana hi Yehovha. Nakambe a a ri wanuna wa matimba tlhelo murhangeri lonene. Kutani Vaisrayele va n’wi kombele leswaku a va rhangela loko va lwa ni valala va vona.

Yefta u khongele eka Xikwembu leswaku xi n’wi pfuna a hlula. Yefta u tshembise leswaku loko o hlula, a a ta nyika Yehovha munhu wo sungula loyi a a ta huma endlwini yakwe loko a tlhelela ekaya. Munhu loyi a a ta tshama ni ku tirha etabernakeleni ya Xikwembu vutomi byakwe hinkwabyo. Hi nkarhi wolowo tabernakela a ku ri ndhawu leyi vanhu a va ya eka yona leswaku va ta gandzela Xikwembu. Kutani Yefta u hlurile enyimpini! Xana wa swi tiva leswaku i mani loyi a rhangeke a huma endlwini yakwe loko a tlhelela ekaya?—

Hakunene i n’wana wa Yefta wa nhwanyana! A a ri n’wana wakwe loyi a velekiweke a ri swakwe naswona sweswi Yefta a a fanele a n’wi rhumela ekule. Leswi swi endle leswaku a twa ku vava swinene. Kambe tsundzuka, a a endle xitshembiso. Xikan’we-kan’we, n’wana wakwe wa nhwanyana u te: ‘Tatana, u endle xitshembiso eka Yehovha, kutani u fanele u xi hetisisa.’

N’wana wa Yefta na yena u twe ku vava. Etabernakeleni, a nga ta tekiwa naswona a nga ta va na vana. Kambe a a lava ku hetisisisa xitshembiso xa tata wakwe kutani a tsakisa Yehovha. Sweswo a swi ri swa nkoka swinene eka yena ku tlula ku tekiwa kumbe ku va ni vana. Kutani u suke ekaya a ya tshama etabernakeleni vutomi byakwe hinkwabyo.

Xana u ehleketa leswaku leswi a swi endleke swi tsakise tata wakwe swin’we na Yehovha?— Ina swi va tsakisile! Loko u yingisa naswona u rhandza Yehovha u nga fana ni n’wana wa Yefta. Na wena u ta va tsakisa swinene vatswari va wena swin’we na Yehovha.