Dyondzo 61

Davhida A Endliwa Hosi

SAWULO u tlhele a ringeta ku khoma Davhida. U teka masocha yakwe ya 3 000 a ya lava Davhida. Loko Davhida a swi twa, u rhume tinhlori ti ya lava laha Sawulo ni vavanuna lava a a ri na vona va goveke kona vusiku byebyo. Hiloko Davhida a vutisa vavanuna lava a a ri na vona a ku: ‘I mani la nga ta famba na mina enxaxeni wa Sawulo?’

Abixayi u hlamule a ku: ‘Hi mina.’ Abixayi i n’wana wa sesi wa Davhida, la vuriwaka Seruya. Loko Sawulo ni vavanuna vakwe va ha etlele, Davhida na Abixayi va nyandlamele va nghena enxaxeni. Va teke tlhari ra Sawulo ni gula ra yena ra mati, leswi a swi ri ekusuhi ni nhloko ya Sawulo. A ku na loyi a va voneke kumbe a va tweke tanihi leswi hinkwavo a va file hi vurhongo.

Hi luya Davhida na Abixayi. Va balekile, naswona va hlayisekile ehenhla ka xintshabyana. Davhida u huwelele ndhuna ya nyimpi ya Israyele, a ku: ‘Abinere, ha yini u nga sirheleli n’wini wa wena, ku nga hosi? Languta! Ri kwihi tlhari ra yona ni gula ra yona ra mati?’

Hiloko Sawulo a pfuka. U twe rito ra Davhida, kutani a vutisa a ku: ‘Xana hi wena Davhida?’ Xana wa va vona Sawulo na Abinere lahaya hansi?

Davhida a hlamula Sawulo a ku: ‘Ina, hosi yanga.’ Kutani Davhida a vutisa a ku: ‘Ha yini u lava ku ndzi khoma? Xana ndzi dyohe yini? Hi leri tlhari ra wena, Wee hosi. Rhuma un’wana wa vavanuna lava nga na wena a ta ri teka.’

Sawulo u te: ‘Ndzi dyohile. Ndzi endle vuphukuphuku.’ Hiloko Davhida a tifambela, Sawulo na yena a tlhelela ekaya. Kambe Davhida a ku: ‘Siku rin’wana Sawulo u ta ndzi dlaya. Ndzi fanele ndzi balekela etikweni ra Vafilisita.’ Kutani a endla tano. Davhida u xise Vafilisita a endla onge se a a yima na vona.

Endzhakunyana Vafilisita va tlhandluke va ya lwa ni Vaisrayele. Sawulo na Yonathani va dlawa enyimpini ya kona. Leswi swi twise Davhida ku vava lokukulu, kutani u tsale risimu ro nandziha, a yimbelela a ku: ‘Ndzi karhatekile hikwalaho ka wena, makwerhu Yonathani. A ndzi ku rhandza ngopfu!’

Endzhaku ka sweswo Davhida u tlhelele eIsrayele emutini wa Hebroni. Ku ve ni nyimpi exikarhi ka vavanuna lava hlawuleke Ixi-boxeti n’wana Sawulo leswaku a va hosi ni lava a va lava leswaku Davhida a va hosi. Eku heteleleni lava hlawuleke Davhida va hlurile. Davhida a a ri ni malembe ya 30 loko a va hosi. U fume eHebroni ku ringana malembe ya nkombo ni hafu. Vana va yena van’wana a ku ri Aminoni, Absalomu na Adoniya.

Ku fike nkarhi lowu Davhida ni vavanuna lava a va ri na yena va fambeke va ya hlasela muti wo saseka wa Yerusalema. Yowabu n’wana un’wana wa Seruya sesi wa Davhida a a rhangela enyimpini yoleyo. Kutani Davhida u hakele Yowabu hi ku n’wi endla ndhuna ya nyimpi yakwe. Hiloko Davhida a sungula ku fuma emutini wa Yerusalema.

1 Samuwele 26:1-25; 27:1-7; 31:1-6; 2 Samuwele 1:26; 3:1-21; 5:1-10; 1 Tikronika 11:1-9.