Davhida Na Sawulo

Endzhaku ka loko Davhida a dlaye Goliyadi, Hosi Sawulo u n’wi veke leswaku a va murhangeri wa masocha yakwe. Davhida u hlule tinyimpi to tala, kutani sweswo swi endle leswaku a duma. Nkarhi ni nkarhi loko Davhida a vuya enyimpini, vavasati a va huma kutani va cina va tlhela va yimbelela, va ku: ‘Sawulo u dlaye magidi, kambe Davhida u dlaye makume ya magidi!’ Sweswo swi endle leswaku Sawulo a venga Davhida a tlhela a lava ku n’wi dlaya.

Davhida a a kota ku tlanga haripa. Siku rin’wana loko Davhida a ri karhi a tlangela Sawulo haripa, hosi yoleyo yi lave ku n’wi tlhava hi tlhari. Davhida u vhikile, kutani tlhari rero ri tlhava khumbi. Endzhaku ka sweswo, Sawulo u ringete ko tala ku dlaya Davhida. Davhida u hetelele a balekile a ya tumbela emananga.

Sawulo u teke masocha ya 3 000 a ya hlota Davhida. Siku rin’wana u nghene ebakweni leri Davhida ni vavanuna vakwe a va tumbele eka rona. Vavanuna lava a va ri na Davhida va hlevetele va ku: ‘Lowu i nkarhi wa leswaku u dlaya Sawulo.’ Davhida u nyandlamerile kutani a tsema xiphemu xa xiambalo xa hosi. Sawulo a nga twanga nchumu. Davhida u biwe hi ripfalo hikwalaho ka leswi a nga xiximangiki hosi leyi hlawuriweke hi Yehovha. A nga va pfumelelanga vavanuna vakwe leswaku va dlaya Sawulo. U tlhele a huwelela Sawulo a n’wi byela leswaku a a ta va a n’wi dlayile Sawulo kambe a nga swi lavanga. Xana sweswo a swi ta endla leswaku Sawulo a cinca langutelo rakwe hi Davhida?

Doo! Sawulo u ye emahlweni a lavana na Davhida. Vusiku byin’wana, Davhida na Abixayi n’wana wa makwavo wa yena wa xisati, va nyandlamele va ya laha Sawulo a dzime kona nxaxa. Hambi ku ri Abinere murindzi wa Sawulo a a etlele. Abixayi u te: ‘Lowu hi wona nkarhi wa kahle! Inge ndzi n’wi dlaya.’ Davhida u te: ‘Yehovha hi yena a nga ta n’wi avanyisa. A hi teke tlhari rakwe ni gula rakwe ra mati ntsena hi famba.’

Davhida u khandziye ntshava leyi a yi ri ekusuhi ni laha Sawulo a dzime kona nxaxa wakwe. U huwelele a ku: ‘Abinere, hikwalaho ka yini u nga yi sirhelelanga hosi ya wena? Gula rakwe ra mati ni tlhari swi kwihi?’ Sawulo u hatle a swi xiya leswaku a ku ri Davhida, kutani a ku: ‘A wu ta va u ndzi dlayile, kambe a wu ndzi dlayanga. Ndza swi tiva leswaku u ta va hosi leyi landzelaka ya Israyele.’ Sawulo u tlhelele ekaya kakwe. Kambe a hi hinkwavo endyangwini wa Sawulo lava a va venga Davhida.