Dyondzo 73
Hosi Leyinene Yo Hetelela eIsrayele
YOSIYA a a ri ni malembe ya nhungu ntsena loko a sungula ku fuma emfun’weni wa le dzongeni wa tinyimba timbirhi eIsrayele. A ha ri ntsongo swinene leswaku a va hosi. Eku sunguleni a a pfuniwa hi vanhu lavakulu ku fuma tiko.
Loko Yosiya a fume malembe ya nhungu u sungule ku lava Yehovha. U landzele xikombiso lexinene xa tihosi to fana na Davhida, Yoxafati na Hezekiya. Loko Yosiya a ha ri emalembeni ya kondlo-a-ndzi-dyi, u endle nchumu lowukulu lowu lavaka xivindzi.
Ku hundze nkarhi wo leha Vaisrayele vo tala va endla leswo homboloka. A va gandzela swikwembu swa mavunwa. A va nkhinsamela swifaniso. Kutani Yosiya u hume ni vavanuna lava a a ri na vona va sungula ku susa vugandzeri bya mavunwa etikweni. Lowu a ku ri ntirho lowukulu hikuva vanhu vo tala a va gandzela swikwembu swa mavunwa. Wa n’wi vona Yosiya ni vavanuna lava a a ri na vona laha va fayetela swifaniso swa hava.
Endzhakunyana, Yosiya u veke vavanuna vanharhu leswaku va lunghisa tempele ya Yehovha. Mali leyi hlengeletiweke evanhwini yi nyikiwe vavanuna lava leswaku va ya emahlweni ni ntirho. Loko va ri karhi va tirha etempeleni, Hilkiya muprista lonkulu u kume nchumu wa nkoka kwalaho. A ku ri buku ya nawu leyi Yehovha a leriseke Muxe leswaku a yi tsala khale swinene. A ku hundze malembe yo tala yi lahlekile.
Buku leyi yi yisiwe eka Yosiya, kutani u kombele leswaku va n’wi hlayela yona. Loko a ri karhi a yingiserile, Yosiya u swi vonile leswaku vanhu a va tlula nawu wa Yehovha. Sweswo swi n’wi hlundzukise ngopfu, hiloko a handzula nguvu yakwe, hilaha u n’wi vonaka hakona laha. U te: ‘Yehovha u hi hlundzukerile, hikuva vatata wa hina a va yi hlayisanga milawu leyi tsariweke ebukwini leyi.’
Yosiya u byele muprista lonkulu Hilkiya ku ya vutisa Yehovha leswi a nga ta va endla swona. Hilkiya u ye eka Hulida muprofeta wa xisati, a ya n’wi vutisa. Hulida u n’wi byele rungula leri humaka eka Yehovha leswaku a ri byela Yosiya: ‘Yerusalema ni vanhu hinkwavo lava akeke kona va ta xupuriwa hikuva va gandzele swikwembu swa mavunwa naswona tiko ri tele hi vuhomboloki. Kambe, leswi wena Yosiya u endleke leswinene, ndzi ta tisa khombo leri endzhaku ka loko u file.’