Yosiya A A Rhandza Nawu Wa Xikwembu

Yosiya u ve hosi ya le Yuda loko a ri ni malembe ya nhungu. Eminkarhini yoleyo, vanhu a va endla masalamusi va tlhela va gandzela swifaniso. Loko Yosiya a ri ni malembe ya 16, u ringete ku dyondza ku gandzela Yehovha hi ndlela leyinene. Loko a ri ni malembe ya 20, u sungule ku herisa swifaniso ni tialitari etikweni hinkwaro. Naswona loko Yosiya a ri ni malembe ya 26, u hlele leswaku tempele ya Yehovha yi lunghisiwa.

Etempeleni, Hilkiya, muprista lonkulu u kume buku leyi songiwaka leyi nga ni Nawu wa Yehovha—kumbexana a yi tsale hi Muxe. Xafani matsalana wa hosi u yise buku yoleyo eka Yosiya kutani a sungula ku wu hlayela ehenhla Nawu. Loko Yosiya a yingiserile, u swi xiyile leswaku vanhu a va ri ni malembe yo tala va nga n’wi yingisi Yehovha. Hosi Yosiya u byele Hilkiya a ku: ‘Yehovha u hi hlundzukerile swinene. Famba u ya vulavula na yena. Yehovha u ta hi byela leswi hi faneleke hi swi endla.’ Yehovha u hlamule hi ku tirhisa muprofeta wa xisati Hulida a ku: ‘Vanhu va le Yuda va ndzi xandzukerile. Va ta xupuriwa, kambe ku nga ri enkarhini wa ku fuma ka Yosiya, hikuva u titsongahatile.’

Loko Hosi Yosiya a twa rungula rero, u ye etempeleni kutani a byela vanhu va le Yuda leswaku va hlengeletana. U hlayele tiko hinkwaro Nawu wa Yehovha hi rito ra le henhla. Yosiya ni vanhu va tshembise leswaku va ta yingisa Yehovha hi timbilu ta vona hinkwato.

Tiko ra Yuda a ri ri ni malembe yo tala ri nga ha yi tlangeli Paseka. Kambe loko Yosiya a hlaye eNawini leswaku Paseka yi fanele yi tlangeriwa lembe ni lembe, u byele tiko a ku: ‘Hi ta endlela Yehovha Paseka.’ Kutani Yosiya u lunghekele ku endla magandzelo yo tala a tlhela a hlela leswaku ku va ni ntlawa wa vanhu vo yimbelela etempeleni. Tiko ri endle Paseka leyi landzeriweke hi Nkhuvo wa Swinkwa leswo kala Comela, lowu tekeke masiku ya nkombo. A ku nga si tshama ku endliwa Paseka yo fana na yona ku sukela eminkarhini ya Samuwele. Hakunene Yosiya a a wu rhandza Nawu wa Xikwembu. Xana wa swi rhandza ku dyondza hi Yehovha?