Xiphemu 6

Ku Velekiwa Ka Yesu Ku Ya Eku Feni Kakwe

Ntsumi Gabriyele a yi rhumiwe eka wansati lonene la vuriwaka Mariya. Yi n’wi byele leswaku u ta veleka n’wana loyi a nga ta va hosi hilaha ku nga heriki. N’wana yoloye, la vuriwaka Yesu, u velekeriwe exivaleni, laha varisi va n’wi endzeleke kona. Hi ku famba ka nkarhi, nyeleti yi kongomise vanhu lava humaka eVuxeni va ya laha n’wana a a ri kona. Hi ta dyondza leswaku i mani a endleke leswaku va vona nyeleti yoleyo, ni ndlela leyi Yesu a ponisiweke ha yona tanihi leswi a va lava ku n’wi dlaya.

Endzhaku ka sweswo, hi ta vona Yesu loko a ri ni malembe ya 12, a ri karhi a vulavula ni vadyondzisi etempeleni. Endzhaku ka malembe ya 18, Yesu u khuvuriwile kutani a sungula ntirho lowu Xikwembu xi n’wi rhumeke leswaku a ta wu endla emisaveni wa ku chumayela ni ku dyondzisa hi ta Mfumo. Yesu u hlawule vavanuna va 12 leswaku va n’wi pfuna entirhweni lowu, kutani a va endla vaapostola vakwe.

Nakambe Yesu u endle masingita yo tala. U phamele magidi ya vanhu hi tinhlampfi tintsongo ni hi swinkwa swi nga ri swingani ntsena. U tshungule lava vabyaka a tlhela a pfuxa lava feke. Eku heteleleni, hi ta dyondza hi ta swilo swo tala leswi Yesu a langutaneke na swona emasikwini yo hetelela ya vutomi byakwe ni ndlela leyi a dlayiweke ha yona. Yesu u chumayele kwalomu ka malembe manharhu ni hafu, kutani XIPHEMU 6 xi hlanganisa nkarhi lowu tlulaka katsongo malembe ya 34.