Dyondzo 84
Ntsumi Yi Endzela Mariya
WANSATI loyi wo saseka i Mariya. I Muisrayele la tshamaka emutini wa Nazareta. Xikwembu xa swi tiva leswaku i munhu lonene ngopfu. Hi yona mhaka leyi xi rhumeleke ntsumi ya xona Gabriyele leswaku yi ta vulavula na yena. Xana wa swi tiva leswaku Gabriyele u tele ku ta n’wi byela yini Mariya? A hi voneni.
Gabriyele u vule marito lawa eka yena: “Xewani, wena loyi a tsakeriweke swinene. Yehovha u na wena.” Mariya a a sungula ku vona munhu loyi. A a karhatekile, hikuva a a nga swi tivi leswaku u vula yini. Kambe hi ku hatlisa Gabriyele u n’wi khongoterile.
U te: ‘U nga chavi, Mariya. Yehovha u ku tsakerile swinene. Hi yona mhaka leyi a lavaka ku ku endlela nchumu wo hlamarisa. U ta kuma n’wana ku nga ri khale. Kutani u ta n’wi thya vito ra Yesu.’
Gabriyele u ye emahlweni a hlamusela, a ku: ‘N’wana loyi u ta va lonkulu naswona u ta vuriwa N’wana wa Xikwembu lexi nge Henhla-henhla. Yehovha u ta n’wi endla hosi ku fana na Davhida. Kambe Yesu u ta va hosi hilaha ku nga heriki, naswona mfumo wakwe a wu nge vi na makumu!’
Mariya u vutise a ku: ‘Xana leswi swi ta endlekisa ku yini? A ndzi tekiwanga. A ndzi si tshama ndzi etlela ni wanuna, xisweswo ndzi nga n’wi kumisa ku yini n’wana?’
Gabriyele u hlamule a ku: ‘Matimba ya Xikwembu ma ta ta eka wena. Hikwalaho ka sweswo, n’wana wa kona u ta vuriwa N’wana wa Xikwembu.’ Hiloko a byela Mariya a ku: ‘Tsundzuka xaka ra wena Elizabeta. Vanhu a va vula leswaku a a dyuharile, a nge he kumi n’wana. Kambe ku nga ri khale u ta va ni n’wana. Kutani waswivo, a wu kona nchumu lowu nga tsandzaka Xikwembu.’
Hiloko Mariya a ku: ‘Ndzi hlonga ra xisati ra Yehovha! Onge swi nga endleka eka mina hi ku ya hi leswi u swi vuleke.’ Hiloko ntsumi yi famba.
Mariya u tsutsumile a endzela Elizabeta. Loko Elizabeta a twa rito ra Mariya, ricece leri a ri ri ekhwirini ra Elizabeta ri sungule ku tlula-tlula hikwalaho ko tsaka. Elizabeta u tale hi moya wa Xikwembu kutani u byele Mariya a ku: ‘U kateke hi ndlela yo hlawuleka exikarhi ka vavasati.’ Mariya u tshame na Elizabeta tin’hweti tinharhu, kutani a tlhelela ekaya eNazareta.
Se a ku ri nkarhi wa leswaku Mariya a tekiwa hi wanuna la vuriwaka Yosefa. Kambe loko Yosefa a twa leswaku Mariya u ta kuma n’wana, a a nga ha lavi ku n’wi teka. Hiloko ntsumi ya Xikwembu yi ku eka yena: ‘U nga chavi ku teka Mariya a va nsati wa wena. Hikuva n’wana yoloye u huma eka Xikwembu.’ Kutani Mariya na Yosefa va tekanile naswona va rindza leswaku Yesu a tswariwa.