Ndzima 2

U Xiximiwe A Nga Si Velekiwa

ENDZHAKU ka loko ntsumi Gabriyele yi byele wanhwana Mariya leswaku u ta veleka n’wana wa mufana loyi a nga ta va hosi hi laha ku nga heriki, Mariya wa vutisa: “Swi nga endlekisa ku yini, leswi ndzi nga si tivanaka ni wanuna ke?”

Gabriyele wa hlamusela a ku: “Moya lowo kwetsima wu ta xikela ka wena ni matimba ya Loyi-a-nge-henhla-henhla ma ta ku funengeta; hikwalaho n’wana lowo hlawuleka loyi a nga ta velekiwa, u ta vuriwa N’wana wa Xikwembu.”

Ku pfuna Mariya leswaku a tshemba rungula ra yena, Gabriyele u ya emahlweni a ku: “Kutani tiva leswaku xaka ra wena Elizabeta na yena u tikile eku dyuhaleni ka yena; n’hweti leyi i ya vu-6 eka yena loyi a a vuriwa mhika, hikuva a ku na xilo na xin’we lexi hlulaka Xikwembu.”

Mariya u amukela rito ra Gabriyele. Kutani hi yihi nhlamulo ya yena? Wa huwelela a ku: “Hi swona, ndzi nandza wa [Yehova]; a ku endliwe ka mina hi laha u nga vula ha kona.”

Endzhakunyana ka loko Gabriyele a sukile, Mariya wa lunghiselela kutani a endzela Elizabeta, loyi a a tshama ni nuna wa yena, Zakariya, etikweni ra tintshava ra Yudiya. Ku suka ekaya ka Mariya eNazareta, leri i riendzo ro leha ra masiku manharhu kumbe mune.

Loko Mariya eku heteleleni a fika endlwini ya Zakariya, wa nghena kutani a xeweta. Hi sweswo, Elizabeta u tala hi moya lowo kwetsima, kutani u ri eka Mariya: “U katekile exikarhi ka vavasati, ku katekile ni n’wana la nge ndzeni ka wena. Swi endlekisa ku yini leswaku mana wa Hosi yanga a ta eka mina xana? Loko ku xeweta ka wena ku fikile etindleveni ta mina, n’wana u tshukatshukile hi ku tsaka endzeni ka mina.”

Hi ku twa leswi, Mariya u hlamula hi mbilu leyi taleke ntsako a ku: “Mbilu yanga yi dzunisa [Yehova], ni moya wa mina wu titsakela eka Xikwembu, muponisi wanga. Hikuva u langutile vusiwana bya mina nandza wa yena, kutani ku sukela sweswi, vanhu va minkarhi hinkwayo va ta ku, ndzi katekile.” Hambi swi ri tano, ku nga khathariseki tintswalo leti a kombiwaka tona, Mariya u yisa xichavo hinkwaxo eka Xikwembu. U ri: “Vito ra yena ri hlawulekile ni tintswalo ta yena i ta minkarhi ni minkarhi eka lava va n’wi chavaka.”

Mariya u ya emahlweni a dzunisa Xikwembu hi risimu leri huhuteriweke ra vuprofeta a ku: “U tirhile hi matimba hi voko ra yena, u hangalasile lava tikurisaka eku anakanyeni ka vona. Tihosi ta matimba u ti susile eswiluvelweni swa tona, kutani u tlakusile lava titsongahataka. Lava nga ni ndlala u va phamerile leswo nandziha, va dya va xurha, kambe lavo fuma u va tlakusile va nga ri na nchumu, u lwerile Israyele nandza wa yena, hi ku anakanya tintswalo ta yena, leti a ti tshembiseke vatata wa hina, a nga Abrahama ni rixaka ra hina hi laha ku nga heriki.”

Mariya u tshama na Elizabeta ku ringana tin’hweti tinharhu, naswona handle ko kanakana i mpfuno lowukulu enkarhini lowu wa mavhiki yo hetelela ya ku tika ka Elizabeta. Entiyisweni swi lulamile leswaku vavasati lava vambirhi vo tshembeka, lava hinkwavo va rhwaleke n’wana hi mpfuno wa Xikwembu, va nga va swin’we enkarhini lowu wa minkateko ya vutomi bya vona!

Xana u ku xiyile ku xixima loku ku nyikiweke Yesu hambi a nga si velekiwaka? Elizabeta u n’wi vule “Hosi yanga,” naswona n’wana wa yena la nga si ku velekiwaka u tlule hi ntsako loko Mariya a humelela ro sungula. Hi tlhelo rin’wana, van’wana endzhaku va khome Mariya ni n’wana wa yena loyi a ta velekiwa hi xichavo lexintsongo, hi laha hi nga ta vona ha kona. Luka 1:26-56.

▪ Gabriyele u ri yini ku pfuna Mariya ku twisisa ndlela leyi a nga ta tika ha yona?

▪ Yesu u xiximiwe njhani a nga si velekiwa?

▪ Mariya u ri yini eka risimu ra vuprofeta loko a dzunisa Xikwembu?

▪ Mariya u tshame na Elizabeta ku ringana nkarhi wo tanihi kwihi, naswona ha yini swi fanela leswaku Mariya a tshama na Elizabeta enkarhini lowu?