Dyondzo 87
Yesu A Ha Ri Ntsongo eTempeleni
LANGUTA xifanyatana lexi vulavulaka ni vakulukumba lava. I vadyondzisi etempeleni ya Xikwembu ya le Yerusalema. Naswona xifanyatana lexi i Yesu. Se a a kurilenyana. Hi nkarhi lowu a a ri ni malembe ya 12.
Vadyondzisi a va hlamale ngopfu hileswi Yesu a a tiva swo tala hi Xikwembu ni hi swilo leswi tsariweke eBibeleni. Kambe ha yini Yosefa na Mariya va nga ri kona laha? Va kwihi? A hi kambisiseni.
Lembe ni lembe Yosefa a a tisa ndyangu wakwe eYerusalema ku ta tlangela nkhuvo wo hlawuleka lowu vuriwaka Paseka. A ku ri riendzo ro leha swinene ku suka eNazareta ku ya eYerusalema. A ku ri hava munhu loyi a a ri ni movha naswona switimela a swi nga ri kona. Vanhu vo tala a va famba hi milenge naswona a swi va teka masiku manharhu ku ya fika eYerusalema.
Hi nkarhi wolowo Yosefa a a ri ni ndyangu lowukulu. Naswona a ku ri ni tindzisana ta Yesu ta vafana ni vanhwanyana leti a a fanele a ti khathalela. Kutani lembe rero Yosefa na Mariya a va fambe ni vana va vona eriendzweni ro leha va muka eNazareta. A va anakanya leswaku Yesu u le xikarhi ka lava va fambaka na vona. Kambe loko va fika va yima kun’wana loko dyambu ri pela, Yesu a a nga ri kona kwalaho. Va sungule ku n’wi lava eka maxaka ni vanghana, kambe a va n’wi kumanga! Hiloko va tlhelela eYerusalema va ya n’wi lava kona.
Eku heteleleni va kume Yesu laha a ri ni vadyondzisi lava. A a va yingiserile ni ku va vutisa swivutiso. Kutani vanhu hinkwavo a va hlamele ndlela leyi Yesu a a tlharihe ha yona. Kambe Mariya u n’wi vutise a ku: ‘N’wananga, ha yini u hi endle leswi? Mina na tata wa wena a hi ri karhi hi vilela hi ri eku ku laveni.’
Yesu u hlamule a ku: ‘A mi ndzi lavela yini? Xana a mi swi tivi leswaku ndzi fanele ku va endlwini ya Tatana?’
Ina, Yesu a a rhandza ku va endhawini leyi a nga ta dyondza hi ta Xikwembu eka yona. Xana a hi yona ndlela leyi na hina hi faneleke ku titwa ha yona? Le kaya eNazareta, Yesu a a ya eminhlanganweni ya vugandzeri vhiki ni vhiki. Leswi a a yingisela minkarhi hinkwayo, u dyondze swilo swo tala eBibeleni. A hi tekeleleni Yesu kutani hi landzela xikombiso xakwe.
Luka 2:41-52; Matewu 13:53-56.