Ndyangu Wa Ka Va Yesu Wu Teka Riendzo Ro Ya Eyerusalema

I ximun’wana. I nkarhi wa leswaku ndyangu wa Yosefa, maxaka ni vanghana va teka riendzo ra lembe ni lembe va ya eYerusalema. Va ya kona leswaku va ya tlangela Paseka, hilaha Nawu wu lerisaka hakona. (Deteronoma 16:16) Ku suka eNazareta ku ya eYerusalema a swi teka kwalomu ka tikhilomitara ta 120. I nkarhi wa mphesamphesa ni lowu tsakisaka eka hinkwavo. Yesu loyi se a nga ni malembe ya 12, u wu langutele hi mahlongati nkhuvo lowu hikuva wu ta endla leswaku a va ekusuhi na tempele nakambe.

Eka Yesu ni ndyangu wa ka vona, Paseka a hi xiendlakalo xa siku rin’we ntsena. Endzhaku ka siku ra Paseka, ku sungula nkhuvo wa masiku ya nkombo wa Swinkwa Leswi Nga Riki Na Comela. (Marka 14:1) Wu tekiwa tanihi xiphemu xa nguva ya Paseka. Loko hi hlanganisa nkarhi lowu va wu hetaka ku suka ekaya ka vona eNazareta, nkarhi lowu va wu hetaka va ri eYerusalema ni wo tlhelela ekaya, i mavhiki mambirhi. Kambe lembe leri, hikwalaho ka xiendlakalo lexi khumbaka Yesu, va heta nkarhi wo leha. Sweswo swi vangiwa hi xiphiqo lexi va xi lemukaka loko va ri ndleleni yo tlhelela eNazareta.

Loko va ri karhi va famba va kongoma en’walungwini, Yosefa na Mariya va ehleketa leswaku Yesu u famba ni maxaka ni vanghana. Kambe loko va yima nimadyambu, a va n’wi voni Yesu. Hiloko va ya n’wi lava exikarhi ka lava a va famba na vona kambe a nga kona. N’wana wa vona a nga kumeki! Kutani Yosefa na Mariya va tlhelela endzhaku eYerusalema va ya n’wi lava.

Va n’wi lave siku hinkwaro va nga n’wi kumi. Hambi ku ri hi siku leri landzelaka a va n’wi kumi. Eku heteleleni, hi siku ra vunharhu va kuma n’wana wa vona etempeleni leyi nga ni makamara yo tala. Va kuma Yesu a tshame exikarhi ka vadyondzisi va Vayuda. U rhiye ndleve, a vutisa swivutiso ni ku va hlamarisa hi ku twisisa kakwe.

Mariya u vutisa a ku: “N’wananga, hikwalaho ka yini u hi endle leswi? Mina ni tata wa wena hi fambe hi ku lava hinkwako.”—Luka 2:48.

Yesu wa hlamala loko a xiya leswaku a va nga swi tivi leswaku u ta va a ri kwihi. Kutani a va vutisa a ku: “Hikwalaho ka yini mi fambe mi ndzi lava? Xana a mi nga swi tivi leswaku ndzi fanele ku va endlwini ya Tatana?”—Luka 2:49.

Leswi se va nga swin’we, Yosefa na Mariya va famba na Yesu va tlhelela eNazareta naswona u ya emahlweni a va yingisa. Yesu a ya emahlweni a kula, a tlhela a va ni vutlhari. Hambileswi a ha riki ntsongo u rhandziwa hi Xikwembu ni vanhu. Ku sukela evutsongwanini byakwe, Yesu u va xikombiso lexinene ku nga ri hi ku rhangisa ku rhandza Xikwembu ntsena kambe ni hi ku xixima vatswari vakwe.