Ndzima 10
Maendzo Yo Ya eYerusalema
XIMUN’WANA xi fikile. Naswona i nkarhi wa ndyangu wa Yosefa, kun’we ni vanghana ni maxaka, wa ku teka riendzo ra vona ra ximun’wana ra lembe na lembe ku ya eYerusalema ku ya tlangela Paseka. Loko va teka riendzo ra kwalomu ka 100 wa tikhilomitara, ku na ku nyanyuka loku tolovelekeke. Yesu sweswi u na malembe ya 12 hi vukhale, naswona u langutele nkhuvo hi ntsako lowu hlawulekeke.
Eka Yesu ni ndyangu wa ka vona, Paseka a hi mhaka ya siku rin’we ntsena. Nakambe va tshama masiku ya nkombo lama landzelaka ya Nkhuvo wa Xinkwa Xo-ke-comela, lawa va ma langutaka tanihi xiphemu xa nguva ya Paseka. Hikwalaho, riendzo hinkwaro ku suka eNazareta, ku katsa ni ku tshama eYerusalema, swi teka kwalomu ka mavhiki mambirhi. Kambe lembe leri, hikwalaho ka swin’wana leswi katsaka Yesu, ri teka nkarhi wo leha.
Xiphiqo xi humelela eriendzweni ro tlhela ku suka eYerusalema. Yosefa na Mariya va ehleketa leswaku Yesu u le ntlaweni wa maxaka ni vanghana lava fambaka swin’we. Hambi swi ri tano a nga humeleli loko va yima ni vusiku, ivi va famba va n’wi lava exikarhi ka vanghana va vona lava fambaka na vona. A nga kumeki. Kutani Yosefa na Mariya va famba va tlhelela eYerusalema va ya n’wi lava.
Siku hinkwaro va lava, kambe va nga humeleli. Siku leri landzelaka va nga n’wi kumi na kona. Eku heteleleni, hi siku ra vunharhu, va ya etempeleni. Kwalaho, eholweni yin’wana ya yona, va vona Yesu a tshame exikarhi ka vadyondzisi va Vayuda, a va yingisela ni ku va vutisa swivutiso.
Mariya wa vutisa, “N’wananga, hikwalaho ka yini u hi tirhisile hi ndlela leyi? Waswivo, tata wa wena na mina a hi ku lava hi ri eku karhatekeni swinene.”
Yesu u hlamarisiwa hi leswaku a va nga ku tivi laha va nga ta n’wi kuma kona. Wa vutisa, “A mi ndzi lavela yini? Xana a mi nga swi tivi leswaku ndzi fanele ku va kwala ndlwini ya Tata wa mina xana?”
Yesu a nga swi twisisi leswaku ha yini vatswari va yena va nga swi tivi leswi. Hikwalaho, Yesu a tlhelela ekaya ni vatswari va yena naswona a hambeta a titsongahata eka vona. U ya emahlweni a kula hi vutlhari ni miri naswona a rhandziwa hi Xikwembu ni vanhu. Ina, ku sukela evuhlangini bya yena ku ya emahlweni, Yesu u veke xikombiso lexinene ku nga ri eku laveni ka swilaveko swa moya ntsena kambe ni ku kombisa xichavo eka vatswari va yena. Luka 2:40-52; 22:7.
▪ I riendzo rihi ra ximun’wana leri Yesu a ri endlaka nkarhi na nkarhi ni ndyangu wa ka vona naswona ri teka nkarhi wo fikela kwihi?
▪ Ku endleke yini eka riendzo leri va ri endleke loko Yesu a ri na malembe ya 12 hi vukhale?
▪ I xikombiso xihi lexi Yesu a xi vekeleke vantshwa namuntlha?