Ndzima 13

Ntshungu Lowukulu eMahlweni Ka Xiluvelo Xa Yehovha

1. (a) Loko malandza ya Xikwembu ya Vakreste vo sungula kumbe lava 144 000 va nga si amukela hakelo ya vona, va fanele va rhanga va humeleriwa hi yini? (b) Kambe i yini lexi nga ta endleka eka ntshungu lowukulu lowu nga ta va wu ri kona loko ‘nhlomulo lowukulu’ wu sungula?

HAMBI leswi malandza yo tshembeka ya Xikwembu ku sukela eka Avele ku ya eka Yohane Mukhuvuri, ma rhangiseke ntirho wa ku endla ku rhandza ka Xikwembu evuton’wini bya wona, hinkwawo ma langutane ni rifu kutani ma rindzela ku pfuxiwa eku feni. Lava 144 000, lava nga ta va na Kreste eMfun’weni wakwe wa le tilweni na vona va fanele va rhanga hi ku fa va nga si amukela hakelo ya vona. Ku hambana ni leswi, exivonweni muapostola Yohane u kombiwe leswaku ku ta va ni ntshungu lowukulu, lowu nga ta pona ‘nhlomulo lowukulu’ ivi handle ka ku fa, wu langutela ku hanya hi laha ku nga heriki.—Nhlav. 7:9-17.

KU VONA “NTSHUNGU LOWUKULU”

2. I yini lexi endleke nhlamuselo ya “ntshungu lowukulu” leyi nga eka Nhlavutelo 7:9 yi twisisiwa?

² Hi malembe xidzana yo tala, a swi nga twisisiwi leswaku “ntshungu lowu lowukulu” i vamani. Kambe ku twisisiwa loku yaka emahlweni ka vuprofeta lebyi yelanaka ni lebyi, ku pfule ndlela. Hi 1923 swi ve erivaleni leswaku “tinyimpfu” ta xifaniso xa Yesu lexi nga eka Matewu 25:31-46 ni “tinyimpfu tin’wana” leti a vulavuleke ha tona eka Yohane 10:16 a ku ri vanhu lava hanyaka sweswi lava a va ta kota ku hanya eka misava leyi hi laha ku nga heriki. Hi 1931 lava hlamuseriwaka eka Ezekiyele 9:1-11 tanihi lava funghiweke emimombyeni ya vona, hi wanuna la nga ni xitsalo xa mutsari va hlamuseriwe tanihi “tinyimpfu” leti ku vulavuriwaka ha tona eka Matewu ndzima 25. Kutani, hi 1935, “vunyingi lebyikulu,” kumbe “ntshungu lowukulu,” lowu nga eka Nhlavutelo 7:9-17 wu voniwe wu fana ni “tinyimpfu” ta le ka xifaniso xa Yesu xa tinyimpfu ni timbuti. Hambi leswi le ndzhaku hi 1923 ku xiyiweke leswaku vanhu van’wana lava kotisaka tinyimpfu se a va sungurile ku tikombisa, nhlayo ya vona yi sungule ku kula hi ku hatlisa loko ku fika 1935. Namuntlha ku ni timiliyoni leti ti lavaka ku vitaniwa tanihi xiphemu xa “ntshungu lowukulu” wa “tinyimpfu tin’wana” lowu tsakeriwaka hi Xikwembu.

3. Ha yini ku ‘yima ka vona emahlweni ka xiluvelo’ ku nga vuli swona leswaku i ntlawa wa le tilweni?

³ Lava va “ntshungu lowukulu” va hambanisiwa ni swirho swa 144 000 swa Israyele wa moya, loyi ku vulavuriwaka ha yena eku sunguleni ka ndzimana leyi fanaka ya Nhlavutelo. Exivonweni xakwe, Yohane a nga vonanga ‘ntshungu lowu lowukulu’ wu ri etilweni. Leswi a “va yimile emahlweni ka xiluvelo” (hi Xigriki: e·noʹpi·on tou throʹnou, “laha va kotaka ku vona xiluvelo”) xa Xikwembu a swi bohi leswaku va va etilweni. Kahle-kahle vo va eka xiyimo lexi Xikwembu xi kotaka ku va “vona,” xona lexi xi hi byelaka leswaku xi vona vana va vanhu xi ri etilweni. (Nhlav. 7:9; Ps. 11:4; ringanisa Pisalema 100:1, 2, na Luka 1:74, 75 na Mintirho 10:33, Kingdom Interlinear.) Hi laha ku fanaka, a swi bohi leswaku ‘matiko hinkwawo’ ma ya etilweni leswaku ma ta va emahlweni ka xiluvelo xa Kreste (leswi hi ku kongoma swi vulaka, “ku va emahlweni ka yena”), hi laha swi hlamuseriwaka ha kona eka Matewu 25:31, 32. Mhaka ya leswaku “ntshungu lowukulu wa vanhu; [lava] a ku nga ri na un’we la kotaka ku va hlaya,” a hi wona ntlawa wa le tilweni, swi tikomba loko u ringanisa Nhlavutelo 7:4-8 na 14:1-4, laha ku paluxiwaka nhlayo leyi heleleke ya lava tekiweke emisaveni leswaku va ya etilweni.

4. (a) Xana i yini ‘nhlomulo lowukulu’ lowu va ponaka eka wona? (b) Hi laha swi vuriweke ha kona eka Nhlavutelo 7:11, 12, i vamani lava langutaka “ntshungu lowukulu” ivi va hlanganyela na wona evugandzerini?

⁴ Loko a hlamusela “ntshungu lowukulu,” Yohane u tsala leswi: “Lava, hi lava humaka eku xanisekeni lokukulu.” Hakunene, va ta pona nhlomulo lowukulu swinene ku tlula wihi na wihi lowu tshameke wu va kona emisaveni. (Nhlav. 7:13, 14; Mt. 24:21) Lava ponaka siku rero ra Yehovha leri chavisaka, va nga ka va nga kanakani leswaku i mani loyi a va kutsuleke. Loko va khensa Xikwembu ni Xinyimpfana hi ku ponisiwa ka vona, kutani, hi laha Yohane a swi voneke ha kona exivonweni, swivumbiwa hinkwaswo swo tshembeka etilweni swi ta hlanganisa marito ya swona na vona, va gandzela Xikwembu xi ri xin’we xa ntiyiso, va ku: “Amen! Ku vongiwa, ni ku twala, ni vutlhari, ni ku nkhensiwa, ni ku dzuneka, ni matimba, ni ntamu, a swi ve eka Xikwembu xa hina hilaha ku nga heriki! Amen.”—Nhlav. 7:11, 12.

LAVA RINGIWEKE KU VONA LOKO VA FANELEKELA KU PONA

5. (a) Xana hi nga swi vonisa ku yini leswi lavekaka eka hina loko hi ta va xiphemu xa “ntshungu lowukulu” lowu nga ta ponisiwa? (b) Hi ku hlamula swivutiso leswi nga emakun’wini ya ndzimana leyi, hlamusela leswi lavekaka leswaku hi pona ‘nhlomulo lowukulu.’

⁵ Ku ponisiwa ka “ntshungu lowukulu” ku endleka hi ku pfumelelana ni mimpimanyeto ya Yehovha leyi lulameke. Swikombiso leswi nga erivaleni swa timfanelo leti funghaka lava nga ta ponisiwa, swi kona evuprofeteni bya Bibele lebyi byi swi hlamuselaka. Xisweswo swa koteka leswaku varhandzi va ku lulama va teka goza sweswi leswaku va ta kota ku pona. Matsalwa lama landzelaka se hi vulavurile ha wona. Kambe sweswi ma kambisise hi vukheta, hi ku pfuniwa hi tindzimana tin’wana leti kombisiweke, naswona ehleketa hi leswi u faneleke u swi endla leswaku u fanelekela tinhlamuselo leti ta vuprofeta.

“Tinyimpfu tin’wana” leti hlamuseriwaka eka Yohane 10:16

Xana kahle-kahle swi vula yini leswaku munhu a yingisa rito ra Yesu? (Yoh. 10:27; Mt. 9:9; Ef. 4:17-24)

Xana hi nga swi kombisisa ku yini leswaku hi amukela Kreste tanihi “murisi un’we” wa hina? (Mt. 23:10, 11)

“Tinyimpfu” eka xifaniso xa Yesu xa tinyimpfu ni timbuti (Mt. 25:31-46)

I vamani ‘vamakwavo’ va Kreste lava vanhu lava, va va endlelaka leswinene? (Hev. 2:10, 11; 3:1)

Xana hi swihi swiyimo swo nonon’hwa leswi eka swona va fanelaka ku tivula vamakwavo va Kreste emisaveni? Naswona hi wihi ntirho lowu va wu seketelaka hi ku tshembeka? (Nhlav. 12:12, 17; Mt. 24:14; 28:19, 20) 

Vanhu lava fungheriwaka ku pona, hi munhu la tameleke xitsalo xa mutsari (Ezek. 9:1-11)

Xana va swi kombisa njhani leswaku a va pfumelelani na swona swilo leswi nyangatsaka leswi endliwaka eYerusalema wo fanekisela, kumbe eVujaganini? (Nhlav. 18:4, 5)

I yini lexi katsekaka eka ‘mfungho’ lowu wu va hambanisaka ni Vakreste va mavunwa kutani xi va endla va lulameriwa hi ku pona? (1 Pet. 3:21; Mt. 7:21-27; Yoh. 13:35)

6. Xana nhlamuselo ya Yohane ya “ntshungu lowukulu” yi hi pfunisa ku yini ku twisisa lexi endlaka leswaku wu ponisiwa?

⁶ Nhlamuselo ya “ntshungu lowukulu” hi laha yi kumekaka ha kona eka Nhlavutelo 7:9-15 yi engetela vuxokoxoko byin’wana bya nkoka. Loko Matsalwa ma hi byela ndlela leyi “ntshungu lowukulu” wu vonakaka ha yona endzhaku ka ‘nhlomulo lowukulu,’ ma tlhela ma boxa tinhla leti endleke leswaku wu ponisiwa.

7. Xana i yini lexi wu xi endleke emahlweni ka ‘nhlomulo lowukulu,’ naswona leswi swi kombisiwa njhani?

⁷ Hambi leswi va humaka eka matiko, swivongo, tinxaka ni tindzimi hinkwato, va kombisiwa “va yimile emahlweni ka xiluvelo” hi vun’we, va khensa Yehovha, Loyi a tshameke exiluvelweni, tanihi Hosi ya Vuako Hinkwabyo. Hi ndlela ya vona ya vutomi va tikombise va ri vaseketeri vo tshembeka va vuhosi bya yena. Mhaka ya leswaku “va hlantswile tinguvu ta vona, va ti basisile hi ngati ya Xinyimpfana” yi komba leswaku va swi lemukile leswaku va ri pfumala gandzelo ra Yesu ro rivalela swidyoho, tanihi Xinyimpfana xa Xikwembu. (Yoh. 1:29; 1 Yoh. 2:2) Hi ripfumelo ra vona va tinyiketele eka Xikwembu hikwalaho ka gandzelo rero, leswi va swi kombise hi ku nyuperisiwa ematini kutani sweswi va ni xiyimo lexi tengeke emahlweni ka Xikwembu, hi laha swi kombisiweke ha kona hi tinguvu ta vona to basa. A va tshikanga ku ri twarisa erivaleni ripfumelo leri va nga na rona eka N’wana wa Xikwembu. (Mt. 10:32, 33) Ku pfumelelana ni timhaka leti hinkwato, va kombisiwa va ri etempeleni ya Xikwembu, kumbe yindlu leyikulu ya vugandzeri, tanihi vagandzeri lava endlelaka Xikwembu ‘ntirho wo kwetsima vusiku ni nhlikanhi.’ Xisweswo va tikombise va ri vaseketeri vo tshembeka va vugandzeri bya ntiyiso ni vahuweleri va Mfumo wa xona.—Esa. 2:2, 3.

8. Leswaku rungula leri ri hi pfuna, hi fanele hi endla yini?

⁸ Xana vuxokoxoko bya swikombiso leswi swa vuprofeta byi vula leswi wena u nga swona? Xana ku na laha u faneleke u endla vutomi bya wena byi fambisana ni leswi hlamuseriwaka laha? Loko swi ri tano, lowu hi wona nkarhi wa ku endla sweswo!

KU HANYA EPARADEYISINI YA MOYA

9. Xana Yohane u yi hlamusela njhani mikateko ya moya leyi kumiwaka hi “ntshungu lowukulu” sweswi?

⁹ Xana u ni ntshembo wa ku pona tanihi xiphemu xa “ntshungu lowukulu”? Loko u pfumelelane ni tindlela ta Yehovha to lulama, kutani a swi kanakanisi leswaku se u sungurile ku tiphina hi swiyimo leswi tshembisiweke, leswi hi laha ku faneleke swi vitaniwaka paradeyisi ya moya. Muapostola Yohane u byeriwe leswi: “A va nga ha twi ndlala kumbe torha, a va nga ha hisiwi hi dyambu kumbe ku tshwa kunene, hikuva Xinyimpfana lexi nge xiluvelweni xi ta va murisi wa vona; xi ta va yisa eswihlobyeni swa mati ya vutomi kutani Xikwembu xi ta sula mihloti hinkwayo emahlweni ya vona.” (Nhlav. 7:16, 17) Xana leswi swi endleke hi ndlela yihi eka wena?

10. (a) Hi ku ya hi ndlela ya moya, xana “ntshungu lowukulu” ‘a wa ha twi ndlala kumbe ku twa torha’ hi ndlela yihi? (b) Xana leswi swi endlekile eka wena?

¹⁰ Loko u nga si ta ehansi ka nkhathalelo wa rirhandzu wa Murisi Lonene, Yesu Kreste, xana a wu ri ni ndlala ni torha ra ku lulama? (Ringanisa Matewu 5:6.) Loko swi ri tano, leswi a wu swi lava a ku ri nchumu lowu a wu ta huma eka Yehovha ntsena hi ku tirhisa N’wana wakwe. Loko u dyondze tindlela to lulama ta Yehovha—xikongomelo xa yena xa ku lovisa lavo biha, kun’we ni tintswalo ta yena ta ku endla leswaku vatukulu va Adamu va kota ku ponisiwa—kutani, a swi kanakanisi leswaku a ku ri ro sungula evuton’wini bya wena leswaku u titwa u enerisekile hakunene. Swakudya ni swakunwa swa moya leswi humaka eRitweni ra Xikwembu, hi laha swi phameriwaka ha kona hi nhlengeletano ya xona, swi hambete swi ku enerisa. (Esa. 65:13, 14) Naswona loko u tinyiketerile eka Xikwembu ha Kreste, sweswi u ni xikongomelo xa ntiyiso evuton’wini. (Ringanisa Yohane 4:32-34.) Sweswi, u langutele ntshembo lowu tsakisaka wa vutomi lebyi nga heriki emisaveni ya Paradeyisi, hikuva Xinyimpfana “xi ta [yisa “ntshungu lowukulu”] eswihlobyeni swa mati ya vutomi.”

11. (a) Xana ‘va nga ka va nga hisiwi hi dyambu hambi ku tshwa kunene’ hi ndlela yihi? (b) Sweswo i swa nkoka ku fikela kwihi eka wena?

¹¹ Tanihi “tinyimpfu” to tshembeka, lava va “ntshungu lowukulu” na vona va sirhelelekile naswona va kongomisiwa khwatsi hi Murisi Lonene. Hi yona mhaka leyi, ‘va nga ta ka va nga hisiwi hi dyambu kumbe ku tshwa kunene,’ hi ndlela yo fanekisela. Leswi a swi vuli swona leswaku, tanihi un’wana wa “ntshungu lowukulu,” u nga ka u nga xanisiwi hi misava. Kambe, swi kombisa leswaku u sirhelelekile eka ku hisa loku vavulaka ka vukarhi bya Xikwembu. Naswona loko xi tisa ndzoviso wa xona eka lavo biha, wena u nga ka u nga lovi. Vuxaka lebyi bya risima byi nga hambeta hi laha ku nga heriki.—Ezek. 38:22, 23; ringanisa Tipisalema 11:6; 85:3, 4.

12. Xana mihloti yi hlanguriwe njhani emahlweni ya wena hambi sweswi?

¹² Mawaku swivangelo leswinene swonghasi swa ku tsaka loko hakunene u ri un’wana wa “ntshungu lowukulu”! U ni ntshembo lowu vangamaka wa ku vona vanhu lavo biha va susiwa va nga ha vi kona, ni ku vona mianakanyo ni miri wa wena swi tshunxiwa eka swilo hinkwaswo leswi vangiwaka hi xidyoho. Kambe hambi sweswi mbitsi lowu dyaka vanhu hikwalaho ka leswi va nga riki na mhaka ni Xikwembu, wena a wu ku dyi. U sungula ku tiva ntsako lowu wu nga wa vanhu lava Xikwembu xa vona xi nga Yehovha. (Ps. 144:15b) Hi ndlela leyi ana se u sungule ku vona ku hetiseka ka xitshembiso lexi nge: “Xikwembu xi ta hlangula mihloti hinkwayo emahlweni ya vona.”

13. Xana i yini lexi nga ta engetela ntsako wa paradeyisi ya moya loko ku fuma ka Kreste ka gidi ra malembe ku ya emahlweni?

¹³ Tanihi leswi “ntshungu lowukulu” wu nga ta pona makumu ya mafambiselo lawa ya swilo, paradeyisi ya moya na yona yi ta pona. Loko u ri un’wana wa vona, kutani u ta hambeta u tiphina hi nkhuvo wa switshongo swa moya, loko ku fuma ka gidi ra malembe ka Kreste ku ya emahlweni. Ku tiva ka wena Xikwembu ku ta dzika loko u vona xikongomelo xa xona lexi tiyeke xi hetiseka hi ndlela yo tsakisa. Ntsako wa wena wu ta kula loko u vuyisa vunyingi lebyi andzaka, lebyi a byi file, byi hlangana na wena evugandzerini bya ntiyiso. Naswona mikateko ya swilo leswi vonakaka leyi nga ta nyikeriwa enkarhini wolowo yi ta va ya risima swinene eka malandza hinkwawo yo tshembeka ya Xikwembu, tanihi leswi yi tekiwaka yi ri swikombiso swa rirhandzu ra Yehovha hi byakwe.—Esa. 25:6-9; Yak. 1:17.

BULO RO PFUXETA

● Xana Bibele yi hlanganisa “ntshungu lowukulu” ni xiendlakalo xihi lexi xiyekaka, naswona njhani?

● Loko hakunene hi lava ku va xiphemu xa ‘ntshungu wolowo lowukulu’ lowu tsakeriwaka hi Xikwembu, hi fanele hi endla yini sweswi?

● Xana mikateko ya paradeyisi ya moya i ya nkoka ku fikela kwihi eka wena?