Ndzima Ya Vukhume-nharhu
Ntshungu Lowukulu Emahlweni Ka Xiluvelo Xa Yehovha
1. (a) Loko malandza ya Xikwembu ya le mahlweni ka Vukreste kumbe lava 144 000 va nga si kuma hakelo ya vona, ku fanele ku rhanga ku humelela yini ha vona? (b) I yini leswi nga ta endleka eka “ntshungu lowukulu” lowu hanyaka enkarhini wa sweswi?
MALANDZA ya Xikwembu yo tshembeka lama sukelaka eka Avele ku ya eka Yohane lowo Khuvula, ma rhangise ku rhandza ka Xikwembu evuton’wini bya wona. Kambe hinkwawo ma file, kutani ma rindzele ku pfuxiwa leswaku ma ta hanya emisaveni leyintshwa ya Xikwembu. Lava 144 000, lava nga ta fuma na Kreste eMfun’weni wa Xikwembu wa le tilweni, na vona va fanele va rhanga va fa leswaku va ta kuma hakelo ya vona. Hambiswiritano, Nhlavutelo 7:9 yi kombisa leswaku emasikwini lawa ya makumu, ku ta va ni “ntshungu lowukulu” lowu humaka eka matiko hinkwawo lowu nga taka wu nga fi, kambe wu ta va ni ntshembo wo hanya hilaha ku nga heriki emisaveni. Xana na wena u wun’wana wa vona?
Ku Tiva Ntshungu Lowukulu
2. I yini lexi hi pfuneke leswaku hi wu twisisa kahle ntshungu lowukulu lowu ku vulavuriwaka hi wona eka Nhlavutelo 7:9?
2 Hi 1923, malandza ya Yehovha ma twisise leswaku “tinyimpfu” ta le xifanisweni xa Yesu lexi kumekaka eka Matewu 25:31-46 ni “tinyimpfu tin’wana” leti a vulavuleke ha tona eka Yohane 10:16 i vanhu lava nga ni lunghelo ro hanya hilaha ku nga heriki emisaveni. Hi 1931 ma twisise leswaku lava hlamuseriweke eka Ezekiyele 9:1-11 tanihi lava va funghiweke emimombyeni ya vona, va ni ntshembo wa laha misaveni. Kutani swi tiviwe hi 1935 leswaku ntshungu lowukulu wu vumba xiphemu xa ntlawa wa tinyimpfu tin’wana leti Yesu a vulavuleke ha tona. Namuntlha, ntshungu lowu lowukulu lowu amukelekaka wu fika eka timiliyoni.
3. Ha yini xiga lexi nge “wu yime emahlweni ka xiluvelo” xi nga vuli ntlawa lowu yaka etilweni?
3 Eka Nhlavutelo 7:9, ntshungu lowukulu a wu voniwanga wu ri etilweni. Ku ‘yima ka wona emahlweni ka xiluvelo’ xa Xikwembu a swi kali swi lava leswaku wu va etilweni. Xikwembu xi kota ku wu vona. (Pisalema 11:4) Leswaku ntshungu lowukulu, “lowu a ku nga ri na munhu la kotaka ku wu hlaya,” a hi ntlawa lowu yaka etilweni, swi kombisiwa hi ku ringanisa nhlayo ya wona leyi nga boxiwangiki ni leswi swi tsariweke eka Nhlavutelo 7:4-8 na Nhlavutelo 14:1-4. Ematsalweni lawa ku paluxiwa leswaku lava nga tekiwa emisaveni leswaku va ya etilweni i vanhu va 144 000.
4. (a) I yini ‘nhlomulo lowukulu’ lowu ntshungu lowukulu wu ponaka eka wona? (b) Hilaha swi hlamuseriweke hakona eka Nhlavutelo 7:11, 12, i vamani lava hlaleleke ntshungu lowukulu ni ku hlanganyela na wona evugandzerini?
4 Nhlavutelo 7:14 yi vula leswi hi ntshungu lowukulu: “Lava hi lava humaka enhlomulweni lowukulu.” Va pone mahlomulo lamakulu swinene eka lama tshameke ma va kona ematin’wini ya vanhu. (Matewu 24:21) Loko va tlangela ku ponisiwa ka vona eka Xikwembu na Kreste, xisweswo swivumbiwa hinkwaswo swo tshembeka etilweni swi ta vula hi rito rin’we swin’we na vona swi ku: “Amen! Ku dzuneka ni ku vangama ni vutlhari ni ku nkhensa ni ku xiximiwa ni matimba ni ntamu a swi ve eka Xikwembu xa hina hi masiku ni masiku. Amen.”—Nhlavutelo 7:11, 12.
Ku Fanelekela Ku Pona
5. Xana hi nga swi tivisa ku yini leswi lavekaka eka hina leswaku hi va xiphemu xa ntshungu lowukulu?
5 Ku ponisiwa ka ntshungu lowukulu eka nhlomulo lowukulu ku fambisana ni mimpimanyeto ya Yehovha yo lulama. Timfanelo leti hlawulaka lava nga ta kutsuriwa ti hlamuseriwe kahle eBibeleni. Xisweswo, swa koteka leswaku lava rhandzaka ku lulama va teka goza sweswi leswaku va fanelekela ku pona. Xana va fanele va endla yini vanhu lava?
6. Ha yini swi fanerile leswaku ntshungu lowukulu wu fanisiwa ni tinyimpfu?
6 Tinyimpfu ti ni moya wo rhula naswona ta titsongahata. Kutani loko Yesu a vula leswaku u ni tinyimpfu tin’wana leti nga riki ta ntlawa wa le tilweni, a a vulavula hi vanhu lava lavaka ku hanya hilaha ku nga heriki emisaveni va tlhela va yingisa tidyondzo ta yena. U te: “Tinyimpfu ta mina ti yingisa rito ra mina, naswona ndza ti tiva, kutani ta ndzi landzela.” (Yohane 10:16, 27) Lava i vanhu lava yingisaka hakunene, va endla leswi Yesu a swi vulaka, va va vadyondzisiwa va yena.
7. Hi tihi timfanelo leti valandzeri va Yesu va faneleke va ti hlakulela?
7 Hi tihi timfanelo tin’wana leti un’wana ni un’wana wa valandzeri va Yesu a faneleke a ti hlakulela? Rito ra Xikwembu ra hlamula: “Mi cukumeta vumunhu bya khale lebyi fambisanaka ni ndlela ya n’wina yo sungula ya ku tikhoma . . . mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Vaefesa 4:22-24) Va hlakulela timfanelo leti kondletelaka vun’we eka malandza ya Xikwembu—ku nga “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.”—Vagalatiya 5:22, 23.
8. I yini leswi ntshungu lowukulu wu nga ta langutana na swona loko wu ri karhi wu seketela masalela?
8 Ntshungu lowukulu wu seketela nhlayo leyitsongo ya lava nga ni ntshembo wa le tilweni, lava rhangelaka entirhweni wo chumayela. (Matewu 24:14; 25:40) Tinyimpfu tin’wana ti seketela ntlawa wolowo hambileswi ti swi tivaka leswaku ti ta kanetiwa hikuva loko masiku lawa ya makumu ma sungula, Kreste Yesu ni tintsumi ta yena va hlongole Sathana ni madimona yakwe etilweni. Leswi a swi vula “khombo eka misava . . . hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.” (Nhlavutelo 12:7-12) Xisweswo Sathana u endla leswaku malandza ya Xikwembu ma kanetiwa swinene tanihi leswi makumu ya mafambiselo lawa ma nga ekusuhi.
9. Xana swi ma fambela njhani malandza ya Xikwembu eku chumayeleni ka mahungu lamanene, naswona ha yini?
9 Hambiloko ku ri ni nxaniso wa tihanyi, ntirho wo chumayela wu ya emahlweni. Loko Nyimpi yo Sungula ya Misava yi hela, a a ku ri ni magidi ma nga ri mangani ya vachumayeri va Mfumo, kambe se ku ni timiliyoni ta vachumayeri, hikuva Yehovha u tshembise leswi: “Tlhari rihi ni rihi leri nga ta endleriwa ku ku hlasela a ri nge humeleli.” (Esaya 54:17) Hambi ku ri xirho xa huvo-nkulu ya Vayuda xi swi xiyile leswaku ntirho wa Xikwembu a wu nge siveriwi. Xi byele Vafarisi eka lembe-xidzana ro sungula malunghana ni vadyondzisiwa xi ku: “Va tshikeni; (hikuva, loko kungu leri kumbe ntirho lowu wu huma evanhwini, wu ta hluleka; kambe loko wu huma eka Xikwembu, a mi nge swi koti ku va hlula;) loko swi nga ri tano, kahle-kahle mi nga ha kumeka mi lwa ni Xikwembu.”—Mintirho 5:38, 39.
10. (a) Xana “mfungho” wa lava ntshungu lowukulu wu vula yini? (b) Xana malandza ya Xikwembu ma ri yingisa njhani ‘rito leri humaka etilweni’?
10 Lava va ntshungu lowukulu va hlamuseriwa tanihi lava fungheriweke ku ponisiwa. (Ezekiyele 9:4-6) “Mfungho” i vumbhoni bya leswaku va tinyiketele eka Yehovha, va khuvuriwa tanihi vadyondzisiwa va Yesu, naswona va tikarhatela ku hlakulela vumunhu lebyi fanaka ni bya Kreste. Va yingisa ‘rito leri humaka etilweni’ leri vulaka leswi malunghana ni mfumo wa misava wa Sathana wa vukhongeri bya mavunwa: “Humani eka yena, vanhu va mina, loko mi nga lavi ku hlanganyela na yena eswidyohweni swa yena, ni loko mi nga lavi ku amukela xiphemu xa makhombo ya yena.”—Nhlavutelo 18:1-5.
11. Hi yihi ndlela ya nkoka leyi ntshungu lowukulu wu kombisaka ha yona leswaku i malandza ya Yehovha?
11 Yesu u tlhele a byela valandzeri va yena a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Ku hambana ni sweswo, swirho swa vukhongeri bya misava leyi swi dlaya swirho swin’wana enyimpini, hikwalaho ka leswi hakanyingi swi nga riki swa tiko rin’we! Rito ra Xikwembu ri ri: “Vana va Xikwembu ni vana va Diyavulosi va vonaka hi leswi: Mani na mani la nga hambetiki a famba hi ku lulama a nga humi eka Xikwembu, hambi ku ri loyi a nga rhandziki makwavo. . . . Hi fanele hi rhandzana; hi nga fani na Kayini, loyi a humeke eka lowo homboloka ivi a dlaya makwavo.”—1 Yohane 3:10-12.
12. Eka nhlomulo lowukulu, xana Yehovha u ta endla yini hi ‘mirhi’ ya vukhongeri leyi humesaka mihandzu leyi nga pfuniki nchumu?
12 Yesu u te: “Murhi wun’wana ni wun’wana lowunene wu humesa mbhandzu lowunene, kambe murhi wun’wana ni wun’wana wo bola wu humesa mbhandzu lowu nga pfuniki nchumu; murhi lowunene a wu nge tswali mbhandzu lowu nga pfuniki nchumu, hambi ku ri murhi wo bola a wu nge humesi mbhandzu lowunene. Murhi wun’wana ni wun’wana lowu nga humesiki mbhandzu lowunene wa tsemiwa wu wa kutani wu hoxiwa endzilweni. Kutani, kahle-kahle vanhu volavo mi ta va vona hi mihandzu ya vona.” (Matewu 7:17-20) Mihandzu leyi humesiwaka hi vukhongeri bya misava leyi yi byi kombisa byi ri ‘mirhi’ leyi yi nga ta herisiwa hi Yehovha ku nga ri khale eka nhlomulo lowukulu.—Nhlavutelo 17:16.
13. Xana ntshungu lowukulu wu swi kombisa njhani leswaku ‘wu yime hi vun’we emahlweni ka xiluvelo’ xa Yehovha?
13 Nhlavutelo 7:9-15 yi vulavula hi swilo leswi nga ta endla leswaku ntshungu lowukulu wu ponisiwa. Wu kombisiwa “wu yime emahlweni ka xiluvelo” xa Yehovha hi vun’we, wu seketela vuhosi bya yena bya vuako hinkwabyo. Va “hlantswe tinguvu ta vona to leha va ti endla to basa hi ngati ya Xinyimpfana,” va kombisa leswaku va pfumela eka gandzelo ra Yesu leri hakelaka swidyoho. (Yohane 1:29) Va tinyiketele eka Xikwembu naswona va kombise leswi hi ku khuvuriwa ematini. Kutani va basile emahlweni ka Xikwembu, leswi fanekiseriwaka hi tinguvu to leha to basa, naswona va xi endlela “ntirho wo kwetsima vusiku ni nhlikanhi.” Xana ti kona tindlela leti u nga endlaka vutomi bya wena byi pfumelelana swinene ni leswi swi hlamuseriweke laha?
Vuyelo Bya Sweswi
14. Hi yihi mikateko yin’wana yo hlawuleka leyi kumiwaka hi malandza ya Yehovha sweswi?
14 Kumbexana se u yi vonile mikateko yo hlawuleka leyi kumiwaka hi vanhu lava tirhelaka Yehovha. Hi xikombiso, loko u dyondza hi swikongomelo swa Yehovha swo lulama u twisise leswaku ku ni ntshembo lowu vangamaka wa nkarhi lowu taka. Kutani sweswi u ni xikongomelo xa xiviri evuton’wini—ku nga ku tirhela Xikwembu xa ntiyiso u ri ni ntshembo lowu tsakisaka wa vutomi lebyi nga heriki emisaveni leyi nga paradeyisi. Ina, Hosi Yesu Kreste u ta “kongomisa [ntshungu lowukulu] eminseledyaneni ya mati ya vutomi.”—Nhlavutelo 7:17.
15. Xana Timbhoni ta Yehovha ti vuyeriwa njhani hi ku hlayisa misinya ya milawu ya Bibele malunghana ni tipolitiki ni mahanyelo?
15 Vuyelo lebyi hlamarisaka lebyi kumiwaka hi ntshungu lowukulu i rirhandzu, vun’we ni ntwanano leswi kumekaka exikarhi ka malandza ya Yehovha emisaveni hinkwayo. Tanihi leswi hinkwerhu hi dyaka swakudya swa moya leswi fanaka, hinkwerhu hi yingisa milawu leyi fanaka ni misinya ya milawu leyi kumekaka eRitweni ra Xikwembu. Hi yona mhaka hi nga hambanisiwiki hi tipolitiki ni vutiko. Nakambe hi hlayisa mimpimanyeto leyi tlakukeke ya mahanyelo leyi Xikwembu xi yi vekeleke vanhu va xona. (1 Vakorinto 6:9-11) Xisweswo, ematshan’weni yo va ni madzolonga, ku nga twanani ni mahanyelo yo biha lama tolovelekeke emisaveni, vanhu va Yehovha va tiphina hi leswi nga vuriwaka paradeyisi ya moya. Xiya ndlela leyi yi hlamuseriwa ha yona eka Esaya 65:13, 14.
16. Hi wihi ntshembo lowu lava ntshungu lowukulu va nga na wona, hambileswi va nga ni swiphiqo leswi tolovelekeke evuton’wini?
16 Malandza ya Yehovha a ma hetisekanga nikatsongo. Naswona ma va ni swiphiqo leswi tolovelekeke evuton’wini emisaveni leyi, swo fana ni ku xanisiwa kumbe ma hlaseriwa ma nga ri na nandzu loko matiko ma lwa. Ma tlhela ma langutana ni vuvabyi, ku xaniseka ni rifu. Kambe ma ni ntshembo wa leswaku emisaveni leyintshwa Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.
17. Ku nga khathariseki leswi nga ha humelelaka eka hina sweswi, hi byihi vumundzuku lebyi hlamarisaka lebyi vekeriweke lava va gandzelaka Xikwembu xa ntiyiso?
17 Hambiloko wo fa sweswi hikwalaho ka vudyuhari, vuvabyi, mhangu kumbe nxaniso, Yehovha u ta ku pfuxa leswaku u hanya eParadeyisini. (Mintirho 24:15) Kutani u ta ya emahlweni u tiphina hi nkhuvo wa moya hi nkarhi wa Ku Fuma ka Kreste ka Gidi ra Malembe. U ta ya u xi rhandza swinene Xikwembu loko u ri karhi u vona swikongomelo swa xona swi hetiseka hi ndlela leyi xiyekaka. Kutani mikateko leyi Yehovha a nga ta ku nyika yona hi tlhelo ra nyama yi ta ku endla u n’wi rhandza swinene. (Esaya 25:6-9) Hakunene bya hlamarisa vumundzuku lebyi vanhu va Xikwembu va vekeriweke byona!
Mpfuxeto
• Hi xihi xiendlakalo lexi xiyekaka lexi Bibele yi xi hlanganisaka ni ntshungu lowukulu?
• Loko hi lava ku va van’wana va ntshungu lowukulu lowu tsakeriwaka hi Xikwembu, xana hi fanele hi endla yini sweswi?
• Mikateko leyi ntshungu lowukulu wu yi kumaka sweswi ni leyi wu nga ta yi kuma emisaveni leyintshwa ya Xikwembu, i ya nkoka ku fikela kwihi eka wena?
[Xifaniso lexi nga eka tluka 123]
Timiliyoni ta ntshungu lowukulu ti gandzela Xikwembu xa ntiyiso hi vun’we