Ndzima 14

‘Ndzi Endla Ntwanano Wa Mfumo Na N’wina’

1. Emadyambyini ya le mahlweni ka rifu rakwe, hi wihi ntshembo lowu Yesu a wu vekeleke vaapostola vakwe?

EMADYAMBYINI ya le mahlweni ka ku dlayiwa ka yena, Yesu u byele vaapostola vakwe vo tshembeka a ku: ‘Endlwini ya Tata wa mina ku ni tindlu to tala. Ndza famba ku ya mi lunghisela ndhawu kona, leswaku laha ndzi nga kona na n’wina mi va kwalaho.’ U ye emahlweni a va byela leswi: “Ndzi endla ntwanano na n’wina, tanihi leswi Tatana a endleke ntwanano wa mfumo na mina.” (Yoh. 14:2, 3; Lk. 22:29, NW) Mawaku ntshembo wo tsakisa swonghasi lowu a va vekeleke wona!

2. I vangani lava nga ta va na Kreste eMfun’weni wakwe wa le tilweni?

² Hambi swi ri tano, Yesu a a nga vuli swona leswaku i vaapostola volavo ntsena lava a va ta fuma na yena eMfun’weni wakwe wa le tilweni. Endzhakunyana ku tivisiwe leswaku vanhu va 144 000 lava tekiweke emisaveni a va ta kuma lunghelo rero lerikulu. (Nhlav. 5:9, 10; 14:1, 4) Xana va kona van’wana namuntlha lava tikarhatelaka ku ri kuma?

KU HLENGELETA VADYANDZHAKA VA MFUMO

3. Evutirhelini byakwe bya le rivaleni, xana Yesu a a vulavula ngopfu hi lunghelo rihi?

³ Endzhaku ka loko Yohane Mukhuvuri a khomiwile hi Heroda Antipas, Yesu u hume tsima lerikulu ra ku chumayela erivaleni, laha a a vulavula ngopfu hi “Mfumo wa matilo.” (Mt. 4:12, 17) U endle vanhu va xiya leswaku va nga swi kota ku kuma lunghelo ra ku nghena eka Mfumo wolowo, naswona vadyondzisiwa vakwe va tirhe hi matimba leswaku va kuma hakelo yoleyo.—Mt. 5:3, 10, 20; 7:21; 11:12.

4. (a) Vadyondzisiwa vo rhanga va Yesu va totiwe rini hi moya wo kwetsima? (b) I yini lexi kombaka leswaku ku sukela enkarhini wolowo a ku khathaleriwa ngopfu ku hlengeletiwa ka vadyandzhaka va Mfumo?

⁴ Hi Pentekosta ya 33 C.E. vo rhanga va vona va totiwe hi moya wo kwetsima. (Mint. 2:1-4; 2 Kor. 1:21, 22) Ku twarisiwe lunghiselelo ra Xikwembu ra ku ponisa vanhu, leri yisaka evuton’wini bya le tilweni lebyi nga riki na ku fa. Petro u tirhise “swilotlelo swa Mfumo wa matilo” leswaku a paluxa vutivi lebyi—u sungule eka Vayuda, ku landzela Vasamariya, kutani a hetelela hi vanhu va tinxaka ta Vamatiko. (Mt. 16:19) A ku khathaleriwa ngopfu ku vumbiwa ka hulumendhe leyi yi nga ta fuma vanhu ku ringana malembe ya 1 000, naswona mapapila yo tala lama huhuteriweke ya Matsalwa ya Vukreste ya Xigriki ma kongomisiwe ngopfu eka ntlawa lowu wa vadyandzhaka va Mfumo—‘vakwetsimi,’ ‘lava kumeke xirhambo xa le tilweni.’a

5. Xana va vitaneriwe ku ya hanya etilweni hikwalaho ka leswi a va ri malandza yo antswa ya Xikwembu ku tlula lava a va hanya emahlweni ka vona?

⁵ Ku vitaniwa ka vona leswaku va ya hanya etilweni a ku nga vangiwi hi leswi kumbexana a va antswa ku tlula malandza laman’wana ya Xikwembu lama feke emahlweni ka Pentekosta ya 33 C.E. (Mt. 11:11) Ematshan’wini ya sweswo, Yehovha sweswi se a a sungule ku hlawula lava va nga ta va vafumi kun’we na Yesu Kreste. Ku ringana malembe xidzana ya kwalomu ka 19 ku sukela kwalaho, a ku ri ni ku vitaniwa kun’we ntsena, ka le tilweni. A wu ri musa lowu nga fanelangiki, lowu Xikwembu xi wu kombiseke nhlayo yo karhi eku hetisiseni ka swikongomelo swa xona swa vutlharhi ni swa rirhandzu.—Ef. 2:8-10.

6. (a) Ha yini ku fanele ku va ni nkarhi wa ku yimisiwa ka xirhambo xa le tilweni? (b) I mani loyi a a ta kongomisa timhaka leswaku ku hetiseka vuprofeta lebyi khumbaka “ntshungu lowukulu,” naswona ku humelele yini?

⁶ Hi ku famba ka nkarhi nhlayo leyi vekiweke, leyi pimiweke ya 144 000, a yi ta helela. Ku funghiwa ko hetelela ka Vaisrayele lava va moya, tanihi lava fanelekaka, a ku ta va ku tshinele. (Nhlav. 7:1-8) Kutani, Yehovha, hi moya wa yena ni ku twisisiwa ka Rito ra yena, loku a ku endleke ku koteka hi ku tirhisa nhlengeletano ya yena leyi vonakaka, u ta kongomisa timhaka leswaku a hetisisa xiphemu xin’wana xa xikongomelo xa yena, hi laha xi hlamuseriweke ha kona eka Nhlavutelo 7:9-17. “Ntshungu lowukulu” lowu humaka eka matiko hinkwawo wu ta hlengeletiwa, wu ri ni ntshembo lowu nyanyulaka wa ku pona nhlomulo lowukulu ivi wu hanya hi ku hetiseka hi laha ku nga heriki emisaveni ya Paradeyisi. Loko hi kambisisa leswi endlekeke, swi le rivaleni leswaku ku vitaniwa ka le tilweni hinkwako ku hetiwe kwalomu ka lembe ra 1935 C.E., enkarhini lowu ntshembo wa laha misaveni wa “ntshungu lowukulu” a wu twisisiwa kahle. Ku sukela enkarhini wolowo, timiliyoni ta vagandzeri va Yehovha lava nga ni ntshembo lowu tiyeke wa ku hanya hi laha ku nga heriki kwala misaveni, ti hlanganisiwe ni magidi ma nga ri mangani lama saleke ya ntlawa wa le tilweni.

7. Xana swi nga koteka leswaku van’wana ni namuntlha va kuma xirhambo xa le tilweni, naswona ha yini u hlamula tano?

⁷ Xana leswi swi vula leswaku sweswi a va kona lava Xikwembu xi va vitanelaka ku hanya etilweni? Ku nga si endliwa ku fungha ko hetelela, kumbexana van’wana va nga ri vangani, lava nga ni ntshembo wolowo va nga ha kumeka va nga tshembekanga, kutani ku ta hlawuriwa van’wana va va siva. Kambe swi le rivaleni leswaku leswi swi nge tali ku endleka.

VANA VA MOYA—VA SWI TIVISA KU YINI?

8. Hi yihi nhlamuselo leyi Pawulo a yi nyikaka, leyi kombaka mukhuva lowu lava tswariweke hi moya wo kwetsima va swi lemukaka ha wona sweswo?

⁸ Moya wa Xikwembu wu nyika Vakreste lava khuvuriweke, lava amukeleke ku vitaniwa ka le tilweni, xitiyisekiso lexinene xa leswaku va endliwe vana va moya. Muapostola Pawulo u swi kombisile leswi loko a tsalela ‘vakwetsimi’ va le Rhoma, a hlamusela leswi enkarhini wolowo a swi endleka eka Vakreste hinkwavo va ntiyiso. U te: “Hinkwavo lava fambisiwaka hi Moya wa Xikwembu i vana va Xikwembu. Hikuva Moya lowu mi nga nyikiwa wona, a wu mi endli mahlonga ni ku tlhela wu mi vangela ku chava, kambe wu mi endla vana; hi matimba ya Moya lowu, hi huwelela hi ku: ‘Abba, Tatana!’ Moya lowu wu yima ni mimoya ya hina ku tiyisa leswaku hi vana va Xikwembu. Kutani leswi hi nga vana, naswona hi vadyandzhaka; hi vadyandzhaka va Xikwembu, ni vadyandzhaka swin’we na Kriste; leswi kunene hi xanisekaka na yena, swi vula leswaku hi ta kwetsimisiwa na yena.”—Rhom. 1:7; 8:14-17.

9. Xana ‘moya wu pfumelelana’ ni moya wa lava va nga vana va Xikwembu hi ndlela yihi?

⁹ Laha ku kombisiwa tindlela timbirhi ta matirhelo ya rito “moya”: “moya hi woxe” ni “moya wa hina.” Lowo sungula i matimba ya Xikwembu lama tirhaka, lama nga vonakiki. Wu endla vana va xona va moya va tiyiseka leswaku va endliwe vana va Xikwembu lava ntshunxekeke. Nakambe moya wu nyikela vumbhoni hi Rito ra Xikwembu leri huhuteriweke, Bibele, leri kotisaka papila ra xona n’wini leri yaka eka vana va xona va moya. (1 Pet. 1:10-12) Loko lava velekiweke hi moya wo kwetsima va hlaya leswi Matsalwa ma swi vulaka eka lava va nga vana va moya va Xikwembu, va angula kahle va ku: ‘Sweswo swi tirha eka mina.’ Xisweswo matimba ya Xikwembu lama tirhaka hi tindlela to hambana-hambana ma pfumelelana ni moya wa vona, ku nga matimba lama susumetaka mianakanyo ni timbilu ta vona, ya leswaku i vana va Xikwembu. Hi ku pfumelelana ni leswi moya wa Xikwembu wu kombisaka swona, mianakanyo ni timbilu ta vona swi langutela ku va vadyandzhaka kun’we na Kreste, naswona va amukela vutihlamuleri bya vana va moya va Xikwembu.—Flp. 3:13, 14.

10. (a) Hi tihi timfanelo leti hambi munhu a ri na tona ti nga n’wi funghiki tanihi Mukreste la totiweke? (b) Hi rihi langutelo leri “tinyimpfu tin’wana” ti nga na rona malunghana ni xiphemu xa tona eka xikongomelo xa Xikwembu?

¹⁰ Xana sweswo swi tano eka wena? Loko swi ri tano, u ni lunghelo lerikulu. Hambi swi ri tano, xi nga va xihoxo ku ehleketa leswaku leswi munhu a tlangelaka swilo swa moya hi vuenti kumbe leswi a hisekelaka vutirheli bya nsimu kumbe leswi a rhandzaka vamakwavo, u fanele a ri Mukreste la totiweke hi moya. Swilo leswi swi kona ni le ka vo tala va “tinyimpfu tin’wana.” Timbilu ta vona na tona, ti susumetiwa hi leswi va swi hlayaka eMatsalweni malunghana ni vadyandzhaka kun’we na Kreste, kambe a va tilaveli leswi Xikwembu xi nga va vekelangiki swona. (Ringanisa Tinhlayo 16:1-40.) Va xiya xikongomelo xa Xikwembu xo sungula hi misava naswona va tirha hi ntsako leswaku va hoxa xandla eka xona.

KU DYA U RI LA FANELEKAKA

11. I vamani lava va vaka kona eku tlangeleni ka rifu ra Yesu ka lembe na lembe, naswona ha yini?

¹¹ Lembe na lembe, hi Nisan 14, endzhaku ka ku pela ka dyambu, valandzeri va Yesu Kreste lava totiweke eswiphen’wini hinkwaswo swa misava va tsundzuka rifu rakwe, hi ku pfumelelana ni swiletelo leswi a swi nyikeke vaapostola va yena. (Lk. 22:19, 20) “Tinyimpfu tin’wana” na tona ti va kona, a ti xi dyi xinkwa ni vhinyo a ti yi nwi, kambe to va ntsena vatlangeri lava nga ni xichavo.

12. Vakreste van’wana vo sungula eKorinto a va tsandzeka njhani ku tlangela Xilalelo xa Hosi hi laha ku faneleke?

¹² Xiendlo lexi a hi mikhuva ya hava ya vukhongeri, kambe xi ni nkoka lowukulu. Eka Vakreste va lembe xidzana ro sungula eKorinto, le Greece, van’wana va vona va tsandzekile ku tlangela xiendlakalo lexi hi laha ku faneleke, hi loko muapostola Pawulo a tsala ndzayo ya matimba, a ku: “Un’wana ni un’wana la dyaka xinkwa lexi, kumbe la nwelaka exinwelweni xa Hosi hi mukhuva lowu nga lulamangiki, ú ta va ni nandzu wo dyohela miri ni ngati ya Hosi.” I yini lexi va endleke va nga ‘faneleki’ ku dya? A va nga tilunghiseleli kahle embilwini ni le mianakanyweni. A ku ri ni ku avana evandlheni. Naswona van’wana a va dya swakudya ni ku nwa swakunwa ku hundza mpimo, emahlweni ka nhlangano lowu. Xilalelo xa Hosi a va xi langutela ehansi. A va nga wu twisisi nkoka lowukulu wa xinkwa ni vhinyo.—1 Kor. 11:17-34.

13. Xana xinkwa ni vhinyo leswi tirhisiwaka eXitsundzuxweni swi fanekisela yini?

¹³ Hi wihi nkoka wa kona? A wu titsheganga hi hlori ro karhi, ra ku hundzuka ka xinkwa ni vhinyo, loku ehleketiwaka leswaku ku kona. A swi kona leswaku Kreste u tlhela a endliwa gandzelo eka Xitsundzuxo xin’wana ni xin’wana. Matsalwa ma vula leswaku “Kriste: U nyiketiwile kan’we ku rhwala swidyoho swa lavo tala.” (Hev. 9:28; 10:10; Rhom. 6:9) Xinkwa lexo ke comela ni vhinyo yo tshwuka ko va swifanekiselo leswi yimelaka miri wa xiviri wa Yesu lowu endliweke gandzelo ni ngati ya xiviri leyi a yi halateke. Kambe vona ndlela leyi swifanekiselo leswi swi nga swa nkoka ha yona! Miri wa Yesu lowu nga riki na xidyoho wu nyikeriwe leswaku vanhu va kota ku hanya hi laha ku nga heriki. (Yoh. 6:51) Naswona ngati yakwe leyi halatiweke yi hetisisa swikongomelo swimbirhi—ku hlantswa swidyoho swa vanhu lava kombisaka ripfumelo eka yona, ni ku endla ntwanano lowuntshwa wu tirha, exikarhi ka Xikwembu ni vandlha ra Israyele wa moya, la vumbiwaka hi Vakreste lava totiweke hi moya. (1 Yoh. 1:7; 1 Kor. 11:25; Gal. 6:14-16) Malunghiselelo lawa ya risima hi wona lama endlaka leswaku swirho swa “ntlhambinyana” swi vuriwa leswi lulameke hi Xikwembu, entiyisweni swi kota ku nyikiwa ku hetiseka ka vumunhu. (Lk. 12:32) Leswi swi endleriwa leswaku va kota ku tswariwa hi moya wo kwetsima tanihi vana va Xikwembu, leswaku va ta hlanganyela na Kreste eMfun’weni wakwe wa le tilweni. Loko va dya swifanekiselo swa Xitsundzuxo lembe na lembe, leswi nyikaka vumbhoni bya ntshembo wa vona wa le tilweni, ku tlangela ka vona mhaka ya leswi va nga eka “ntwanano lowuntshwa,” lowu endliwaka hi Kreste, ka pfuxetiwa ni ku kurisiwa.—Hev. 8:6-12.

“HI TA YA NA ṄWINA”

14. (a) Ha yini “tinyimpfu tin’wana” ti nga swi dyi swifanekiselo swa Xitsundzuxo, kambe i yini lexi ti xi languteleke hi mahlo yo tshwuka? (b) Xana va ku langutisisa ku yini ku tirhisana ka vona ni masalela ya vadyandzhaka va Mfumo?

¹⁴ “Tinyimpfu tin’wana” ti twisisa ndlela leyi Yehovha a a ri karhi a tirhisana ha yona ni vatotiwa, naswona ti vula kun’we na vona, ti ku: “Hi ta ya na ṅwina, hikuv̌a hi twile leŝaku Yehova o na ṅwina.” (Zak. 8:20-23) A vo hlanganyela kun’we ntsena kambe va tlhela va twarisa swin’we mahungu lamanene ya Mfumo emisaveni hinkwayo leyi akiweke. Hambi swi ri tano, “tinyimpfu tin’wana” a ti ngheni eka “ntwanano lowuntshwa” kun’we na Israyele wa moya naswona a ti ngheni eka ‘ntwanano . . . wa mfumo’ lowu endliweke hi Yesu kun’we ni lava va hlawuriweke ku hlanganyela na yena evuton’wini bya le tilweni, kutani hi laha ku faneleke, a va swi dyi swifanekiselo swa Xitsundzuxo. (Lk. 22:20, 29) Kambe loko “ntwanano lowuntshwa” wu ya wu hetisisa xikongomelo xa wona, ku nga ku hlengeletiwa ka swirho swo hetelela swa “ntlhambinyana” eMfun’weni wa le tilweni, “tinyimpfu tin’wana” ti lemuka leswaku leswi swi kombisa leswaku mikateko leyi ti nga ta yi kuma emisaveni hi Mfumo wolowo ya tshinela. Ti swi languta swi ri lunghelo, “emasikwini ya makumu,” ku tirhisana ni masalela yo tshembeka ya vadyandzhaka va Mfumo.

[Nhlamuselo ya le hansi]

BULO RO PFUXETA

● Ha yini vunyingi bya Matsalwa ya Vukreste ya Xigriki byi vulavula hi ntshembo wa le tilweni?

● Lava va velekiweke tanihi vana va Xikwembu va swi tivisa ku yini sweswo? Swifanekiselo swa Xitsundzuxo leswi va swi dyaka swi vula yini?

● “Tinyimpfu tin’wana” ti swi kombisa njhani leswaku hakunene ti ni vun’we ni “ntlhambinyana”?