Vakriste Ni Vito Leri

KU HAVA loyi a nga vulaka hi ku kongoma leswaku hi rini kahle-kahle Vayuda va vukhongeri va tshikeke ku vula vito ra Xikwembu ivi va ri siva hi marito ya Xiheveru lama nge Xikwembu na ku Hosi Leyi Tlakukeke. Van’wana va pfumela leswaku vito ra Xikwembu ri tshike ku tirhisiwa siku na siku emahlweni ka nkarhi wa Yesu. Kambe ku ni vumbhoni lebyi tiyeke bya leswaku muprista la tlakukeke u hambetile a ri vula emintirhweni ya vukhongeri etempeleni—ngopfu-ngopfu hi siku ra ku Rivaleriwa ka swidyoho—ku ya fikela loko tempele yi lovisiwa hi 70 C.E. Hikwalaho ke, loko Yesu a ha ri emisaveni, mavulelo ya vito leri a ma tiviwa, hambi leswi kumbexana a ri nga tirhisiwi ngopfu.

Hikwalaho ka yini Vayuda va tshike ku vula vito ra Xikwembu? Kumbexana, hi loko va nga ya tirhisi kahle marito ya nawu wa vunharhu lowu nge: “U nga tshuki u tlanga hi vito ra Yehova Xikwembu xa wena.” (Eksoda 20:7) Kavula, nawu lowu a wu nga siveli ku tirhisiwa ka vito ra Xikwembu. Loko a swi ri tano, hikwalaho ka yini malandza ya Xikwembu ya khale tanihi Davhida ya ri tirhise hi ku tshunxeka ya tama ya tiphina hi mikateko ya Yehova? Naswona hikwalaho ka yini Xikwembu xi ri vurile eka Muxe ivi xi byela Muxe ku hlamusela Vaisrayele leswaku a a rhumiwile hi mani?—Psalma 18:1-3, 6, 13; Eksoda 6:2-8.

Hambi swi ri tano, hi nkarhi wa Yesu a ku ri ni mboyamelo wa matimba wa ku teka milawu leyinene ya Xikwembu ivi yi hlamuseriwa hi ndlela leyi nga riki yinene. Hi xikombiso, nawu wa vumune wa Milawu ya Khume a wu bohelela Vayuda ku hlayisa siku ra vunkombo vhiki na vhiki tanihi siku ra ku wisa, Savata. (Eksoda 20:8-11) Vayuda va vukhongeri va hundzeletile nawu wolowo, va endla milawu yo tala leyi fumaka ni swiendlo leswintsongo leswi a swi nga ha endliwa kumbe swi nga endliwi hi Savata. Handle ko tipfinyinga ku vile ni moya lowu fanaka laha va tekeke nawu lowunene, wa leswaku vito ra Xikwembu a ku fanelanga ku tlangiwa hi rona, va swi hundzeleta, va ku vito leri hambi ku ri ku vuriwa a swi fanelanga.a

Yesu Ni Vito Leri

Xana Yesu a a ta landzela mukhuva wo tano lowu nga pfumelelaniki ni matsalwa ke? Nikantsongo! Hakunene a nga tshikanga ku tirha mintirho ya ku hanyisa hi Savata, hambi leswi sweswo a swi ta vula ku tshova milawu ya vanhu ya Vayuda futhi ku ri ku veka vutomi bya yena ekhombyeni. (Matewu 12:9-14) Entiyisweni, Yesu u avanyise Vafarisi a ku i vakanganyisi hikuva mikhuva ya vona a yi nga twanani na Rito leri huhuteriweke ra Xikwembu. (Matewu 15:1-9) Kutani ke, a swi vonaki a fanele ku tshika ku vula vito ra Xikwembu, ngopfu-ngopfu hikwalaho ka leswi vito rakwe, ra Yesu, ri vulaka leswaku “Yehova i ku Hlayiseka.”

Siku rin’wana, Yesu u yimile esinagogeni ivi a hlaya xiphemu xa buku ya Esaya. Xiyenge lexi a xi hlayeke hi lexi hina namuntlha hi nge i Esaya 61:1, 2, laha vito ra Xikwembu ri humelelaka ku tlula kan’we. (Luka 4:16-21) Xana laha a a ta ala ku vula vito leri kwetsimaka, a ri siva hi “Hosi” kumbe “Xikwembu”? Kavula a swi tano. Sweswo a ku ta va ku landzela mukhuva lowu nga seketeriwiki hi matsalwa wa varhangeri va vukhongeri va Vayuda. Kambe, ha hlaya: “Hikuva a va dyondzisa tanihi loyi a nga ni vuhosi, ku nga ri kukota vatsari va vona.”—Matewu 7:29.

Entiyisweni, hi laha hi dyondzeke ha kona eku sunguleni, u dyondzise valandzeri vakwe ku khongela eka Xikwembu va ku: “Vito ra wena a ri hlawuleke.” (Matewu 6:9) Naswona loko a khongela nivusiku emahlweni ka ku avanyisiwa ka yena u byele Tata wakwe a ku: “Vito ra wena, ndzi ri tivisile vanhu lava u ndzi nyikeke vona emisaveni . . . Tatana la kwetsimeke, hlayisa lava u ndzi nyikeke vona evitweni ra wena.”—Yohane 17:6, 11.

Malunghana ni tinhlamuselo leti ta Yesu ehenhleni ka vito ra Xikwembu, buku leyi nge Der Name Gottes (Vito ra Xikwembu) eka tluka 76 ya hlamusela: “Hi fanele ku tlangela ntiyiso lowu hlamarisaka wa leswaku mukhuva wa ku twisisa Testamente ya Khale ka nhlavutelo ya Xikwembu hi leswaku i nhlavutelo ya vito ra xona ni leswaku rona ri yisiwe emahlweni ku ya fika eka swiphemu swo hetelela swa Testamente ya Khale, ina, ri yile emahlweni hambi ku ri ku ya fika eka swiphemu swo hetelela swa Testamente Leyintshwa, laha, hi xikombiso, eka Yohane 17:6 hi hlayaka: ‘Vito ra wena ndzi ri twarisile.’”

Ee, a swi ta va leswi nga twaliki ku anakanya leswaku Yesu u tshikile ku tirhisa vito ra Xikwembu, ngopfu-ngopfu loko a tshaha eka swiphemu sweswo swa Matsalwa ya Xiheveru leswi nga na rona.

Vakriste Vo Sungula

Xana valandzeri va Yesu va ri tirhisile vito ra Xikwembu hi lembe xidzana ro sungula? Va lerisiwe hi Yesu ku endla vadyondzisiwa hi vanhu va matiko hinkwawo. (Matewu 28:19, 20) Vanhu vo tala lava a va fanele ku chumayeriwa a va nga xi tivi Xikwembu lexi tihlavuteleke eka Vayuda hi vito ra Yehova. Vakriste a va ta swi kotisa ku yini ku va hlamusela Xikwembu xa ntiyiso-ke? Xana a swi ta va swi ringene ku xi vitana Xikwembu kumbe Hosi? Doo! Vamatiko a va ri ni swikwembu ni tihosi ta vona. (1 Vakorinto 8:5) Xana Vakriste a va ta swi kotisa ku yini ku hlawula Xikwembu xa ntiyiso eka leswa mavunwa? Hi ku tirhisa vito ra Xikwembu xa ntiyiso ntsena.

Xisweswo, mudyondzisiwa Yakobo enkarhini wa nhlengeletano ya vakulukumba eYerusalema, u te: “Simon u mi amberile hi laha Xikwembu xi nga sungula ku endzela vamatiko, ku tihumesela exikarhi ka vona etiko leri hlayisaka vito ra xona. Na tona timhaka ta vaprofeta ti pfumelelana na vona.” (Mintirho 15:14, 15) Muapostola Petro, eka vuvulavuri byakwe lebyi tivekaka ngopfu hi Pentekosta, u kombe xiyenge xa ntikelo xa mahungu ya Vukriste loko a tshahe marito ya muprofeta Yoel a ku: “Un’wana ni un’wana la nga ta khongela vito ra [Yehova] u ta ponisiwa.”—Yoel 2:32; Mintirho 2:21.

Muapostola Pawulo a nga siyi ku kanakana hi ta nkoka wa vito ra Xikwembu eka yena. Eka papila rakwe leri a ri tsaleleke Varhoma, u tshaha marito lama fanaka ya muapostola Yoel ivi a ya emahlweni a khutaza Vakriste-kulobye ku kombisa ripfumelo emhakeni leyi hi ku famba va chumayela hi ta vito ra Xikwembu eka van’wana leswaku na vona, va ta ponisiwa. (Varhoma 10:13-15) Masala-ndzhaku u tsale leswi eka papila rakwe leri a ri tsaleleke Timotiya: “Un’wana ni un’wana la vulaka vito ra [Yehova], a avane ni leswo homboloka.” (2 Timotiya 2:19) Eku heleni ka lembe xidzana ro sungula, muapostola Yohane u tirhise vito ra Xikwembu emapapileni ya yena. Rito leri nge “Aleluya,” leri vulaka leswaku “Dzunisani Yehova,” ri humelela hi ku phindha-phindha ebukwini ya Nhlavutelo.—Nhlavutelo 19:1, 3, 4, 6.

Hambi swi ri tano, Yesu ni valandzeri vakwe va profetile leswaku vugwinehi a byi ta humelela ebandlheni ra Vukriste. Muapostola Petro u tsarile a ku: ‘Ku ta va ni vadyondzisi va mavunwa exikarhi ka n’wina.’ (2 Petro 2:1; nakambe vona Matewu 13:36-43; Mintirho 20:29, 30; 2 Vatesalonika 2:3; 1 Yohane 2:18, 19.) Switsundzuxo leswi swi hetisekile. Vuyelo byin’wana hi leswaku vito ra Xikwembu ri bakanyeriwe endzhaku. Hambi ku ri ku susiwa ri susiwile etibukwini ni le ku hundzuluxeleni ka Bibele! A hi voneni leswaku sweswo swi endlekise ku yini.

[Nhlamuselo ya le hansi]

[Xifaniso lexi nga eka tluka 14]

Xifaniso lexi xa muprista lonkulu wa Vayuda, ni mfungho lowu hi Xiheveru wu nge “Ku Kwetsima i ka Yehova” exihukwini xa yena, xi kumeka eVatican

[Xifaniso lexi nga eka tluka 15]

Hi laha ku hundzuluxela loku ka Bibele ka 1805 ka Xijarimani ku kombaka ha kona, loko Yesu a hlaya buku ya Esaya esinagogeni, u vurile vito ra Xikwembu ri twakala.—Luka 4:18, 19

[Swifaniso leswi nga eka tluka 16]

Petro na Pawulo va tirhise vito ra Xikwembu loko va tshaha eka vuprofeta bya Yoel.—Mintirho 2:21; Varhoma 10:13