Mabandlha Lama Akiwaka Hi Rirhandzu Ni Vun’we

Unga ha va u hlanganyele eka minhlangano yin’wana ya bandlha ya Timbhoni ta Yehova kusuhi ni laha u tshamaka kona. Vanhu va mahanyelo hinkwawo—mintlawa ya mindyangu, vanhu lava nga voxe, lavakulu ni vantshwa—a va ri kwalaho. Hinkwavo a va ri na vun’we evugandzerini bya vona naswona a va tsakela ku pfuna van’wana.

Eka lunghiselelo rin’wana ni rin’wana laha nhlayo leyikulu ya vanhu yi navelaka ku tirha hi vun’we, ku fanela ku va ni vukongomisi. Xikwembu i Xikwembu xa ku rhula; kutani, ku rhula koloko ku fanele ku kombisiwa ebandlheni ra vanhu va xona. Tanihi le ka lembe xidzana ro sungula, kutani namuntlha, vavanuna lava fanelekeke, lava vupfeke ni lava nga ni ntokoto va Vukriste va hlawuriwa tanihi vakulu, kumbe valanguteri. Lava va kongomisa bandlha ni ku lunghiselela swilaveko swa moya. Va pfuniwa hi vavanuna lava tshembekaka lava tivekaka tanihi malandza ya vutirheli. Vavanuna lava a va kumi hakelo kumbe mbuyelo wun’wana wa swa timali kambe va tirha hi ku tirhandzela, hakanyingi va tirhisa mali ya vona ya ntirho wo tihanyisa.—1 Vakorinto 14:33, 40; Vafilipiya 1:1; 1 Timotiya 3:8, 9.

Xana lava va hlawuriwa hi ndlela yihi? Va fanele ku va malandza lama tshembekaka ya Xikwembu lava nga ni timfanelo tin’wana ta Matsalwa. Tin’wana ta tona: u fanele a ‘dya hi ku pima, a tikhoma, a chaviseka, a tsakela vaendzi, a kota ku dyondzisa. A va ni ku rhula, naswona a nga vi la rhandzaka ngopfu mali. A fambisa ndyangu wakwe swinene, a nga vi munhu loyi a ha ku pfumelaka, u fanele ku va loyi vanhu va le handle va n’wi xiximaka’; ‘a va munhu la namarhelaka rito leri tshembekeke, leri fambelanaka ni leswi swi dyondzisiwaka.—1 Timotiya 3:1-15; Tito 1:7-9.

Vavanuna lava a va langiwi hi bandlha, laha hakanyingi vunyingi byi nga vaka Vakriste lavantshwa. Ku ri na sweswo, va bumabumeriwa hi vavanuna lava vupfeke lava nga ni ntokoto lava nga vakulu ni lava xiyisisaka mpimo lowu lava va bumabumeriwaka va fikelelaka swilaveko swa Matsalwa ha wona. Kutani ku hlawuriwa ka vakulu ni malandza ya vutirheli ku endliwa ehansi ka nkongomiso wa Huvo leyi Fumaka ya Timbhoni ta Yehova, leswi swi landzela ntila lowu vekiweke hi bandlha ra Vakriste eka lembe xidzana ro sungula.

Vakulu lava, kumbe valanguteri, a va vumbi ntlawa wa vafundhisi; a va fumi van’wana. Hi laha Yesu a vuleke ha kona, hinkwavo lava rhangelaka va fanele ku va mahlonga ya hinkwavo. Ebandlheni ra Timbhoni ta Yehova, vakulu hakunene i vatirheli-kulobye va Mfumo wa Xikwembu.—Matewu 20:26, 27; 23:8-11; Varhoma 12:8; 1 Vakorinto 3:5; 4:1, 2; Vakolosa 4:11; 1 Vatesalonika 5:12-14.

Tanihi valanguteri, va kongomisa dyondzo leyi nyikeriweke eminhlanganweni kutani va veka xikombiso entirhweni wa ku chumayela. Ku chumayela mahungu lamanene ya Mfumo ensin’wini hinkwayo leyi averiweke vona i xikongomelo-nkulu xa bandlha. Valanguteri nakambe va tirha tanihi varisi, va vhakela swirho swa bandlha va swi khutaza hi laha swi lavekaka ha kona.—Matewu 24:14; Mintirho 1:8; 1 Vatesalonika 2:11, 12; 5:14, 15; 2 Timotiya 2:24-26; Vaheveru 13:17; Yakobo 5:13-16; 1 Petro 5:1-4.

Nakambe vakulu va na vutihlamuleri bya ku tshinya ni ku kongomisa ndzayo eka un’wana ni un’wana loyi a nga ha fambaka hi ndlela leyi hoxeke loyi a nga ha onhaka ku tenga ka moya ni mahanyelo ni vun’we bya bandlha.—1 Vakorinto 5:4, 5, 7, 11-13; Tito 1:9; 2:15; 3:10, 11.

Ku hlanganyela nkarhi na nkarhi ni bandlha swi ta ku nyika vuxaka lebyinene ni mimbuyelo yo tala ya moya.—Psalma 35:18; 84:10.

• I vamani lava kongomisaka timhaka ta mabandlha ha rin’we-rin’we?

• Valanguteri lava va hlawuriwa exisekelweni xihi?

• Vutihlamuleri bya vona hi byihi?

[Swifaniso leswi nga eka tluka 13]

Valanguteri va dyondzisa bandlha, va veka xikombiso eku chumayeleni hi yindlu na yindlu, va khutaza hi ku endla maendzo ya vurisi, va nyika ndzayo ni ku tshinya loko swi laveka