Valanguteri Lava Famba-fambaka—Vatirhi-kulorhi eNtiyisweni

Abandlheni ra Vukriste ra lembe xidzana ro sungula, a ku ri na valanguteri lava famba-fambaka lava endzeleke mabandlha ku ma aka. Va tinyiketerile, va nga lavi ku pfuneka vona vini, leswaku va ta pfuna lava nga emabandlheni ku hambeta va famba kahle eka Xikwembu.—Mintirho 11:23, 24; 14:21, 22; 15:32; 20:2, 31-35; Vafilipiya 2:20-22, 29; 1 Vatesalonika 2:5-12.

Namuntlha mabandlha ya Timbhoni ta Yehova nakambe ya pfuniwa hi valanguteri lava famba-fambaka. Vavanuna lava va ni malembe yo tala ya ntokoto eka mintirho ya ku chumayela ya Timbhoni ta Yehova naswona va ri valanguteri. Va tintshunxile eka ntirho wo tihanyisa ni vutihlamuleri bya ndyangu leswaku va tinyiketela evutirhelini bya nkarhi hinkwawo. Lava va ngheneleke vukati, hakanyingi vavasati na vona va hlanganyerile evutirhelini lebyi hi nkarhi lowu teleke ni vanuna va vona.

Mulanguteri wa xifundza u averiwa ku khathalela xifundza xa mabandlha ya 18 ku ya ka 25. U vhakela bandlha rin’wana ni rin’wana eka xifundza xexo kambirhi hi lembe naswona endzhaku ka malembe mambirhi kumbe manharhu u averiwa xifundza xin’wana. Hi ndlela leyi mabandlha ya nga kuma mpfuno eka mintokoto yo hambana-hambana ni vuswikoti bya valanguteri va xifundza vo hambana-hambana.

Mulanguteri wa xifundza u kambela xiyimo xa moya xa bandlha ni ntirho wa rona. U nyikela tinkulumo to tala ebandlheni naswona u hlangana ni vakulu ni malandza ya vutirheli ku vona hi laha va nga antswisaka ntirho wa vona ebandlheni.

Exikarhi ka vhiki yena ni nsati wakwe, loko a tekile, va hlangana ni Timbhoni ta kwalaho, va ti pfuna ku antswisa entirhweni wa vona wa yindlu na yindlu. Yena ni nsati wakwe va ta tlhela va endzela vanhu lava tsakelaka lavantshwa ku va khutaza eripfumelweni. U nga kombela ku endzeriwa ko tano.

Mulanguteri wa muganga u na timfanelo to tano ta moya ni ntokoto wo tano. U vhakela xifundza ni xifundza, a endla ntirho vhiki na vhiki mayelana ni minhlangano ya xifundza. Yena ni nsati wakwe va tlhela va tirha evutirhelini bya nsimu ni Timbhoni ta rin’wana ra mabandlha ya xifundza lexi a xi vhakelaka. U kongomisa malunghiselelo yo hetelela ya nongonoko wa nhlengeletano ya xifundza kutani a nyikela tinkulumo to tala enkarhini wa nhlengeletano, ku katsa ni nkulumo ya le rivaleni.

Loko valanguteri lava famba-fambaka va hetile pfhumba ra vona ebandlheni kumbe xifundza, va hambeta va endzela yan’wana kumbe swin’wana, va landzela nongonoko lowu fanaka, ku fikela loko mabandlha hinkwawo kumbe swifundza swi vhakeriwile hi tin’hweti leti nga vaka tsevu; kutani va sungula nakambe.

Ematikweni yo tala valanguteri lava famba-fambaka va famba hi movha kumbe va tirhisa swo famba swa mani na mani. Ematikweni man’wana va nga ha tirhisa xikanyakanya kumbe hambi ku ri ku famba hi milenge. Sosayiti yi hakela mali hinkwayo ya swo famba leyi tirhisiwaka hi valanguteri lava famba-fambaka, yi tlhela yi nyika yena ni nsati wakwe xipfuno xintsongo xa swilaveko swa vona swa vumunhu. Hakanyingi mulanguteri la famba-fambaka ni nsati wa yena va lunghiseleriwa ndzhawu yo tshama ni swakudya hi swirho swa bandlha rin’wana ni rin’wana.

Ntirho lowu wu komba moya wa ku tinyiketa. Valanguteri lava famba-fambaka ni vasati va vona va fanele ku tirha ntirho wa vona emabandlheni handle ko va rhwexa ndzhwalo wo tika wa swa timali.—1 Vatesalonika 2:9.

• A ku ri xihi xikongomelo xa valanguteri lava famba-fambaka ebandlheni ra Vukriste ra lembe xidzana ro sungula?

• Xana valanguteri lava famba-fambaka namuntlha va ve lava fanelekaka ni ku kumeka evutirhelini lebyi hi ndlela yihi?

• Hlamusela ntirho wa mulanguteri wa xifundza ni wa muganga ni ndlela leyi va hanyaka ha yona.

[Xifaniso lexi nga eka tluka 20]

Mulanguteri wa muganga u veka nkulumo enhlengeletanweni ya xifundza

[Swifaniso leswi nga eka tluka 21]

Valanguteri va swifundza va nyika swiletelo eku chumayeleni hi yindlu na yindlu, va vulavula ni vakulu va bandlha, va endzela dyondzo ya Bibele ni mpatswa lowa ha ku sungulaka ku tsakela, va veka tinkulumo emabandlheni