Ndlela Leyi Ha Yona Valanguteri Lava Famba-fambaka Va Tirhaka Tanihi Valanguteri Vo Tshembeka

“Leswi un’wana ni un’wana a nyikiweke nyiko ya yena, tirhisani tinyiko leti mi pfunana ha tona, mi va valanguteri lavanene va tinyiko ta Xikwembu ta tinxaka-xaka.”—1 PETRO 4:10.

1, 2. (a) Xana u nga ri hlamusela njhani rito leri nge “mulanguteri”? (b) I vamani lava katsekaka eka valanguteri lava tirhisiwaka hi Xikwembu?

YEHOVHA u tirhisa Vakreste hinkwavo vo tshembeka tanihi valanguteri. Mulanguteri hakanyingi i nandza loyi a langutelaka muti. Nakambe a nga ha fambisa swilo swa bindzu ra n’wini wakwe. (Luka 16:1-3; Vagalatiya 4:1, 2) Yesu u vitane ntlawa wa vatotiwa vakwe vo tshembeka emisaveni a ku i “mulanguteri lowo tshembeka.” U tamerise mulanguteri loyi “swilo hinkwaswo swa n’wini wa yena,” ku katsa ni mintirho yo chumayela hi Mfumo.—Luka 12:42-44; Matewu 24:14, 45.

² Muapostola Petro u vule leswaku Vakreste i valanguteri va musa lowu nga fanelangiki wa Xikwembu lowu kombisiwaka hi tindlela to hambana-hambana. Mukreste un’wana ni un’wana u ni xivandla lexi a nga endlaka eka xona vulanguteri byo tshembeka. (1 Petro 4:10) Vakulu va Vakreste lava vekiweke i valanguteri, naswona van’wana va vona i valanguteri lava famba-fambaka. (Tito 1:7) Xana vakulu lava va famba-fambaka va fanele va langutiwa njhani? Xana va fanele va va ni timfanelo ni swikongomelo swihi? Naswona xana va nga wu endlisa ku yini ntirho lowu vuyerisaka?

Ku Nkhensa Ntirho Wa Vona

3. Ha yini valanguteri lava famba-fambaka va vuriwa “valanguteri lavanene”?

³ Mpatswa wun’wana wa Vakreste lowu tekaneke, loko wu tsalela mulanguteri la famba-fambaka kun’we ni nsati wakwe, wu te: “Ha nkhensa swinene hikwalaho ka nkarhi ni rirhandzu ra n’wina leswi mi hi nyikeke swona. Hina tanihi ndyangu, hi vuyeriwile swinene hikwalaho ka swikhutazo ni switsundzuxo swa n’wina hinkwaswo. Ha swi tiva leswaku hi fanele hi ya emahlweni hi kula emoyeni, kambe hi ku pfuniwa hi Yehovha ni vamakwerhu va xinuna ni va xisati vo fana na n’wina, mintshikilelo leyi vaka kona ya hangalaka.” Marito yo fana ni lawa ma tala ku vuriwa hikuva valanguteri lava famba-fambaka va tsakela vapfumeri-kulobye hi xiviri, hilaha mulanguteri lonene a swi khathalelaka kahle hakona swilaveko swa va muti. Van’wana i swivulavuri leswi xiyekaka. Vo tala va endla kahle entirhweni wo chumayela, kasi van’wana va tiviwa hi rirhandzu ni ntwela-vusiwana wa vona. Hi ku hlakulela ni ku tirhisa tinyiko to tano eku tirheleni ka van’wana, valanguteri lava famba-fambaka va nga vitaniwa hilaha ku faneleke leswaku i “valanguteri lavanene.”

4. Hi xihi xivutiso lexi nga ta kambisisiwa sweswi?

⁴ Muapostola Pawulo u tsarile: “Leswi lavekaka eka valanguteri hileswaku munhu a kumeka a ri la tshembekeke.” (1 Vakorinto 4:2) Ku pfuna Vakreste-kuloni eka vandlha rin’wana vhiki na vhiki i lunghelo ro hlawuleka, leri tsakisaka. Hambiswiritano, i vutihlamuleri byo tika. Kutani, xana valanguteri lava famba-fambaka va nga byi hetisisa njhani vulanguteri bya vona hi ku tshembeka ni hilaha ku humelelaka?

Ku Endla Vulanguteri Bya Vona Hilaha Ku Humelelaka

5, 6. Ha yini swi ri swa nkoka leswaku mulanguteri la famba-fambaka a titshega hi Yehovha hi xikhongelo evuton’wini byakwe?

⁵ Ku titshega hi Yehovha hi xikhongelo i swa nkoka leswaku valanguteri lava famba-fambaka va kota ku va valanguteri lava humelelaka. Hikwalaho ka xiyimiso xa vona ni vutihlamuleri byo tala, nkarhi wun’wana va nga ha titwa va tshikilelekile. (Ringanisa 2 Vakorinto 5:4.) Kutani va fanele va endla hi ku pfumelelana ni risimu ra mupisalema Davhida: “Nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.” (Pisalema 55:22) Marito ya Davhida na wona ma chavelela: “A ku nkhensiwe Hosi le’yi rwalaka mirwalo ya hina hi masiku.”—Pisalema 68:19.

⁶ Xana Pawulo u ma kume kwihi matimba ya ku khathalela vutihlamuleri byakwe bya moya? U tsarile: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) Ina, Yehovha Xikwembu a a ri Xihlovo xa matimba ya Pawulo. Hilaha ku fanaka, Petro u tsundzuxile: “Loko un’wana a nyikiwile ku tirhela vanhu, a a swi endle tanihi loyi a swi tirhaka hi matimba lawa Xikwembu xi n’wi nyikaka wona, leswaku eswilweni hinkwaswo Xikwembu xi dzunisiwa ha Yesu Kriste.” (1 Petro 4:11) Makwerhu un’wana loyi a heteke malembe yo tala a ri mulanguteri la famba-fambaka u kandziyise xilaveko xa ku titshega hi Xikwembu, a ku: “Nkarhi hinkwawo tshembela eka Yehovha leswaku a ku pfuna eku tlhantlheni ka swiphiqo ni ku lava mpfuno wa nhlengeletano yakwe.”

7. Xana ku ringanisela ku pfuna hi ndlela yihi entirhweni wa mulanguteri la famba-fambaka?

⁷ Ku ringanisela ka laveka leswaku mulanguteri la famba-fambaka a humelela. Ku fana ni Vakreste van’wana, u tikarhatela “ku hlawula leswi nga swinene ku tlula swin’wana.” (Vafilipiya 1:10)a Loko vakulu va vandlha va ri ni swivutiso emhakeni yo karhi, i swinene leswaku va vutisa mulanguteri wa xifundzha loyi a va endzeleke. (Swivuriso 11:14; 15:22) Swi le rivaleni leswaku tinhlamuselo takwe leti ringaniseriweke ni ndzayo ya Matsalwa swi ta pfuna swinene loko vakulu va tamela mhaka yoleyo loko se a sukile evandlheni. Malunghana ni mhaka leyi yelanaka ni sweswo, Pawulo u byele Timotiya a ku: “Leswi u swi tweke eka mina emahlweni ka timbhoni leto tala, swi hundzisele eka vanhu lavo tshembeka, lava na vona va nga ta kota ku dyondzisa van’wana.”—2 Timotiya 2:2.

8. Ha yini swi ri swa nkoka ku va ni dyondzo ya Bibele, ku endla ndzavisiso ni ku anakanyisisa?

⁸ Dyondzo ya Matsalwa, ndzavisiso ni ku anakanyisisa swa laveka eku nyikeleni ka ndzayo leyi twalaka. (Swivuriso 15:28) Mulanguteri un’wana wa muganga u te: “Loko hi ri ni vakulu, a hi fanelanga hi chava ku vula loko hi nga yi tivi nhlamulo ya xivutiso xo karhi.” Ku endla matshalatshala ya ku kuma “miehleketo ya Kriste” emhakeni swi endla leswaku hi kota ku nyika ndzayo leyi sekeriweke eBibeleni leyi nga ta pfuna van’wana ku fambisana ni ku rhandza ka Xikwembu. (1 Vakorinto 2:16) Minkarhi yin’wana ku laveka leswaku mulanguteri la famba-fambaka a tsalela Sosayiti ya Watch Tower leswaku a kuma nkongomiso. Kambe, ku va ni ripfumelo eka Yehovha ni ku rhandza ntiyiso i swa nkoka swinene ku tlula vito leri munhu a tiendlelaka rona kumbe nkucetelo wakwe. Ematshan’weni ya ku ta hilaha ku “hlamarisaka hi ku vulavula kumbe hi vutlhari,” Pawulo u sungule vutirheli byakwe eKorinto a “ri la tsaneke, ni ku chava, ni ku rhurhumela ngopfu.” Xana sweswo swi endle leswaku a nga humeleli? Ku hambana ni sweswo, swi pfune Vakorinto leswaku va va ni ripfumelo, “[ri] nga akiwi ehenhla ka vutlhari bya vanhu, kambe [ri] akiwa ehenhla ka matimba ya Xikwembu.”—1 Vakorinto 2:1-5.

Timfanelo Tin’wana Ta Nkoka

9. Ha yini swi laveka leswaku vakulu lava famba-fambaka va va ni ntwela-vusiwana?

⁹ Ntwela-vusiwana wu pfuna valanguteri lava famba-fambaka leswaku va kuma vuyelo lebyinene. Petro u khongotele Vakreste hinkwavo leswaku va “twelana vusiwana” kumbe va “anakanyela.” (1 Petro 3:8, nhlamuselo ya le hansi, NW) Mulanguteri un’wana wa xifundzha u vona swi fanela ‘ku tsakela un’wana ni un’wana evandlheni ni ku n’wi khathalela hi xiviri.’ Hi moya lowu fanaka, Pawulo u tsarile: “Tsakani ni lava tsakaka, mi rila ni lava rilaka.” (Varhoma 12:15) Langutelo ro tano ri susumetela valanguteri lava famba-fambaka leswaku va endla matshalatshala lamakulu yo twisisa swiphiqo ni swiyimo swa vapfumeri-kulobye. Kutani va kota ku nyika ndzayo ya Matsalwa leyi akaka leyi nga pfunaka swinene loko yi tirhisiwa. Mulanguteri wa xifundzha loyi a kombisaka ntwela-vusiwana hilaha ku humelelaka u amukele papila leri a ri huma evandlheni ra le kusuhi ni le Turin, eItaly, leri nge: “Loko u lava ku khathaleriwa hi vanhu, va khathalele; loko u lava ku tsakeriwa hi vanhu, va tsakele; loko u lava ku rhandziwa hi vanhu, va rhandze; loko u lava ku pfuniwa, lunghekela ku pfuna. Leswi hi leswi hi swi dyondzeke eka wena!”

10. Xana valanguteri va swifundzha ni va miganga va vule yini malunghana ni ku titsongahata, naswona hi xihi xikombiso lexi Yesu a xi vekeke emhakeni leyi?

¹⁰ Ku titsongahata ni ku tshineleleka swi pfuna valanguteri lava famba-fambaka leswaku va humelela. Mulanguteri un’wana wa xifundzha u te: “I swa nkoka ku titsongahata nkarhi hinkwawo.” A a tsundzuxa valanguteri lavantshwa lava famba-fambaka: “Mi nga kuceteriwi hi vamakwerhu lava fuweke hikwalaho ka leswi va mi endlelaka swona, kumbe ku endla xinghana ni vanhu vo tano ntsena, kambe mi fanele nkarhi hinkwawo mi tirhisana ni van’wana handle ko ya hi nghohe.” (2 Tikronika 19:6, 7) Naswona mulanguteri la famba-fambaka loyi a titsongahataka hakunene a nge tilanguti a ri wa nkoka ku tlula mpimo hi leswi a nga muyimeri wa Sosayiti. Mulanguteri wa muganga u vule hilaha ku faneleke a ku: “Titsongahate naswona u tiyimisela ku yingisela vamakwenu. U tshineleleka nkarhi hinkwawo.” Yesu Kreste, nghwazi leyi tshameke yi hanya a ta va a endle vanhu va titwa va nga ntshunxeki, kambe a a titsongahata swinene ni ku tshineleleka lerova hambi vana a va ntshunxeka loko va ri na yena. (Matewu 18:5; Marka 10:13-16) Valanguteri lava famba-fambaka va lava leswaku swihlangi, vana va kondlo-a-ndzi-dyi, lavakulu—kunene un’wana ni un’wana evandlheni—va titwa va ntshunxekile ku ya eka vona.

11. Loko swi fanerile, xana ku kombela ku khomeriwa swi nga va ni vuyelo byihi?

¹¹ Ina, “hinkwerhu hi ni swihoxo leswo tala,” naswona ku hava mulanguteri la famba-fambaka loyi a nga swi endliki swihoxo. (Yakobo 3:2) Loko va endla swihoxo, ku kombela ku khomeriwa hi mbilu hinkwayo swi veka xikombiso lexinene xa ku titsongahata eka vakulu van’wana. Hi ku ya hi Swivuriso 22:4, “hakelo ya ku tiṭongahata ni ya ku tšhav̌a Yehova, i rifuwo, ni ku kwetsima, ni v̌utomi.” Kutani xana a hi swona leswi lavekaka leswaku malandza hinkwawo ya Xikwembu ‘ma titsongahata emahlweni ka Xikwembu’? (Mikiya 6:8) Mulanguteri un’wana wa xifundzha u vule leswi landzelaka loko a vutisiwa malunghana ni xitsundzuxo lexi a a ta xi nyika nkulu lontshwa la famba-fambaka: “Vana ni xichavo lexikulu ni ku xixima vamakwerhu hinkwavo naswona u va teka va antswa ku tlula wena. U ta dyondza swo tala eka vamakwerhu. Titsongahate nkarhi hinkwawo. U nga cinci xiyimo xa wena. U nga titlakusi.”—Vafilipiya 2:3.

12. Ha yini swi ri swa nkoka ku hisekela vutirheli bya Vukreste?

¹² Ku hisekela vutirheli bya Vukreste swi endla marito ya mulanguteri la famba-fambaka ma va ya nkoka. Entiyisweni, loko yena ni nsati wakwe va veka xikombiso hi ku hiseka entirhweni wo vula evhangeli, vakulu, vasati va vona, ni vandlha hinkwaro ra khutazeka leswaku ri hiseka evutirhelini. Mulanguteri un’wana wa xifundzha u khutazile: “Hisekela nsimu.” U engeterile: “Hi ntolovelo, ndzi kume leswaku loko vandlha ri hiseka swinene evutirhelini, swiphiqo leswi vaka kona a swi talanga.” Mulanguteri un’wana wa xifundzha u te: “Ndzi xiya leswaku loko vakulu va tirha nsimu ni vamakwerhu va xinuna ni va xisati ni ku va pfuna ku tsakela vutirheli, sweswo swi ta tisa ku rhula ka mianakanyo ni ku eneriseka lokukulu eku tirheleni ka Yehovha.” Muapostola Pawulo ‘u ve ni matimba yo twarisa mahungu lamanene ya Xikwembu eka Vatesalonika hambileswi lavo tala a va ri karhi va lwa na wona.’ A swi hlamarisi leswi a va tsaka loko va tsundzuka maendzo yakwe ni ntirho wo chumayela, va navela ni ku tlhela va n’wi vona!—1 Vatesalonika 2:1, 2; 3:6.

13. Xana mulanguteri la famba-fambaka u anakanyela yini loko a tirha ni Vakreste-kulobye entirhweni wa nsimu?

¹³ Loko a tirha ni Vakreste-kulobye evutirhelini, mulanguteri la famba-fambaka u xiya swiyimo ni ku tsana ka vona. Hambiloko swiringanyeto swakwe swi pfuna, wa swi tiva leswaku van’wana va nga ha chava ku chumayela swin’we ni nkulu la nga ni ntokoto. Hikwalaho, minkarhi yin’wana xikhutazo xi nga ha pfuna swinene ku tlula ndzayo. Loko a famba ni vahuweleri kumbe maphayona edyondzweni ya Bibele, va nga ha rhandza leswaku yi fambisiwa hi yena. Kunene sweswo swi ta va toloveta tindlela tin’wana to antswisa madyondziselo ya vona.

14. Ha yini ku vuriwa leswaku valanguteri lava famba-fambaka lava hisekaka va endla leswaku van’wana va hiseka?

¹⁴ Valanguteri lava famba-fambaka lava hisekaka va endla leswaku van’wana va hiseka. Mulanguteri un’wana wa xifundzha eUganda a a famba ekhwatini leri tlhumeke nkarhi wo ringana awara kun’we ni makwerhu un’wana va ya eka dyondzo ya Bibele leyi nhluvuko wa yona a wu nga nyawuli. Loko va ri karhi va famba ku ne mpfula leyikulu swinene lerova va fike va tsakamile. Loko ndyangu lowu wa swirho swa tsevu wu twa leswaku loyi a va endzeleke i mulanguteri la famba-fambaka, a wu tsakile swinene. A va swi tiva leswaku vafundhisi va kereke ya vona a va nga ta wu kombisa nkhathalelo wo tano entlhambini. Hi Sonto leyi landzeleke, va ye eka nhlangano wa vona wo sungula kutani va phofula ku tsakela ka vona ku va Timbhoni ta Yehovha.

15. Xana mulanguteri wa xifundzha la hisekaka wa le Mexico u ve ni ntokoto wihi?

¹⁵ Endhawini leyi vuriwaka Oaxaca eMexico, mulanguteri un’wana wa xifundzha u endle matshalatshala lawa a ma nga languteriwanga. U hlele ku tshama ekhotsweni vusiku bya mune leswaku a endzela ntlawa wa vabohiwa va nkombo lava hundzukeke vahuweleri va Mfumo. Masiku yo hlaya a a famba ni vabohiwa lava loko va nyikela vumbhoni eka xitokisi xin’wana ni xin’wana xa khotso ni loko va fambisa tidyondzo ta Bibele. Hikwalaho ka ku tsakela loku kombisiweke, tin’wana ta tidyondzo a ti fambisiwa byi kala byi va vusiku. Mulanguteri loyi wa xifundzha la hisekaka wa tsala: “Eku heleni ka riendzo leri, mina ni vabohiwa lava hi twe hi ri ni ntsako lowukulu hikwalaho ka ndlela leyi hi khutazaneke ha yona.”

16. Ha yini swi vuyerisa swinene loko valanguteri lava famba-fambaka kun’we ni vasati va vona va nyika xikhutazo?

¹⁶ Valanguteri lava famba-fambaka va ringeta ku nyika xikhutazo. Loko Pawulo a endzela mavandlha ya le Makedoniya, u ma ‘khongoterile hi marito layo tala.’ (Mintirho 20:1, 2) Marito ya xikhutazo ma nga pfuna swinene eku kongomiseni ka lavantshwa ni lavakulu eka tipakani ta moya. Eka hofisi yin’wana leyikulu ya rhavi ya Sosayiti ya Watch Tower, nkambisiso lowu endliweke wu paluxe leswaku valanguteri va swifundzha va khutaze kwalomu ka 20 wa tiphesente ta vatirhi lava va ku tirhandzela leswaku va nghenela ntirho wa nkarhi hinkwawo. Hi xikombiso xakwe lexinene leswi a nga muhuweleri wa Mfumo wa nkarhi hinkwawo, nsati wa mulanguteri la famba-fambaka na yena u va xihlovo lexikulu xa xikhutazo.

17. Xana mulanguteri un’wana wa xifundzha la dyuhaleke u titwisa ku yini hi lunghelo rakwe ro pfuna van’wana?

¹⁷ Lavakulu ni mimoya-xiviri leyi tshikilelekeke va xi lava swinene xikhutazo. Mulanguteri un’wana wa xifundzha la dyuhaleke wa tsala: “Xiphemu xa ntirho wa mina lexi ndzi nyikaka ntsako lowukulu swinene i lunghelo ra ku pfuna lava tsaneke ni lava dyuhaleke exikarhi ka ntlhambi wa Xikwembu. Marito ya Varhoma 1:11, 12 i ya nkoka swinene eka mina, tanihi leswi ndzi kumaka xikhutazo lexikulu ni matimba loko ndzi ‘avela nyiko yin’wana ya moya eka lavo tano leswaku va tiyisiwa.’”

Vuyelo Bya Ntirho Wa Vona Lowu Tsakisaka

18. Hi swihi swikongomelo swa Matsalwa leswi valanguteri lava famba-fambaka va nga na swona?

¹⁸ Valanguteri lava famba-fambaka va khathala swinene hi vapfumeri-kulobye. Va lava ku tiyisa mavandlha ni ku ma aka emoyeni. (Mintirho 15:41) Mulanguteri un’wana la famba-fambaka u tirha hi matimba “ku nyika xikhutazo, ku phyuphyisa, ni ku hlakulela ku navela ka ku hetisisa vutirheli ni ku hanya hi ntiyiso nkarhi hinkwawo.” (3 Yohane 3) Un’wana u lava ku tiyisa vapfumeri-kulobye eripfumelweni. (Vakolosa 2:6, 7) Tsundzuka leswaku mulanguteri la famba-fambaka i “mutirhi-kulorhi la tshembekaka,” a hi mulawuri wa ripfumelo ra van’wana. (Vafilipiya 4:3; 2 Vakorinto 1:24) Nkarhi lowu a endzeke ha wona i wa ku khutaza ni ku endla ntirho lowu engetelekeke, naswona i nkarhi wa leswaku huvo ya vakulu yi kambela nhluvuko lowu endliweke ni ku anakanyisisa hi tipakani ta nkarhi lowu taka. Hi marito ni xikombiso xakwe, vahuweleri va vandlha, maphayona, malandza ya vutirheli ni vakulu va nga langutela ku akiwa ni ku tiyisiwa leswaku va endla ntirho lowu va langutaneke na wona. (Ringanisa 1 Vatesalonika 5:11.) Kutani, seketela riendzo ra mulanguteri wa xifundzha hi mbilu hinkwayo ni ku vuyeriwa swinene eka ntirho lowu endliwaka hi mulanguteri wa muganga.

19, 20. Xana valanguteri lava famba-fambaka kun’we ni vasati va vona va vuyeriwe njhani eku tirheni ka vona hi ku tshembeka?

¹⁹ Valanguteri lava famba-fambaka kun’we ni vasati va vona va vuyeriwa swinene hikwalaho ka ku tirha ka vona hi ku tshembeka, naswona va nga tiyiseka leswaku Yehovha u ta va katekisa eka leswinene leswi va swi endlaka. (Swivuriso 19:17; Vaefesa 6:8) Georg na Magdalena i mpatswa lowu dyuhaleke lowu tirheke malembe yo tala entirhweni wo famba-famba. Entsombanweni wa le Luxembourg, Magdalena u hlangane ni munhu loyi a nyikeleke vumbhoni eka yena emalembeni yo tlula 20 lama hundzeke. Lexi endleke leswaku wansati loyi wa Muyuda a tsakela ntiyiso i buku ya Bibele leyi Magdalena a n’wi siyeleke yona, kutani hi ku famba ka nkarhi u khuvuriwile. Georg u hlangane ni makwerhu wa xisati wa moya, loyi a a tsundzuka nkarhi lowu a n’wi endzeleke ha wona ekaya rakwe emalembeni yo tlula 40 lama hundzeke. Rungula rakwe leri hisaka ra mahungu lamanene eku heteleleni ri endle leswaku yena ni nuna wakwe va amukela ntiyiso. A swi kanakanisi leswaku Georg na Magdalena a va tsake ngopfu.

²⁰ Vutirheli lebyi Pawulo a byi endleke hi ku tshembeka aEfesa byi n’wi nyike ntsako naswona swi nga ha endleka byi n’wi susumetele ku tshaha marito ya Yesu: “Ku nyika i nkateko lowu tlulaka ku nyikiwa.” (Mintirho 20:35) Tanihi leswi ntirho wo famba-famba wu katsaka ku nyika nkarhi hinkwawo, lava va wu endlaka va kuma ntsako, ngopfu-ngopfu loko va vona vuyelo lebyinene bya ntirho wa vona. Mulanguteri un’wana wa xifundzha loyi a pfuneke nkulu loyi a a hele matimba u kume papila leri vulaka leswi: “U ve ‘mpfuno lowu tiyisaka’ swinene evuton’wini bya mina bya moya—a ndzi swi koti ku swi hlamusela. . . . Ndzi pfumala marito ya ku ku hlamusela ndlela leyi u nyikeke mpfuno ha yona eka Asafa wa manguva lawa, loyi ‘milenge yakwe a yi lava ku n’wi wisa.’”—Vakolosa 4:11; Pisalema 73:2.

21. Ha yini u vula leswaku 1 Vakorinto 15:58 ya tirha eka leswi endliwaka hi valanguteri lava famba-fambaka?

²¹ Mukreste la dyuhaleke loyi a a ri entirhweni wa xifundzha malembe yo tala, u rhandza ku anakanya hi 1 Vakorinto 15:58, laha Pawulo a khutazeke a ku: “Tiyani swinene mi nga tsekatsekeni; tiyiselani swinene, mi tirhela Hosi masiku hinkwawo mi ri karhi mi swi tiva leswaku eHosini mintirho ya n’wina a yi nga weli ehansi.” Hakunene valanguteri lava famba-fambaka va ni ntirho wo tala eHosini. Naswona ha va nkhensa swinene leswi va tirhaka hi ntsako tanihi valanguteri vo tshembeka va tintswalo ta Yehovha leti nga fanelangiki!

[Nhlamuselo ya le hansi]

U Nga Angurisa Ku Yini?

◻ Ha yini valanguteri lava famba-fambaka va langutiwa tanihi “valanguteri lavanene”?

◻ Hi tihi tinhla tin’wana leti pfunaka valanguteri va swifundzha ni va miganga leswaku va endla ntirho lowunene?

◻ Ha yini swi ri swa nkoka leswaku lava endlaka ntirho wo famba-famba va titsongahata va tlhela va hiseka?

◻ Hi swihi swikongomelo leswinene leswi valanguteri lava famba-fambaka va nga na swona?

[Xifaniso lexi nga eka tluka 16]

Valanguteri lava famba-fambaka va lava ku khutaza vapfumeri-kulobye

[Swifaniso leswi nga eka tluka 17]

Lavatsongo ni lavakulu va nga vuyeriwa hi ku tihlanganisa ni valanguteri lava famba-fambaka ni vasati va vona

[Xifaniso lexi nga eka tluka 18]

Ku hiseka ka mulanguteri la famba-fambaka evutirhelini ku endla leswaku van’wana va hiseka