Va Xaniseriwa Ku Lulama

Unga ha twa vanghana ni maxaka va ku Timbhoni ta Yehova ti lwisana ni nawu, leswi ti siveriweke hi tihulumendhe tin’wana, kumbexana va ku i vanhu vo biha. Hikwalaho ka yini ku ri na ku vulavula loku ko biha hi vona?

A hi leswi Timbhoni ti delelaka nawu kambe hi leswi ti landzelaka minkondzo ya Yesu. Yesu u byele vadyondzisiwa vakwe a ku vanhu va ta va rhuketela, va va xanisa, kutani hi ku hemba va vula xin’wana ni xin’wana xo biha hi vona. Leswi i mhaka ya leswi mukaneti lonkulu wa Xikwembu, Sathana, a nga xikwembu xa misava leyi, kutani u ta rhandza ku hambukisa vanhu eku tirheleni ka Xikwembu.—Matewu 5:10-12; 10:16-22, 34-39; 24:9, 10; Yohane 15:17–16:3; 2 Timotiya 3:12; 1 Petro 5:8; Nhlavutelo 12:17.

Loko vaapostola va khomiwile ivi va yisiwa ekhoto, a ku nga ri hi leswi a va ri swigevenga, vanhu va vukari, kumbe vapfuxi va mpfilumpfilu. A ku ri hi leswi a va chumayela mahungu lamanene. Loko muapostola Pawulo a yise mhaka yakwe eka tihuvo ta le henhla, a ku ri ku tilwela ni ku tiyisa lunghelo ro va Vakriste va chumayela mahungu lamanene.—Mintirho 4:18-20; 5:28-32; Vafilipiya 1:7.

Namuntlha, Timbhoni ta Yehova i Vakriste lava hlayisaka nawu lava hakelaka mindzuvo ya vona ni ku komba xichavo eka lava fumaka. Va tlherisela Khezari leswi nga swa Khezari ni Xikwembu leswi nga swa Xikwembu. Loko va lwisana ni nawu wihi na wihi wa hulumendhe, hi leswi hulumendhe yi nga xiyiki ntirho wa vona wa ku chumayela, kumbe hikwalaho ka vukala-tlhelo bya vona etimhakeni ta matiko. Kambe eka leswi Timbhoni ta Yehova ti fanele ku endla leswi endliweke hi vaapostola, lava nga te: “Hi fanele ku yingisa Xikwembu ku tlula vanhu.”—Mintirho 5:29; Marka 12:17; Yohane 18:36; Tito 3:1, 2.

Timbhoni ta Yehova a ti tilaveli ku xanisiwa kambe ti lava ku hanya vutomi byo rhula ni lebyo hola. Hambi swi ri tano, loko va xanisiwa hikwalaho ka ku landzela ka vona nawu wa Xikwembu ni xikombiso xa Yesu Kriste, va tsakela ku swi tiyisela.—Matewu 5:10-12; Mintirho 5:40, 41; 1 Vakorinto 4:12; 1 Timotiya 2:2; 1 Petro 3:14, 15; 4:12-16.

• Hikwalaho ka yini malandza ya Yehova ya rhuketeriwa ni ku xanisiwa?

• Hikwalaho ka yini Timbhoni ta Yehova minkarhi yin’wana ti lwisana ni milawu ya mfumo, tanihi leswi vaapostola va Vukriste va swi endleke?

• Xana malandza ya Yehova ma languta ku xanisiwa hi ndlela yihi?

[Swifaniso leswi nga eka tluka 29]

Yesu u yisiwe emahlweni ka Pilato naswona muapostola Pawulo u khotsiwile hikwalaho ka ku chumayela Mfumo wa Xikwembu