Ndzima 19
“Ku Lwa Ka Siku Lerikulu Ra Xikwembu Xa Matimba Hinkwawo” Loku Tshinelaka
1. (a) Ku nga ri khale matiko ma ta sindzisa Xikwembu xa Matimba Hinkwawo ku tsala yini “ebukwini ya Mivango ya Yehova,” naswona buku ya kona a ku ri yini? (b) Buku yoleyo yi ta fikelela nhlohlorhi leyinene hi nyimpi yihi?
MATIKO eku heteleleni ya fike enkarhini lowu ya sindzisaka Xikwembu xa Matimba Hinkwawo ku tsala vuprofeta lebyinene “ebukwini ya Mivango ya Yehova.” (Tinhlayo 21:14) Buku yoleyo ya xiviri a yi ri rhekhodo ya tinyimpi leti Yehova a ti lweke ematshan’wini ya vanhu vakwe. Entiyisweni Muxe u yi hlayile. Buku leyi yi nga ha va yi sungule enyimpini leyi humelelaka ya Abrahama yo lwa ni tihosi leti khotseke Lota, loko Yehova a lwela Abrahama. (Genesa 14:1-16, 20) Ku nga ri khale sweswi, “[buku] ya Mivango ya Yehova” yi ta tisiwa enhlohlorhini leyinene yi tlhandlekeriwe ndzima leyintshwa—mhaka ya ku hlula kakwe loku vangamaka swinene. Koloko ku ta va “ku lwa ka siku lerikulu ra Xikwembu xa matimba hinkwawo” eArmagedoni, vuprofeta lebyi vulavulaka hi mafambiselo lawa ya swilo. (Nhlavutelo 16:14, 16) “Buku” hinkwayo yi ta komba leswaku Xikwembu xa Matimba Hinkwawo a xi hluriwanga enyimpini.
2, 3. (a) Ku sukela eku sunguleni ka Vukriste, i yini lexi xi veke ntiyiso malunghana ni ku lwa ka Yehova ka “tinyimpi”? (b) I yini lexi nga tlhontlha Yehova leswaku a lwela malandza yakwe enkarhini wa hina?
2 I ntiyiso, ku sukela eku sunguleni ka Vukriste ku fikela sweswi, Yehova u hlayise vanhu vakwe hi ndlela yin’wana handle ka tinyimpi. Yehova a nga si tshama a lwela Timbhoni takwe ta Vukriste hi laha a lweleke Israyele ha kona ehansi ka Nawu wa Muxe. Kambe nkarhi wu ta fika eka nkarhinyana lowu taka laha a nga ta lwela malandza yakwe lama tinyiketeke ya minkarhi ya manguva lawa hi nyimpi. I yini lexi nga ta tlhontlha nyimpi yoleyo eArmagedoni ke?
3 Emahlweni ka ku tlhekeka ka nyimpi ya Xikwembu, Babilona Lonkulu, mfumo wa misava wa vukhongeri byo hemba, u ta va a herisiwile. Sathana Diyavulosi ni valovisi va politiki lava nga riki va vukhongeri va Babilona Lonkulu va ta hlundzukela leswi Timbhoni ta Yehova wu nga ta va wona ntlawa wu ri woxe lowu nga ta pona. Vafumi va misava va ta va va nga yi fikelelanga pakani ya vona ya misava leyi nga hava Xikwembu. Kutani ke, sweswi, va kongome enhlaselweni lowukulu wo hlasela vagandzeri va Yehova, loyi va landzulaka ni ku delela vuhosi byakwe bya hinkwako-nkwako! Xisweswo entiyisweni va ta va va lwa ni Xikwembu.—Nhlavutelo 17:14, 16; ringanisa Mintirho 5:39.
“Yehova Wa Tinyimpi” U Yisa Mintirho Ya Nyimpi eMahlweni
4. (a) Yehova u amukela nhlaselo wa Gog hi ndlela yihi? (b) Ku amukela koloko ku ta komba yini, ku pfumelelana ni vito ra “Yehova wa tinyimpi”?
4 Sathana Diyavulosi, Gog wa Magog wo fanekisela, u ta pfuxa nhlaselo lowu eka vanhu va Yehova. Loko Gog a tirhisa mintshungu yakwe leyi nga pfumeriki eka Xikwembu ku hlasela vanhu va Yehova, ku phanga ni ku va herisa, Yehova u ta nghenelela ivi a lwela vanhu va yena, hi laha ku vhumbiweke ha kona eka Ezekiel 38:2, 12, 18-20. Ku hlamula ka Yehova nakambe ku vhumbiwe eka Zakaria 14:3: “Yehova u ta humelela, a lwa ni matiko wolawo, kukota siku a lwaka esikwini ra ku dlaya.” Hi ndlela leyi Xikwembu xa Bibele xi ta nyika vumbhoni eka matiko hinkwawo ya manguva lawa bya leswaku xa ha ri Xikwembu lexi Hlulaka, hi laha a xi ri ha kona emasikwini ya Israyele wa khale, loko hi laha swi rhekhodiweke ha kona eMatsalweni ya Xiheveru, xi hlamuseriwe tanihi “Yehova wa Tinyimpi” ka 260.—Psalma 24:10; 84:12.
5, 6. (a) I nyimpi yihi leyi sweswi yi tlhekekaka, naswona i mani loyi a rhangelaka mavuthu ya le tilweni enyimpini? (b) I mhaka yihi leyi muapostola Yohane a yi nyikaka ya mavuthu ya le tilweni lama yaka enyimpini?
5 Loko “ku lwa ka siku lerikulu ra Xikwembu xa Matimba Hinkwawo” ku fika, wu ta va nkarhi wa “nyimpi” leyi nga ta fungha siku rero. Yehova u koweta Ndhuna yakwe ya Nyimpi, Yesu Kriste. Evitweni ra Yehova, yena ni mavuthu ya madzana-dzana ya tintsumi ta le tilweni va nghena enyimpini, ku fana ni loko va khandziye tihanci ta nyimpi. (Yuda 14, 15) Ku fana ni muhlamuseri wa nyimpi, muapostola Yohane u hi nyika mhaka leyi antswaka ya ku hlula loku onhaka loku Ndhuna ya Nyimpi ya Yehova yi nga ta ku kuma eka “ku lwa ka siku lerikulu ra Xikwembu xa Matimba Hinkwawo”:
6 “Endzhaku ka swona, ndzi vona tilo ri pfuriwile, kutani, hi nomo lo, ku vonaka mangwa leyo basa. Loyi a gadeke yona, mavito ya yena va ri i “Mutshembeki,” ni “Ntiyiso.” U avanyisa ni ku lwa hi ku lulama. Mahlo ya yena ma fana ni langavi ra ndzilo; enhlokweni ya yena ku ni tiharhi ta vuhosi leto tala . . . kutani mavandla ya le tilweni lama ambaleke tinguvu ta ntswembana wa risima, lowo basa ni wa nkoka, ma n’wi landzelela ma gadile timangwa to basa. Enon’wini wa yena ku huma banga lero kariha, leri a nga ta tsema matiko ha rona, kutani u ta ma fuma hi nhonga ya nsimbi. U ta kandziyela xikamelo xa vhinya ya vukari lebyo chavisa bya Xikwembu lexi nga ni matimba hinkwawo. Engubyeni ya yena ni le ndzhumbyini wa yena, ku tsariwile vito leri nge: Mufumi wa vafumi, ni Hosi ya tihosi.”—Nhlavutelo 19:11-16.
7. Ku kandziyeriwa ka xikamelo xo fanekisela xa vhinya ya vukari bya Xikwembu ku komba yini eka matiko?
7 Ndhuna ya Nyimpi ya le vuhosini, Yesu Kriste, yi rhangela mavuthu ya nyimpi eku lweni lokukulu ka ku lwisana ni valala hinkwavo lava hlanganeke eArmagedoni. U hundzula rivala rero ra nyimpi ri va xikamelo lexikulu xa vhinya! Tanihi leswi Hosi ya tihosi yi ‘kandziyelaka xikamelo xa vhinya ya vukari lebyo chavisa bya Xikwembu xa Matimba Hinkwawo,’ leswi swi komba leswaku matiko ma ta kamiwa hi laha ku heleleke. Ya ta cukumetiwa ku fana ni tivhinya ‘exikamelweni xa vhinya’ lexi hlamarisaka, laha “vukari lebyo chavisa bya Xikwembu lexi nga ni matimba hinkwawo” byi nga ta va ehenhla ka vona kona byi ri ni vuyelo lebyi lovisaka. Mavuthu ya le tilweni ya ta tihlanganisa ni “xikamelo xa vhinya ya vukari lebyo chavisa ya Xikwembu lexi nga ni matimba hinkwawo.”—Nhlavutelo 14:18-20.
8. Yehova u hlamusela marhengu yakwe ya nyimpi hi ndlela yihi?
8 Timbhoni ta Yehova emisaveni a ti rhwali ‘tlhari’ ro lwisana ni mintshungu ya Gog, kambe Yehova wa ri rhwala. Leyi i nyimpi yakwe! Kutani manuku eku heteleleni matiko ya misava leyi hluvukeke hi swa sayense ya ta vona nyimpi yakwe! Yingisela loko a ri karhi a hlamusela marhengu yakwe ya nyimpi a ku: “Kutani ndzi ta vitana ripanga, ri lwa na yena [Gog] etintshaveni ta yena hinkwato, va ta tlhavana hi fumu, ku vula Hosi Yehova. Hi laha ndzi nga ta tenga na yena hi ntungu ni ngati, ndzi ta nisa mpfula leyikulu, ni maribye, ni ndzilo, ni xivavula ehenhla ka yena, ehenhla ka mintlawa ya yena, ne henhla ka matiko lamanyingi lama nga ta va na yena. Kutani ndzi ta tikurisa ni ku tikwetsimisa, ndzi ta titivisa emahlweni ka matiko lamanyingi, va ta tiva leswaku hi mina Yehova.”—Ezekiel 38:21-23.
Matlhari Ya Xikwembu Lama Tirhiseriwaka Nala
9. Hi wahi yan’wana ya matlhari ya nyimpi lawa Yehova a nga ta ma tirhisela ku lwa ni valala vakwe?
9 Tanihi matlhari ya nyimpi, Yehova u ta lawula matimba ya ntumbuluko: Mapapa lama bulukaka ya ndhambi ya mpfula, maribye ya mpimo lowu dlayaka, ku chululuka ka ndzilo lowu dlayaka ni xivavula, mati lama chululukaka ma huma evuentweni bya misava ni ku baleka ka rihati. Eku vonakaleni ka tindlela ta Xikwembu to dlaya valala va xona, ku vonakala ku ta va lokukulu vusiku ni nhlekanhi lerova dyambu ni n’weti wa ntumbuluko swi ta vonaka swi nga ha laveki leswaku swi voninga. Swi ta fana ni loko swi tiyimerile, swi nga tirhi tanihi leswi voningaka kambe swi pfumelela minseve leyi vangamaka ya Yehova yi kombisiwa ematimbeni yo voninga. (Habakuk 3:10, 11) Yehova u ni xiendlakalo lexikulu lexi xiyekaka xa ntumbuluko eku paluxeni kakwe nyimpi.—Yoxuwa 10:11; Yobo 38:22, 23, 29.
10. Hi ku ya hi Zakaria 14:12, i yini xin’wana lexi Yehova a nga ta xi tirhisa ‘esikwini ra nyimpi’ leri taka?
10 ‘Esikwini ro lwa’ leri taka, nakambe Yehova u ta tirhisa ntungu ni “khombo.” Muprofeta Zakariya u tsarile malunghana ni leswi a ku: “Hi rona khombo leri Yehova a nga ta ba matiko hinkwawo lama hlaseleke Yerusalema: Nyama ya vona yi ta bola va ri karhi va yimile hi milenge ya vona; mahlo ya vona ya ta bola emakheleni ya wona, ni tindzimi ta vona emilon’wini ya vona.”—Zakaria 14:12.
11. I yini lexi nga ta humelela loko “khombo” ri wela masocha lama hlaselaka vanhu va Yehova?
11 Hambi “khombo” ri ta va ra xiviri kumbe e-e, ri ta pfala milomu leyi pfulekeke leswaku yi pfumelela minxungeto leyi vavisaka! Tindzimi ti bola! Matimba ya xivono ma ta hela, leswaku vahlaseri lava nga ni mahlo yo tshwuka va dlayiwa mahlo. Mahlo ya bola! Tinyama ta mavuthu ya matimba ti ta heleriwa hi matimba loko va yima hi milenge ya vona—hayi loko va etlele entshurini tanihi mintsumbu. Nyama leyi funengeteke mikongotlo ya vona yi bola!—Ringanisa Habakuk 3:5.
12. “Khombo” ri ta khumba tikampa ta nyimpi ni switirho swa valala hi ndlela yihi?
12 “Khombo” ri tlhekeka hi xihatla etikampeni ta vona ta nyimpi. Mimovha leyi tirhisiwaka ku hlasela a ya ha pfuni nchumu! (Zakaria 14:15; ringanisa Eksoda 14:24, 25.) Lexi kombisaka ndlela leyi switirho swa vona swa nyimpi swi nga ta ka swi nga pfuni nchumu ha yona i marito ya Zakaria 14:6 lama nge: “Esikwini rolero, ku vonakala a ku nga vi kona, ku kwetsima ka tinyeleti ku ta swihala.” Ku hava ku vonakala ka le tilweni ka musa wa Xikwembu loku nga ta voninga ehenhla ka vona. Timboni leti endliweke ta sayense ya manguva lawa ti nga ka ti nga wu susi munyama wa ku avanyisa ka Xikwembu. Swilo leswi tirhaka swi nga ka swi nga ha tirhi, onge hi loko swi tiyisiwe hi xirhami—swi swiharisiwile.
13. I yini lexi nga ta engetela ku chavisa loku Yehova a ku pfuxaka exikarhi ka vahlaseri?
13 Hinkwaswo leswi swi vavisa hi laha ku aneleke! Kambe lexi engetelaka ku vaviseka i mpfilumpfilu lowu Xikwembu xi nga ta wu hakasa exikarhi ka vahlaseri. Ku hlangana ka vona ka xiendlo xo lwisana ni Timbhoni ta Yehova ku ta tshoviwa. Ku fana ni masocha lama nga ni swihuku leswi funengeteke tinhloko ta vona erivaleni ra mintlangu ra Rhoma, va ta hlaselana va nga vonani. Mpfilumpfilu lowu dlayaka wu ta hangalaka loko va ri karhi va dlayana.—Zakaria 14:13.
14. (a) Ku dlaya ku ta va lokukulu ku fikela kwihi enkarhini wolowo, naswona tinyanyana ni swivandzana swi ta hlanganyela eka mimpfuno ya ku hlula ka Yehova hi ndlela yihi? (b) I langutelo rihi leri vaponi va nga ta va na rona ehenhleni ka “lava tlhaviweke hi Yehova”?
14 Ku dlayiwa ka vunyingi esikwini rero ra masiku ku ta va loku hlamarisaka, hikuva mavuthu lama tixaxameteke etlhelweni ra Gog enyimpini yoleyo ya ta va lama hlamarisaka. (Nhlavutelo 19:19-21) Rero hakunene ri ta va dzolonga ra misava hinkwayo, hikuva ku hava xiyenge xa misava lexi nga ta pona ndzoviso lowu. Ku tlula kwalaho, lava dlayiweke eArmagedoni va nga ka va nga lahliwi emasirheni lama nga ni mimfungho yo va tsundzuka. Tinyanyana ta muxaka wihi na wihi ni swivandzana swa nhova swi ta hlanganyela eka mimpfuno ya ku hlula ka Xikwembu, naswona hi nkarhi lowu fanaka, swi pfuneta ku hlantswa misava eka mintsumbu yo tala leyi nga ta va yi hangalakile ehenhla ka misava ku fana ni xinonisi, lexi nga rileriwangiki, lexi nga lahliwangiki, lexi vengiwaka hi vaponi. (Ezekiel 39:1-5, 17-20; Nhlavutelo 19:17, 18) “Lava tlhaviweke hi Yehova” va ta va va tikumele ku avanyisiwa loku nga heriki.—Yeremia 25:32, 33; Esaya 66:23, 24.
Ku Sasekisiwa Ka Vito Ra Yehova
15. I xiendlakalo xihi lexi xiyekaka lexi manuku xi nga ta va xi hetisekile, naswona ku va ni vuyelo byihi evitweni ra Yehova?
15 Xisweswo, “Yehova wa tinyimpi” hi ku tirhisa Ndhuna yakwe ya Nyimpi, Yesu Kriste, u ta tikumela ku dzuneka loku nga feki. Xiendlakalo lexikulu swinene xa vurunguri bya misava hinkwayo manuku xi ta va xi hetisekile—ku kurisiwa ka vuhosi bya hinkwako-nkwako bya Yehova ni ku kwetsimisiwa ka vito rakwe lero hlawuleka. (Ezekiel 38:23; 39:6, 7) Yehova u ta tiendlela vito leri tlulaka xin’wana ni xin’wana leri hlamuseriweke eka “buku ya Mivango ya Yehova” ni le Matsalweni ya Xiheveru ya Bibele leyo Kwetsima. (Ringanisa Esaya 63:12-14.) I vito muni ro saseka swonghasi leri Yehova a nga ta tiendlela rona hi ku hlula loku chavisaka eka “ku lwa ka siku lerikulu ra Xikwembu xa Matimba Hinkwawo”! Hi ntsako varhandzi hinkwavo va vito rero manuku va ta ri twarisa hi laha ku nga heriki, va yimbelela ku dzunisa ka rona!
16. Hikwalaho ka “ku lwa ka siku lerikulu ra Xikwembu xa Matimba Hinkwawo” loku tshinelaka, i xikhongelo xihi lexi nyikeriwaka ematshan’wini ya “ntshungu lowukulu”?
16 Manuku ke, yana emahlweni u nghena eka xiendlo xa nyimpi, wena Yehova wa tinyimpi, ni N’wana wa wena la fumaka, Yesu Kriste, a ri etlhelweni ra wena! (Psalma 110:5, 6) Endla leswaku Timbhoni ta wena leti tshembekaka emisaveni ti va timbhoni leti tsakeke ta ku hlula ka wena loku nga ringanisiwiki hi ku tirhisa Hosi ya wena Yesu Kriste eka “ku lwa ka siku lerikulu ra Xikwembu xa Matimba Hinkwawo.” Endla leswaku “ntshungu lowukulu” hi ku tsaka wu ‘huma eku xanisekeni lokukulu’ wu va timbhoni ta wena ta la misaveni hi laha ku nga heriki. (Nhlavutelo 7:14) Ehansi ka nkhathalelo wa wena, endla leswaku va pona va nghena eka ku Fuma ka Gidi ra Malembe loku nga hava nyimpi ka ‘Hosana ya wena ya ku Rhula’ leyi hlulaka. A va vi vumbhoni lebyi vonekaka eka lava pfuxiweke eku feni eku kurisiweni ka vuhosi lebyi nga bya wena hakunene ehenhla ka misava hinkwayo. Ha ku nkhensa leswi u hi tsaleleke vuprofeta lebyinene “ebukwini ya Mivango ya Yehova.” Eka nkarhi lowu nga heriki, mhaka leyi ya ku hlula ka wena loku nga ringanisiwiki a yi tshame yi ri kona evurungurwini lebyi tsariwaka lembe na lembe bya misava hinkwayo!
[Xifaniso lexi nga eka tluka 156, 157]
“Yehova wa tinyimpi” u ta lwa ni matiko