Ndzima 39
Hosi Leyi Nga Nhenha Ya Hlula eArmagedoni
Xivono 13—Nhlavutelo 19:11-21
Nhloko-mhaka: Yesu u rhangela mavuthu ya le tilweni ku ya lovisa mafambiselo ya Sathana ya swilo
Nkarhi wa ku hetiseka: Endzhaku ka ku lovisiwa ka Babilona Lonkulu
1. Armagedoni i yini, naswona hi swihi swiendlakalo leswi nga ta humelela loko yi ri kusuhi ni ku fika?
ARMAGEDONI—i rito leri chavisaka vo tala! Kambe eka lava rhandzaka ku lulama, ri vula siku leri ku nga khale ri languteriwe hi mahlo-ngati, laha Yehovha a nga ta tisa vuavanyisi byo hetelela ehenhla ka matiko. A hi nyimpi ya vanhu kambe i “nyimpi ya siku lerikulu ra Xikwembu xa Matimba Hinkwawo”—siku ra xona ra ku tirihisela eka vafumi va misava. (Nhlavutelo 16:14, 16; Ezekiyele 25:17) Leswi Babilona Lonkulu a nga ta va a lovisiwile, nhlomulo lowukulu wu ta va se wu sungurile. Kutani, hi ku susumetiwa hi Sathana, xivandzana xa ribungu ni timhondzo ta xona ta khume swi ta sungula ku hlasela vanhu va Yehovha. Leswi Diyavulosi a nga ta va a yi karihele ngopfu nhlengeletano ya Xikwembu leyi fanaka ni wansati, u ta tiyimisela ku tirhisa vayimeri vakwe ku herisa lava saleke va mbewu ya wansati. (Nhlavutelo 12:17) Lowu i nkarhi wa Sathana wo hetelela!
2. Gogo wa Magogo i mani, naswona Yehovha u n’wi susumeta hi ndlela yihi leswaku a hlasela vanhu va Yena?
2 Nhlaselo wa vukarhi wa Diyavulosi wu vekiwe erivaleni eka Ezekiyele ndzima 38. Kwalaho, Sathana lowo homboloka u vitaniwa “Gogo wa tiko ra Magogo.” Yehovha u nghenisa swiove swo fanekisela etinhlayeni ta Gogo, a kokela yena swin’we ni vuthu rakwe lerikulu ra nyimpi leswaku va ya hlasela. U swi endlisa ku yini sweswo? Hi ku endla leswaku Gogo a vona Timbhoni ta Yena onge i tiko leri nga hava nsirhelelo leri ‘hlengeletiweke ri huma ematikweni, leri ri hlengeletaka rifuwo ni nhundzu, leri tshamaka exikarhi ka misava.’ Ti tiveka hi ku yima hi rito rin’we tanihi vanhu lava nga ni vun’we lava alaka ku gandzela xivandzana ni xifaniso xa xona. Matimba ya tona hi tlhelo ra moya ni ku andza ka tona swi hlundzukisa Gogo. Hikwalaho Gogo ni vuthu rakwe lerikulu, ku katsa ni xivandzana lexi humaka elwandle ni timhondzo ta xona ta khume, va ta tsutsumela eku ti dlayeni. Kambe, ku hambana na Babilona Lonkulu, vanhu va Xikwembu lava tengeke va sirheleriwe hi Xikwembu!—Ezekiyele 38:1, 4, 11, 12, 15; Nhlavutelo 13:1.
3. Yehovha u ma lovisa njhani mavuthu ya Gogo?
3 Xana Yehovha u n’wi lovisa njhani Gogo ni ntshungu wa yena hinkwawo? Yingisela! “‘Ndzi ta n’wi vitanela banga endhawini ya mina hinkwayo ya tintshava,’ ku vula Yehovha, Hosi leyi Lawulaka. ‘Banga ra un’wana ni un’wana ri ta va ehenhla ka makwavo.’” Kambe ku hava matlhari ya nyutliya kumbe lama tolovelekeke lama nga ta hlula enyimpini yoleyo, hikuva Yehovha u ri: “Ndzi ta n’wi avanyisa, hi ntungu ni hi ngati; ehenhla ka yena ni le henhla ka mavuthu yakwe ni le henhla ka vanhu vo tala lava va nga ta va va ri na yena, ndzi ta nisa maboboma lamakulu ni xihangu, ndzilo ni xivavula. Kunene ndzi ta titwarisa ndzi tihlawulekisa, ndzi titivisa ematihlweni ya matiko yo tala; va ta tiva leswaku hi mina Yehovha.”—Ezekiyele 38:21-23; 39:11; ringanisa na Yoxuwa 10:8-14; Vaavanyisi 7:19-22; 2 Tikronika 20:15, 22-24; Yobo 28:22, 23.
Loyi A Vuriwaka “Wo Tshembeka Ni Wa Ntiyiso”
4. Yohane u n’wi hlamusele njhani Yesu Kreste loko a ambale swiambalo swa nyimpi?
4 Yehovha u vitana banga. I mani la ndziwitaka banga leri? Loko hi tlhelela eka Nhlavutelo, hi kuma nhlamulo eka xivono xin’wana lexi na xona xi tsakisaka. Yohane u vone matilo ma pfuleka kutani ku paluxeka swin’wana leswi chavisaka hakunene—Yesu Kreste hi yexe u ambale swiambalo swa nyimpi! Yohane u te: “Kavaloko ndzi vona matilo ma pfuleka, kutani waswivo, ku humelela hanci yo basa. Loyi a tshameke ehenhla ka yona u vuriwa wo Tshembeka ni wa Ntiyiso, naswona u avanyisa ni ku lwa hi ku lulama. Mahlo ya yena i langavi ra ndzilo, naswona enhlokweni ya yena ku tele swidlodlo.”—Nhlavutelo 19:11, 12a.
5, 6. I yini lexi fanekiseriwaka hi (a) “hanci yo basa”? (b) vito leri nge “wo Tshembeka ni wa Ntiyiso”? (c) mahlo lama fanaka ni “langavi ra ndzilo”? (d) ‘swidlodlo swo tala’?
5 Tanihi le xivonweni xo sungula xa vagadi va tihanci va mune, “hanci yo basa” yi yi fanekisela kahle nyimpi yo lulama. (Nhlavutelo 6:2) Naswona i mani eka vana va Xikwembu la nga vaka la lulameke ku tlula Nhenha leya matimba? Leswi yi “vuriwaka wo Tshembeka ni wa Ntiyiso,” yi fanele yi ri “mbhoni yo tshembeka ni ya ntiyiso,” yoloye i Yesu Kreste. (Nhlavutelo 3:14) U lwa nyimpi leswaku a tisa vuavanyisi bya Yehovha lebyo lulama. Xisweswo, u tirha tanihi Muavanyisi la hlawuriweke hi Yehovha, i “Xikwembu xa Matimba.” (Esaya 9:6) Mahlo yakwe ma chavisa swinene, ku fana ni “langavi leri pfurhaka,” ma langute eka ndzoviso lowu taka lowu fanaka ni ndzilo eka valala vakwe.
6 Hosi leyi nga Nhenha yi ni swidlodlo swa vuhosi enhlokweni. Xivandzana lexi Yohane a xi voneke xi huma hi le lwandle a xi ri ni swidlodlo swa khume, leswi fanekiselaka vuhosi bya xona bya nkarhinyana emisaveni. (Nhlavutelo 13:1) Kambe, Yesu u ni ‘swidlodlo swo tala.’ Vuhosi byakwe lebyi vangamaka a byi ringanisiwi na nchumu, tanihi leswi a nga “Hosi ya lava nga tihosi ni Mufumi wa lava nga vafumi.”—1 Timotiya 6:15.
7. Xana vito ra Yesu leri tsariweke ri yimela yini?
7 Nhlamuselo ya Yohane yi ye emahlweni yi ku: “U tsariwe vito leri nga tiviwiki hi munhu kambe ro tiviwa hi yena.” (Nhlavutelo 19:12b) Bibele ana yi kombetela eka N’wana wa Xikwembu tanihi Yesu, Emanuwele na Mikayele. Kambe “vito” leri ku vulavuriwaka ha rona laha, leri nga boxiwangiki, ri vonaka ri yimela xikhundlha ni malunghelo lawa Yesu a ma kumaka enkarhini wa siku ra Hosi. (Ringanisa na Nhlavutelo 2:17.) Esaya, loko a hlamusela Yesu ku sukela hi 1914, u ri: “Vito ra yena u ta thyiwa Mutsundzuxi wo Hlamarisa, Xikwembu xa Matimba, Tatana La Nga Riki Na Makumu, Hosana ya Ku Rhula.” (Esaya 9:6) Muapostola Pawulo u hlanganise vito ra Yesu ni malunghelo Yakwe lama tlakukeke swinene ya ntirho loko a tsala a ku: “Xikwembu xi n’wi tlakusele exiyin’weni lexi tlakukeke [Yesu] kutani hi musa xi n’wi nyika vito leri nga ehenhla ka mavito man’wana hinkwawo, leswaku matsolo hinkwawo ya lava nga etilweni ni lava nga emisaveni ni lava nga ehansi ka misava, ma nkhinsama hi vito ra Yesu.”—Vafilipiya 2:9, 10.
8. Hikwalaho ka yini ku ri Yesu ntsena la kotaka ku tiva vito leri tsariweke, naswona i vamani lava a hlanganyelaka na vona eka man’wana ya malunghelo yakwe lama tlakukeke?
8 Malunghelo ya Yesu ma hlawulekile. Handle ka Yehovha hi byakwe, i Yesu ntsena la kotaka ku twisisa ku tlakuka ka xikhundlha xo tano. (Ringanisa na Matewu 11:27.) Hikwalaho, eka swivumbiwa hinkwaswo swa Xikwembu, i Yesu ntsena la kotaka ku tiva vito leri hi xitalo. Nilokoswiritano, Yesu u katsa mutekiwa wakwe eka man’wana ya malunghelo lawa. Hikwalaho u endla xitshembiso lexi: “Loyi a hlulaka . . . eka yena ndzi ta tsala . . . vito ra mina lerintshwa.”—Nhlavutelo 3:12.
9. I yini lexi kombisiwaka hi (a) ku va Yesu a “ambale nguvu ya le handle leyi xuviweke hi ngati”? (b) ku va Yesu a vitaniwa “Rito ra Xikwembu”?
9 Yohane u engetele a ku: “Naswona u ambale nguvu ya le handle leyi xuviweke hi ngati, kutani vito leri a vitaniwaka ha rona i Rito ra Xikwembu.” (Nhlavutelo 19:13) Xana “ngati” leyi i ya mani? Yi nga va yi ri ngati ya Yesu, leyi halatiweke hikwalaho ka vanhu. (Nhlavutelo 1:5) Kambe, eka mongo lowu swi nga ha endleka yi ri ngati ya valala vakwe leyi halatiwaka loko va weriwa hi vuavanyisi bya Yehovha. Hi tsundzuxiwa xivono xin’wana lexi hundzeke lexi eka xona vhinya ya laha misaveni yi tshoveriwaka ivi yi pyanyeteriwa exikamelweni lexikulu xa vukarhi bya Xikwembu kukondza ngati yi fika “ematon’wini ya tihanci”—leswi kombisaka ku hluriwa lokukulu ka valala va Xikwembu. (Nhlavutelo 14:18-20) Hilaha ku fanaka, ngati leyi nga xuva nguvu ya Yesu yi tiyisekisa leswaku u hlula ro hetelela naswona hi ndlela leyi heleleke. (Ringanisa na Esaya 63:1-6.) Sweswi Yohane u tlhela a vulavula hi ku va Yesu a vitaniwa hi vito. Kambe sweswi vito ra kona ra tiveka swinene—ku nga “Rito ra Xikwembu”—leri kombisaka leswaku Hosi leyi, leyi nga Nhenha i Muvulavuleri-nkulu wa Yehovha ni Nhenha ya ntiyiso.—Yohane 1:1; Nhlavutelo 1:1.
Tinhenha-kulobye Na Yesu
10, 11. (a) Yohane u swi kombisa hi ndlela yihi leswaku Yesu a nga yexe enyimpini leyi? (b) Xana swi kombisa yini ku va tihanci ti ri to basa naswona vagadi va tona va ri lava ambaleke “nguvu ya ntsembyana wa risima, yo basa, leyi tengeke”? (c) I vamani lava vumbaka “mavuthu” ya le tilweni?
10 Yesu a nga yexe enyimpini leyi. Yohane wa hi byela: “Nakambe, mavuthu lawa a ma ri etilweni a ma n’wi landzela hi tihanci to basa, naswona a ma ambale nguvu ya ntsembyana wa risima, yo basa, leyi tengeke.” (Nhlavutelo 19:14) Ku va tihanci ti ri to “basa” swi kombisa nyimpi yo lulama. “Nguvu ya ntsembyana wa risima” ya va fanela vagadi va tihanci va Hosi, naswona ku vangama ka yona ni ku basa yi ku paa, swi komba ku tenga ni ku lulama emahlweni ka Yehovha. Kutani, i vamani lava vumbaka “mavuthu” lawa? Handle ko kanakana, va katsa tintsumi to kwetsima. A ku ri emasungulweni ya siku ra Hosi laha Mikayele ni tintsumi takwe va cukumeteke Sathana ni madimona ya yena va va susa etilweni. (Nhlavutelo 12:7-9) Ku tlula kwalaho, “tintsumi hinkwato” sweswi ti tirhela Yesu tanihi leswi a tshameke exiluvelweni xakwe lexo vangama naswona a yaka emahlweni a avanyisa matiko ni vanhu va misava. (Matewu 25:31, 32) Kunene, enyimpini ya makumu, loko ku ta vuavanyisi bya Xikwembu, Yesu u ta tlhela a huma ni tintsumi ta yena.
11 Ku ta katseka ni van’wana. Loko a rhumela rungula rakwe evandlheni ra le Tiyatira, Yesu u tshembisile a ku: “Loyi a hlulaka naswona a hlayisaka swiendlo swa mina ku fika emakumu ndzi ta n’wi nyika vulawuri ehenhla ka matiko, vulawuri byo fana ni lebyi ndzi byi amukeleke eka Tatana, u ta risa vanhu hi nhonga ya nsimbi lerova va ta fayeleriwa va va swipetlu ku fana ni xibya xa vumba.” (Nhlavutelo 2:26, 27) Handle ko kanakana, loko nkarhi wu fika, vamakwavo volavo va Kreste lava se va nga etilweni va ta hoxa xandla eku riseni ka vanhu ni matiko hi nhonga yoleyo ya nsimbi.
12. (a) Xana malandza ya Xikwembu lama nga emisaveni ma ta hlanganyela enyimpini ya Armagedoni? (b) Xana vanhu va Yehovha lava nga emisaveni va katseka njhani eArmagedoni?
12 Kambe, ku vuriwa yini hi malandza ya Xikwembu laha misaveni? Lava ntlawa wa Yohane a va nge hoxi xandla enyimpini ya Armagedoni; hambi va ri vanakulobye va vona lavo tshembeka, vanhu lava humaka ematikweni hinkwawo lava khitikaneke endlwini ya Yehovha ya moya ya vugandzeri. Vanhu lava vo rhula se va fule mabanga ma va swikomu. (Esaya 2:2-4) Kambe, va katseka swinene! Hilaha se hi swi xiyeke hakona, i vanhu va Yehovha lava vonakaka va nga ri na nsirhelelo lava Gogo ni ntshungu wa yena hinkwawo va nga ta va hlasela hi vukarhi. Xexo i xikombiso eka Hosi ya Yehovha leyi nga Nhenha leyi seketeriwa hi mavuthu ya le tilweni, xa leswaku yi sungula ku lwa nyimpi yo herisa matiko wolawo hinkwawo. (Ezekiyele 39:6, 7, 11; ringanisa na Daniyele 11:44–12:1.) Vanhu va Xikwembu lava nga emisaveni va ta tsaka ngopfu hi mhaka yoleyo tanihi leswi va nga vahlaleri. Armagedoni yi ta vula ku ponisiwa ka vona, naswona va ta hanya hilaha ku nga heriki tanihi timbhoni leti yi voneke hi mahlo nyimpi leyikulu ya Yehovha.
13. Hi swi tivisa ku yini leswaku Timbhoni ta Yehovha a ti lwisani ni tihulumendhe hinkwato?
13 Xana leswi swi vula leswaku Timbhoni ta Yehovha ti lwisana ni tihulumendhe hinkwato? Doo! Ti yingisa ndzayo ya muapostola Pawulo leyi nge: “Moya-xiviri wun’wana ni wun’wana a wu tiveke ehansi ka valawuri lava tlakukeke.” Ta swi xiya leswaku loko mafambiselo lawa ma ha ri kona, ‘valawuri volavo lava tlakukeke’ va ta ya emahlweni va fuma hikwalaho ka mpfumelelo wa Xikwembu leswaku ku va ni ku hleleka ko karhi etikweni. Xisweswo, Timbhoni ta Yehovha ti hakela swibalo swa tona, ti yingisa milawu, ti xixima milawu ya le magondzweni, ti fambisana ni milawu yo tsarisa laha swi faneleke ni swin’wana ni swin’wana. (Varhoma 13:1, 6, 7) Ku tlula kwalaho, ti hanya hi misinya ya milawu ya Bibele hi ku vulavula ntiyiso ni ku tshembeka; ti rhandza vanhu-kulobye; ti aka mindyangu leyi nga ni vun’we; ni ku letela vana va tona leswaku va va vaaka-tiko lava nga xikombiso lexinene. Hi ndlela leyi ti tlherisela “swilo swa Khezari eka Khezari, kambe swilo swa Xikwembu eka Xikwembu.” (Luka 20:25; 1 Petro 2:13-17) Tanihi leswi Rito ra Xikwembu ri kombaka leswaku mimfumo ya hulumendhe ya misava leyi i ya xinkarhana, Timbhoni ta Yehovha sweswi ti tilunghiselela ku kuma vutomi bya xiviri, lebyi ku nga ri khale ti nga ta byi kuma ehansi ka vulawuri bya Mfumo wa Kreste. (1 Timotiya 6:17-19) Hambileswi ti nga ta ka ti nga hlanganyeli eku wiseni ka mimfumo ya misava leyi, Timbhoni ti swi xixima ngopfu leswi Rito leri huhuteriweke ra Xikwembu, Bibele leyo Kwetsima, ri swi vulaka ehenhleni ka ku avanyisa loku Yehovha a nga ekusuhi ni ku ku tisa hi nkarhi wa Armagedoni.—Esaya 26:20, 21; Vaheveru 12:28, 29.
Ku Ya Fika eNyimpini Yo Hetelela!
14. I yini lexi fanekiseriwaka hi “banga ro leha ro kariha” leri humaka enon’wini wa Yesu?
14 Xana Yesu u nyikiwa hi mani matimba yo hlula? Yohane wa hi byela: “Kutani enon’wini wa yena a ku huma banga ro leha ro kariha, leswaku a khemba matiko ha rona, naswona u ta ma risa hi nhonga ya nsimbi.” (Nhlavutelo 19:15a) ‘Banga rolero ro leha ro kariha’ ri yimela matimba ya Yesu lawa a ma nyikiweke hi Xikwembu yo humesa swileriso swo lovisa hinkwavo lava alaka ku seketela Mfumo wa Xikwembu. (Nhlavutelo 1:16; 2:16) Swifaniso leswi swa matimba swi yelana ni marito ya Esaya lama nge: “[Yehovha] u endle nomu wa mina wu fana ni banga ro kariha. U ndzi fihle endzhutini wa voko rakwe. Hakatsongo-tsongo u ndzi endle nseve lowu lotiweke.” (Esaya 49:2) Laha Esaya u fanekisele Yesu la twarisaka ku avanyisa ka Xikwembu a tlhela a ku tisa, onge hiloko a tirhisa nseve lowu nga riki na xihoxo.
15. Enkarhini lowu, i mani la nga ta va se a paluxiwile ni ku avanyisiwa leswaku ku ta funghiwa ku sungula ka yini?
15 Enkarhini lowu, Yesu u ta va se a ri tekile goza, leswaku ku hetiseka marito ya Pawulo lama nge: “Kunene lowo kala nawu u ta hlavuteriwa, loyi Hosi Yesu a nga ta n’wi dlaya hi moya wa nomu wakwe a n’wi herisa loko vukona byakwe byi humelela erivaleni.” Ina, vukona bya Yesu (hi Xigriki, pa·rou·siʹa) byi vonakile ku sukela hi 1914 ku ya emahlweni hi ku paluxiwa ni hi ku avanyisiwa ka munhu lowo homboloka, ku nga vafundhisi va Vujagana. Vukona byebyo byi ta vonaka swinene loko timhondzo ta khume ta xivandzana xa ribungu ti tisa vuavanyisi byebyo ni ku hlasela Vujagana kun’we na Babilona Lonkulu hi ku helela. (2 Vatesalonika 2:1-3, 8) Koloko ku ta va ku sungula ka nhlomulo lowukulu! Endzhaku ka sweswo, Yesu u ta tirhana ni lava saleke va nhlengeletano ya Sathana, hi ku pfumelelana ni vuprofeta lebyi nge: “U ta ba misava hi nhonga ya nomu wakwe; naswona hi moya wa milomu yakwe u ta dlaya lowo homboloka.”—Esaya 11:4.
16. Xana buku ya Yeremiya ni Tipisalema ti wu hlamusela njhani ntirho wa Hosi leyi nga Nhenha leyi hlawuriweke hi Yehovha?
16 Hosi leyi nga Nhenha, leyi hlawuriweke hi Yehovha, yi ta hambanisa lava nga ta pona ni lava nga ta lova. Yehovha, loko a vulavula hi ndlela ya vuprofeta ni N’wana loyi wa Yena, u ri: “U ta ma faya [vafumi va misava] hi nhonga ya nsimbi ya vuhosi, u ta ma faya ma va swiphemu-phemu ku fana ni xibya xa muvumbi.” Naswona Yeremiya u vulavula hi vafumi vo tano lava thyakeke va hulumendhe ni valandzeri va vona, loko a ku: “Rilani, n’wina varisi, mi huwelela! Mi vumbuluka-vumbuluka n’wina vakulukumba va ntlhambi, hikuva masiku ya n’wina ya ku tlhava ni ya ku hangalasa ma hetisekile, mi ta wa kukota xibya lexi navelekaka!” Ku nga khathariseki ndlela leyi vafumi volavo va tikombaka va rhandzeka ha yona emisaveni leyo homboloka, ku fayiwa kan’we hi nhonga ya nsimbi ya Hosi ku ta va hlanhlelela onge hiloko ku fayiwa xibya lexi kokaka mahlo. Swi ta va hilaha Davhida a profeteke hakona malunghana na Hosi Yesu, a ku: “Nhonga ya ntamu wa wena Yehovha u ta yi humesa eSiyoni, a ku: ‘Famba u ya hlula exikarhi ka valala va wena.’ Yehovha evokweni ra wena ra xinene kunene u ta tshovelela tihosi hi siku ra ku hlundzuka kakwe. U ta avanyisa exikarhi ka matiko; u ta endla leswaku ku tala mintsumbu.”—Pisalema 2:9, 12; 83:17, 18; 110:1, 2, 5, 6; Yeremiya 25:34.
17. (a) Yohane u yi hlamusele njhani ndlela leyi Hosi leyi nga Nhenha yi lovisaka ha yona? (b) Hlamusela vuprofeta byin’wana lebyi kombaka ndlela leyi siku ra vukarhi bya Xikwembu ri nga ta va ra khombo ha yona eka matiko.
17 Hosi leyi ya matimba leyi nga Nhenha yi tlhela yi vonaka exivonweni lexi landzelaka, Yohane u te: “U pyanyetela ni xikamelo xa vhinya xa vukarhi bya ku hlundzuka ka Xikwembu xa Matimba Hinkwawo.” (Nhlavutelo 19:15b) Exivonweni lexi nga hundza, Yohane ana se u vone ku pyanyeteriwa ka ‘xikamelo xa vhinya lexikulu xa ku hlundzuka ka Xikwembu.’ (Nhlavutelo 14:18-20) Esaya na yena u hlamusele xikamelo xa ndzoviso, kasi vaprofeta van’wana va hlamusele hilaha siku ra vukarhi bya Xikwembu ri nga ta va khombo hakona eka matiko hinkwawo.—Esaya 24:1-6; 63:1-4; Yeremiya 25:30-33; Daniyele 2:44; Sofaniya 3:8; Zakariya 14:3, 12, 13; Nhlavutelo 6:15-17.
18. I yini leswi muprofeta Yuwele a swi paluxaka malunghana ni ku avanyisa ka Yehovha ka matiko hinkwawo?
18 Muprofeta Yuwele u hlanganisa xikamelo xa vhinya ni ku ta ka Yehovha a ta “avanyisa matiko hinkwawo lama rhendzeleke.” Naswona i Yehovha loyi handle ko kanakana a nyikaka Muavanyisi-kulobye, ku nga Yesu ni mavuthu yakwe ya le tilweni xileriso lexi nge: “Nghenisani rihwevo, hikuva ntshovelo wu wupfile. Tanani, mi rhelela, hikuva xikamelo xa madiriva xi tele. Kahle-kahle makhuwana ya le xikamelweni ma khapakhapa; hikuva vubihi byi andzile. Mintshungu, mintshungu yi le rivaleni ra le hansi leri timhaka ti tsemiwaka eka rona, hikuva siku ra Yehovha ri le kusuhi erivaleni ra le hansi leri timhaka ti tsemiwaka eka rona. Kunene dyambu ni n’weti swi ta hundzuka munyama, kutani tinyeleti ti ta tlherisa ku vangama ka tona. Yehovha u ta vomba a ri eSiyoni, u ta twarisa rito rakwe a ri eYerusalema. Kunene matilo ni misava swi ta ninginika; kambe Yehovha u ta va vutumbelo bya vanhu va yena, ni xisirhelelo xa vana va Israyele. Kutani mi ta tiva leswaku hi mina Yehovha Xikwembu xa n’wina.”—Yuwele 3:12-17.
19. (a) Xivutiso lexi vutisiweke eka 1 Petro 4:17 xi ta hlamuriwa njhani? (b) Hi rihi vito leri tsariweke engubyeni ya Yesu, naswona ha yini ri ri leri faneleke?
19 Hakunene rolero ri ta va siku ra khombo eka matiko ni vanhu lava nga yingisiki, kambe eka hinkwavo lava endleke Yehovha ni Hosi yakwe leyi nga Nhenha xichavelo xa vona, ri ta va siku ra ntshunxeko! (2 Vatesalonika 1:6-9) Ku avanyisa loku sunguleke hi va yindlu ya Xikwembu hi 1918 ku ta va ku fike eku chaputeni ka kona, ku ta hlamula xivutiso lexi nga eka 1 Petro 4:17 lexi nge: “Makumu ya lava nga yingisiki mahungu lamanene ya Xikwembu ma ta va wahi?” Muhluri la kwetsimaka u ta va a pyanyetele xikamelo xa vhinya ku ya fika emakumu, ku komba leswaku hi yena La tlakukeke loyi Yohane a vulavuleke ha yena a ku: “Kutani engubyeni ya yena ya le handle, hileswaku endzhumbini wa yena, u tsariwe vito leri nge, Hosi ya tihosi ni Mufumi wa vafumi.” (Nhlavutelo 19:16) U tikombise a ri la nga ni matimba swinene ku tlula mufumi kumbe hosi yihi na yihi ya laha misaveni. Vukulukumba ni ku vangama ka yena swa hlamarisa. U gade hanci a famba “hi ndlela ya ntiyiso ni ku titsongahata ni ku lulama” naswona u hlulele makumu! (Pisalema 45:4) Etingubyeni takwe leti totiweke hi ngati ku tsariwe vito leri a ri nyikiweke hi Yehovha Hosi Leyi Lawulaka, loyi a nga Mulweri wa yena!
Xilalelo Lexikulu Xa Xikwembu
20. Yohane u xi hlamusela njhani “xilalelo lexikulu xa Xikwembu,” naswona swi hi tsundzuxa hi vuprofeta byihi bya khale lebyi fanaka na xona?
20 Endzhaku ka ku lovisiwa ka ntshungu wa Gogo eka xivono xa Ezekiyele, tinyenyana ni swiharhi swa nhova swi rhambiwa enkhubyeni! Swi susa mintsumbu ya valala va Yehovha hi ku dya tinyama ta vona. (Ezekiyele 39:11, 17-20) Marito ya Yohane lama landzelaka ma hi tsundzuxa vuprofeta byo sungula, ma ri: “Ndzi vona ntsumi nakambe yi yime edyambyini, yi huwelela hi rito lerikulu yi byela tinyenyana hinkwato leti hahaka empfhukeni yi ku: ‘Tanani haleno, hlengeletanelani xilalelo lexikulu xa Xikwembu, leswaku mi dya tinyama ta tihosi ni tinyama ta tindhuna ta nyimpi ni tinyama ta vavanuna va matimba ni tinyama ta tihanci, ni ta lava va ti gadeke, ni tinyama ta hinkwavo, ta lava ntshunxekeke ni ta mahlonga ni ta lavatsongo ni lavakulu.’”—Nhlavutelo 19:17, 18.
21. I yini lexi kombisiwaka hi (a) ku va ntsumi yi “yime edyambyini”? (b) yinhla ya leswaku vafi va tshikiwa va lo n’walala, ehenhla ka misava? (c) nxaxamelo wa lava mintsumbu ya vona yi nga ta tshikiwa ehenhla ka misava? (d) marito lama nge “xilalelo lexikulu xa Xikwembu”?
21 Ntsumi yi “yime edyambyini,” ku nga xivandla xo lerisela eka xona leswaku yi vitana tinyenyana. Yi ti byela leswaku ti tilulamisela ku dya nyama ya lava nga kusuhi ni ku dlayiwa hi Hosi leyi nga Nhenha ni mavandla ya yona ya le tilweni. Mhaka ya leswaku lava dlayiweke va fanele ku tshikiwa ehenhla ka misava yi komba leswaku va ta fa hi ndlela leyi nyumisaka. Ku fana na Yezabele wa khale, va nga ka va nga endleriwi nkosi lowu xiximekaka. (2 Tihosi 9:36, 37) Nxaxamelo wa lava mintsumbu ya vona yi nga ta tshikiwa yi lo n’walala, wu komba ku tala ka lava nga ta lovisiwa: ku ta va tihosi, tindhuna ta nyimpi, tinhenha, lava ntshunxekeke ni mahlonga. A ku nge sali munhu. Hinkwavo lava nga ta va va sele emisaveni lava tinonon’hwisaka ni ku lwisana na Yehovha va ta lovisiwa. Endzhaku ka sweswo, a ku nge he vi na lwandle leri kariheke ra vanhu lava pfilunganyekeke. (Nhlavutelo 21:1) Lexi i “xilalelo lexikulu xa Xikwembu,” tanihi leswi ku nga Yehovha la rhambelaka tinyenyana eka xona.
22. Xana Yohane u yi katsakanye njhani ndlela leyi nyimpi yo hetelela yi nga ta fambisa xiswona?
22 Loko Yohane a katsakanya ta nyimpi yo hetelela u te: “Kutani ndzi vona xivandzana ni tihosi ta misava ni mavuthu ya tona va hlengeletanile leswaku va lwa nyimpi ni loyi a gadeke hanci swin’we ni vuthu ra yena. Kavaloko xivandzana xi khomiwa, swin’we ni muprofeta wa mavunwa la endleke mahlori emahlweni ka xona, lawa a hambukiseke ha wona lava amukeleke mfungho wa xivandzana ni lava gandzelaka xifaniso xa xona. Hi vumbirhi bya vona va lahleriwa etiveni ra ndzilo leri pfurhaka xivavula va ri karhi va hanya. Kambe lavan’wana hinkwavo va dlayiwa hi banga ro leha ra loyi a gadeke hanci, ku nga banga leri a ri huma enon’wini wa yena. Tinyenyana hinkwato ti xurha hi tinyama ta vona.”—Nhlavutelo 19:19-21.
23. (a) Xana ‘nyimpi ya siku rero lerikulu ra Xikwembu xa Matimba hinkwawo’ yi lweriwa ‘eHar–Magedoni’ hi ndlela yihi? (b) Hi xihi xitsundzuxo lexi “tihosi ta misava” ti tsandzekeke ku xi yingisa, naswona hi byihi vuyelo bya kona?
23 Endzhaku ka ku chuluriwa ka nkambana wa vutsevu wa vukarhi bya Yehovha, Yohane u vike leswaku ‘tihosi ta misava ni misava hinkwayo’ swi ta hlengeletiwa hi mavunwa ya vudimona ‘enyimpini ya siku lerikulu ra Xikwembu xa Matimba Hinkwawo.’ Nyimpi leyi yi lwiwa eArmagedoni—ku nga ri exivandleni xo karhi xa xiviri, kambe emisaveni hinkwayo leyi nga ta avanyisiwa hi Yehovha. (Nhlavutelo 16:12, 14, 16) Sweswi Yohane u vona mavandla ya nyimpi lama hlomeke. “Tihosi ni mavuthu ya tona” ti pfukele Xikwembu. Ti sihalarile, ti ala ku titsongahata eka Hosi ya Yehovha. U ti nyike xitsundzuxo lexi nga erivaleni eka rungula leri huhuteriweke, a ku: “Ntswontswani n’wana, leswaku [Yehovha] A nga hlundzuki leswaku mi nga lovi endleleni, hikuva ku hlundzuka kakwe ku tlakuka hi ku olova.” Leswi va nga titsongahatangiki eka vulawuri bya Kreste, va fanele va fa.—Pisalema 2:12.
24. (a) I ku avanyisa kwihi loku welaka xivandzana ni muprofeta wa mavunwa, naswona va va “va ri karhi va hanya” hi ndlela yihi? (b) Ha yini ‘tiva ra ndzilo’ ri ri ro fanekisela?
24 Xivandzana xa tinhloko ta nkombo ni timhondzo ta khume lexi humaka elwandle, lexi fanekiselaka nhlengeletano ya Sathana ya politiki xa lovisiwa swin’we ni muprofeta wa mavunwa, la nga mfumo wa vunkombo wa misava. (Nhlavutelo 13:1, 11-13; 16:13) Va hoxiwa “etiveni ra ndzilo” va ha ‘hanya,’ kumbe va ha ri nyandza yin’we eku kaneteni ka vanhu va Xikwembu emisaveni. Xana leri i tiva ra ndzilo ra xiviri? Doo, hikuva xivandzana ni muprofeta wa mavunwa na swona a hi swa xiviri. Kambe, ri fanekisela ndzoviso wo hetelela, ku loviseriwa makumu. Laha hi kona laha rifu ni Hayidesi kun’we na Diyavulosi hi byakwe, va nga ta cukumeteriwa kona. (Nhlavutelo 20:10, 14) Hakunene a hi le ndzilweni lowu ku xanisiwaka lavo biha hilaha ku nga heriki, tanihi leswi xivandla xo tano xi n’wi nyenyetsaka Yehovha.—Yeremiya 19:5; 32:35; 1 Yohane 4:8, 16.
25. (a) I vamani lava nga ta “dlayiwa hi banga ro leha ra loyi a gadeke hanci”? (b) Xana hi fanele ku langutela leswaku van’wana va lava va ‘dlayiweke’ va pfuxiwa?
25 Lavan’wana hinkwavo lava a va nga ri xiphemu xa hulumendhe hi ku kongoma kambe lava a va ri xiphemu lexi nga hundzukiki xa misava leyo homboloka na vona va “dlayiwa hi banga ro leha ra loyi a gadeke hanci.” Yesu u ta va vula lava faneriwaka hi rifu. Leswi eka vona ku nga vulavuriwangiki hi tiva ra ndzilo, xana hi nga langutela leswaku va ta pfuxiwa? Ku hava laha hi byeriwaka leswaku lava dlayiweke hi Muavanyisi wa Yehovha enkarhini wolowo va ta pfuxiwa. Hilaha Yesu hi yexe a vuleke hakona, hinkwavo lava nga riki “tinyimpfu” va ta ya “endzilweni lowu nga heriki lowu lunghiseleriweke Diyavulosi ni tintsumi takwe,” hi leswaku “va ta loviseriwa makumu.” (Matewu 25:33, 41, 46) Leswi swi chaputa “siku ra vuavanyisi ni ra ndzoviso wa vanhu lava va nga xi xiximiki Xikwembu.”—2 Petro 3:7; Nahume 1:2, 7-9; Malakiya 4:1.
26. Hlamusela vuyelo bya Armagedoni hi ku komisa.
26 Hi ndlela leyi, nhlengeletano hinkwayo ya Sathana ya laha misaveni ya herisiwa. “Tilo ro sungula” ra mfumo wa politiki ri hundzile. “Misava,” leyi nga fambiselo leri vonakaka ri tiyile ra Sathana leri a ri vumbeke hi malembe-xidzana yo tala, sweswi yi lovisiwa hilaha ku heleleke. “Lwandle,” ku nga vunyingi bya vanhu lavo homboloka lava kanetaka Yehovha, a ra ha ri kona. (Nhlavutelo 21:1; 2 Petro 3:10) Kambe, Yehovha u ta endla yini hi Sathana? Yohane u ya emahlweni a hi byela.