Ku Ponisiwa Loko Yesu Kreste A Humelela

“Kambe tsakani . . . leswaku siku a humelelaka eku kwetsimeni ka yena, na n’wina mi ta tsaka mi tsakisisa.”—1 PETRO 4:13.

1. Xana Yehovha u ma fuwise njhani malandza ya yena?

YEHOVHA u fuwise Timbhoni takwe hi tinyiko leto tala. Tanihi Muleteri wa hina Lonkulu, u hi voningerile hi vutivi lebyikulu mayelana ni ku rhandza ni xikongomelo xa yena. Hi moya wa yena lowo kwetsima, u hi nyike vuswikoti bya ku humesa ku vonakala hi xivindzi. Muapostola Pawulo la huhuteriweke u hi byela leswi eka 1 Vakorinto 1:6, 7: “Hikuva vumbhoni bya hina eka Kriste byi tiyisiwile exikarhi ka n’wina; hikokwalaho a mi pfumali nyiko ni yin’we ya Moya, loko mi ri karhi mi langutela ku hlavuteriwa ka Hosi ya hina Yesu Kriste.”

2. I ku langutela kwihi loku tsakisaka loku “ku hlavuteriwa ka Hosi ya hina Yesu Kreste” ku nga na kona?

² Swi vula yini—“ku hlavuteriwa ka Hosi ya hina Yesu Kriste”? Swi vula nkarhi lowu Yesu a nga ta paluxiwa tanihi Hosi leyi vangamaka, a teka goza ro hakela valandzeri vakwe lavo tshembeka ni ku rihisela eka lava nga chaviki Xikwembu. Hi laha 1 Petro 4:13 yi kombisaka ha kona, ku ta va nkarhi wa leswaku Vakreste lava hlayiseke vutshembeki lava totiweke hi moya ni vanghana va vona vo tshembeka va ntshungu lowukulu va “tsaka [va] tsakisisa,” hikuva wu vula ku hela ka mafambiselo ya swilo ya Sathana.

3. Xana hi fanele hi yima hi tiyile tanihi vamakwerhu va le Tesalonika hi ndlela yihi?

³ Loko nkarhi wu ya wu tshinela, Sathana hi ku hlundzuka u engetela ntshikilelo ehenhla ka hina. Tanihi nghala leyi bongaka, u ringeta ku hi hlula. Hi fanele hi yima hi tiyile! (1 Petro 5:8-10) Loko vamakwerhu va le Tesalonika ra khale, va ha ri vantshwa entiyisweni, va vone mahlomulo yo fana ni lama humelelaka Timbhoni ta Yehovha to tala namuntlha. Hikwalaho, leswi muapostola Pawulo a va byeleke swona i swa nkoka eka hina. U tsarile: “Xikwembu xi ta endla leswi lulameke: Xi ta ba lava va mi xanisaka, xi va vangela maxangu, kutani xi ta mi nyika ku wisa swin’we na hina, n’wina mi xanisiwaka; xi ta endla sweswo siku Hosi Yesu a humelelaka hi le tilweni, swin’we ni tintsumi ta yena ta matimba, emalangavini ya ndzilo. Xi ta ba lava va nga xi tiviki, va nga lava nga yingisiki Evhangeli ya Hosi ya hina Yesu.” (2 Vatesalonika 1:6-8) Ina, hi ta wisa hakunene!

4. Ha yini vafundhisi va faneriwa hi ku avanyisa loku taka eku hlavuteriweni ka Yesu?

⁴ Enkarhini wa Pawulo nhlomulo lowukulu a wu vangiwa hi varhangeri va Vayuda. Swa fana ni namuntlha, ku kanetiwa ka Timbhoni ta Yehovha leti rhandzaka ku rhula hakanyingi ku vangiwa hi lava vulaka leswaku va yimela Xikwembu, ngopfu-ngopfu vafundhisi va Vujagana. Va tiendla onge va tiva Xikwembu, kambe va kaneta ‘Yehovha’ wa le Bibeleni, va n’wi siva hi Vunharhu-un’we bya xihundla. (Marka 12:29) A va ma yingisi mahungu lamanene ya Hosi ya hina Yesu, va tshemba vulawuri bya munhu leswaku va kuma ku wisa ivi va ala mahungu lamanene ya Mfumo wa Kreste lowu taka wa ku lulama. Vakaneti lava hinkwavo va vukhongeri va fanele va hela enkarhini wa “ku hlavuteriwa ka Hosi ya hina Yesu”!

Ku “Ta” Ka Yesu Kreste

5. Xana ku hlavuteriwa ka Yesu ku hlamuseriwa erivaleni hi ndlela yihi eka Matewu 24:29, 30?

⁵ Yesu u hlamusela ku hlavuteriwa koloko eka Matewu 24:29, 30 hi ndlela leyi twisisekaka. Loko a hlamusela swivumbeko swin’wana swa xikombiso xa vukona bya yena ni xa ku hela ka mafambiselo ya swilo, u te: “Dyambu ri ta hundzuka ntima, ni n’weti a wu nga ha voningi; tinyeleti ti ta wa hi le tilweni, ni leswa matimba swa le matilweni swi ta dzinginisiwa.” Hi nkarhi wolowo ‘xikombiso xa N’wana-wa-Munhu xi ta vonaka etilweni.’ Matiko ya misava ma “ta ba nkosi, kutani va ta vona N’wana-wa-Munhu [Hosi ya Xikwembu ya Vumesiya] a ta emapapeni ya le tilweni, hi matimba hi ku kwetsima lokukulu.” Ku “ta,” loku er·khoʹme·non hi Xigriki, swi vula ku humelela ka Yesu tanihi Mulweri wa Yehovha.

6, 7. Xana swi hi ndlela yihi leswaku “un’wana ni un’wana ú ta n’wi vona,” naswona i vamani lava katsiwaka laha?

⁶ Nakambe ku “ta” loku ku tlhela ku hlamuseriwa hi muapostola Yohane eka Nhlavutelo 1:7, laha a nge: “Vonani wa ta hi mapapa!” Phela, valala lavaya va nge n’wi voni Yesu hi mahlo ya xiviri, hikuva “mapapa” ma kombisa leswaku u ta ta a nga vonakali a ta avanyisa. Loko vanhu a va kota ku vona ku kwetsima ka yena ka le tilweni hi mahlo ya nyama, a va ta pfaleka mahlo, ku kotisa Sawulo, loko a ri endleleni yo ya eDamaska u pfaleke mahlo loko Yesu la kwetsimisiweke a humelela eka yena hi ku vonakala lokukulu loku tlhavaka.—Mintirho 9:3-8; 22:6-11.

⁷ Mhaka leyi nga eka Nhlavutelo yi vula leswaku “un’wana ni un’wana ú ta n’wi vona, ku katsa ni lava va n’wi dlayeke. Tinxaka hinkwato ta vanhu va misava ti ta ba nkosi ti rila hikwalaho ka yena.” Leswi swi vula leswaku vakaneti va ta swi vona hi ndzoviso lowu Yesu a va tiselaka wona leswaku u te hi matimba ni ku kwetsima lokukulu tanihi Muavanyisi wa Yehovha. Ha yini valala lava va hlamuseriwa tanihi lava va “n’wi dlayeke”? Hikuva langutelo ra vona ra vukarhi ehenhla ka malandza ya Yehovha namuntlha ri fana ni ra vaxanisi va Yesu. Hakunene, va ‘ta ba nkosi va rila hikwalaho ka yena.’

8. I xitsundzuxo xihi lexi Yesu na Pawulo va xi nyikelaka mayelana ni ndzoviso wa xihatla?

⁸ Xana siku rero ra ku rihisa ka Yehovha ri ta fika hi ndlela yihi? Eka vuprofeta lebyi nga eka Luka ndzima 21, Yesu u hlamusela swiendlo leswi chavisaka leswi veke xikombiso xa vukona bya yena ku sukela hi 1914. Kutani, eka tindzimana 34 na 35, Yesu wa tsundzuxa: “Tivoneleni leswaku timbilu ta n’wina ti nga tikeriwi hi makolo ni ku pyopyiwa, ni ku vilela hi swa vutomi lebyi, na swona tivoneleni leswaku siku rero ri nga mi tshuketi; hikuva, kukotisa xirimbani, ri ta wela hinkwavo lava akeke emisaveni hinkwayo.” Ina, siku rero ra ku rihisela ka Yehovha ri ta hi ku hatlisa, hi ku tshuketa! Muapostola Pawulo u tiyisisa leswi eka 1 Vatesalonika 5:2, 3, a ku: “Siku ra Hosi ri ta fika kukotisa khamba leri taka nivusiku. Siku vanhu va nga ta ku: ‘Ku rhulile, ku hava xo karhata’ hi wona nkarhi lowu ku onhaka ku nga ta va wela henhla hi xitshuketa.” Hambi ku ri sweswi matiko ma vulavula hi ku rhula ni nsirhelelo naswona ma kunguhata ku tiyisa Nhlangano wa Matiko leswaku ma sivela swiphiqo hi ku tirhisa matimba ya nyimpi.

9. Xana ‘ku vonakala,’ ku voningela mani naswona ha yini?

⁹ Eka tindzimana 4 na 5, muapostola u ya emahlweni a hi byela: “Kambe n’wina vamakwerhu, a mi le munyameni; hikokwalaho, siku ra kona ri nga mi tshuketi ku fana ni khamba. Hikuva hinkwenu mi vana va ku vonakala, mi vana va nhlekanhi. A hi va vusiku hina, kumbe va munyama.” Ha tsaka leswi hi nga vana va ku vonakala—vabyarhi va ku vonakala eka van’wana lava lavaka ku rhula ni nsirhelelo wa ntiyiso emisaveni leyintshwa ya Xikwembu. Eka Pisalema 97:10, 11, ha hlaya: “Ṅwina la’mi ranḍaka Yehova, v̌engani leŝo biha! O hlayisa mimoya ya v̌akwetsimi v̌a yena, o v̌a kuṭula e mav̌okweni ya la’v̌o biha. Ku v̌onakala ku byaleriwe l’a lulameke, ni ku ṭaka ku nyikiwa v̌a timbilu to lulama.”

Ku Landzelelana Ka Swiendlakalo

10. I xitsundzuxo xihi lexi nge mahlweni lexi hi faneleke hi xi hlayisa mayelana ni siku ra Xikwembu ra ku rihisa? (Nhlavutelo 16:15)

¹⁰ Xana swiendlakalo swi ta landzelelana hi ndlela yihi loko nhlomulo lowukulu wu sungula? A hi languteni Nhlavutelo ndzima 16. Xiya, hi laha swi hlamuseriweke ha kona eka ndzimana 13 ku ya eka 16, leswaku mimoya leyi thyakeke, ya mademona yi hlengeletela matiko ya misava hinkwayo eHar–Magedoni, nyimpi ya siku lerikulu ra Xikwembu xa Matimba Hinkwawo. Nakambe ku ta ka siku leri ra ku rihisela loku fanaka ni khamba ka kandziyisiwa, naswona hi tsundzuxiwa leswaku hi tshama hi xalamukile—hi tshama hi ambale tinguvu ta moya leti hi funghaka leswaku hi ta ponisiwa. Nkarhi wa ku avanyisa vanhu va misava ni matiko wu fikile, kun’we ni ku avanyisiwa ka—munhu un’wana. I mani yoloye?

11. Xana wansati wa Nhlavutelo 17:5 u tivitanisa ku yini?

¹¹ I wansati wo fanekisela loyi a ringetaka ku tiendla “yena.” Eka Nhlavutelo 17:5 u hlamuseriwa tanihi “xihundla, . . . ‘Babilona lonkulu, mana wa tinghwavava ni lava endlaka swa manyala la misaveni.’” Kambe eka Timbhoni ta Yehovha a nga ha ri xihundla. U tikombise erivaleni tanihi mfumo wa misava wa vukhongeri bya mavunwa, lowu mimpambukwa ya Vujagana yi vumbaka xiphemu-nkulu xa wona. Lexi nga manyala swinene emahlweni ya Yehovha, i ku tipeta ka yena etimhakeni ta tipolitiki, ni ku ‘pyopyiwa hi ngati ya vakwetsimi’ hi ku xanisa Vakreste va ntiyiso, ni ku va ni vutihlamuleri bya ngati ya “hinkwavo lava nga dlawa laha misaveni,” ku katsa ni lava tlulaka dzana ra timiliyoni lava dlayiweke etinyimpini ta lembe xidzana leri ra vu-20 ntsena.—Nhlavutelo 17:2, 6; 18:24.

12. Ha yini mimpambukwa ya Vujagana yi soriwa?

¹² Leswi nga biha ngopfu, hi leswaku mimpambukwa ya Vujagana yi tise xisandzu evitweni ra Xikwembu lexi hi vukanganyisi va vulaka leswaku va xi yimela. Va dyondzise tifilosofi ta Babilona ni ta Magriki ematshan’wini ya Rito ra Xikwembu lero tenga naswona va hoxe xandla eku onheni ka mahanyelo ya matiko hinkwawo hi ku pfumelela mahanyelo ya ku tirhandzela lama tlulaka misinya ya milawu ya Bibele. Van’wankumi va vukanganyisi ni va makwanga lava nga exikarhi ka vona va soriwa hi marito lama nga eka Yakobo 5:1, 5: “Twanani ke, n’wina lava fuweke: Mi fanele ku rila mi kolola hikwalaho ka mahlomulo lama nga ta mi humelela. Emisaveni, mi hanyile emafurheni mi ri karhi mi tiphina; kambe mi lo tinonisela ntsena siku ra ku dlayiwa ka n’wina.”

Babilona Lonkulu A Herisiwe!

13. Xana ku sungula ka nhlomulo lowukulu ku tisa ku yini, naswona i nchumu wihi wa xihatla lowu kandziyisiwaka eka Nhlavutelo 18:4, 5?

¹³ Ku sungula ka nhlomulo lowukulu ku tisa ku avanyisiwa ka Babilona Lonkulu hi Yehovha. Nhlavutelo 17:15-18 hi ndlela leyi twisisekaka yi hlamusela “makungu” ya Xikwembu—ku susumetela “timhondzo ta khume,” mimfumo ya matimba leyi nga exikarhi ka mimfumo leyi hlanganeke ya UN, “xivandzana,” leswaku yi n’wi herisa. “Timhondzo ta khume leti u ti voneke, tona swin’we ni xivandzana, swi ta venga wansati loyi wa muoswi, swi ta endla leswaku a swela ni ku sala a nga ambalanga nchumu, swi dya nyama ya yena swi n’wi hisa hi ndzilo. Hikuva Xikwembu xi nghenisile etimbilwini ta swona leswaku swi yisa makungu ya xona emahlweni.” A swi hlamarisi leswi rito ra le tilweni ri tsundzuxaka hi xihatla eka Nhlavutelo 18:4, 5: “N’wina vanhu va mina, humani mi n’wi siya, leswaku mi ta kala mi nga ngheni eswidyohweni swa yena mi ta kala mi nga weriwi hi maxangu ya yena, hikuva swidyoho swa yena swi tlhandlekelene ku ya fika ehenhla tilweni, kutani Xikwembu xi tsundzukile ku homboloka ka yena.” Xitsundzuxo xi ya emahlweni: Dlayani vuxaka hinkwabyo ni vukhongeri bya mavunwa, nkarhi wu nga si hela!

14. I vamani va nga ta rilela Babilona Lonkulu, naswona ha yini?

¹⁴ Xana misava yi ku tekisa ku yini ku lovisiwa ka Babilona Lonkulu? Van’watipolitiki, va yimele le kule—“tihosi ta misava”—va n’wi rilela hikuva va kume ntsako wa nkarhinyana eka vuoswi bya vona bya moya. Van’wana lava n’wi rilelaka va vovola i van’wamabindzu, “va mabindzu va laha misaveni . . . , lava nga fuma hi ku bindzurisa emutini wolowo.” Na vona lava va yimela ekule, va ku: “Yo! Yo! Khombo ra muti lowukulu, lowu a wu ambale tinguvu ta ntsembyani wa risima, to vangama ta xivunguvungu ni leto tshwuka; a wu tikhavisile hi nsuku, ni maribye ya nkoka, ni vuhlalu byo saseka. Kambe hi nkarhinyana ntsena rifuwo leri hinkwaro ri herisiwile!” Hinkwaswo swikhaviso swa tinguvu ta varhangeri va tikereke ni miako ya tikereke letikulu emisaveni swi ta helela makumu! (Nhlavutelo 18:9-17) Kambe xana un’wana ni un’wana u ta rilela Babilona Lonkulu?

15, 16. Xana vanhu va Xikwembu va ta tsakela yini?

¹⁵ Nhlavutelo 18:20, 21 yi ri: “Tsaka hi mhaka ya wona, wena tilo; na n’wina vahlawuriwa va Xikwembu, ni vaapostola, ni vaprofeta, tsakani, hikuva Xikwembu xi wu avanyisile, xi mi rihisetela.” Ku kotisa ribye lerikulu ro sila leri hoxiwaka elwandle, “hi swo leswi u nga ta endliwa swona, we Babilona, muti lowukulu: U ta wiseriwa ehansi hi nsele, kutani a wu nga ha vi kona nakambe.”

¹⁶ Mawaku xivangelo xo tano xo tsaka! Lexi Nhlavutelo 19:1-8 yi xi hlamuselaka. Xirhambo lexi nge, “Dzunisani Xikwembu, n’wina vanhu!” xi twala xi huma etilweni hi minkarhi ya mune. Leto sungula ta Tihaleluya leti ti dzunisa Yehovha hikuva u avanyise muoswi lowo biha, Babilona Lonkulu hi ku lulama. Mfumo wa misava wa vukhongeri bya mavunwa a wa ha ri kona! Ku ta rito ri huma exiluvelweni xa Xikwembu, ri ku: “Dzunisani Xikwembu xa hina, n’wina hinkwenu malandza ya xona, na n’wina lava mi xi chavaka, lavakulu ni lavatsongo.” Vona lunghelo leri hi nga ta va na rona ra ku hlanganyela eka risimu rero!

Vukati Bya Xinyimpfana

17. Loko u ringanisa Nhlavutelo 11:17 na 19:6, Yehovha u sungula ku fuma tanihi Hosi hi tindlela tihi timbirhi?

¹⁷ Aleluya ya vumune yi humesa mhaka yin’wana: “Ku fuma i ka Hosi, Xikwembu xa hina lexi nga ni matimba hinkwawo.” Kambe, xana ku huwelela loku fanaka a ku endliwanga eka Nhlavutelo 11:17? Kona hi hlaya leswi: “We Hosi, Xikwembu xa matimba hinkwawo, . . . ha ku nkhensa, hikuva u tirhisile matimba lamakulu ya wena, kutani sweswi u sungurile ku fuma.” Ina. Hambi swi ri tano, mongo wa Nhlavutelo 11:17 wu vulavula hi ku tisa ka Yehovha Mfumo wa Vumesiya hi 1914 ku “ta fuma matiko hinkwawo hi nhonga ya nsimbi.” (Nhlavutelo 12:5) Nhlavutelo 19:6 yi vulavula hi ku lovisiwa ka Babilona Lonkulu. Hi ku susiwa ka vukhongeri lebyi fanaka ni muoswi, Vukwembu bya Yehovha byi lweriwa hi laha ku nga heriki. Vugandzeri byakwe tanihi Mulawuri ni Hosi leyi Tlakukeke byi ta andza sweswi ni hi laha ku nga heriki!

18. Ku susiwa ka Babilona Lonkulu swi pfula ndlela ya xitiviso xihi xa ku dzunisa?

¹⁸ Hikwalaho, xitiviso xa ntsako xi nga twarisiwa: “A hi tsakeni hi tsakisisa, hi xi dzunisa hikuva nkhuvo wa vukati bya Xinyimpfana wu fikile, ni mutekiwa wa xona ú tilulamisile; ú nyikiwile ku ambala swa ntsembyani wa risima, wo vangama ni wa nkoka. Leswi swa ‘ntsembyani wa risima’, swi vula mintirho yo lulama ya vahlawuriwa va Xikwembu.” (Nhlavutelo 19:7, 8) Leswaku xana vatotiwa lava ha riki emisaveni va ta pfuxeriwa rini etilweni a swi vuriwanga. Kambe ha tiyisekisiwa eka ndzimana leyi leswaku ku hlanganyela ka vona evukatini bya Xinyimpfana, Kreste Yesu, ku ta tsakisa, naswona ngopfu-ngopfu leswi va nga ta va va vone ku dlayiwa ka muoswi lowo biha, Babilona Lonkulu.

Misava Ya Sathana Yi Herisiwa

19. I yini swin’wana leswintshwa leswi hlamuseriwaka eka Nhlavutelo 19:11-21?

¹⁹ Hanci leyo basa leyi rhangeke yi boxiwa eka Nhlavutelo 6:2 sweswi yi tlhela yi humelela. Ha hlaya eka Nhlavutelo 19:11: “Loyi a gadeke yona [hanci yo basa], mavito ya yena va ri i ‘Mutshembeki’, ni ‘Ntiyiso’. U avanyisa ni ku lwa hi ku lulama.” Xisweswo “Mufumi wa vafumi ni Hosi ya tihosi” u gada a ya emahlweni leswaku a ya lwa ni matiko ni ku ya khuvuta a “kandziyela xikamelo xa vhinya ya vukari lebyo chavisa bya Xikwembu lexi nga ni matimba hinkwawo.” “Tihosi ta misava ni mavuthu ya tona” ti hlanganile leswaku ti lwa nyimpi ya Harmagedoni. Mugadi wa hanci yo basa wa hlula. Ku hava nchumu lowu saleke wa nhlengeletano ya Sathana ya la misaveni.—Nhlavutelo 19:12-21.

20. Diyavulosi yena u humeleriwa hi yini ke?

²⁰ Kambe ku vuriwa yini hi Diyavulosi hi yexe? Eka Nhlavutelo 20:1-6, Kreste Yesu u hlamuseriwa tanihi “ntsumi leyi xikaka hi le tilweni, yi tamele xilotlelo xa khele lero enta ku ya ni ku ya, yi tamele ni nketani leyikulu.” U hlula dragona, Nyoka ya khale, leyi nga Diyavulosi na Sathana, a n’wi boha, ivi a n’wi hoxa ekheleni, kutani a pfala a ri tiyisa. Leswi Sathana a nga ha riki kona naswona a nga ha swi kotiki ku tlhela a hambukisa matiko, Mfumo lowu vangamaka wa Gidi ra Malembe wa Xinyimpfana ni mutekiwa wa xona wa sungula. A ka ha ririwi! A ka ha ri na rifu ra Adamu! A ka ha ri na nkosi, kumbe ku kolola hambi ku ri ku vaviseka! “Leswo sungula swi hundzile.”—Nhlavutelo 21:4.

21. Loko hi ri karhi hi rindzela nhlavutelo ya Yesu Kreste hi mahlo ngati, hi fanele hi tiyimisela ku endla yini?

²¹ Leswi hi rindzeleke ku hlavuteriwa ka Hosi ya hina Yesu Kreste hi mahlo ngati, a hi kombiseni ku hiseka hi byela van’wana hi ta switshembiso swa rirhandzu swa Mfumo wa Xikwembu. Nkutsulo wu kusuhi! Onge hi nga ya emahlweni, hi hambeta hi ya emahlweni tanihi vana lava voningeriweke va Hosi Yehovha Mufumi!

Ku Pfuxeta

◻ I yini lexi kombaka leswaku ku hlavuteriwa ka Yesu Kreste ku le kusuhi?

◻ Xana siku ra vukarhi bya Yehovha ri ta fika hi ndlela yihi?

◻ Xana ‘lava rhandzaka Xikwembu’ va fanele va languta xiyimo xa misava xa namuntlha hi ndlela yihi?

◻ Xana ku landzelelana ka swiendlakalo loko nhlomulo lowukulu wu fika ku ta va hi ndlela yihi?

[Xifaniso lexi nga eka tluka 23]

Yesu u ta hi ‘mapapa,’ a nga vonakali, leswaku a ta avanyisa

[Xifaniso lexi nga eka tluka 25]

Hi ku hatlisa vukhongeri bya mavunwa, mafambiselo layo biha ya Sathana, na yena Sathana hi yexe va ta herisiwa