Xana Siku Ra Hosi Ri Ta Vula Yini Eka Wena?
“Tlhoma ku fuma ka wena e šikari ka v̌alala v̌a wena!”—PSALMA 110:2.
1-3. (a) Ha yini ku sungula ka siku ra Hosi ku ve nkarhi wa nkwetlembetano, naswona ku ve kwihi ku humelela kun’wana ka Yesu? (b) Xana Yesu u ta ku ‘heta njhani ku hlula ka yena’?
LE NDZHAKU hi 1914, Yesu u vekiwe tanihi Hosi ya Mfumo wa Xikwembu, naswona siku ra Hosi ri sungurile. Hi xihatla, Hosi leyintshwa yi langutane ni nkaneto wa tihanyi wo huma eka Sathana Diyavulosi ni vayimeri va yena laha emisaveni. (Psalma 2:1-6) Kutani malembe lawa yo sungula ya siku ra Hosi ma ve nkarhi wa nkwetlembetano lowu ha wona Yesu a ‘tlhomeke ku fuma ka yena exikarhi ka valala va yena.’—Psalma 110:2.
2 Ku hlula ka Hosi leyintshwa ku ve loku nyanyulaka. Endzhaku ka 1914, Sathana u ringete ku “mita” Mfumo lowu wa ha ku tswariwaka kambe, ematshan’wini ya sweswo, u hlongoriwile etilweni hi ndlela leyi tsongahataka. (Nhlavutelo 12:1-12) Kutani a ‘sungula nyimpi’ ni lava saleke va lava totiweke, kambe a nga swi kotanga ku sivela ‘ku yima’ ka vona hi 1919 kumbe ku amukela ka vona “xibukwana” evokweni ra Yesu Kriste. (Nhlavutelo 10:8-11; 11:11, 12; 12:17) A a ri hava matimba yo sivela ku hlengeletiwa ka lava hetelela va lava 144 000 ni ku hlengeletiwa ka ntshungu lowukulu (wu huma eka matiko hinkwawo), lava va endlaka ‘ntirho wo hlawuleka vusiku ni nhlekanhi etempeleni ya [Yehova].’—Nhlavutelo 7:1-3, 9-15.
3 Hakunene, ku sukela hi 1914 Yesu ‘u ye emahlweni a hlula.’ Hambi swi ri tano, swi tele leswi faneleke ku endliwa. Yesu wa ha ta ‘heta ku hlula ka yena.’ Wa ha ta teka goza ro susa vuthala hinkwabyo bya mafambiselo ya swilo ya misava ya Sathana. (Nhlavutelo 6:1, 2; 19:11-21) Goza leri rikulu ri ta vula yini eka hina tanihi vanhu?
Ku Hahluriwa Ka Le Rivaleni Ka Babilona Lonkulu
4. Vukhongeri bya mavunwa byi hlamuseriwa njhani eka Nhlavutelo?
4 Ku herisiwa ka misava ya Sathana ku sungula hi ku hela ka vukhongeri bya mavunwa. Nhlavutelo yi hlamusela mfumo hinkwawo wa misava wa vukhongeri bya mavunwa—ku katsa ni Vujagana—tanihi muoswi, Babilona Lonkulu, loyi a nga ni vuxaka ni tihosi ta misava naswona u dakwisa vanhu hi vuoswi bya yena. Na yena hi yexe u pyopyiwile—hi ndlela yo xandzuka—hikwalaho ka ku nwa ngati, ngati ya malandza ya Xikwembu. (Nhlavutelo 17:1-6) Nhlavutelo nakambe yi hlamusela makumu ya muoswi loyi wa khale la nyenyetsaka, naswona hi nga swi twisisa ku antswa leswi leswi swi nga ta vula swona loko hi kambisisa leswi humeleleke eka muoswi un’wana wa vukhongeri la veke kona le ndzhaku eka lembe xidzana ra vunkombo emahlweni ka Nguva ya hina leyi Tolovelekeke.
5, 6. Ha yini Yerusalema la nga tshembekiki a vuriwe muoswi, naswona i ku avanyisa kwihi loku leswi swi ku tiseke ku huma evokweni ra Yehova?
5 Muoswi yoloye a ku ri muti wa Yerusalema. A a fanele a va ntsindza wa vugandzeri bya Yehova emisaveni, kambe Xikwembu xi te eka yena: “U ni nanḍu hi ngati leyo u yi halateke.” (Ezekiel 22:4) Naswona a a fanele ku va la tengeke emoyeni, kambe u tiendle muoswi hi ku tihlanganisa ni matiko. “Oho ndlela leyi ndzi ku hlundzukeleke ha yona,” ku vule Yehova eka yena, “hikwalaho ka ku endla ka wena swilo leswi hinkwaswo, ntirho wa wansati, muoswi la lawulaka!”—Ezekiel 16:30, NW; 23:1-21; Yakobo 4:4.
6 Manuku ke, xiya ku avanyisa ka Yehova eka muoswi loyi: “Waŝiv̌o, nḍi ta hlengeleta v̌agangisi [matiko] v̌a wena lav̌a u oŝaneke na v̌ona, lav̌a u v̌a ranḍeke . . . , v̌a ku susela tinguv̌u, v̌a ku tekela masinḍa ni ŝingwav̌ila swa wena, v̌a ku siya e v̌uŝetini bya wena. V̌a ta hisa tindlu ta wena hi nḍilo.” (Ezekiel 16:37, 39, 41; 23:25-30) Matimu ma rhekhoda leswi humeleleke. Vababilona va te hi 607 B.C.E. ivi va hahlula Yerusalema wu sala wu nga ri na nchumu. Vanhu va wona ni rifuwo ra wona swi tekiwile swi yisiwa eBabilona. Muti wu lovisiwile, tempele yi hisiwa, naswona muti wu siyiwa wu ri marhumbi.—2 Tikronika 36:17-21.
7. Makumu ya Babilona Lonkulu ya ta va wahi?
7 Xin’wana lexi fanaka xi ta humelela eka Babilona Lonkulu. Nhlavutelo ya tsundzuxa: “Tona [“tihosi” ta manguva lawa, kumbe vafumi lava Babilona Lonkulu a endleke vuoswi bya moya na vona] swin’we ni swivandzana swi ta venga nsati loyi wa muoswi, swi ta endla leswaku a swela ni ku sala a nga ambalanga nchumu, swi dya nyama ya yena, swi n’wi hisa hi ndzilo.” (Nhlavutelo 17:2, 16) Hi ku ya hi xikombiso xa Yerusalema wa khale, ha swi tiva leswaku leswi swi ta vula yini. Vugandzeri bya mavunwa byi ta herisiwa hi tihulumendhe ta matiko leti khale a ti n’wi ‘rhandza.’ Rifuwo ra yena ri ta tekiwa, naswona u ta hisiwa, a herisiwa hi ku helela. Makumu lama fanelaka swonghasi eka nhlengeletano leyi nyenyetsaka!
Matilo Ma Va Ya Ntima
8. Xana nhlomulo lowukulu wu ta va nkarhi wa njhani eka vanhu?
8 Loko ku herisiwa Babilona Lonkulu, hi ta va hi nghenile eka ‘nhlomulo lowukulu’ lowu profetiweke hi Yesu. (Matewu 24:21; Nhlavutelo 7:14) Loko yi vulavula hi nkarhi wolowo, Nhlavutelo yi ri: “Ku va ni ku tsekatseka lokukulu ka misava; dyambu ri endla ntima, ri fana ni nguvu ya ntima yo khwaxa. N’weti hinkwawo wu hundzuka lowo tshwuka ku fana ni ngati. Tinyeleti ti wa hi le mpfhukehi ti wela emisaveni.” (Nhlavutelo 6:12, 13) Ku tsekatseka loku kukulu ka misava i “ku tsekatseka lokukulu ka misava” eka ‘tiko ra Israyele’ leri Ezekiyele a profeteke ha rona. (Ezekiel 38:18, 19; Yoel 3:14-16) I ku herisiwa ko hetelela ka mafambiselo lawa yo biha ya swilo. Xana xi kona lexi nga ta humelela eka dyambu, n’weti, ni tinyeleti ta xiviri hi nkarhi wolowo?
9, 10. I yini lexi Ezekiyele a xi profeteke emhakeni ya Egipta, naswona leswi swi hetiseke hi ndlela yihi?
9 Ezekiyele, loko a tsundzuxa hi ku wa loku taka ka muakelani lonkulu wa le dzongeni wa Israyele, Egipta, u te: “E siku nḍi ku [Faro] pimaka, nḍi ta pfala matilo, nḍi endla tinyeleti e ntima; nḍi ta funengeta dyambu hi papa, kutani ṅweti a yi nga ha tisi ṅweti wa yona. Mav̌oningo hikwawo ya tilo nḍi ta wa endla munyama hikwalaho ka wena, nḍi v̌eka munyama e henhla ka tiko ra wena, ku v̌ula Hosi Yehova.”—Ezekiel 32:7, 8.
10 Loko Faro ni mavuthu ya yena va wile, matilo ya xiviri a ma vanga ya ntima. Kambe vumundzuku bya Egipta byi ve bya ntima. Hi laha mudyondzi wa Bibele C. F. Keil a xiyaka ha kona, “Vuyelo bya munyama [ku wa ka Faro] i xikombiso xo fanekisela xa swiyimo leswi hetaka matimba hi ku helela. “Loko ri heriseriwe makumu tanihi mfumo wa misava lowu tilawulaka, Egipta ri fumiwe hi mimfumo ya misaya hi ku landzelelana! Namuntlha, xiphemu lexikulu xa mfumo wa misava wa Vafaro va khale xi fumiwa hi rixaka ra Vaarab.
11. (a) I yini lexi fanekiseriweke hi leswi swi humeleleke aEgipta? (b) Vumundzuku byi ta va bya ntima hi laha ku heleleke eka misava ya Sathana enhlomulweni lowukulu hi ndlela yihi?
11 Kambe Keil u vone nhlamuselo yin’wana ya vuprofeta bya Ezekiyele. Wa tsala: “Ku hluriwa ka mfumo lowu wa misava [Egipta] i xikombiso ni masungulo ya ku hluriwa ka mfumo wihi na wihi wa misava lowu nga chaviki Xikwembu hi siku ra ku avanyisa ko hetelela. “Kahle-kahle, leswi i ntiyiso. Hilaha Nhlavutelo yi kombaka ha kona, eka nhlomulo lowukulu ku langutela ka vanhu lava nga chaviki Xikwembu ku ta va ka ntima hi laha lokuya ka Egipta a ku ri ha kona. Ku ta va onge hi loko dyambu ri nga voningi ninhlekani naswona mpfhuka wa nivusiku wu pfumala rivoni rihi na rihi leri kufumelaka ro huma eka n’weti naswona ku ri hava tinyeleti ta xinghana, leti voningaka. Lava va alaka ku xixima Hosi ya Yehova va ta lova va pfumala hambi ku ri ku lahliwa loku xiximekaka loko Mugadi wa hanci yo basa a heta ku hlula ka yena. (Nhlavutelo 19:11, 17-21; Ezekiel 39:4, 17-19) A swi hlamarisi leswi vanhu vo biha va nga ta huwelela “tintshava ni maribye va ku: ‘Hi weleni ehenhla, mi hi funengeta leswaku loyi a tshameke exiluvelweni a ta kala a nga hi voni, ni vukarhi bya Xinyimpfana byi ta kala byi nga hi fikeli. Hikuva siku lerikulu ra vukarhi bya vona ri fikile, kutani i mani loyi a nga ri tiyelaka xana?’”—Nhlavutelo 6:16, 17; Matewu 24:30.
Nyimpi Leyi Yaka eMahlweni!
12. Sathana u ku kombisa njhani ku venga ka yena Yesu Kriste hi siku ra Hosi?
12 Hambi swi ri tano, ku vuriwa yini hi Vakriste eminkarhini leyi? Kunene, va khumbeke swinene hi nyimpi leyi nga heriki exikarhi ka Sathana ni Mukhandziyi wa hanci yo basa. Tanihi leswi Sathana a tsandzekeke ku ya eka Yesu hi xiviri, u humese matimba ya yena lamakulu ya vukarhi bya yena eka lava saleke va vatotiwa naswona—sweswinyana swinene—eka ntshungu lowukulu wa tinyimpfu tin’wana leti va rhendzeleke. Hi laha Yesu a tsundzuxeke ha kona, lava va “vengiwa hi vanhu va matiko hinkwawo hikwalaho ka vito ra [yena].” (Matewu 24:9) Sathana u tirhise tlhari rin’wana ni rin’wana leri a nga na rona, ku katsa ni ku hlasela hi ntshungu, ku pfalela ekhotsweni, ku xanisa ni ku dlaya, ku lwa na vona.—2 Timotiya 3:12.
13. Sathana u tirhise mano eku lwisaneni ka yena ni vanhu va Xikwembu hi ndlela yihi?
13 Sathana nakambe u tirhise mano hi vutshila. (Vaefesa 6:11) Hi ku tirhisa ‘matimba ya ku kanganyisa ya rifuwo,’ u ringe van’wana ku ehlisa kumbe hambi ku ri ku herisa ntirho wa vona wo hlawuleka. (Matewu 13:22; 1 Timotiya 6:9, 10) Van’wana u va phasele ethyakeni ni le vunghwavaveni. (1 Vakorinto 5:1, 2) Vo tala va le hansi ka ntshikilelo lowukulu hikwalaho ka “ku vilela hi swa vutomi,” naswona Sathana u tirhisa leswi ku ringeta ku ‘va tshikilela.’ (Luka 21:34) Etimhakeni tin’wana, u tirhise ku kwetlembetana ka vumunhu kumbe mimboyamelo ya ku xandzuka ku va susa eka ‘swilo swa nkoka swinene.’—Vafilipiya 1:10; 1 Vakorinto 1:11, 12; Yakobo 4:1-3.
14, 15. Hi nga hlurisa ku yini eku lwisaneni ka hina na Sathana?
14 Hikwalaho, Vakriste va boheke ku hlakulela ku tiyisela hi siku ra Hosi. Van’wana va tsandzekile, naswona ku tsandzeka kun’wana ni kun’wana ku ve ku hlula lokuntsongo ka Sathana. (1 Petro 5:8) Kambe vo tala va yingise xitshembiso xa Yesu lexi nge: “Kambe loyi a tiyiselaka ku fika makumu, hi yena loyi a nga ta ponisiwa.” (Matewu 24:13) Hi mpfuno wo huma eka Yehova, va hlurile naswona va tisa ntsako embilwini ya yena.—Swivuriso 27:11; 1 Yohane 2:13, 14.
15 Hakunene, a nga kona exikarhi ka hina loyi a lavaka ku anerisa Sathana hi ku hi vona hi tshika! Hikwalaho, a hi landzeleni xitsundzuxo xa Pawulo ivi hi tihlomisa hi ntiyiso, ku lulama ni ripfumelo—hi chumayela mahungu lamanene hi ku chivirika ni ku dyondza ku hlayisa ripfumelo ra hina ri tiyile. Nakambe a hi hambeteni hi khongela naswona hi tshama hi phaphamile. Hi ndlela yoleyo, hi ta va “lava nga solekiki hi siku ra Hosi ya hina Yesu Kriste.” (1 Vakorinto 1:8; Vaefesa 6:10-18; 1 Vatesalonika 5:17; 1 Petro 4:7) Ematshan’wini ya sweswo, siku ra Hosi ri ta va xihlovo xa minkateko leyi fuweke eka hina.
Malunghelo Lama Hlamarisaka Ya Ntirho
16. Ha yini Yohane a byeriwe ku ka a nga swi tsali leswi tindlati ta nkombo ti swi vuleke, naswona leswi a swi vula yini eka Vakriste lava totiweke hi 1919?
16 Eka Nhlavutelo 10:3, 4, (BX) Yohane u vula leswaku u twe “tindlati ta ntlhanu na timbiri” ti pfumisa marito ya tona hi toxe. U lave ku tsala leswi a swi tweke, kambe wa vika: “Nḍi twa rito leri humaka e tilweni, ri te ka mina: Lemela ŝilo leŝi nga v̌uriwa hi tindlati le’ta ntlhanu na timbiri, u nga ŝi ṭari.” Entiyisweni, a wu nga si fika nkarhi wa leswaku rungula ro tano ri humesiwa. Ematshan’wini ya sweswo, Yohane u byeriwe ku teka xibukwana kutani a xi dya. Tindlati ta nkombo ti tikomba ti yimela xikombiso lexi heleleke xa swikongomelo swa Yehova. (Psalma 29:3; Yohane 12:28, 29; Nhlavutelo 4:5) Le ndzhaku hi 1919, loko Vakriste lava totiweke hi ndlela yo fanekisela va dye xibukwana, a wu nga si fika nkarhi wa leswaku va va ni ku twisisa loku heleleke ka swikongomelo swa Yehova. (Ringanisa Daniel 12:8, 9.) Kambe handle ko chava va ye emahlweni ni ku twisisanyana loku a va ri na kona naswona va tikombisa va faneriwe hi ku voningeriwa loku engetelekeke.
17. Hi kwihi ku twisisa kun’wana lokuntshwa loku Yehova a ku nyikeke vanhu va yena emalembeni yo sukela hi 1919?
17 Kutani, hi malembe yo tala, va nyikiwe ku twisisa lokunene loku yaka emahlweni ka ku rhandza ka Yehova. Hi xikombiso, va ve lava twisisaka leswaku tinyimpfu ta xifaniso xa Yesu hambi ku ri emahlweni ka Armagedoni, a ti ri karhi, ti hambanisiwa exikarhi ka timbuti. (Matewu 25:31-46) Va vone leswaku ku tswariwa ka Mfumo hi 1914 a ku ri ku hetiseka ka Nhlavutelo ndzima 12. Va wu twisise swinene nkoka wa vito ra Yehova, naswona va twisise lava kahle-kahle ntshungu lowukulu wa Nhlavutelo ndzima 7 a va ri vona. Mawaku ku tiyiseka konghasi loku ku hlavutela loku ku yaka emahlweni ku ku nyikeke vanhu va Xikwembu!—Swivuriso 4:18; 2 Petro 1:19.
18. I malunghelo wahi lama xiyekaka ya ntirho lama vanhu va Yehova va hlanganyeleke eka wona hi siku ra Hosi, naswona i ku phaphama kwihi loku leswi swi ku akaka etimbilwini ta hina?
18 Hi nkarhi lowu fanaka, Yehova u nyike malandza ya yena ya la misaveni malunghelo lama xiyekaka ya ntirho. Exivonweni lexi tlakukeke, Yohane u vone tintsumi ti twarisa mahungu lamanene lama nga heriki eka vanhu, ti twarisa ku wa ka Babilona Lonkulu ni ku tsundzuxa ehenhleni ka ku amukela mfungho wa xivandzana. (Nhlavutelo 14:6-10) Hambi leswi handle ko kanakana tintsumi ti vhumbeke malunghelo lawa ya ntirho wa Xikwembu, a ku ri vanhu, Timbhoni ta Yehova emisaveni, lava va vuleke marungula lawa eka vanhu hi xiviri. Yohane nakambe u vone Yesu a tshovela ‘ntshovelo wa le misaveni.’ (Nhlavutelo 14:14-16) Kambe u tshovele ntshovelo lowu hi ku tirhisa ntirho wa ku chumayela hi Mfumo ni wa ku endla vadyondzisiwa va vafumiwa va Yesu emisaveni. (Matewu 24:14; 28:19, 20) Mawaku lunghelo ronghasi ku avelana ni tintsumi na Yesu Kriste hi hexe eka malunghelo ya ntirho wa nkoka wo tano lowukulu! Hi ku endla tano, entiyisweni hi titwa hi ri ni vun’we ni nhlengeletano ya Yehova leyikulu, leyi nga vonakiki ya le matilweni ya swivumbiwa swa moya leswi tshembekaka.
Nsirhelelo Wa Xikwembu
19. (a) Nhlohlorhi ya tihanyi ta Sathana eka vanhu va Xikwembu yi ta va yihi? (b) I mani la nga ta hlula eka nkwetlembetano lowukulu, wo hetelela?
19 Tanihi leswi makumu ya misava ya yena ma tshinelaka, Sathana u ta ya a engetela ntshikilelo ehenhla ka Vakriste. Nhlohlorhi ya tihanyi ta yena yi hlamuseriwe eka Ezekiel ndzima 38, na 39, laha hi ndlela ya vuprofeta a vuriwaka Gogo wa Magogo. Hi ku ya hi vuprofeta lebyi lebyi huhuteriweke, Sathana u ta endla nhlaselo lowu heleleke ku ringeta ku herisela vanhu va Xikwembu makumu. Xana u ta humelela? Nhlavutelo ya hlamula: “Timhondzo ta khume [“tihosi” ta manguva lawa, kumbe vafumi] . . . ti ta lwa ni Xinyimpfana, kambe Xinyimpfana xi ta ti hlula, hikuva i Hosi ya tihosi ni Mufumi wa vafumi; ni malandza ya xona lama vitaniweke, lama hlawuriweke ni lama tshembekaka, xi ta ma nyika ku hlula.” (Nhlavutelo 17:12, 14) Vakriste lava tshembekaka va ta tiyiseka leswaku va ta hlula loko va tshama va tshembekile eka Hosi ya vona leyikulu, leyi hlulaka. Mavuthu ya Gogo ma ta herisiwa hi laha ku heleleke.—Ezekiel 39:3, 4, 17-19; Nhlavutelo 19:17-21.
20. I minkateko yihi leyi siku ra Hosi ri nga ta yi tisa eka Vakriste lava tshembekaka eka nhlomulo lowukulu?
20 Xisweswo, siku ra Hosi ri vula ku hlayiseka eka vanhu va Xikwembu. Lava va vatotiwa lava va ha hanyaka tanihi vanhu enhlomulweni lowukulu va ta tiyiseriwa xiyimo xa vona xa le tilweni, naswona va ta tiyimisela swinene ku heta ndlela ya vona yo hanya hi ku tshembeka. (Nhlavutelo 7:1-3; 2 Timotiya 4:6-8) Ntshungu lowukulu na wona wu ta pona, naswona Yesu u “ta va yisa eswihlobyeni swa mati ya vutomi. Kutani Xikwembu xi ta hlangula mihloti hinkwayo emahlweni ya vona.” (Nhlavutelo 7:14, 17) Mayana hakelo leyinene swonghasi ya ku tiyisela hi ku tshembeka!
21. I yini lexi nga ta humelela emisaveni hi siku ra Hosi endzhaku ka Nhlomulo lowukulu?
21 Manuku siku ra Hosi ri nghena eka xiyimo lexi hlamarisaka: Ku Fuma ka Gidi ra Malembe ka Yesu Kriste. (Nhlavutelo 20:6, 11-15) Nambu wa mati ya vutomi, lowu profetiweke eka Nhlavutelo ni le ka Ezekiyele, wu ta khulukela eka vanhu wu huma exiluvelweni xa Yehova, naswona lava nwaka eka wona hakantsongo-ntsongo va ta yisiwa eku hetisekeni ka vumunhu. (Ezekiel 47:1-12; Nhlavutelo 22:1, 2) Hades yi ta siyiwa yi nga ri na nchumu, naswona magidi ya timiliyoni ta lava feke na wona ya va ni nkarhi wa ku nwa eka nambu lowu.—Yohane 5:28, 29.
22. I swiendlakalo swihi leswikulu leswi yimeleke vanhu eku heleni ka ku Fuma ka Gidi ra Malembe ka Kriste?
22 Eku heleni ka malembe ya gidi, vanhu va ta va va endliwe lava hetisekeke. Mayana nkarhi lowu faneleke swonghasi eka Sathana ku endla ku humelela ka yena ko hetelela exivonweni xa la misaveni! Nakambe u ta ringeta ku xisa vanhu, naswona van’wana va ta n’wi landzela, hambi ku ri hi nkarhi wolowo. Lava hi ku fanela va vitaniwa “Gogo wa Magogo” tanihi leswi va nga ta kombisa moya lowu fanaka lowo biha tanihi lowu kombisiweke hi ‘ntshungu wa Gogo’ evuprofetweni bya Ezekiyele. Kambe moya wa vona wa ku xandzuka wu ta heriseriwa makumu loko vona, kun’we na Sathana hi yexe ni mademona ya yena, va hoxiwa etiveni ra ndzilo ro fanekisela. (Nhlavutelo 20:7-10; Ezekiel 39:11) Vumundzuku lebyi katekisiweke hakunene byi yimele lava tshamaka va tshembekile eka ndzingo wolowo wo hetelela, kutani endzhaku rixaka ra vanhu leri hetisekeke ri ta va kun’we ni nhlengeletano ya hinkwako-nkwako leyo lulama ya Yehova. Yehova Xikwembu hi yexe u ta va “ehenhla ka hinkwaswo-nkwaswo”!—1 Vakorinto 15:24, 28; Nhlavutelo 20:5.
23. Hikwalaho ka nkarhi lowu hi hanyaka eka wona, i xitsundzuxo xihi xa Pawulo lexi swi fanelaka swinene eka un’wana ni un’wana wa hina ku xi yingisa?
23 Manuku ke, mawaku minkateko leyi nga pimekiki swonghasi, leyi hi yimeleke loko hi tiyisela! Tsundzuka, siku ra Hosi i khale ri sungurile. Swilo swo hlamarisa ana se swi sungurile ku humelela. Manuku ke, ma fanela swonghasi marito ya Pawulo lama nge: “Loko hi ri karhi hi endla leswinene, hi nga karhaleni, hikuva hi ta tshovela hi nkarhi wa kona, loko hi nga heli mbilu.” (Vagalatiya 6:9) Hakunene ‘hi nga karhaleni ku endla leswinene’ esikwini leri ra Hosi. Loko hi tiyisela, siku leri ri ta tisa vuyelo lebyi nga heriki eka un’wana ni un’wana wa hina.
U Nga Hlamusela Xana?
◻ Hi rihi goza ro sungula ra ku lovisiwa ka misava ya Sathana?
◻ Xana Yesu ‘u ta heta ku hlula’ valala va yena hi ndlela yihi?
◻ Sathana u lwe njhani ni Timbhoni ta Yehova esikwini ra Hosi?
◻ I minkateko yihi leyi xiyekaka leyi vanhu va Xikwembu va yi tsakeleke ku sukela hi 1919?
◻ Hikwalaho ka laha hi nga kona eku fambeni ka nkarhi, i yini lexi wena hi wexe u tiyimiseleke ku xi endla?
[Xifaniso lexi nga eka tluka 16]
Makumu ya Yerusalema wa khale ma komba leswi nga ta humelela ku nga ri khale eka Babilona Lonkulu