“Leri I Siku Ra Masiku Hinkwawo”
“Hi siku ra Hosi, Moya wu ndzi nghenile.”—NHLAVUTELO 1:10.
1. I “siku” rihi leri hi hanyaka eka rona, naswona ha yini yinhla leyi yi nyanyula swonghasi?
“LERI i siku ra masiku hinkwawo. Vonani, Hosi ya fuma!” Marito lawa ya matimba lama vuriweke hi muungameri wa vumbirhi wa Watch Tower Bible and Tract Society le ndzhaku hi 1922 ma ha hi nyanyula ni namuntlha. Ma hambeta ma hi tsundzuxa leswaku hi hanya enkarhini lowu nyanyulaka swinene ematin’wini hinkwawo, nkarhi lowu eBibeleni wu vitaniwaka “siku ra Hosi.” (Nhlavutelo 1:10) Hakunene i “siku ra masiku hinkwawo,” hikuva i nkarhi lowu Yehova, hi Mfumo wa Kriste, a nga ta hetisisa swikongomelo swa Yena leswikulu hinkwaswo naswona u ta hlawulekisa vito ra Yena ro kwetsima emahlweni ka swivumbiwa hinkwaswo.
2, 3. (a) Siku ra Hosi ri ta ya emahlweni ku fikela rini? (b) Hi kwihi laha hi nga kumisisaka kona mayelana ni siku leri?
2 Siku leri ri sungule hi 1914 loko Yesu a vekiwa tanihi Hosi ya Mfumo wa Xikwembu. Naswona ri ta ya emahlweni ku ya fika emakun’wini ya Ku Fuma Ka Gidi Ra Malembe, loko Kriste a ta ‘nyiketa mfumo eka Xikwembu ni Tata wakwe.’ (1 Vakorinto 15:24) Vakriste lava tshembekaka va langutele siku ra Hosi hi malembe xidzana yo tala. Sweswi, eku heteleleni ri fikile! Xana ‘siku leri ra masiku hinkwawo’ ri vule yini eka vanhu va Xikwembu ni le ka misava hinkwayo?
3 Buku ya Bibele leyi yi hi byelaka swo tala mayelana ni siku ra Hosi i Nhlavutelo. Kwalomu ka vuprofeta hinkwabyo bya buku leyi byi hetiseka hi siku ra Hosi. Kambe Nhlavutelo yo va ntsena ku chaputa ka nxaxamelo wa tibuku ta vuprofeta leti hi byelaka hi siku rero. Esaya, Yeremia, Ezekiel na Daniel, exikarhi ka tin’wana, na tona ti hi byela ha rona. Hakanyingi, leswi ti swi vulaka swi hi pfuna ku twisisa vuprofeta lebyi nga eka Nhlavutelo ku antswa. A hi voneni ndlela leyi ha yona ngopfu-ngopfu buku ya Ezekiel yi humesaka ku vonakala eku hetisekeni ka Nhlavutelo hi siku ra Hosi.
Vagadi Va Mune Va Tihanci
4. Hi ku ya hi Nhlavutelo ndzima 6, ku humelele yini eku sunguleni ka siku ra Hosi?
4 Hi xikombiso, eka ndzima ya vutsevu ya Nhlavutelo, muapostola Yohane u hlamusela xivono lexikulu a ku: “Ndzi languta, kutani ndzi vona [hanci] leyo basa. Loyi a gadeke yona a khomile vurha, a nyikiwile ni harhi ya vuhosi, a huma ku kota nhenha leyi yaka eku hluleni.” (Nhlavutelo 6:2) Mugadi loyi wa hanci la hlulaka i mani? A ku na un’wana handle ka Yesu Kriste, la vekiweke tanihi Hosi ya Mfumo wa Xikwembu naswona u khandziya ku ya hlula valala va yena. (Psalma 45:3-6; 110:2) Ku khandziya ka Yesu loku hlulaka ku sungule le ndzhaku hi 1914, eku sunguleni ka siku ra Hosi. (Psalma 2:6) Ku hlula ka yena ko sungula a ku ri ku cukumeteriwa ka Sathana ni mademona ya yena emisaveni. Vuyelo byi ve byihi eka vanhu? “Mi ni khombo, n’wina misava ni lwandle.”—Nhlavutelo 12:7-12.
5. Hi swihi swifaniso leswi chavisaka leswi landzelaka Mugadi la nga ehenhla ka hanci yo basa, naswona i matimba wahi lawa xifaniso xin’wana ni xin’wana xi nga na wona?
5 Kutani exivonweni ku landzela swifaniso swinharhu leswi chavisaka: hanci yo tshwuka leyi fanekiselaka nyimpi, hanci ya ntima leyi fanekiselaka ndlala ni hanci yo kwalala leyi mugadi wa yona a vuriwaka “Rifu.” Hi hanci leyi ya vumune, ha hlaya: “Ndzi languta, kutani ndzi vona [hanci] yo kwalala. Mugadi wa yona a vuriwa ‘Rifu’, ni loyi va nge i ‘Tihele’ a n’wi landzelela hi le ndzhaku. A va nyikiwe matimba ehenhla ka swa xiphemu xin’we xa mune xa misava, ku swi dlaya hi tlhari ni dyandza ni ntungu, ni hi swiharhi swa nhova.”—Nhlavutelo 6:3-8; Matewu 24:3, 7, 8; Luka 21:10, 11.
6. Mbuyelo wa tihanci leti tinharhu to chavisa ni vagadi va tona wu ve wihi emisaveni?
6 Ku pfumelelana ni vuprofeta, vanhu va xanisekile swinene hi nyimpi, ndlala ni vuvabyi ku sukela hi 1914. Kambe mugadi wa hanci ya vumune u dlaya na hi ku tirhisa “swiharhi swa nhova.” Xana lexi xi ve xivumbeko lexi xiyekaka ku sukela hi 1914? Ku xiya vuprofeta lebyi fanaka bya Ezekiyele swi hi pfuna ku kambisisa mhaka leyi ya vuprofeta.
7. (a) I vuprofeta byihi lebyi Ezekiyele a byi vuleke malunghana na Yerusalema? (b) Vuprofeta lebyi byi hetisisiwe hi ndlela yihi?
7 Loko a tsala kumbexana malembe ya ntlhanu emahlweni ka ku lovisiwa ka Yerusalema hi 607 B.C.E., Ezekiyele u profete nxupulo lowu chavisaka eka Vayuda hikwalaho ka ku nga tshembeki ka vona. Ehansi ka ku huhuteriwa u tsarile a ku: “Hambi nḍi ba muti wa Yerusalem hi ku av̌anyisa ka mina ka mune, ku nga tlhari, ni ndlala, ni ŝivanḍana, ni ntungu, leŝaku ku herisiwa v̌anhu ni ŝifuwo.” (Ezekiel 14:21; 5:17) Xana leswi swi hetisekile hi ku kongoma hi nkarhi wolowo? Handle ko kananana Yerusalema wu xanisekile hi ndlala ni nyimpi loko makumu ya wona ma tshinela. Naswona ndlala hi ntolovelo yi vanga vuvabyi. (2 Tikronika 36:1-3, 6, 13, 17-21; Yeremia 52:4-7; Swirilo Swa Yeremia 4:9, 10) Xana ku tlhele ku va ni nhlaselo wa swiharhi swa nhova hi ku kongoma hi nkarhi wolowo? Kumbexana swi ve kona swiendlakalo swa vanhu lava kokiweke kumbexana hambi ku ri ku dlayiwa hi swiharhi, tanihi leswi Yeremiya na yena a swi vhumbeke leswi.—Levitika 26:22-33; Yeremia 15:2, 3.
8. I xiphemu xihi lexi swiharhi swa nhova swi veke na xona hi siku ra Hosi ku fikela sweswi?
8 Ku vuriwa yini hi namuntlha? Ematikweni lama hluvukeke, swiharhi swa nhova a hi xiphiqo lexi nga ni khombo ku fana ni khale. Hambi swi ri tano, ematikweni man’wana, swiharhi swa nhova swi hambeta swi hlasela, ngopfu-ngopfu loko hi katsa tinyoka ni tingwenya exikarhi ka “swiharhi swa nhova.” Mafu yo tano yo chavisa a ya tali ku vikiwa eka phepha-hungu ra matiko hinkwawo, kambe ya xiyeka. Buku leyi nge Planet Earth—Flood yi vulavula hi vo tala eIndia ni le Pakistan lava “va feke hi ndlela yo vava hi ku lumiwa hi tinyoka leti nga ni vuxungu” loko va ri karhi va ringeta ku balekela tindhambi. India Today yi vike ehenhleni ka muganga wun’wana eBengal Vupela-dyambu laha kwalomu ka vavasati va 60 va lahlekeriweke hi vavanuna va vona hikwalaho ko hlaseriwa hi tiyingwe. Makhombo yo tano ma nga ha va lama andzaka swinene hi nkarhi lowu taka loko vandla ra vanhu ri hohloka ni loko ndlala yi andza.
9. I muxaka wihi wa “xihari” lowu vangeke mpfilumpfilu ni ku xaniseka exikarhi ka vanhu hi lembe xidzana leri?
9 Kambe Ezekiyele u kombetele eka muxaka wun’wana wa “xiharhi” loko a te: “Ku ni ku pfumelelana ka ku tiarisa e ka v̌aprofeta la’v̌a nga ka rona, e ku fana ni nghala leyi ḍumaḍumaka, le’yi hanḍulelaka mbhari; v̌a dya mimoya ya v̌anhu . . . tihosana ta rona e šikari ka rona ti fana ni timhisi le’ti hanḍulaka mbhari.” (Ezekiel 22:25, 27) Kutani vanhu na vona va nga endla ku fana ni swiharhi, naswona vanhu va xanisekile swonghasi eka vahlaseri vo tano eka lembe xidzana ra hina! Vo tala va file emavokweni ya swigevenga ni matherorisi lama fanaka ni swiharhi. Ina, hi tindlela to tlula yin’we, rifu ri koxe vunyingi lebyikulu bya lava hlaseriweke hi “swiharhi swa nhova.”
10. Ku xaxameta ka Yohane nyimpi, ndlala, vuvabyi ni swiharhi swa nhova tanihi swivangelo swa rifu swi hi pfuna ku vona yini?
10 Ku xaxametiwa ka nyimpi, ndlala, vuvabyi ni swiharhi swa nhova exivonweni xa Yohane swi hi pfuna ku vona leswaku maxangu lama tiyiseleriweke hi Yerusalema hi 607 B.C.E. a ma ta fanekiseriwa eka swiendlakalo swo tala esikwini ra hina. Siku ra Hosi xisweswo ana se ri vule ku xaniseka eka misava, ngopfu-ngopfu hikwalaho ka leswi vafumi va vanhu va aleke ku titsongahata eka Mugadi luya wo sungula wa hanci. Hosi leyi vekiweke, Yesu Kriste. (Psalma 2:1-3) Hambi swi ri tano, ku vuriwa yini hi vanhu va Xikwembu? Xana siku ra Hosi ri vule yini eka vona?
Ku Pima Tempele
11. Eka Nhlavutelo 11:1, Yohane u lerisiwe ku endla yini, naswona leswi a swi kongomisiwe eka tempele yihi?
11 Eka Nhlavutelo 11:1, muapostola Yohane u ri: “Kutani ndzi nyikiwa rihlanga ro pima hi rona, ro kota nxongotelo, ndzi byeriwa marito lawa ya nge: ‘Pfuka u pima [vuhlawulekisiso bya] tempele ya Xikwembu ni altari ni ntsengo wa lava gandzelaka kona.’” Ku pimiwa loku ka tempele exivonweni a ku ri ka nkoka swinene eka vanhu va Xikwembu. I vuhlawulekisiso byihi bya tempele lebyi Yohane a byi pimeke? A ku nga ri tempele ya Vayuda ya xiviri laha Yohane a gandzeleke kona emahlweni ko va Mukriste. Tempele yoleyo yi ariwe hi Yehova, naswona yi mbundzumuxiwile hi 70 C.E. (Matewu 23:37–24:2) Kambe, a ku ri lunghiselelo ra tempele ya Yehova leyikulu ya moya. Etempeleni leyi yo fanekisela, Vakriste lava totiweke va tirha tanihi vapristantsongo exivaveni xa le misaveni.—Vaheveru 9:11, 12, 24; 10:19-22; Nhlavutelo 5:10.
12. Tempele yoleyo yi sungule rini, naswona i minhluvuko yihi leyi humeleleke malunghana na yona eka lembe xidzana ro sungula?
12 Tempele yoleyo yi sungule ku va kona hi 29 C.E. loko Yesu Kriste a totiwe tanihi muprista lonkulu. (Vaheveru 3:1; 10:5) A yi fanele ku va ni vaprista-ntsongo va 144 000, naswona eka lembe xidzana ro sungula vo tala va lava va hlawuriwile, va tiyisisiwa kutani endzhaku va fa va tshembekile. (Nhlavutelo 7:4; 14:1) Kambe loko Vakriste volavo va lembe xidzana ro sungula va file, va etlele esirheni, va nga pfuxeriwi etilweni hi xihatla. (1 Vatesalonika 4:15) Ku tlula kwalaho, endzhaku ka lembe xidzana ro sungula vugwinehi lebyikulu byi sungurile, naswona Vakriste lava totiweke va vuprista a va rhendzeriwe hi “mfava” lowukulu, vagwinehi. (Matewu 13:24-30) Hi malembe xidzana yo tala ku sukela kwalaho, ku nga ha va ku vutisiwile khwatsi ku: ‘Xana vaprista-ntsongo hinkwavo va 144 000 va ta kondza va tiyisisiwa?’ ‘Xana lava va feke va tshembekile va ta kondza va pfuxiwa leswaku va ya tirha evuhlawulekisisweni bya le tilweni?’ Ku pimiwa ka tempele ka le xivonweni ku kombe leswaku nhlamulo ya xin’wana ni xin’wana xa swivutiso leswi i ina. Ha yini?
13. Ku pima ka Yohane vuhlawulekisiso bye tempele a swi tiyisa yini, naswona ku humelele yini eku sunguleni ka siku ra Hosi?
13 Hikuva evuprofeteni bya Bibele ku pimiwa ka xilo xo karhi hi ntolovelo swi komba leswaku xikongomelo xa Yehova hi xilo xexo hakunene xi ta hetisisiwa hi ku helela. (2 Tihosi 21:13; Yeremia 31:39; Swirilo Swa Yeremia 2:8) Xisweswo, ku pima ka Yohane ka le xivonweni ka vuhlawulekisiso bya tempele a ku ri xitiyisekiso xa leswaku hi siku ra Hosi, swikongomelo swa Yehova hinkwaswo malunghana ni tempele swi ta hetisisiwa. Ku pfumelelana ni leswi na hi ku ya hi vumbhoni hinkwabyo, lava va vatotiwa lava ana se va feke va tshembekile va sungule ku pfuxeriwa ku ya endhawini ya vona leyi tshembisiweke evuhlawulekisisweni bya le tilweni ku sukela hi 1918. (1 Vatesalonika 4:16; Nhlavutelo 6:9-11) Kambe ku vuriwa yini hi lavan’wana va lava 144 000?
14. Ku humelele yini eka Vakriste lava totiweke emahlweni na hi nkarhi wa nyimpi ya misava yo sungula?
14 Hambi ku ri emahlweni ka ku sungula ka siku ra Hosi, Vakriste lava totiweke lava humeke eVujaganini lebyi gwineheke va sungule ku hlengeletana va vumba nhlengeletano ya le tlhelo. Va vumbe rhekhodo leyinene ya ku tshembeka eku tiviseni ka nkoka wa lembe ra 1914, kambe elembeni rero leri pakanisaka, loko nyimpi yo sungula ya misava yi sungula, va sungule ku karhatiwa hi ntshikilelo, ‘ku kandziyeriwa.’ Leswi swi fikelele nhlohlorhi hi 1918 loko vakongomisi va Sosayiti ya Watch Tower va khotsiwile, naswona ntirho lowu hleriweke wo chumayela wu lave ku yima. Hi nkarhi wolowo, a va fana ni loko va ‘dlayiwile.’ (Nhlavutelo 11:2-7) Ku pimiwa ka vuhlawulekisiso bya tempele a swi vula yini eka Vakriste lava?
15. Xana ku pimiwa ka tempele ya le xivonweni a ku vula yini eka vanhu va Xikwembu va siku ra Ezekiyele?
15 Hi lembe ra 593 B.C.E., malembe ya 14 endzhaku ka loko tempele ya Yehova eYerusalema yi lovisiwile, Ezekiyele u vone yindlu ya Yehova exivonweni. U kombisiwe tempele leyi hi laha ku heleleke naswona a languta loko xin’wana ni xin’wana xa swivumbeko swa yona xi pimiwa hi vukheta. (Ezekiel, tindzima 40–42) Leswi a swi vula yini? Yehova hi yexe u hlamuserile a ku: Ku pimiwa ka tempele a ku vula ku ringiwa eka vanhu va Ezekiyele. Loko a vo titsongahata, va hundzuka eswidyohweni swa vona, naswona va fambisana ni milawu ya Yehova, a va ta byeriwa mimpimo ya tempele. Leswi entiyisweni a swi ta va khutazela ntshembo wa leswaku siku rin’wana vanhu va Yehova a va ta ntshunxiwa eBabilona naswona va tlhela va gandzela Yehova etempeleni ya yena ya xiviri.—Ezekiel 43:10, 11.
16. (a) Ku pima ka Yohane vuhlawulekisiso bya tempele ku va tiyisekise hi yini vanhu va Xikwembu le ndzhaku hi 1918? (b) Xana leswi swi hetiseke hi ndlela yihi?
16 Hi ku fanana, loko Vakriste volavo lava hetiweke matimba le ndzhaku hi 1918 a va ta titsongahata naswona va hundzuka eka swidyoho swihi na swihi leswi va swi endleke, a va ta ntshunxiwa leswaku va amukela nkateko wa Yehova kutani va va ni xiphemu lexikulu elunghiselelweni ra yena ra tempele. Naswona leswi hi leswi humeleleke. Hi ku ya hi Nhlavutelo 11:11, va ‘yimile,’ kumbe hi ku fanekisela va pfuxiwile. Xivono lexi yelanaka xa ku pfuxiwa eka Ezekiel xi fanekisele ku kondleteriwa ka Vayuda etikweni ra vona. (Ezekiel 37:1-14) ‘Ku pfuxiwa’ loku ka manguva lawa ku tikombe ku ri ku kondleteriwa ka vanhu va Xikwembu va suka eka xiyimo xa vona xa ku hetiwa matimba, xa ku nga tirhi, va ya eka xiyimo lexi hanyaka, lexi gingiritekaka lexi eka xona a va ta va ni xiphemu lexikulu entirhweni wa Yehova. ‘Ku pfuxiwa’ ko tano ku humelele hi 1919.
Xibukwana
17. (a) Hlamusela xivono xa Yohane eka Nhlavutelo 10:1. (b) A ku ri mani ntsumi leyi Yohane a yi voneke, naswona xivono a xi fanele ku hetiseka hi siku rihi?
17 Eka Nhlavutelo 10:1, Yohane u vone “ntsumi yin’wana ya matimba yi xika hi le tilweni yi phutseriwile hi papa, yi ri ni nkwangula-tilo ehenhla ka nhloko ya yona; nghohe ya yona a yi fana ni dyambu, milenge ya yona yi fana ni timhandzi ta ndzilo.” Leswi hi ndlela yo karhi swi fana ni swivono swa Yehova leswi voniweke eku sunguleni hi Ezekiyele na Yohane hi yexe. (Ezekiel 8:2; Nhlavutelo 4:3) Kambe laha Yohane u vone ntsumi, hayi Yehova. Hikwalaho, ku fanele ku ri N’wana lonkulu wa Yehova wa ntsumi, Yesu Kriste, loyi a nga “xifaniso xa Xikwembu lexi nga voniwiki.” (Vakolosa 1:15) Ku tlula kwalaho, Nhlavutelo 10:2 yi hlamusela Yesu tanihi la yimeke eka xiyimo xa vulawuri lebyikulu, “nenge wa [yena] wa xinene elwandle, lowu ximatsi [a] wu veka laha ku omeke.” Kutani ntsumi yi fanisela Yesu hi siku ra Hosi.—Vona Psalma 8:4-8; Vaheveru 2:5-9.
18. (a) Yohane u lerisiwe ku dya yini? (b) Exivonweni lexi fanaka, Ezekiyele u lerisiwe ku dya yini, naswona ku ve ni vuyelo byihi?
18 Yesu, eka xivumbeko lexi lexi hlamarisaka xa le xivonweni, u ni xibukwana evokweni ra yena, naswona Yohane u lerisiwa ku teka xibukwana ni ku xi dya. (Nhlavutelo 10:8, 9) Hi ndlela leyi, Yohane u ni ntokoto lowu fanaka swinene ni lowuya wa Ezekiyele, loyi a lerisiweke ku dya buku ya le xivonweni. Emhakeni ya Ezekiyele, Yehova hi yexe u nyike muprofeta buku, naswona Ezekiyele u vonile leswaku “ŝirilo, ni mahlomulo, ni ku v̌av̌iseka a ŝi ṭariwe ka yona.” (Ezekiel 2:8-10) Ezekiyele wa vika: “Kutani nḍi yi dya, e noṅwini wa mina, a yi fana ni v̌ulombe hi ku ṭokombela.” (Ezekiel 3:3) Xana ku dya buku a swi vula yini eka Ezekiyele?
19. (a) I yini lexi a xi faniseriwa hi ku dya ka Ezekiyele buku? (b) I vamani lava a va ta amukela marungula yo bava lawa Ezekiyele a a lerisiwe ku ma chumayela?
19 Entiyisweni, buku a yi ri na rungula leri huhuteriweke ra vuprofeta. Loko Ezekiyele a dye buku, u amukele ntirho wo twarisa rungula leri lerova wu kondza wu va xiphemu xa yena. (Ringanisa Yeremia 15:16.) Kambe leswi nga ebukwini a swi nga tsokombeli eka van’wana. Buku a yi tele hi “ŝirilo, ni mahlomulo, ni ku v̌av̌iseka.” Rungula leri ro bava a ri ri ra vamani xana? Xo sungula, Ezekiyele u byeriwe ku: “Ṅwana wa munhu, yana e ka yindlu ya Israel, u v̌a byela marito ya mina.” (Ezekiel 3:4) Endzhakunyana, rungula ra Ezekiyele ri ndlandlamukile leswaku ri katsa ni matiko ya vahedeni lama wu rhendzeleke.—Ezekiel, tindzima 25–32.
20. Ku humelele yini loko Yohane a dye xibukwana, naswona ku ve ni vuyelo byihi eku endleni ka yena tano?
20 Emhakeni ya Yohane, mbuyelo wa ku dya ka yena buku wu ve lowu fanaka. Wa vika: “Hi loko ndzi teka xibukwana evokweni ra ntsumi, ndzi xi dya. A xi tsokombela ku fana ni vulombe enon’wini, kambe loko ndzi xi dyile ndzi twa xi bava ekhwirini ra mina.” (Nhlavutelo 10:10) Ku dya buku a swi tsokombela ni le ka Yohane. A swi nyanyula ku va rito ra Yehova ri va xiphemu xa yena. Kambe rungula a ri ri ni ku twala ko bava eka rona. A ri bavela vamani? Yohane u byeriwile: “U fanele ku engeta u vulavula henhla ka vanhu va swivongo leswo tala ni vamatiko layo tala ni va tindzimi leto tala, u vulavula ni henhla ka tihosi leto tala.”—Nhlavutelo 10:11.
21. (a) I yini lexi Vakriste lava totiweke va xi endleke hi 1919 lexi yelanaka ni ku dya ka Yohane xibukwana, naswona ku ve ni vuyelo byihi? (b) Vuyelo byi ve byihi eka Vujagana ni le ka misava hinkwayo?
21 Xana hinkwaswo leswi swi hetiseke njhani hi siku ra Hosi? Hi ku ya hi mintiyiso ya vurunguri, le ndzhaku hi 1919 Vakriste vo tshembeka va teke lunghelo ro tirhela Yehova hi ku tinyiketela lerova ku va xiphemu xa vona, naswona leswi a swi tsokombela hakunene. Kambe nkateko ni lunghelo ra vona ri tikombe ri bava eka van’wana—ngopfu-ngopfu eka vafundhisi va Vujagana. Ha yini? Hikuva Vakriste lava vo tshembeka lava totiweke va twarise rungula hinkwaro ra Yehova eka vanhu hi xivindzi. A va chumayelanga “evhangeli leyi ya Mfumo” ntsena kambe va tlhele va paluxa xiyimo lexi feke emoyeni xa Vujagana ni xa misava hinkwayo.—Matewu 24:14; Nhlavutelo 8:1–9:21; 16:1-21.
22. (a) Lava totiweke va tirhisiwe hi ndlela yihi leyikulu hi Yehova esikwini ra Hosi ku fikela sweswi?(b) Xana siku ra Hosi ri yule yini eka misava ya Sathana ni le ka vanhu va Xikwembu?
22 Ntlawa lowu wo tshembeka wa Vakriste wu tirhisiwe hi Yehova ku hlengeleta vanhu vo hetelela va lava 144 000 leswaku va ta tiyisisiwa, naswona va rhangele ku hlengeletiwa ka ntshungu lowukulu, lowu nga ni ntshembo wa la misaveni. (Nhlavutelo 7:1-4, 9, 10) Ntshungu lowu wukulu wu endla xiphemu xa nkoka eswikongomelweni swa Yehova emisaveni leyi, naswona ku humelela ka wona ku vange ntsako lowukulu etilweni ni le misaveni. (Nhlavutelo 7:11-17; Ezekiel 9:1-7) Hikwalaho, ‘siku leri ra masiku hinkwawo’ ana se ri vule ku xaniseka eka misava ya Sathana kambe ri vule minkateko leyi fuweke eka vanhu va Yehova. Manuku, a hi voneni ndlela leyi ha yona leswi swi nga ta ya emahlweni swi va ntiyiso loko siku ra Hosi ri ri karhi ri ya emahlweni.
U Nga Hlamusela Xana?
◻ Siku ra Hosi i yini?
◻ I xiphemu xihi lexi lovisaka lexi endliwaka hi “swiharhi swa nhova” hi siku ra Hosi?
◻ I xitiyisekiso xihi lexi Yehova a xi nyikeke hi ku pima ka Yohane vuhlawulekisiso bya tempele?
◻ Xana ku dya ka Yohane xibukwana a ku vula yini eka masalela lama totiweke hi 1919?
◻ Ku fikela sweswi, xana siku ra Hosi ri vule yini eka vanhu va Xikwembu ni le ka misava hinkwayo?
[Xifaniso lexi nga eka tluka 13]
Ku pima ka Yohane tempele ku nyike xitiyisekiso lexi tiyeke eka vatotiwa esikwini ra Hosi