“Veka Mbilu Ya Wena” Etempeleni Ya Xikwembu!

“N’wana wa munhu, . . . veka mbilu ya wena eka hinkwaswo leswi ndzi ku kombisaka swona . . . Xin’wana ni xin’wana lexi u xi vonaka xi tivise yindlu ya Israyele.”—EZEKIYELE 40:4, NW.

1. Xana vanhu va Xikwembu lava hlawuriweke va tikume va ri eka xiyimo xihi hi 593 B.C.E.?

A KU ri lembe ra 593 B.C.E, lembe ra vu-14 ku sukela loko tiko ra Israyele ri ri evuhlongeni. Eka Vayuda lava tshamaka eBabilona, tiko-xikaya ra vona leri rhandzekaka, handle ko kanakana a ri languteka ri ri ekule swinene. Ro hetelela loko vo tala va vona Yerusalema, a wu ri karhi wu tshwa, makhumbi ya wona lamakulu ma mbundzumuxiwile, miako ya wona yo saseka yi ri marhumbi. Tempele ya Yehovha—leyi khale a yi ri muti lowu kwetsimaka swinene, ntsindza wu ri woxe wa vugandzeri bya ntiyiso emisaveni hinkwayo—a yi hundzuke marhumbi. Sweswi, vunyingi bya vanhu va tiko ra Israyele a va ha saleriwe hi malembe yo tala ya vuhlonga. A ka ha ta hundza 56 wa malembe ntshunxeko lowu tshembisiweke wu nga si fika.—Yeremiya 29:10.

2. Hikwalaho ka yini Ezekiyele a fanele a khomiwe hi gome loko a tsundzuka tempele ya Xikwembu ya le Yerusalema?

² Ezekiyele muprofeta wo tshembeka, u fanele a vavisekile swinene loko a anakanya hi tempele ya Xikwembu leyi a yi sale yi ri marhumbi, eka mpfuka wa madzana-dzana ya tikhilomitara ku suka kwalaho, yi ri marhumbi lama rhurhelaka swiharhi swa nhova. (Yeremiya 9:11) Tata wa yena, Buzi, u tshame a va muprista kwalaho. (Ezekiyele 1:3) Ezekiyele na yena a ta kuma lunghelo leri fanaka, kambe u yisiwe evuhlongeni swin’we ni tintlharhi ta Yerusalema hi 617 B.C.E., loko a ha ri ntsongo. Sweswi leswi se a nga ni malembe ya kwalomu ka 50 hi vukhale, swi nga ha endleka Ezekiyele a a swi tiva leswaku a nge he pfuki a vone Yerusalema nakambe kumbe ku va ni xiphemu eku pfuxetiweni ka tempele ya wona. Kutani ke, anakanya leswaku Ezekiyele u fanele a titwe njhani loko a amukele xivono xa tempele leyi vangamaka!

3. (a) A xi ri xihi xikongomelo xa xivono xa tempele, xa Ezekiyele? (b) Hi swihi swiyenge swa mune leswikulu swa xivono lexi?

³ Xivono lexi lexi anameke, lexi tekaka tindzima ta kaye ta buku ya Ezekiyele, xi nyike Vayuda lava khotsiweke xitshembiso lexi tiyisaka ripfumelo. Vugandzeri bya ntiyiso a byi ta kondleteriwa! Eka malembe xidzana lama landzeleke, hambi ku ri ku fikela esikwini ra hina, xivono lexi xi ve xikhutazo eka lava rhandzaka Yehovha. Njhani? A hi kambisiseni leswi xivono xa Ezekiyele xa vuprofeta a a xi vula swona eka Vaisrayele lava nga evuhlongeni. Xi vulavula hi swilo swa mune leswikulu: tempele, vuprista, tindhuna ni tiko.

Ku Pfuxetiwa Ka Tempele

4. Hi kwihi laha Ezekiyele a yisiwaka kona loko xivono xi sungula, i yini lexi a xi vonaka kwalaho naswona i mani loyi a n’wi valangisaka?

⁴ Xo sungula, Ezekiyele u yisiwa “e nṭhav̌eni le’yo leha ngopfu.” Edzongeni ka ntshava leyi ku ni tempele leyikulu, leyi fanaka ni muti lowu biyeriweke hi rirhangu. Ntsumi leyi “ku v̌onakala ka y[o]na ku fanaka ni ku v̌onakala ka kopor,” yi teka muprofeta yi n’wi valangisa muako lowu hi rixaladza. (Ezekiyele 40:2, 3) Loko xivono xi ya emahlweni, Ezekiyele u languta ntsumi loko hi vukheta yi ri karhi yi pima tinyangwa tinharhu ta tempele leti fanaka swin’we ni tindlu ta tona to rindza eka tona, xivava xa le handle, xivava xa le ndzeni, makamara yo dyela eka wona, alitari ni xikwetsimisiso xa tempele swin’we ni makamara ya xona ya Ndhawu yo Kwetsima ni Ndhawu yo Kwetsima Ngopfu.

5. (a) Hi xihi xitiyisekiso lexi Yehovha a xi nyikaka Ezekiyele? (b) “Miṭumbu ya tihosi ta v̌ona” leyi a yi fanele yi susiwa etempeleni a ku ri yini, naswona hikwalaho ka yini leswi a swi ri swa nkoka?

⁵ Kutani, Yehovha hi yexe a humelela exivonweni. U nghena etempeleni kutani a tiyisekisa Ezekiyele leswaku U ta tshama kwalaho. Kambe U lerisa leswaku yindlu Yakwe yi basisiwa, a ku: “Ŝeŝi v̌a ta ṭhineta kule na mina e ku oŝana ka v̌ona ni miṭumbu ya tihosi ta v̌ona, kutani nḍi ta aka e šikari ka v̌ona hi laha ku nga heriki.” (Ezekiyele 43:2-4, 7, 9) “Miṭumbu ya tihosi ta v̌ona” handle ko kanakana a yi kombetela eka swifaniso swa vona. Vafumi swin’we ni vanhu va Yerusalema lava xandzukeke, va thyakise tempele ya Xikwembu hi swifaniso, naswona kahle-kahle, va swi endle swi va tihosi ta vona. (Ringanisa Amosi 5:26.) Entiyisweni leswi a swi nga ri swikwembu kumbe tihosi leti hanyaka, a swi ri swilo leswi feke, leswi thyakeke ematihlweni ya Yehovha. Swi fanele swi herisiwa.—Levhitika 26:30; Yeremiya 16:18.

6. Ku pimiwa ka tempele a ku kombisa yini?

⁶ Xana xiyenge lexi xa xivono, a xi vula yini? A xi tiyisekisa vabohiwa leswaku vugandzeri lebyi tengeke etempeleni ya Xikwembu byi ta kondleteriwa hi ku helela. Ku tlula kwalaho, ku pimiwa ka tempele a ku nyikela xitiyisekiso xo huma etilweni xa leswaku xivono lexi a xi ta hetiseka hakunene. (Ringanisa Yeremiya 31:39, 40; Zakariya 2:2-8.) Vugandzeri hinkwabyo bya swifaniso a byi ta herisiwa. Yehovha a a ta tlhela a katekisa yindlu yakwe.

Vaprista Ni Ndhuna

7. Hi rihi rungula leri nyikeriwaka malunghana ni Valevhi swin’we ni vaprista?

⁷ Vaprista na vona a va fanele va tengisiwa, kumbe ku basisiwa. Valevhi a va fanele va xupuriwa hikwalaho ko amukela vugandzeri bya swifaniso, kasi vana va le ndyangwini wa vuprista wa Sadoki, a va fanele va bumabumeriwa ni ku nkhensiwa hikwalaho ko tshama va basile.a Hambiswiritano, mintlawa leyi hayimbirhi a yi ta va ni lunghelo ro tirha endlwini ya Xikwembu leyi pfuxetiweke—leswi handle ko kanakana, a swi ta titshega hi ku tshembeka ka munhu ha un’we. Ku tlhandlekela kwalaho, Yehovha u lerisile a ku: “V̌a ta dyonḍisa tiko ra mina e ku av̌anyisa ŝo kwetsima ni le’ŝi nga kwetsimiki, v̌a v̌a ṭunḍuša e ku hlawula le’ŝi nga tengangiki ni le’ŝi tengeke.” (Ezekiyele 44:10-16, 23) Xisweswo, fambiselo ra vuprista a ri fanele ri pfuxetiwa, naswona ku tiyisela hi ku tshembeka ka vaprista a ku ta hakeriwa.

8. (a) I vamani tindhuna ta Israyele wa khale? (b) Ndhuna ya le xivonweni xa Ezekiyele a yi gingiriteka evugandzerini bya ntiyiso hi ndlela yihi?

⁸ Xivono nakambe xi vulavula hi un’wana la vuriwaka ndhuna. Ku sukela emasikwini ya Muxe, tiko a ri ri ni tindhuna. Rito ra Xiheveru na·siʼʹ, leri hundzuluxeriwaka va ku ndhuna, ri nga ha kombetela eka nhloko ya yindlu, ya rixaka kumbe hambi ku ri ya tiko. Exivonweni xa Ezekiyele, vafumi va tiko ra Israyele hinkwavo ka vona, va tshinyiwa hikwalaho ko tshikelela vanhu naswona va byeriwa leswaku va nga yi hi nghohe, va tirhisa vululami. Hambileswi yi nga riki ya ndyangu wa vuprista, ndhuna yi ni xiphemu lexikulu evugandzerini bya ntiyiso. Yi nghena yi tlhela yi huma exivaveni xa le handle swin’we ni tinxaka leti nga riki ta ndyangu wa vuprista, yi tshama erikupakupeni ra Nyangwa ya le Vuxeni, naswona yi nyika vanhu switlhavelo swin’wana, leswaku va endla gandzelo ha swona. (Ezekiyele 44:2, 3; 45:8-12, 17) Xisweswo, xivono lexi xi tiyisekise vanhu va Ezekiyele leswaku tiko leri kondleteriweke ri ta katekisiwa hi varhangeri lavanene, vavanuna lava nga ta seketela vaprista eku hleleni ka vanhu va Xikwembu naswona va va xikombiso lexinene etimhakeni ta moya.

Tiko

9. (a) Xana tiko a ri ta aviwa njhani, kambe i vamani lava a va nga ta yi kuma ndzhaka? (b) Munyikelo wo kwetsima a ku ri yini, naswona a wu tamele yini?

⁹ Eku heteleleni, xivono xa Ezekiyele xi katsa nkatsakanyo wa tiko ra Israyele. A ri ta aviwa, rixaka rin’wana ni rin’wana ri va ni mbangu wa rona. Hosana na yona a yi ta kuma ndzhaka ya yona. Hambiswiritano, vaprista a va nga ta yi kuma hikuva Yehovha u te, “nḍaka ya v̌ona hi mina.” (Ezekiyele 44:10, 28; Tinhlayo 18:20) Xivono xi kombise leswaku mbangu lowu nga ta averiwa ndhuna a wu ta va wu ri ematlhelweni ya ndhawu yo hlawuleka leyi vitaniwaka munyikelo wo kwetsima. Leyi a ku ri ndhawu ya tinhla ta mune leyi aviweke yi va swiphemu swinharhu—xiphemu xa le henhla a a xi ri xa Valevhi lava hundzukeke, xa le xikarhi a xi ri xa vaprista naswona xa le hansi a xi ri xa muti swin’we ni masimu lama noneke lama nga ematlhelweni ka xona. Tempele ya Yehovha a yi ta akiwa embangwini wa vaprista, exikarhi ka ndhawu ya tinhla ta mune leyi nga munyikelo.—Ezekiyele 45:1-7.

10. Xana vuprofeta bya ku aviwa ka tiko a byi vula yini eka Vayuda lava tshembekaka lava nga evuhlongeni?

¹⁰ Swilo leswi hinkwaswo swi fanele swi ti tsakise swinene timbilu ta vabohiwa! Ndyangu wun’wana ni wun’wana a wu tshembisiwe ku nyikiwa ndzhaka etikweni. (Ringanisa Mikiya 4:4.) Vugandzeri bya ntiyiso a byi ta kuma ndhawu leyi tlakukeke, yo hlawuleka kwalaho. Nakambe xiya leswaku exivonweni xa Ezekiyele, ndhuna, ku fana ni vaprista, a yi ta tshama etikweni leri nyikeriweke hi vanhu. (Ezekiyele 45:16) Kutani ke, etikweni leri pfuxetiweke, vanhu a va ta seketela ntirho lowu endliwaka hi lava Yehovha a va vekeke leswaku va rhangela, va va seketela hi ku landzela nkongomiso wa vona. Hi ku komisa, tiko leri a ri fanekisela nhleleko, ntirhisano ni vuhlayiseki.

11, 12. (a) Xana Yehovha u va tiyisekise njhani vanhu vakwe hi ku tirhisa vuprofeta, leswaku u ta ri katekisa tiko-xikaya ra vona leri pfuxetiweke? (b) I yini lexi a xi fanekiseriwa hi mirhi leyi nga etimbuweni ta nambu?

¹¹ Xana Yehovha a a ta ri katekisa tiko ra vona? Vuprofeta lebyi byi hlamula xivutiso lexi hi nhlamuselo leyi tsakisaka. Nambu wa khuluka wu huma etempeleni, wu ndlandlamuka loko wu ya emahlweni, wu va nambu lowukulu loko se wu nghena eLwandle leri Feke. Kwalaho wu fika wu hanyisa mati lama nga hava vutomi naswona ntirho wo phasa tinhlampfi wu famba kahle eribuweni ra kwalaho. Etimbuweni ta nambu ku ni mirhi yo tala leyi vekaka mihandzu lembe hinkwaro, leyi wundlaka yi tlhela yi hanyisa.—Ezekiyele 47:1-12.

¹² Eka vabohiwa, xitshembiso lexi a xi va tsundzuxa ni ku tiyisekisa vuprofeta lebyi tshameke byi vuriwa bya ku kondletela, lebyi a va byi langutele hi mahlo-ngati. Ku tlula kan’we, Yehovha u huhutele vaprofeta leswaku va hlamusela tiko ra Israyele leri kondleteriweke, leri nga ni vaaki naswona ri fanaka ni paradeyisi. Vuprofeta hi ku phindha-phindha a byi vulavula hi tindhawu leti feke leti tlhelaka ti hanya. (Esaya 35:1, 6, 7; 51:3; Ezekiyele 36:35; 37:1-14) Xisweswo vanhu a va ta langutela leswaku mikateko ya Yehovha leyi hanyisaka yi ta khuluka ku fana ni nambu lowu humaka etempeleni leyi pfuxetiweke. Xisweswo, tiko leri feke hi tlhelo ra moya a ri ta pfuka. Vanhu lava kondleteriweke a va ta katekisiwa hi vavanuna va moya—vavanuna lava lulameke ni lava tiyeke ku fana ni mirhi leyi mileke etimbuweni ta nambu lowu wa le xivonweni, vavanuna lava a va ta rhangela ntirho wa ku pfuxeta tiko leri onhiweke. Esaya na yena u tsarile a vulavula hi “mikuhlu ya ku lulama” leyi a yi ta “v̌uyetela miti le’yi onhakeke, le’yi nga mbunḍušiwa e mikarini ya khale.”—Esaya 61:3, 4.

Xana Xivono Lexi Xi Hetiseka Rini?

13. (a) Yehovha u katekisa vanhu vakwe lava kondleteriweke hi “mikuhlu ya ku lulama” hi mongo wihi? (b) Xana vuprofeta lebyi vulavulaka hi Lwandle leri Feke byi hetiseke hi ndlela yihi?

¹³ Xana vabohiwa lava vuyaka a a va hele matimba? Nikatsongo! Masalela lama kondleteriweke ma tlhelele etiko-xikaya ra wona leri rhandzekaka hi 537 B.C.E. Hi ku famba ka nkarhi, ehansi ka nkongomiso wa “mikuhlu ya ku lulama”—yo tanihi mutsari Ezra, muprofeta Hagayi na Zakariya, na Yoxuwa Muprista Lonkulu—tindhawu leti ku nga khale ti onhiwile ti pfuxetiwile. Tihosana, to tanihi Nehemiya na Zerubabele, ti fume tiko hi vululami naswona a ti nga yi hi nghohe. Tempele ya Yehovha yi pfuxetiwile, naswona lunghiselelo rakwe ra vutomi—ku nga mikateko ya ku hanya hi ntwanano wa yena—ri tlhele ri khuluka. (Deteronoma 30:19; Esaya 48:17-20) Nkateko wun’wana a ku ri vutivi. Vuprista byi tlhele byi sungula ku tirha, naswona vaprista va dyondzise vanhu Nawu. (Malakiya 2:7) Hikwalaho ka sweswo, vanhu va pfuxetiwile emoyeni naswona va tlhele va va malandza ya Yehovha lama vekaka mihandzu, hilaha swi kombisiweke hakona hi ku hanyisiwa ka Lwandle leri Feke kutani ri hundzuka ndhawu leyinene ya ntirho wo phasa tinhlampfi.

14. Hikwalaho ka yini a ka ha fanele ku va ni ku hetiseka ka vuprofeta bya Ezekiyele loku tlulaka leswi humeleleke endzhaku ka loko Vayuda va vuyile evuhlongeni eBabilona?

¹⁴ Xana swiendlakalo leswi a ku ri swona ntsena leswi hetisiseke xivono xa Ezekiyele? Doo; xi kombetela eka nchumu wun’wana lowukulu swinene. Tsundzuka: Tempele leyi Ezekiyele a yi voneke a swi nga ta koteka leswaku yi akiwa hi ndlela leyi yi hlamuseriweke ha yona. Ina, Vayuda va xi landzele swinene xivono xexo naswona va tlhele va byi endla hi ku kongoma vuxokoxoko byin’wana bya xona.b Hambiswiritano, tempele ya le xivonweni hinkwayo ka yona a yi ri yikulu lerova a yi nga ta enela eNtshaveni ya Moriya, laha tempele yo sungula a yi akiwe kona. Ku tlhandlekela kwalaho, tempele ya Ezekiyele a yi nga ri kona emutini kambe a yi ri kule endhawini leyi nga yoxe, kasi tempele ya vumbirhi yi akiwe laha leyi yo sungula a yi akiwe kona, emutini wa Yerusalema. (Ezra 1:1, 2) Nakambe, a wu kona nambu wa xiviri lowu tshameke wu huma etempeleni ya le Yerusalema. Xisweswo, Israyele wa khale u vone ku hetiseka lokutsongo ntsena ka vuprofeta bya Ezekiyele. Leswi swi vula leswaku ku fanele ku ri ni ku hetiseka lokukulu ka moya ka xivono lexi.

15. (a) Xana tempele ya Yehovha ya moya yi sungule rini ku tirha? (b) I yini lexi kombisaka leswaku xivono xa Ezekiyele a xi hetisekanga loko Kreste a ha ri laha misaveni?

¹⁵ Kahle-kahle, hi fanele hi kuma ku hetiseka lokukulu ka xivono xa Ezekiyele etempeleni leyikulu ya Yehovha ya moya, leyi muapostola Pawulo a yi hlamuselaka hi vuenti ebukwini ya Vaheveru. Tempele yoleyo yi sungule ku tirha loko Yesu Kreste a totiwa tanihi Muprista Lonkulu wa yona hi 29 C.E. Kambe, xana xivono xa Ezekiyele xi hetisekile esikwini ra Yesu? Doo! Yesu, tanihi Muprista Lonkulu, u hetisise leswi Siku ra ku Kombela ku Rivaleriwa ri vulaka swona hi tlhelo ra vuprofeta, hi ku khuvuriwa ka yena, hi ku fa rifu ra gandzelo ni ku nghena kakwe eNdhawini yo Kwetsima Ngopfu, ku nga tilo hi roxe. (Vaheveru 9:24) Kambe, lexi tsakisaka, xivono xa Ezekiyele a xi vulavuli nchumu hi muprista lonkulu kumbe hi Siku ra ku Kombela ku Rivaleriwa. Xisweswo, a xi kona lexi kombisaka leswaku xivono lexi a xi kombetela eka lembe-xidzana ro sungula C.E. Kutani ke, xi tirha eka nkarhi wihi?

16. Matshamelo ya xivono xa Ezekiyele ma hi tsundzuxa vuprofeta byihi byin’wana, naswona leswi swi hi pfuna njhani leswaku hi vona nkarhi wa ku hetiseka lokukulu ka xivono xa Ezekiyele?

¹⁶ Leswaku hi kuma nhlamulo, a hi tlheleleni exivonweni hi xoxe. Ezekiyele u tsarile a ku: “A nḍi yisa kona hi miloro ya mahlori ya Šikwembu, kutani a nḍi v̌eka e nṭhav̌eni le’yo leha ngopfu, e henhla ka yona a ku ri ni šilo le’ši fanaka ni muti hi tlhelo ra ḍonga.” (Ezekiyele 40:2) Matshamelo ya xivono lexi, ‘ntshava yo leha ngopfu,’ yi hi tsundzuxa Mikiya 4:1, leyi nge: “E mikarini ya makumu, nṭhav̌a ya yindlu ya Yehova yi ta v̌a yi yimisiwile henhla ka tinṭhav̌a, yi wungamela ŝiṭunga, kutani matiko ma ta hangalakela kona.” Xana vuprofeta lebyi byi hetiseka rini? Mikiya 4:5 yi kombisa leswaku leswi swi sungula loko matiko ma ha gandzela swikwembu swa mavunwa. Kahle-kahle, hi le nkarhini wa hina, “e mikarini ya makumu,” laha vugandzeri byo tenga byi nga tlakusiwa kona, byi tlheriseriwa endhawini ya byona evuton’wini bya malandza ya Xikwembu.

17. Xana vuprofeta bya Malakiya 3:1-5 byi hi pfuna njhani leswaku hi kuma nkarhi lowu tempele ya xivono xa Ezekiyele yi basisiweke ha wona?

¹⁷ I yini lexi endleke leswaku ku va ni ku pfuxetiwa loku? Tsundzuka, eka xiendlakalo xa nkoka swinene xa xivono xa Ezekiyele, Yehovha u nghena etempeleni naswona u lava leswaku ku susiwa vugandzeri bya swifaniso swa hava endlwini yakwe. Xana tempele ya Xikwembu ya moya yi basisiwe rini? Eka Malakiya 3:1-5, Yehovha u vulavula hi nkarhi lowu ha wona a nga “nghena e tempeleni” a ri ni “nṭumi ya ntwanano,” Yesu Kreste. Hi xikongomelo xihi? “O [ta] kotisa nḍilo wa muṅwokisi, ni šisipi ša v̌ahlantŝi.” Ku basisa loku ku sungule hi nkarhi wa nyimpi ya misava yo sungula. Vuyelo byi ve byihi? Yehovha u tshame endlwini yakwe kutani a katekisa tiko ra moya ra vanhu vakwe ku sukela hi 1919 ku ya emahlweni. (Esaya 66:8) Kutani ke, hi nga ha heta hi leswaku vuprofeta bya Ezekiyele malunghana ni tempele byi hetiseka kahle enkarhini wa masiku ya makumu.

18. Xana xivono xa tempele xi ta hetiseka rini ro hetelela?

¹⁸ Ku fana ni vuprofeta byin’wana bya ku kondletela, xivono xa Ezekiyele xi tlhela xi va ni ku hetiseka kun’wana, ku hetiseka ko hetelela, eParadeyisini. Hi kona ntsena enkarhini lowu laha vanhu va timbilu letinene va nga ta amukela vuyelo lebyi heleleke bya lunghiselelo ra Xikwembu ra tempele. Hi nkarhi wolowo Kreste u ta tirhisa ntikelo wa gandzelo rakwe ra nkutsulo, a ri ni vaprista vakwe va le tilweni va 144 000. Vanhu hinkwavo lava yingisaka lava nga ehansi ka ku fuma ka Kreste, va ta endliwa va va lava hetisekeke. (Nhlavutelo 20:5, 6) Hambiswiritano, ku hetiseka lokukulu ka xivono xa Ezekiyele a ku endleki eParadeyisini ntsena. Hikwalaho ka yini?

Xivono Lexi Xi Kombetela Esikwini Ra Hina

19, 20. Hikwalaho ka yini ku hetiseka lokukulu ka xivono lexi ku fanele ku humelela namuntlha ku nga ri eParadeyisini?

¹⁹ Ezekiyele u vone tempele leyi a ku fanele ku susiwa vugandzeri bya swifaniso eka yona swin’we ni vuoswi bya moya. (Ezekiyele 43:7-9) Leswi entiyisweni a swi kombeteli ka byona vugandzeri bya Yehovha bya le Paradeyisini. Ku tlula kwalaho, vaprista va le xivonweni va fanekisela vaprista lava totiweke loko va ha ri laha misaveni, ku nga ri endzhaku ka ku pfuxeriwa ka vona ematilweni kumbe hi nkarhi wa Gidi ra Malembe. Hikwalaho ka yini? Xiya leswaku vaprista va kombisiwa va ri karhi va tirha exivaveni xa le ndzeni. Swihloko swa minkandziyiso leyi hundzeke ya Xihondzo xo Rindza swi kombise leswaku xivava lexi xi fanekisela xiyimo lexi hlawulekeke xa moya xa vaprista-ntsongo va Kreste loko va ha ri laha misaveni.c Nakambe xiya leswaku xivono lexi xi kandziyisa ku nga hetiseki ka vaprista. Va byeriwa leswaku va humesa magandzelo ya swidyoho swa vona vini. Va tsundzuxiwa hi khombo ra ku va vanhu lava thyakeke—emoyeni ni le mahanyelweni. Kutani a va fanekiseli vona vatotiwa lava pfuxiweke, lava muapostola Pawulo a tsaleke leswi ha vona: “Mhalamhala yi ta rila, ivi vafi va pfuxiwa va ri lava nga onhakiki.” (1 Vakorinto 15:52; Ezekiyele 44:21, 22, 25, 27) Vaprista lava nga exivonweni, va le xikarhi ka vanhu naswona va va tirhela hi ku kongoma. Leswi a swi nge vi tano eParadeyisini, loko ntlawa wa vaprista wu ta va wu ri etilweni. Hikokwalaho, xivono lexi xi nyikela ndlela leyi twisisekaka leyi vatotiwa va tirhisanaka swinene ha yona ni “ntshungu lowukulu” emisaveni namuntlha.—Nhlavutelo 7:9; Ezekiyele 42:14.

²⁰ Xisweswo ke, xivono xa Ezekiyele xa tempele xi kombisa ku tenga loku vaka kona hikwalaho ka ku basisa hi tlhelo ra moya, loku hetisekaka namuntlha. Kambe, xana leswi swi vula yini eka wena? Lawa a hi mawetana ya ta vukhongeri lama pfilunganyaka. Xivono lexi xi ku khumba swinene ku gandzela ka wena ka siku ni siku ka Xikwembu xi ri xin’we xa ntiyiso, Yehovha. Eka xihloko xa hina lexi landzelaka, hi ta vona leswaku xi swi endla njhani.

[Tinhlamuselo ta le hansi]

Wa Tsundzuka Xana?

◻ Hi kwihi ku hetiseka ko sungula ka xivono xa Ezekiyele xa tempele swin’we ni fambiselo ra kona ra vuprista?

◻ Xana xivono xa Ezekiyele xa ku aviwa ka tiko xi hetiseke njhani ro sungula?

◻ Eku pfuxetiweni ka Israyele wa khale, i vamani lava tirheke tanihi tindhuna to tshembeka naswona i vamani lava tirheke tanihi “mikuhlu ya ku lulama”?

◻ Hikwalaho ka yini xivono xa Ezekiyele xa tempele xi fanele xi hetiseka hi ndlela leyikulu hi nkarhi wa masiku ya makumu?