“Tempele” Ni “Ndhuna” Namuntlha

“Loko ku ri ndhuna leyi nga exikarhi ka vona, loko va nghena, yona yi fanele yi nghena; loko va huma, yi fanele yi huma.”—EZEKIYELE 46:10, NW.

1, 2. Hi wihi ntiyiso wa xisekelo lowu hi pfunaka leswaku hi twisisa xivono xa tempele xa Ezekiyele?

VARABI van’wana va khale a va nga eneriseki swinene hi buku ya Ezekiyele. Hi ku ya hi Talmud, van’wana va vona a va ehleketa ni ku yi susa enxaxamelweni wa tibuku leti amukelekaka ta Matsalwa yo Kwetsima. A va tsandzeka ku twisisa xivono xa tempele naswona a va vula leswaku a hi nchumu lowu nga twisisiwaka hi munhu. Swidyondzi swin’wana swa Bibele swi pfilunganyiwile hi xivono xa Ezekiyele xa tempele ya Yehovha. Ku vuriwa yini hi hina?

² Ku sukela loko vugandzeri byo tenga byi kondleteriwile, Yehovha u katekise vanhu vakwe hi ku endla leswaku va twisisa swilo swo tala swa moya, ku katsa ni ku twisisa leswi tempele ya Xikwembu ya moya yi vulaka swona—lunghiselelo ra Yehovha ra vugandzeri byo tenga ro fana ni tempele.a Ntiyiso lowu wa xisekelo wu hi pfuna leswaku hi kota ku vona tinhlamuselo to tala ta xivono xa tempele xa Ezekiyele. A hi kambisiseni swinene swiyenge swa mune swa xivono lexi—tempele, vuprista, ndhuna ni tiko. Xana leswi swi vula yini namuntlha?

Tempele Na Wena

3. I yini leswi hi swi dyondzaka hi silin’i leyi tlakukeke swinene ni minkovotlo leyi nga emakhumbini ya tinyangwa ta tempele?

³ A hi nge hi karhi hi valanga tempele leyi ya le xivonweni. Kutani hi fika hi khandziya swikhandziyo swa nkombo leswi yaka eka yin’wana ya tinyangwa letikulu. Endzeni ka nyangwa lowu, loko hi languta ehenhla, ha hlamala. Silin’i ya yona, yi le henhla ka hina hi timitara to tlula 30! Xisweswo ha tsundzuxiwa leswaku mimpimanyeto ya ku nghena elunghiselelweni ra Yehovha ra ku gandzela yi tlakukile. Ku vonakala lokukulu loku nghenaka hi mafasitere ku voninga mirhi ya micindzu leyi kovotliweke ekhumbini, leyi eMatsalweni yi tirhaka ku fanekisela ku lulama. (Pisalema 92:12; Ezekiyele 40:14, 16, 22) Ndhawu leyi yo kwetsima i ya lava ntsena va baseke emahanyelweni ni le moyeni. Hi ku pfumelelana ni leswi, hi lava ku tshama hi ri lava lulameke leswaku vugandzeri bya hina byi amukeleka eka Yehovha.—Pisalema 11:7.

4. I vamani lava aleriwaka ku nghena etempeleni, naswona leswi swi hi dyondzisa yini?

⁴ Ematlhelweni ya ndlela yin’wana ni yin’wana, ku ni tiyindlu tinharhu to rindza eka tona. Xana varindzi va ta hi pfumelela hi nghena endzeni ka tempele? Yehovha u byela Ezekiyele leswaku a ku na munhu wumbe la nga ‘yimbangiki embilwini’ la nga nghenaka kona. (Ezekiyele 40:10; 44:9) Xana sweswo swi vula yini? Xikwembu xi amukela ntsena vagandzeri lava va rhandzaka milawu ya xona naswona va hanyaka hi ku pfumelelana na yona. (Yeremiya 4:4; Varhoma 2:29) Xi amukela vanhu vo tano entsongeni wa xona wa moya, yindlu ya xona ya vugandzeri. (Pisalema 15:1-5) Ku sukela loko vugandzeri bya ntiyiso byi kondleteriwile hi 1919, nhlengeletano ya Yehovha ya laha misaveni yi namarhele milawu ya yena ya mahanyelo ni ku hambeta yi yi hlamusela kahle. Lava hi vomu va alaka ku yingisa a va ha amukeriwi exikarhi ka vanhu va yena. Namuntlha, mukhuva lowu sekeriweke eBibeleni wa ku susa vadyohi lava nga hundzukiki eku hlanganyeleni, wu pfunile ku hlayisa vugandzeri bya hina byi basile naswona byi tengile.—1 Vakorinto 5:13.

5. (a) Hi kwihi ku yelana loku nga kona exikarhi ka xivono xa Ezekiyele ni xivono xa Yohane lexi tsariweke eka Nhlavutelo 7:9-15? (b) Exivonweni xa Ezekiyele, i vamani lava fanekiseriwaka hi tinyimba ta 12 leti gandzelaka exivaveni xa le handle?

⁵ Ndlela yi hundzela exivaveni xa le handle laha vanhu va gandzelaka ni ku dzunisa Yehovha kona. Leswi swi hi tsundzuxa xivono xa muapostola Yohane xa “ntshungu lowukulu” lowu gandzelaka Yehovha “nhlikanhi ni vusiku etempeleni ya [ye]na.” Mirhi ya micindzu yi kona eka swivono haswimbirhi. Exivonweni xa Ezekiyele yi sasekisa makhumbi ya le nyangweni. Exivonweni xa Yohane vagandzeri va khome marhavi ya micindzu, leswi fanekiselaka ntsako lowu va wu kumaka hi ku dzunisa Yehovha ni ku hoyozela Yesu tanihi Hosi ya vona. (Nhlavutelo 7:9-15) Eka xivono xa Ezekiyele, tinyimba ta 12 ta Israyele ti fanekisela “tinyimpfu tin’wana.” (Yohane 10:16; ringanisa Luka 22:28-30.) Xana na wena u wun’wana wa lava va tsakelaka ku dzunisa Yehovha hi ku twarisa Mfumo wa yena?

6. Hi xihi xikongomelo xa makamara yo dyela eka wona lama nga exivaveni xa le handle, naswona hi rihi lunghelo leri leswi, swi nga ri tsundzuxaka lava va tinyimpfu tin’wana?

⁶ Loko hi ri karhi hi valanga xivava xa le handle, hi vona makamara yo dyela eka wona ya 30 laha vanhu va dyelaka kona magandzelo ya vona ya ku tirhandzela. (Ezekiyele 40:17) Namuntlha, lava va tinyimpfu tin’wana a va ma endli magandzelo ya swiharhi, kambe a va ti ximandla-mandla etempeleni ya moya. (Ringanisa Eksoda 23:15) Muapostola Pawulo u tsarile a ku: “Ha [Yesu] a hi nyikeleni eka Xikwembu xitlhavelo xa ku vonga nkarhi hinkwawo, ku nga mbhandzu wa milomu leyi endlaka xitiviso xa le rivaleni eka vito ra xona. Ku tlula kwalaho, mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:15, 16; Hosiya 14:2) I lunghelo lerikulu ku endlela Yehovha switlhavelo swo tano.—Swivuriso 3:9, 27.

7. Xana ku pimiwa ka tempele ku hi tiyisekisa ha yini?

⁷ Ezekiyele u langutile loko ntsumi yi ri karhi yi pima tempele ya le xivonweni. (Ezekiyele 40:3) Hilaha ku fanaka, muapostola Yohane u byeriwe leswi: “Suka u yima u pima vukwetsimelo bya tempele ya Xikwembu ni alitari ni lava gandzelaka eka byona.” (Nhlavutelo 11:1) Xana ku pima loku ku vula yini? Eka timhaka leti hatimbirhi, ku tirha tanihi xitiyisekiso, tanihi xikombiso xa leswaku a xi kona lexi nga sivelaka Yehovha leswaku a hetisisa swikongomelo swakwe malunghana ni vugandzeri bya ntiyiso. Hilaha ku fanaka namuntlha, hi nga tiyisekisiwa leswaku a xi kona—hambi ku ri nkaneto lowukulu wo huma eka tihulumendhe ta matimba—lexi nga sivelaka ku kondleteriwa ka vugandzeri byo tenga.

8. I vamani lava nghenaka hi tinyangwa ta xivava xa le handle, naswona xana tinyangwa leti ti hi tsundzuxa yini?

⁸ Loko hi tsemakanya xivava xa le handle, ha swi vona leswaku ku ni tinyangwa tinharhu leti yaka exivaveni xa le ndzeni; tinyangwa ta le ndzeni ti langutane ni tinyangwa ta le handle naswona i ta mpimo lowu ringanaka. (Ezekiyele 40:6, 20, 23, 24, 27) I vaprista ntsena lava nghenaka exivaveni xa le ndzeni. Tinyangwa ta le ndzeni ti hi tsundzuxa leswaku, vatotiwa va faneleke va fikelela mimpimanyeto ni milawu ya Xikwembu naswona Vakreste va ntiyiso hinkwavo na vona va kongomisiwa hi mimpimanyeto ni milawu yoleyo. Kambe hi wihi ntirho wa vaprista, naswona leswi swi vula yini namuntlha?

Vaprista Vo Tshembeka

9, 10. Xana “vaprista va vuhosi,” va nyikela ndzetelo wa moya hi ndlela yihi, hilaha swi fanekiseriweke ha kona hi ntlawa wa vaprista exivonweni xa Ezekiyele?

⁹ Eminkarhini ya le mahlweni ka Vukreste, vaprista a va tirha hi matimba etempeleni. Ku dlaya swiharhi swa xitlhavelo, ku endla magandzelo ha swona ealitarini, ni ku tirhela vaprista-kulobye ni vanhu van’wana, a ku ri ntirho wo tika swinene. Kambe a va ri ni ntirho wun’wana wa nkoka. Yehovha u vule leswi malunghana ni vaprista: “V̌a ta dyonḍisa tiko ra mina e ku av̌anyisa ŝo kwetsima ni le’ŝi nga kwetsimiki, v̌a v̌a ṭunḍuša e ku hlawula le’ŝi nga tengangiki ni le’ŝi tengeke.”—Ezekiyele 44:23; Malakiya 2:7.

¹⁰ Xana wa wu tlangela ntirho lowukulu lowu endliweke hi vatotiwa ni ku titsongahata ka vona tanihi ntlawa, “vaprista va vuhosi,” va seketela vugandzeri byo tenga? (1 Petro 2:9) Ku fana ni vaprista va khale lava nga Valevhi, va rhangerile eku nyikeleni ka ndzetelo wa moya, va pfuna vanhu leswaku va vona leswi baseke ni leswi amukelekaka ematihlweni ya Xikwembu ni leswi nga amukelekiki. (Matewu 24:45) Ndzetelo wo tano lowu humaka etibukwini leti sekeriweke eBibeleni ni le minhlanganweni swin’we ni mintsombano ya Vukreste, wu pfune timiliyoni ta vanhu leswaku ti vuyelelana ni Xikwembu.—2 Vakorinto 5:20.

11. (a) Xana xivono xa Ezekiyele xi wu kandziyise njhani nkoka wa ku basa eka vaprista? (b) Emasikwini yo hetelela, xana vatotiwa va basisiwe njhani hi tlhelo ra moya?

¹¹ Hambiswiritano, vaprista a va fanelanga va dyondzisa van’wana ku va lava baseke ntsena; na vona va fanele va basa. Xisweswo, Ezekiyele u ri vone ka ha ri emahlweni fambiselo ro basisa vaprista va Israyele. (Ezekiyele 44:10-16) Hilaha ku fanaka, matimu ma kombisa leswaku hi 1918, Yehovha u ve “muṅwokisi” etempeleni yakwe ya moya, a kambisisa ntlawa wa vaprista lava totiweke. (Malakiya 3:1-5) Lava va tekiwaka va basile emoyeni kumbe lava va tisoleke hi leswi va nga tshama va gandzela swifaniso, a va pfumeleriwa ku ya emahlweni ni lunghelo ro tirha etempeleni yakwe ya moya. Hambiswiritano, vatotiwa, ku fana ni vanhu hinkwavo, va nga ha hundzuka lava nyameke—emoyeni ni le mahanyelweni. (Ezekiyele 44:22, 25-27) Va fanele va tirha hi matimba leswaku va tshama va “nga ri na xivati xa misava.”—Yakobo 1:27; ringanisa Marka 7:20-23.

12. Hikwalaho ka yini hi fanele hi tlangela ntirho wa vatotiwa?

¹² Un’wana ni un’wana wa hina a nga ha tivutisa, ‘Xana ndza xi tlangela xikombiso lexinene xa vatotiwa lexi va xi vekeke eka malembe yo tala va endla ntirho hi ku tshembeka? Xana ndza ri tekelela ripfumelo ra vona?’ I swinene leswaku lava va ntshungu lowukulu va tsundzuka leswaku wu ta fika nkarhi lowu vatotiwa va nga ta suka laha misaveni. Malunghana ni vaprista exivonweni xa Ezekiyele, Yehovha u te: “Mi nga v̌a nyiki tiko Israeleni: tiko ra v̌ona hi mina.” (Ezekiyele 44:28) Hilaha ku fanaka, vatotiwa a va nge tshami va ri kona laha misaveni. Ndzhaka ya vona yi le tilweni, naswona lava va ntshungu lowukulu va swi teka ku ri lunghelo ku va pfuna ni ku va khutaza loko va ha ri laha misaveni.—Matewu 25:34-40; 1 Petro 1:3, 4.

Ndhuna—I Mani?

13, 14. (a) Hikwalaho ka yini ndhuna yi fanele yi va ya tinyimpfu tin’wana? (b) Xana ndhuna yi fanekisela vamani?

¹³ Sweswi ku tlakuka xivutiso lexi nyanyulaka. Xana ndhuna yi fanekisela mani? Tanihi leswi kun’wana ku vulavuriwaka ha yena tanihi munhu a ri un’we kasi kun’wana tanihi ntlawa wa vanhu, hi nga ha hetelela hi ku vula leswaku u yimela ntlawa wa vanhu. (Ezekiyele 44:3; 45:8, 9) Kambe i vamani? Handle ko kanakana a hi vona vatotiwa. Exivonweni yi tirhisana swinene ni vaprista, kambe yona a hi muprista. Ku hambana ni ntlawa wa vaprista, yona yi nyikiwa ndzhaka etikweni kutani vumundzuku bya yona byi laha misaveni, ku nga ri etilweni. (Ezekiyele 48:21) Ku tlula kwalaho, Ezekiyele 46:10 (NW) yi ri: “Loko ku ri ndhuna leyi nga exikarhi ka vona, loko va nghena, yona yi fanele yi nghena; loko va huma, yi fanele yi huma.” A yi ngheni exivaveni xa le ndzeni kambe yi gandzela exivaveni xa le handle, yi nghena yi tlhela yi huma ni vanhu etempeleni. Tinhlamuselo leti, hi ku olova ti endla ndhuna yi wela exikarhi ka ntshungu lowukulu wa tinyimpfu tin’wana.

¹⁴ Swi le rivaleni leswaku ndhuna yi ni vutihlamuleri byo karhi exikarhi ka vanhu va Xikwembu. Exivaveni xa le handle, yi tshama erikupakupeni ra Nyangwa ya le Vuxeni. (Ezekiyele 44:2, 3) Leswi swi kombisa xiyimo xa ku langutela, lexi fanaka ni lexiya xa vakulukumba va Israyele lava a va tshama enyangweni ya muti kutani va avanyisa. (Rhuti 4:1-12; Swivuriso 22:22) I vamani exikarhi ka tinyimpfu tin’wana lava nga eka xiyimo xa vulanguteri namuntlha? I vakulu lava nga ni ntshembo wa laha misaveni, lava vekiweke hi moya lowo kwetsima. (Mintirho 20:28) Kutani ke, ntlawa wa tindhuna wu karhi wa tolovetiwa, leswaku hi ku famba ka nkarhi wu ta kongomisa timhaka emisaveni leyintshwa.

15. (a) Xana xivono xa Ezekiyele xi byi hlamusela njhani vuxaka lebyi nga kona exikarhi ka vakulu lava nga va ntshungu lowukulu swin’we ni ntlawa wa vaprista lowu totiweke? (b) Hi byihi vurhangeri lebyi vakulu lava totiweke va byi kombiseke enhlengeletanweni ya Xikwembu ya laha misaveni?

¹⁵ Kambe, hi wihi ntirhisano lowu nga kona namuntlha exikarhi ka ntlawa wa vaprista lava totiweke swin’we ni vakulukumba volavo, lava tanihi swirho swa ntshungu lowukulu, va tirhaka tanihi valanguteri? Xivono xa Ezekiyele xi ringanyeta leswaku vakulu lava nga swirho swa ntshungu lowukulu va seketela naswona va kongomisiwa, kasi vatotiwa hi vona va rhangelaka eka swilo swa moya. Njhani? Tsundzuka leswaku vaprista exivonweni va nyikiwe vutihlamuleri byo dyondzisa vanhu timhaka ta moya. Nakambe va byeriwe ku avanyisa milandzu. Ku engetela kwalaho, Valevhi a va averiwe ‘ntirho wo langutela’ etinyangweni ta tempele. (Ezekiyele 44:11, 23, 24) Swi le rivaleni leswaku, tindhuna a ti fanele ti endla mintirho ya moya leyi endliwaka hi vaprista ni ku landzela nkongomiso wa vona. Kutani ke, swa twala leswi eminkarhini ya sweswi, vatotiwa ku nga vona va rhangelaka evugandzerini byo tenga. Hi xikombiso, swirho swa Huvo leyi Fumaka ya Timbhoni ta Yehovha swi hlawuriwe eka vona. Vakulu vo tano lava tshembekaka, lava totiweke, se i khale va ri karhi va letela ntlawa wa tindhuna lowu nga kona, va endla leswaku vanhu lava nga ta va swirho swa ntlawa lowu va lunghekela siku leri ha rona va nga ta nyikiwa vutihlamuleri bya vona lebyi teleke emisaveni leyintshwa ya Xikwembu, leyi taka.

16. Hi ku ya hi Esaya 32:1, 2, xana vakulu hinkwavo va fanele va endlisa ku yini?

¹⁶ Xana lava va nga ta va swirho swa ntlawa lowu nga ta kuma vutihlamuleri bya ku va ntlawa wa tindhuna, i valanguteri va njhani? Vuprofeta lebyi nga eka Esaya 32:1, 2 byi ri: “V̌onani, hosi yi ta fuma hi ku lulama, tihosana, na tona, ti ta risa hi ku lulama. Uṅwana ni uṅwana wa v̌ona o ta kotisa šisirelelo loko moya wu hunga, kukota šitšhav̌elo loko šidzedze ši fika, kukota šinambyana ša mati e tikweni ra dyandza, nḍuti wa ribye le’ri tlakukeke tikweni le’ri omeke.” Vuprofeta lebyi bya karhi bya hetiseka namuntlha tanihi leswi vakulu va Vakreste—lava totiweke swin’we ni va tinyimpfu tin’wana—va lwelaka ku sirhelela ntlhambi eka ‘xidzedze’ xo tanihi nxaniso kumbe ku hela matimba.

17. Xana varisi lava nga Vakreste va fanele va titeka hi ndlela yihi, naswona xana ntlhambi wu fanele wu va tekisa ku yini?

¹⁷ Rito leri nge “hosana” ni leri nge “ndhuna,” lama nga ni nhlamuselo leyi fanaka hi Xiheveru, a ma tirhisiwi tanihi xithopo, lexi endleriwaka ku tlakusa vanhu. Ku ri na sweswo, ma hlamusela vutihlamuleri lebyi vanhu volavo va nga na byona eku languteleni ka tinyimpfu ta Xikwembu. Yehovha wa tsundzuxa: “Swi ringene hi n’wina, N’wina tindhuna ta Israyele! Susani madzolonga ni ku phanga, mi endla vululami ni vunene.” (Ezekiyele 45:9 NW) I swinene leswaku vakulu hinkwavo namuntlha va yingisa ndzayo leyi. (1 Petro 5:2, 3) Na wona ntlhambi, wa swi xiya leswaku Yesu u lunghiselele varisi tanihi “tinyiko leti nga vanhu.” (Vaefesa 4:8) Timfanelo ta vona ti andlariwe eRitweni ra Xikwembu leri huhuteriweke. (1 Timotiya 3:1-7; Tito 1:5-9) Hikokwalaho, Vakreste va landzela nkongomiso wa vakulu.—Vaheveru 13:7.

18. Hi byihi vutihlamuleri byin’wana lebyi lava va nga ta va va ntlawa wa tindhuna va nga na byona sweswi, naswona xana vutihlamuleri bya vona byi ta va byihi enkarhini lowu taka?

¹⁸ Eminkarhini ya Bibele, tindhuna tin’wana a ti ri ni matimba lamakulu, tin’wana a ti ri ni lamatsongo. Namuntlha, vakulu lava nga va ntshungu lowukulu va ni vutihlamuleri byo hambana swinene. Van’wana va tirha evandlheni rin’we, van’wana va pfuna mavandlha yo tala va ri valanguteri lava famba-fambaka; van’wana va pfuna matiko yo hambana-hambana va ri swirho swa Komiti ya Rhavi; van’wana hi ku kongoma va pfuna tikomiti to hambana-hambana ta Huvo leyi Fumaka. Emisaveni leyintshwa, Yesu u ta veka “tihosana e misav̌eni hikwayo” leswaku ti rhangela vagandzeri va Yehovha emisaveni. (Pisalema 45:16) Handle ko kanakana u ta hlawula vo tala va vona eka vakulu vo tshembeka va namuntlha. Leswi vavanuna lava va kombisaka leswaku va faneleka sweswi, u ta hlawula ku byarhisa vo tala va vona vutihlamuleri lebyikulu enkarhini lowu taka loko a paluxa ntirho wa ntlawa wa tindhuna emisaveni leyintshwa.

Tiko Ra Vanhu Va Xikwembu Namuntlha

19. Xana tiko ra le xivonweni xa Ezekiyele ri yimela yini?

¹⁹ Xivono xa Ezekiyele nakambe xi kombisa tiko leri pfuxetiweke ra Israyele. Xana xiyenge lexi xa xivono xi fanekisela yini? Vuprofeta byin’wana bya ku pfuxeta byi vhumbhe leswaku tiko, ku nga Israyele, a ri ta va paradeyisi yo fana na Edeni. (Ezekiyele 36:34, 35) Namuntlha, hi hanya ‘etikweni’ leri pfuxetiweke, na rona, hi mongo wo karhi, ri fana na Edeni. Hi yona mhaka leyi minkarhi yin’wana hi vulavulaka hi paradeyisi ya hina ya moya. Xihondzo xo Rindza xi hlamusele “tiko” ra hina tanihi “xivandla xa ntirho” xa vanhu va Xikwembu lava hlawuriweke.b Kun’wana ni kun’wana laha nandza wa Yehovha a nga kona, u le tikweni rero leri pfuxetiweke ntsena loko a lwela ku namarhela vugandzeri bya ntiyiso hi ku famba eminkondzweni ya Kreste Yesu.—1 Petro 2:21.

20. Hi wihi nsinya wa nawu lowu hi wu kumaka eka “munyikelo wo kwetsima” wa le xivonweni xa Ezekiyele, naswona xana hi nga wu tirhisa njhani nsinya lowu wa nawu?

²⁰ Ku vuriwa yini hi xiphemu xa tiko lexi vitaniwaka “munyikelo wo kwetsima”? Lowu a wu ri munyikelo wa vanhu wo seketela vaprista ni muti. Hilaha ku fanaka, “vanhu hinkwavo va tiko” a va fanele va nyikela mbangu wo karhi wu va wa ndhuna. Xana leswi swi vula yini namuntlha? Entiyisweni, leswi a swi vuli swona leswaku vanhu va Xikwembu va fanele va tikiseriwa hi ku va ni ntlawa wa vafundhisi lowu kumaka muholo. (2 Vatesalonika 3:8) Ku ri na sweswo, nseketelo lowu nyikiwaka vakulu ngopfu-ngopfu i wa moya. Wu katsa ku pfuneta eka ntirho lowu endliwaka sweswi, ni ku kombisa moya wa ntirhisano ni ku titsongahata. Kambe, tanihi le sikwini ra Ezekiyele, munyikelo lowu wu nyikiwa “Yehovha,” ku nga ri munhu wo karhi.—Ezekiyele 45:1, 7, 16.

21. Xana hi nga dyondza yini hi ku aviwa ka tiko exivonweni xa Ezekiyele?

²¹ A hi ndhuna ni vaprista ntsena lava nga ni tindhawu leti vekiweke etikweni leri pfuxetiweke. Ku aviwa ka tiko ku kombisa leswaku un’wana ni un’wana wa tinyimba ta 12 u ni ndzhaka yakwe. (Ezekiyele 47:13, 22, 23) Kutani ke, lava va ntshungu lowukulu a va kumi ndhawu eparadeyisini ya moya ya namuntlha ntsena, kambe va ta tlhela va nyikiwa mbangu loko va fanelekela ku nghena exivandleni xa laha misaveni xa Mfumo wa Xikwembu.

22. (a) Xana muti wa le xivonweni xa Ezekiyele wu yimela yini? (b) I yini leswi hi swi dyondzaka hi leswi muti lowu wu nga ni tinyangwa matlhelo hinkwawo?

²² Xo hetelela, xana muti wa le xivonweni wu yimela yini? A hi muti wa le tilweni, hikuva wu kumeka exikarhi ka tiko leri “nyameke” (leri nga kwetsimiki). (Ezekiyele 48:15-17) Xisweswo wu fanele wu ri wa laha misaveni. Kutani ke, xana muti lowu i yini? Xana a wu kombisi ku hlengeletana ka vanhu tanihi ntlawa, va vumba nchumu wo karhi lowu hlelekeke? Ina. Hikwalaho, muti lowu wu vonaka wu fanekisela fambiselo ra laha misaveni leri pfunaka vanhu hinkwavo lava nga ta vumba vandla ra vanhu vo lulama emisaveni. Wu ta tirha hi ku hetiseka “emisaveni leyintshwa” leyi taka. (2 Petro 3:13) Tinyangwa ta muti ematlhelweni hinkwawo, nyimba yin’wana ni yin’wana yi ri ni nyangwa wa yona, leswi swi ku fanekisela kahle ku pfuleka. Namuntlha, vanhu va Xikwembu a va kongomisiwi hi fambiselo ro karhi ra xihundla. Vamakwerhu lava nga ni vutihlamuleri va fanele va tshineleleka; misinya ya milawu leyi yi va kongomisaka ya tiveka eka vanhu hinkwavo. Mhaka ya leswaku vanhu va tinyimba hinkwato va rima mbangu lowu seketelaka muti lowu, yi hi tsundzuxa leswaku tinyimpfu tin’wana ti ma seketela ni hi swilo leswi vonakalaka, malunghiselelo yo kongomisa lama endleriweke vanhu va Xikwembu emisaveni hinkwayo.—Ezekiyele 48:19, 30-34.

23. I yini leswi hi nga ta swi kambisisa eka xihloko lexi landzelaka?

²³ Kambe, ku vuriwa yini hi nambu lowu khulukaka wu huma exikwetsimisisweni xa tempele? Leswaku sweswo swi yimela yini namuntlha, ni le nkarhini lowu taka, ku ta kaneriwa ha swona eka xihloko xa vunharhu ni xo hetelela eka nxaxamelo lowu.

[Tinhlamuselo ta le hansi]

Tinhla Ta Mpfuxeto

◻ Xana tempele ya le xivonweni xa Ezekiyele yi fanekisela yini?

◻ Xana vaprista lava tirhaka etempeleni a va fanekisela yini?

◻ Xana ntlawa wa tindhuna i yini, naswona hi byihi byin’wana bya vutihlamuleri bya wona?

◻ Xana tiko ra le xivonweni xa Ezekiyele i yini, naswona ri averiwe tinyimba ta 12 hi mongo wihi?

◻ Xana muti wu fanekisela yini?

[Dayagramu/Mepe lowu nga eka tluka 15]

(Leswaku u vona rungula leri hleriweke hi ku helela, vona nkandziyiso wa kona)

Ku aviwa ka tiko hilaha swi kombisiweke hakona exivonweni xa Ezekiyele

TINYIMBA TA 12

Lwandle Lerikulu

Lwandle Ra Galeliya

Nambu Wa Yordani

Lwandle Ra Munyu

DANI

ASERE

NEFTALI

MANASE

EFRAYIMI

RUVENI

YUDA

NDHUNA

BENJAMINI

SIMIYONI

ISAKARA

ZEBULONI

GADI

[Dayagramu]

KU NDLANDLAMUXIWA KA MUNYIKELO WO KWETSIMA

A. “Yehovha Hi Yexe U Kwalaho” (Yehovha- Shammah); B. masimu lama noneke ya muti

Xiyenge Xa Valevhi

Xikwetsimisiso Xa Yehovha

Xiyenge Xa Vaprista

B A B