Ndzima 29

Ku Yimbelela Risimu Lerintshwa Ra Ku Hlula

Xivono 9—Nhlavutelo 14:1-20

Nhloko-mhaka: Lava 144 000 va yime ni Xinyimpfana eNtshaveni ya Siyoni; tintsumi ti vula swihlambanyo emisaveni; i nkarhi wa ntshovelo

Nkarhi wa ku hetiseka: Ku sukela hi 1914 ku ya fika enhlomulweni lowukulu

1. I yini leswi ana se hi swi dyondzeke eka Nhlavutelo tindzima 7, 12 na 13 kutani hi ta dyondza yini sweswi?

SWI phyuphyisa swonghasi ku yingisa xivono lexi landzelaka xa Yohane! Sweswi hi ta twa hi malandza yo tshembeka ya Yehovha ni mintirho ya wona esikwini ra Hosi, ku ri ni ku twa hi ta tinhlengeletano ta dragona leti fanaka ni xivandzana lexi nyenyetsaka. (Nhlavutelo 1:10) Nhlavutelo 7:1, 3 ana se yi hi paluxele leswaku timheho ta mune ta ndzoviso ti khomiwile kukondza ku hlengeletiwa mahlonga hinkwawo ya vatotiwa lava 144 000 lava funghiweke. Nhlavutelo 12:17 yi hi byele leswaku mahlonga lawa hi “lava saleke va mbewu [ya wansati]” lava Sathana, la nga dragona, a tiyimiseleke ku va hlasela hi nkarhi wolowo. Nakambe Nhlavutelo ndzima 13 yi hi vekele erivaleni leswaku tinhlengeletano ta tipolitiki leti Sathana a ti sunguleke emisaveni, ti tshikilela malandza yo tshembeka ya Yehovha hi tihanyi ti tlhela ti ma xanisa. Kambe, nala yoloye lonkulu wa Xikwembu a nge pfuki a sivele xikongomelo xa xona! Sweswi hi ta dyondza leswaku hambileswi Sathana a tiyimiseleke hi matimba, lava va 144 000 lava hluleke va ta hlengeletiwa.

2. Hi xihi xivono xa makumu lama tsakisaka lexi Yohane a hi hlavutelaka xona eka Nhlavutelo 14:1 naswona i mani Xinyimpfana?

² Yohane swin’we ni lava ntlawa wa Yohane namuntlha va kombiwe vuyelo byebyo lebyi tsakisaka, u te: “Hiloko ndzi languta, kutani waswivo, a ku ri ni Xinyimpfana xi yime eNtshaveni ya Siyoni, xi ri ni lava 144 000 va tsariwe vito ra xona ni vito ra Tata wa xona emimombyeni ya vona.” (Nhlavutelo 14:1) Hilaha hi swi voneke hakona, Xinyimpfana lexi xa fana na Mikayele loyi a basiseke matilo hi ku hlongola Diyavulosi ni madimona ya yena. Hi yena Mikayele loyi Daniyele a vuleke leswaku ‘u yimile, a yimela vanhu va Xikwembu’ loko a lunghiselela ku “yima” leswaku a hetisisa vuavanyisi bya Yehovha byo lulama. (Daniyele 12:1; Nhlavutelo 12:7, 9) Ku sukela hi 1914, Xinyimpfana lexi xa Xikwembu lexi rhangisaka swilaveko swa van’wana xi yimile eNtshaveni ya Siyoni tanihi Hosi leyi nga Mesiya.

3. Xana i yini ‘Ntshava ya Siyoni’ leyi Xinyimpfana ni lava 144 000 va ‘yimeke’ eka yona?

³ Swi hilaha Yehovha a profeteke hakona loko a ku: “Mina ndzi veke hosi yanga ehenhla ka Siyoni, ku nga ntshava ya mina yo kwetsima.” (Pisalema 2:6; 110:2) Ntshava leyi a ya ha ri Ntshava ya Siyoni ya laha misaveni, laha muti wa Yerusalema a wu kumeka kona, ku nga muti lowu tihosi ta rixaka ra Davhida a ti fuma ti ri kona. (1 Tikronika 11:4-7; 2 Tikronika 5:2) Phela, endzhaku ka loko Yesu a file kutani a pfuxiwa hi 33 C.E., u vekiwe tanihi ribye ra yinhla emasungulweni ya Ntshava ya Siyoni ya le tilweni, ku nga ndhawu ya le tilweni laha Yehovha a tiyimiseleke ku simeka “muti wa Xikwembu lexi hanyaka, Yerusalema wa le tilweni.” Hikwalaho, ‘Ntshava ya Siyoni’ leyi ku vulavuriwaka ha yona laha yi yimela xikhundlha lexi tlakukeke xa Yesu ni vadyandzhaka-kulobye, lava vumbaka Yerusalema wa le tilweni, lowu nga Mfumo. (Vaheveru 12:22, 28; Vaefesa 3:6) I xiyimo lexi vangamaka lexi Yehovha a va vekeke eka xona hi nkarhi wa siku ra Hosi. Eka malembe-xidzana lama hundzeke, Vakreste lava totiweke tanihi “maribye lama hanyaka,” a va tshama va ku langutele hi mahlo-ngati ku yima eNtshaveni yoleyo ya Siyoni ya le tilweni, va ri na Hosi Yesu Kreste la vangamaka eMfun’weni wakwe lowukulu.—1 Petro 2:4-6; Luka 22:28-30; Yohane 14:2, 3.

4. Hinkwavo lava 144 000 va yime eNtshaveni ya Siyoni hi ndlela yihi?

⁴ Yohane a nga vonanga Yesu ntsena kambe u n’wi vone a ri ni hinkwavo vadyandzhaka-kulobye lava 144 000 va ri eMfun’weni wa le tilweni, va yime eNtshaveni ya Siyoni. Hi nkarhi wa xivono lexi, vo tala va lava 144 000 ana se a va ri etilweni, kambe ku nga ri hinkwavo. Endzhakunyana eka xivono lexi fanaka, Yohane u twe leswaku van’wana va vakwetsimi lava va ha fanele va tiyisela kutani va fa va tshembekile. (Nhlavutelo 14:12, 13) Kutani swi le rivaleni leswaku van’wana va lava 144 000 va ha ri laha misaveni. Kambe, swi tisa ku yini leswaku Yohane a va vona hinkwavo va yime na Yesu eNtshaveni ya Siyoni?a Phela, tanihi swirho swa vandlha ra Vakreste lava totiweke, va “tshinelele Ntshava ya Siyoni ni muti wa Xikwembu lexi hanyaka, Yerusalema wa le tilweni.” (Vaheveru 12:22) Ku fana na Pawulo loko a ha ri laha misaveni, ana se va pfuxiwile hi mianakanyo ya moya leswaku va va swin’we na Kreste Yesu etilweni. (Vaefesa 2:5, 6) Ku engetela kwalaho, hi 1919 va amukele xirhambo lexi nge “Tlhandlukelani haleno,” hi ndlela yo fanekisela va ‘tlhandlukele etilweni va ri epapeni.’ (Nhlavutelo 11:12) Hi ku ya hi leswi matsalwa lawa ma swi vulaka, ha swi vona leswaku hinkwavo lava 144 000—hi mianakanyo ya moya—va le Ntshaveni ya Siyoni na Yesu Kreste.

5. Xana ku tsariwe mavito ya vamani emimombyeni ya lava 144 000, naswona ku tsariwa ka vito ha rin’we swi vula yini?

⁵ Lava 144 000 a va okelani ndzilo nikatsongo ni vagandzeri va xivandzana, lava nga ni mfungho wo fanekisela wa nhlayo ya 666. (Nhlavutelo 13:15-18) Kambe, lava vo tshembeka va tsariwe vito ra Xikwembu ni ra Xinyimpfana emimombyeni ya vona. A swi kanakanisi leswaku leswi Yohane a a ri Muyuda, u vone vito ra Xikwembu leri nge יהוה ri tsariwe hi maletere ya Xiheveru.b Hi ku tsariwa vito ra Tata wa Yesu hi ndlela yo fanekisela emimombyeni ya vona, lava funghiweke va swi veka erivaleni eka mani na mani leswaku i timbhoni ta Yehovha, naswona i malandza ya Yena. (Nhlavutelo 3:12) Nakambe ku tsariwa ka vito ra Yesu emimombyeni ya vona ku kombisa leswaku va n’wi amukela tanihi n’wini wa vona. U va tshembise ku va teka leswaku a ta va “nuna” wa vona, na vona va ta va ‘vatekiwa’ va yena, “xivumbiwa lexintshwa” lexi tirhelaka Xikwembu xi ri karhi xi langutele ku ya hanya etilweni. (Vaefesa 5:22-24; Nhlavutelo 21:2, 9; 2 Vakorinto 5:17) Vuxaka bya vona lebyikulu na Yehovha swin’we na Yesu Kreste byi khumba xin’wana ni xin’wana lexi va xi anakanyaka ni ku xi endla.

Ku Yimbelela Leswi Fanaka Ni Risimu Lerintshwa

6. Hi byihi vuyimbeleri lebyi Yohane a byi tweke naswona u byi hlamusele njhani?

⁶ Leswaku hakunene swi tano, Yohane u te: “Kutani ndzi twa mpfumawulo wu huma etilweni wu fana ni mpfumawulo wa mati yo tala, ni mpfumawulo wa ku dzindza lokukulu ka tilo; naswona mpfumawulo lowu a ndzi wu twa a wu kotisa wa vayimbeleri lava fambisanaka ni haripa, loko va chaya tiharipa ta vona. Va yimbelela leswi fanaka ni risimu lerintshwa emahlweni ka xiluvelo ni le mahlweni ka swivumbiwa leswi hanyaka swa mune ni le mahlweni ka vakulu; naswona a ku na munhu loyi a a kota ku tivisisa risimu rero loko va nga ri lava 144 000, lava xaviweke emisaveni.” (Nhlavutelo 14:2, 3) A swi hlamarisi leswi Yohane a tsundzukeke mpfumawulo wa maboboma ni wa ku dzindza lokukulu ka tilo loko a twa marito ya lava 144 000 va ri karhi va yimbelela. Mawaku ku tsakisa ka miloti yoleyo leyi fambisanaka ni haripa! (Pisalema 81:2) A ku na khwayere emisaveni leyi nga kotaka ku yimbelela hi mpfumawulo lowukulu swonghasi!

7. (a) Hi rihi risimu lerintshwa ra Nhlavutelo 14:3? (b) Xana risimu ra Pisalema 149:1 i rintshwa namuntlha hi ndlela yihi?

⁷ Xana i yini “risimu lerintshwa” leri a ri tweke? Hilaha hi swi voneke hakona loko hi bula hi Nhlavutelo 5:9, 10, risimu leri ri fambisana ni swikongomelo swa Mfumo wa Yehovha ni lunghiselelo ra yena ro hlamarisa, ha Yesu Kreste, ro endla leswaku Israyele wa moya a va “mfumo ni vaprista eka Xikwembu xa hina.” I risimu ro dzunisa Yehovha, leri swi twarisaka erivaleni leswi a swi endlelaka Israyele wa Xikwembu ni leswi a swi endlaka hi ku tirhisa yena. (Vagalatiya 6:16) Swirho swa Israyele wa moya swi amukela xirhambo xa mupisalema lexi nge: “Dzunisani Yah! Yimbelelelani Yehovha risimu lerintshwa, swidzuniso swakwe enhlengeletanweni ya lavo tshembeka. Israyele a a tsakele Muendli wakwe Lonkulu, vana va Siyoni—a va tsakele Hosi ya vona.” (Pisalema 149:1, 2) I ntiyiso leswaku se ku hundze malembe-xidzana yo tala marito lawa ma tsariwile, kambe enkarhini wa hina ma yimbeleriwa hi matwisiselo lamantshwa. Mfumo wa Mesiya wu velekiwile hi 1914. (Nhlavutelo 12:10) Hi 1919, vanhu va Yehovha va sungule ku twarisa “rito ra mfumo” hi ku hiseka lokukulu. (Matewu 13:19) Hi lembe rero va sungule ku ‘yimbelela etimbilwini ta vona va fambisana ni miloti leyi yaka eka Yehovha,’ hikwalaho ko susumetiwa hi ndzimana ya lembe ya 1919 (Esaya 54:17) ni hikwalaho ko khutaziwa hi ku pfuxetiwa ka paradeyisi ya moya.—Vaefesa 5:19.

8. Ha yini ku ri lava 144 000 ntsena lava kotaka ku yimbelela risimu lerintshwa leri ku vulavuriwaka ha rona eka Nhlavutelo 14:3?

⁸ Kambe, ha yini ku ri lava 144 000 ntsena lava tivaka risimu leri ku vulavuriwaka ha rona eka Nhlavutelo 14:3? Hikuva ri fambisana ni mintokoto ya vona loko va hlawuriwa tanihi vadyandzhaka eMfun’weni wa Xikwembu. Hi vona ntsena lava amukeriweke tanihi vana va Xikwembu ni lava totiweke hi moya lowo kwetsima. Hi vona ntsena lava xaviweke emisaveni leswaku va ya va xiphemu xa Mfumo wa le tilweni nakambe hi vona ntsena lava nga ta va “vaprista . . . naswona va ta va tihosi” na Yesu Kreste ku ringana gidi ra malembe leswaku va endla vanhu va va lava hetisekeke. Hi vona ntsena lava voniwaka va ri karhi va “yimbelela leswi fanaka ni risimu lerintshwa” emahlweni ka Yehovha.c Mintokoto leyi yo hlawuleka ni ntshembo wa vona swi endla leswaku va tlangela Mfumo hi ndlela yo hlawuleka naswona va kota ku yimbelela ha wona hi ndlela leyi ku nga riki na munhu la kotaka ku yimbelela ku fana na vona.—Nhlavutelo 20:6; Vakolosa 1:13; 1 Vatesalonika 2:11, 12.

9. Xana ntshungu lowukulu wu angule njhani eka risimu leri yimbeleriwaka hi vatotiwa naswona hi xihi xikhongotelo lexi va xi hetisiseke?

⁹ Nilokoswiritano, van’wana va ri yingisile kutani va yimbelela swin’we na vona. Ku sukela hi 1935, nhlayo leyi andzaka ya lava tinyimpfu tin’wana yi ri twile risimu lera vatotiwa ra ku hlula kutani na yona yi susumeteleka ku hlanganyela eku twariseni ka Mfumo wa Xikwembu. (Yohane 10:16; Nhlavutelo 7:9) I ntiyiso leswaku lava ntshungu lowukulu a va nge swi koti ku yimbelela risimu leri lerintshwa hi ku kongoma hi ndlela leyi vafumi va nkarhi lowu taka va Mfumo wa Xikwembu va ri yimbelelaka ha yona. Kambe, na vona va yimbelela swidzuniso leswi dzunisaka Yehovha hikwalaho ka swilo leswintshwa leswi a swi endlaka. Xisweswo, va hetisisa xikhongotelo xa mupisalema lexi nge: “Yimbelelelani Yehovha risimu lerintshwa. Yimbelelelani Yehovha, n’wina hinkwenu vanhu va misava. Yimbelelelani Yehovha, dzunisani vito rakwe. Siku ni siku vulani mahungu lamanene ya ku ponisiwa ha yena. Vulani ku vangama ka yena exikarhi ka matiko, mintirho yakwe yo hlamarisa exikarhi ka vanhu hinkwavo. N’wina mindyangu ya vanhu, nyikani Yehovha, nyikani Yehovha ku vangama ni ntamu. Vulani exikarhi ka matiko mi ku: ‘Yehovha i hosi.’”—Pisalema 96:1-3, 7, 10; 98:1-9.

10. Xana lava 144 000 va nga swi kotisa ku yini ku yimbelela “emahlweni” ka vakulu va 24 vo fanekisela?

¹⁰ Xana lava 144 000 va nga swi kotisa ku yini ku yimbelela “emahlweni” ka vakulu, tanihi leswi vakulu va 24 na vona va nga van’wana va lava 144 000 loko se va ri eswikhundlheni swa vona swo vangama etilweni? Loko siku ra Hosi ra ha ku sungula, “lava feke evun’weni na Kreste” va pfuxiwile va va swivumbiwa swa moya. Xisweswo, Vakreste vo tshembeka lava nga vatotiwa lava hluleke, sweswi va le tilweni, hi ndlela yo fanekisela naswona va karhi va endla ntirho lowu fanaka ni wa mintlawa ya 24 ya vaprista lava nga vakulu. Va katsiwile exivonweni xa nhlengeletano ya Yehovha ya le tilweni. (1 Vatesalonika 4:15, 16; 1 Tikronika 24:1-18; Nhlavutelo 4:4; 6:11) Hikwalaho, masalela ya lava 144 000 lama ha riki emisaveni ma yimbelela risimu lerintshwa emahlweni ka vamakwavo lava pfuxiweke lava sweswi se va nga le tilweni, kumbe va nga laha va kotaka ku va vona.

11. Ha yini vatotiwa lava hluleke va vuriwa vakulu va 24 nileswaku hi lava 144 000?

¹¹ Sweswi hi nga ha vutisa hi ku: Ha yini vatotiwa lava hluleke va vuriwa lava fanekiselaka vakulu va 24 nileswaku va fanekisela lava 144 000? Xivangelo xa kona hi leswaku buku ya Nhlavutelo yi va hlamusela va ri eka swikhundlha swimbirhi leswi nga faniki. Minkarhi hinkwayo vakulu va 24 va kombisiwa va ri exikhundleni xa vona xo hetelela, va rhendzele xiluvelo xa Yehovha, va ri tihosi ni vaprista etilweni. Va yimela hinkwavo lava 144 000 loko se va ri eswikhundlheni swa vona etilweni, hambileswi sweswi ka ha riki ni masalela ma nga ri mangani lama ha riki emisaveni. (Nhlavutelo 4:4, 10; 5:5-14; 7:11-13; 11:16-18) Hambiswiritano, Nhlavutelo ndzima 7, yi vulavula hi lava 144 000 va ri lava xaviweke evanhwini naswona yi kandziyisa xikongomelo xa Yehovha xo fungha nhlayo leyi heleleke ya Vaisrayele va moya ni ku ponisa nhlayo leyi nga pimiwangiki ya ntshungu lowukulu. Nhlavutelo ndzima 14 yi hi komba xivono lexi tiyisekisaka leswaku swirho leswi heleleke swa vahluri lava 144 000 swa Mfumo swi ta hlengeletana ni Xinyimpfana eNtshaveni ya Siyoni. Nakambe yi hlamusela timfanelo leti lavekaka leswaku munhu a va un’wana wa lava 144 000, hilaha hi nga ta swi vona hakona.d

Valandzeri Va Xinyimpfana

12. (a) Xana Yohane u ye emahlweni a va hlamusela njhani lava 144 000? (b) Ha yini ku vuriwa leswaku lava 144 000 i tinghwendza?

¹² Loko Yohane a ya emahlweni a hlamusela lava 144 000, “lava xaviweke emisaveni,” u te: “Lava hi lava va nga tinyamisangiki hi vavasati; entiyisweni, i tinghwendza. Lava hi vona lava hambetaka va landzela Xinyimpfana ku nga khathariseki leswaku xi ya kwihi. Lava va xaviwe evanhwini leswaku va va swirhangana eka Xikwembu ni le ka Xinyimpfana, naswona a ku kumiwanga mavunwa emilon’wini ya vona; a va na xisolo.” (Nhlavutelo 14:4, 5) Mhaka ya leswaku lava 144 000 i “tinghwendza” a yi vuli leswaku swirho swa ntlawa lowu a swi nghenelanga vukati loko swa ha ri vanhu va nyama. Muapostola Pawulo u tsalele Vakreste lava a va ri ni ntshembo wo ya hanya etilweni, a va byela leswaku hambileswi ku tshama u nga nghenelanga vukati swi pfunaka eka Mukreste, kambe i swinene ku nghenela vukati ehansi ka swiyimo swo karhi. (1 Vakorinto 7:1, 2, 36, 37) Nchumu lowu endlaka leswaku ntlawa lowu wu va lowu hlawulekeke i vunghwendza bya moya. Va papalate vuoswi bya moya ni tipolitiki ta misava leyi swin’we ni vukhongeri bya mavunwa. (Yakobo 4:4; Nhlavutelo 17:5) Tanihi leswi va tshembisaneke vukati na Kreste, va tshame va tengile, ‘va nga ri na xisolo exikarhi ka xitukulwana xo homboloka ni lexi gombonyokeke.’—Vafilipiya 2:15.

13. Ha yini lava 144 000 va faneleka kahle ku va mutekiwa wa Yesu Kreste naswona hi yihi ndlela leyi va “hambetaka va landzela Xinyimpfana ku nga khathariseki leswaku xi ya kwihi”?

¹³ Ku engetela kwalaho, “a ku kumiwanga mavunwa emilon’wini ya vona.” Emhakeni leyi va fana ni Hosi ya vona, Yesu Kreste. Tanihi munhu la hetisekeke, “a nga xi endlanga xidyoho, hambi vuxisi a byi kumiwanga enon’wini wakwe.” (1 Petro 2:21, 22) Hikwalaho ka leswi lava 144 000 va nga riki na xisolo ni leswi va nga ni ntiyiso, va lungheke ku fana ni mutekiwa la tengeke wa Muprista Lonkulu wa Yehovha. Loko Yesu a ri laha misaveni, u rhambe lava nga ni timbilu letinene leswaku va n’wi landzela. (Marka 8:34; 10:21; Yohane 1:43) Lava va amukeleke xirhambo xa yena va tekelele mahanyelo ya yena kutani va yingisa leswi a a va dyondzisa swona. Xisweswo, loko va ha ri laha misaveni, va ‘hambete va landzela Xinyimpfana ku nga khathariseki leswaku xi ya kwihi,’ loko xi ri karhi xi va kongomisa emisaveni ya Sathana.

14. (a) Xana lava 144 000 i “swirhangana eka Xikwembu ni le ka Xinyimpfana” hi ndlela yihi? (b) Xana lava ntshungu lowukulu i swirhangana hi ndlela yihi?

¹⁴ Lava 144 000 va ‘xaviwe emisaveni’ hileswaku va “xaviwe evanhwini.” Va amukeriwe tanihi vana va Xikwembu kutani loko va pfuxiwile a va nge he vi vanhu va nyama ni ngati. Hilaha swi vuriweke hakona eka ndzimana 4, va va “swirhangana eka Xikwembu ni le ka Xinyimpfana.” Ina, hi lembe-xidzana ro sungula Yesu u ve “xirhangana xa lava va etleleke eku feni.” (1 Vakorinto 15:20, 23) Kambe, lava 144 000 i “swirhangana swo karhi” eka vanhu lava nga hetisekangiki, lava xaviweke hi ngati ya xitlhavelo xa Yesu. (Yakobo 1:18) Nilokoswiritano, ku hlengeletiwa ka vanhu a ku heteleli hi vona ntsena. Buku ya Nhlavutelo ana se yi vurile leswaku ku ni ntshungu lowukulu lowu hlengeletiweke, lowu ku nga riki na munhu la kotaka ku wu hlaya, lowu huwelelaka hi rito leri tlakukeke wu ku: “Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.” Ntshungu lowu lowukulu wu ta pona nhlomulo lowukulu kutani loko wu ri karhi wu hanyisiwa hi ‘minseledyana ya mati ya vutomi’ wu ta hetelela wu ri vanhu lava hetisekeke emisaveni. Endzhaku ka nhlomulo lowukulu, timiliyoni ta vanhu lava nga le Hayidesi ti ta pfuxiwa kutani ti kuma lunghelo ro nwa mati wolawo ya vutomi. Loko swi te tano, swi fanerile ku vula leswaku lava ntshungu lowukulu i swirhangana swa tinyimpfu letin’wana—i swirhangana hikuva va ta va vo sungula ku ‘hlantswa tinguvu ta vona to leha va ti endla to basa hi ngati ya Xinyimpfana,’ va ri ni ntshembo wo hanya hilaha ku nga heriki emisaveni.—Nhlavutelo 7:9, 10, 14, 17; 20:12, 13.

15. Hi kwihi ku fana loku nga kona exikarhi ka mintlawa yinharhu ya swirhangana ni minkhuvo leyi a yi tlangeriwa hi nkarhi wa Nawu wa Muxe?

¹⁵ Mintlawa leyinharhu ya swirhangana (ku nga Yesu Kreste, lava 144 000 ni lava ntshungu lowukulu) ku ni leswi yi fanaka ha swona eka minkhuvo leyi a yi tlangeriwa hi ku ya hi Nawu wa khale wa Muxe. Hi Nisani 16, loko ku ri karhi ku tlangeriwa Nkhuvo wa Swinkwa Leswo-ke-comela, a ku tekiwa nyandza ya swirhangana swa ntshovelo wa maxalana, yi nyikeriwa eka Yehovha. (Levhitika 23:6-14) Siku leri ra Nisani 16 hi leri Yesu a pfuxiweke ha rona eku feni. Hi siku ra vu-50 ku sukela hi Nisani 16 hi n’hweti ya vunharhu, Vaisrayele a va tlangela nkhuvo wa ntshovelo wo rhanga wa koroni. (Eksoda 23:16; Levhitika 23:15, 16) Nkhuvo lowu wu vitaniwe Pentekosta (ku nga rito ra Xigriki leri vulaka “vu-50”), naswona swirho swo sungula swa lava 144 000 swi totiwe hi moya lowo kwetsima hi Pentekosta ya 33 C.E. Eku heteleleni, hi n’hweti ya vunkombo loko se ntshovelo hinkwawo wu hlengeletiwile, a ku va ni Nkhuvo wa Mitsonga, ku nga nkarhi wa Vaisrayele wo nkhensa, kutani a va heta vhiki va tshama emitsongeni leyi minkarhi yin’wana a yi endliwa hi switluka swa mirhi ya micindzu. (Levhitika 23:33-43) Hilaha ku fanaka, lava ntshungu lowukulu lava hlanganyelaka entirhweni lowukulu wo hlengeleta, va yima emahlweni ka xiluvelo va nkhensa, va ri karhi va tamele “marhavi ya micindzu emavokweni ya wona.”—Nhlavutelo 7:9.

Ku Vula Mahungu Lamanene Lama Nga Heriki

16, 17. (a) Xana Yohane u vone ntsumi yi haha kwihi, naswona yi twarisa mahungu wahi? (b) I vamani lava katsekaka entirhweni wo chumayela hi Mfumo naswona hi yihi mintokoto leyi kombisaka sweswo?

¹⁶ Yohane u ye emahlweni a ku: “Kavaloko ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo, yi vula hi rito lerikulu yi ku: ‘Chavani Xikwembu mi xi vangamisa, hikuva nkarhi wa ku avanyisiwa hi xona wu fikile, gandzelani Loyi a endleke tilo ni misava ni lwandle ni minseledyana ya mati.’” (Nhlavutelo 14:6, 7) Ntsumi leyi yi haha “empfhukeni” laha swinyenyana swi hahaka kona. (Ringanisa na Nhlavutelo 19:17.) Xisweswo rito ra yona ri twiwa hi mani na mani la hanyaka emisaveni. Hakunene a xi kona xitichi xa thelevhixini lexi nga haxaka mahungu ma fika lomu rito ra ntsumi leyi ri fikaka kona emisaveni hinkwayo!

¹⁷ Vanhu hinkwavo va khutaziwa ku chava Yehovha, ku nga ri xivandzana ni xifaniso xa xona, hikuva u ni matimba lama ku nga riki na xivandzana ni xin’we xo fanekisela lexi lawuriwaka hi Sathana lexi nga ni matimba lama nga pimanisiwaka ni ya yena. Phela, Yehovha u tumbuluxe matilo ni misava naswona nkarhi se wu fikile leswaku a avanyisa misava! (Ringanisa na Genesa 1:1; Nhlavutelo 11:18.) Loko Yesu a ha ri laha misaveni, u profete hi ta siku ra hina a ku: “Naswona mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Vandlha ra Vakreste lava nga vatotiwa ri hetisisa ntirho lowu. (1 Vakorinto 9:16; Vaefesa 6:15) Buku ya Nhlavutelo yi vula leswaku ni tintsumi leti nga vonakiki na tona ta hlanganyela entirhweni lowu wo chumayela. Hakanyingi tintsumi ti kongomise Timbhoni ta Yehovha emakaya ya vanhu lava a va tshikilelekile, va pfanga ni ku khongelela ku pfuniwa hi tlhelo ra moya!

18. Hi ku ya hi ntsumi leyi hahaka empfhukeni, hi wihi nkarhi lowu fikeke naswona i vamani lava nga ta ya emahlweni va vula swihlambanyo?

¹⁸ Hilaha ntsumi leyi hahaka empfhukeni yi vuleke hakona, nkarhi wa ku avanyisa wu fikile. Hi byihi vuavanyisi lebyi Xikwembu xi nga ta byi humesa sweswi? Tindleve ti ta hlohlonya loko ti twa swihlambanyo leswi nga ta vuriwa hi ntsumi ya vumbirhi, ya vunharhu, ya vumune ni ya vuntlhanu.—Yeremiya 19:3.

[Tinhlamuselo ta le hansi]

[Swifaniso leswi nga eka tluka 202, 203]

Lava 144 000

Vakulu va 24

Vadyandzhaka-kulobye ni Xinyimpfana, Kreste Yesu, loko va ri eswikhundlheni swa vona leswi nga faniki