Ndzima 41

Siku Ra Xikwembu Ra Ku Avanyisa—Vuyelo Bya Rona Lebyi Tsakisaka!

Xivono 15—Nhlavutelo 20:11–21:8

Nhloko-mhaka: Ku pfuxiwa ka vanhu hinkwavo eku feni, Siku ra Vuavanyisi ni mikateko leyi nga ta tisiwa hi matilo lamantshwa ni misava leyintshwa

Nkarhi wa ku hetiseka: Hi nkarhi wa Mfumo wa Gidi ra Malembe

1. (a) Vanhu va lahlekeriwe hi yini endzhaku ka loko Adamu na Evha va dyohile? (b) Hi xihi xikongomelo xa Xikwembu lexi nga hundzukangiki, naswona hi swi tivisa ku yini?

LESWI hi nga vanhu va nyama, a hi vumberiwe leswaku hi hanya hilaha ku nga heriki. Loko Adamu na Evha a va yingise swileriso swa Xikwembu, a va ta va va nga fanga. (Genesa 1:28; 2:8, 16, 17; Eklesiasta 3:10, 11) Kambe leswi va nga dyoha, va lahlekeriwe hi ku hetiseka ni vutomi bya vona ni bya vana va vona, naswona rifu ri lawule vanhu ku fana ni nala wa tihanyi. (Varhoma 5:12, 14; 1 Vakorinto 15:26) Nilokoswiritano, xikongomelo xa Xikwembu xa leswaku vanhu lava hetisekeke va hanya hilaha ku nga heriki emisaveni leyi nga paradeyisi a xi hundzukanga. Hikwalaho ka leswi Xikwembu xi rhandzaka vanhu, xi rhumele N’wana wa xona la tswariweke a ri swakwe emisaveni, ku nga Yesu, loyi a nyikeleke hi vutomi bya yena lebyi hetisekeke tanihi nkutsulo eka vo “tala” va vana va Adamu. (Matewu 20:28; Yohane 3:16) Sweswi Yesu a nga tirhisa gandzelo ra yena ku endla vanhu lava pfumelaka leswaku va tlhela va va ni vutomi lebyi hetisekeke emisaveni leyi nga paradeyisi. (1 Petro 3:18; 1 Yohane 2:2) Xexo i xivangelo lexikulu hakunene lexi endlaka vanhu va ‘tsaka’!—Esaya 25:8, 9.

2. Yohane u vika yini eka Nhlavutelo 20:11, naswona i yini “xiluvelo lexikulu xo basa”?

² Mfumo wa Yesu wa Gidi ra Malembe wu ta sungula loko Sathana a pfaleriwe ekheleni ro enta. Leri hi rona “siku” leri Xikwembu xi nga ta “avanyisa misava leyi akiweke hi ku lulama hi wanuna loyi xi n’wi vekeke.” (Mintirho 17:31; 2 Petro 3:8) Yohane u te: “Kavaloko ndzi vona xiluvelo lexikulu xo basa ni loyi a tshameke eka xona. Misava ni tilo swi nyamalala emahlweni ka yena, kutani ndhawu ya swona a ya ha kumekanga.” (Nhlavutelo 20:11) I yini “xiluvelo [lexi] lexikulu xo basa”? I xitshamo xo avanyisa xa “Xikwembu [lexi nga] Muavanyisi wa hinkwavo.” (Vaheveru 12:23) Xi ta avanyisa vanhu, xi kombisa leswaku i vamani lava nga ta vuyeriwa eka gandzelo ra nkutsulo ra Yesu.—Marka 10:45.

3. (a) Mhaka ya leswaku xiluvelo xa Xikwembu i ‘xikulu’ naswona i xo “basa” yi kombisa yini? (b) I vamani lava nga ta avanyisa hi Siku ra Vuavanyisi, naswona va ta avanyisa exisekelweni xihi?

³ Xiluvelo xa Xikwembu i ‘xikulu,’ leswi kandziyisaka vukulu bya Yehovha tanihi Hosi Leyi Lawulaka, naswona i xo “basa,” hikuva ku lulama ka xona ku hetisekile. Xikwembu hi xona xi nga Muavanyisi lonkulu wa vanhu. (Pisalema 19:7-11; Esaya 33:22; 51:5, 8) Hambiswiritano, xi nyike Yesu Kreste ntirho wo avanyisa: “Tatana a nga avanyisi munhu ni un’we, kambe ku avanyisa hinkwako u ku tamerise N’wana.” (Yohane 5:22) Yesu u ta avanyisa swin’we ni lava 144 000, lava “[nyikiweke] matimba ya ku avanyisa . . . ku ringana malembe ya 1 000.” (Nhlavutelo 20:4) Hambiswiritano, i milawu ya Yehovha leyi nga ta vula leswaku ku humelela yini eka munhu ha un’we hi Siku ra Vuavanyisi.

4. Swi vula yini leswaku “misava ni tilo [swa] nyamalala”?

⁴ “Misava ni tilo swi nyamalala” hi ndlela yihi? Tilo leri ra fana ni leriya ri nga suka ku fana ni buku-nsongwa loko ku pfuriwa xilemo xa vutsevu—ku nga vafumi lava lawulaka lava “hlayiseriwe[ke] ndzilo naswona [va] ha vekiwile ku fikela siku ra vuavanyisi ni ra ndzoviso wa vanhu lava va nga xi xiximiki Xikwembu.” (Nhlavutelo 6:14; 2 Petro 3:7) Misava i fambiselo ra swilo leri hleriweke leri nga kona hi nkarhi wa ku fuma ka vafumi lava. (Nhlavutelo 8:7) Ku lovisiwa ka xivandzana ni tihosi ta misava ni mavuthu ya tona, swin’we ni lava va nga ni mfungho wa xivandzana ni lava gandzelaka xifaniso xa xona, swi fungha ku suka ka tilo leri ni misava leyi. (Nhlavutelo 19:19-21) Leswi misava ni tilo ra Sathana swi nga ta va swi avanyisiwile, Muavanyisi Lonkulu u veka Siku rin’wana ra Vuavanyisi.

Siku Ra Vuavanyisi Leri Tekaka Gidi Ra Malembe

5. Endzhaku ka loko misava ya khale ni tilo ra khale swi sukile, i vamani lava nga ta sala va avanyisiwa?

⁵ I vamani lava nga ta sala va avanyisiwa loko misava ya khale ni tilo ra khale swi sukile? A hi wona masalela lama totiweke ya lava 144 000, hikuva wona se ma ta va ma avanyisiwile ma tlhela ma funghiwa. Loko van’wana va vatotiwa va ta va va ha ri kona emisaveni endzhaku ka Armagedoni, va fanele va fa endzhakunyana ka kwalaho kutani va kuma hakelo ya vona ya le tilweni hi ku va va pfuxiwa eku feni. (1 Petro 4:17; Nhlavutelo 7:2-4) Hambiswiritano, vanhu va timiliyoni, va ntshungu lowukulu, lava va nga ta va va hume eka nhlomulo lowukulu va ta yima va vonaka “emahlweni ka xiluvelo.” Vanhu lava se va vuriwe lava lulameke leswaku va ponisiwa, hikwalaho ka ripfumelo ra vona eka ngati ya Yesu leyi halatiweke, kambe va fanele va ya emahlweni va avanyisiwa ku kondza ku hela malembe ya gidi tanihi leswi Yesu a nga ta hambeta a va kongomisa “eminseledyaneni ya mati ya vutomi.” Kutani, leswi va nga ta va va endliwe lava hetisekeke ivi endzhaku ka sweswo va ringiwa, va ta vuriwa lava lulameke hi ku helela. (Nhlavutelo 7:9, 10, 14, 17) Vana lava nga ta pona nhlomulo lowukulu ni vana vahi ni vahi lava nga ta velekiwa hi lava va ntshungu lowukulu hi nkarhi wa Mfumo wa Gidi ra Malembe na vona va fanele va avanyisiwa hi nkarhi wa gidi ra malembe.—Ringanisa na Genesa 1:28; 9:7; 1 Vakorinto 7:14.

6. (a) Hi wihi ntshungu lowu voniwaka hi Yohane, naswona marito lama nge “lavakulu ni lavatsongo” ma kombisa yini? (b) Handle ko kanakana, vanhu va timiliyoni va ntsandza-vahlayi lava nga le mianakanyweni ya Xikwembu va ta pfuxiwa njhani?

⁶ Hambiswiritano, Yohane u vone ntshungu lowu teleke swinene ku tlula ntshungu lowukulu lowu poneke. Nhlayo ya wona i magidi ya timiliyoni! “Kavaloko ndzi vona vafi, lavakulu ni lavatsongo, va yime emahlweni ka xiluvelo, kutani ku pfuriwa tibuku-nsongwa.” (Nhlavutelo 20:12a) “Lavakulu ni lavatsongo” va katsa vanhu lava dumeke ni lava a va nga dumanga, lava hanyeke va tlhela va fa emisaveni emalembeni ya 6 000 lama hundzeke. Eka Evhangheli leyi muapostola Yohane a yi tsaleke endzhakunyana ka buku ya Nhlavutelo, Yesu u vule leswi hi Tatana: “U . . . nyike [Yesu] matimba ya ku avanyisa, hikuva i N’wana wa munhu. Mi nga hlamaleni ha swona, hikuva nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.” (Yohane 5:27-29) Lowu ku ta va ku ri ntirho lowu hlamarisaka hakunene—ku pfuxiwa ka vanhu lava feke ematin’wini hinkwawo! A swi kanakanisi leswaku vanhu va timiliyoni ta ntsandza-vahlayi lava nga le mianakanyweni ya Xikwembu va ta pfuxiwa hakatsongo-tsongo leswaku lava ntshungu lowukulu—lava nhlayo ya vona yi nga yitsongo loko yi ringanisiwa ni timiliyoni toleto—va ta kota ku langutana ni swiphiqo leswi nga ha vaka kona hikwalaho ka leswi lava pfuxiweke va nga ha yaka emahlweni ni mahanyelo ya vona ya khale ni langutelo ra vona ra nyama.

I Vamani Lava Nga Ta Pfuxiwa Va Tlhela Va Avanyisiwa?

7, 8. (a) I buku-nsongwa yihi leyi nga ta pfuriwa, naswona ku ta humelela yini endzhaku ka sweswo? (b) I vamani lava nga taka va nga pfuxiwi?

⁷ Yohane u engete, a ku: “Kambe ku pfuriwa buku-nsongwa yin’wanyana; i buku-nsongwa ya vutomi. Vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona. Kutani lwandle ri humesa vafi lava nga eka rona, rifu ni Hayidesi swi humesa vafi lava nga eka swona, kavaloko munhu ni munhu a avanyisiwa hi ku ya hi swiendlo swa yena.” (Nhlavutelo 20:12b, 13) Lexi i xiendlakalo lexi hlamarisaka hakunene! ‘Lwandle, rifu ni Hayidesi’ hinkwaswo swi hetisisa xiphemu xo karhi, kambe xiya leswaku marito lawa ma fambisana.a Yonasi, loko a ri ekhwirini ra nhlampfi naswona a ri exikarhi ka lwandle, u vule leswaku u le Sheol kumbe Hayidesi. (Yonasi 2:2) Loko munhu a fe hikwalaho ka xidyoho xa Adamu, na yena a nga ha va a ri eHayidesi. Marito lawa ya vuprofeta ma nyikela xitiyisekiso xa matimba xa leswaku a ku nge siyiwi munhu.

⁸ Kambe ku ni nhlayo leyi nga tiviwiki ya vanhu lava nga taka va nga pfuxiwi. Van’wana va vona ku ta va ku ri vatsari ni Vafarisi lava nga hundzukangiki naswona va nga n’wi yingisangiki Yesu ni vaapostola va yena ni “munhu wo kala nawu” wa vukhongeri bya mavunwa swin’we ni Vakreste lava a va totiwile “lava weke.” (2 Vatesalonika 2:3; Vaheveru 6:4-6; Matewu 23:29-33) Yesu u tlhele a vulavula hi vanhu lava fanaka ni timbuti lava loko misava yi hela va nga ta ya “endzilweni lowu nga heriki lowu lunghiseleriweke Diyavulosi ni tintsumi takwe,” ku nga ku “loviseriwa makumu.” (Matewu 25:41, 46) Vanhu lava a va nge pfuxiwi!

9. Muapostola Pawulo u swi kombisa njhani leswaku van’wana va ta kombiwa tintswalo swinene eku pfuxiweni ka vafi, naswona lava va katsa vamani?

⁹ Hi hala tlhelo, van’wana va ta kombiwa tintswalo swinene eku pfuxiweni ka vafi. Muapostola Pawulo u kombise leswi loko a ku: “Ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Malunghana ni ku pfuxiwa ka vafi ka laha misaveni, “lava lulameke” va ta katsa vavanuna ni vavasati vo tshembeka va khale—Abrahama, Rahava ni van’wana vo tala—lava vuriweke vo lulama hikwalaho ka leswi va veke vanghana va Xikwembu. (Yakobo 2:21, 23, 25) Exikarhi ka ntlawa lowu ku ta va ku ri ni tinyimpfu tin’wana to lulama ta manguva lawa leti feke ti tshembekile eka Yehovha. Kumbexana vanhu vo tano hinkwavo lava tshembekeke hi vona va nga ta rhanga va pfuxiwa eka Mfumo wa Yesu wa Gidi ra Malembe. (Yobo 14:13-15; 27:5; Daniyele 12:13; Vaheveru 11:35, 39, 40) A swi kanakanisi leswaku vo tala va vanhu volavo vo lulama lava pfuxiweke va ta averiwa malunghelo yo hlawuleka yo langutela ntirho lowukulu wa ku pfuxeta Paradeyisi.—Pisalema 45:16; ringanisa na Esaya 32:1, 16-18; 61:5; 65:21-23.

10. Eka lava nga ta pfuxiwa, i vamani “lava nga lulamangiki”?

¹⁰ Kambe i vamani “lava nga lulamangiki” lava ku vulavuriwaka ha vona eka Mintirho 24:15? Lava va ta katsa mintshungu leyikulu ya vanhu lava feke emalembeni hinkwawo lama hundzeke, ngopfu-ngopfu lava hanyeke ‘eminkarhini yo pfumala vutivi.’ (Mintirho 17:30) Vanhu lava a va vanga na wona nkarhi wo dyondza ku endla ku rhandza ka Yehovha hikwalaho ka ndhawu leyi va tswaleriweke eka yona kumbe leyi a va tshama eka yona. Ku engetela kwalaho, ku nga ha va ni van’wana lava tweke rungula ra ku ponisiwa kambe va nga ri amukelangiki hi ku hetiseka hi nkarhi wolowo kumbe va feke va nga si tinyiketela ni ku khuvuriwa. Loko va pfuxiwa eku feni vanhu vo tano va ta boheka ku endla mindzulamiso leyi engetelekeke eka ndlela leyi va anakanyaka ha yona ni ndlela leyi va hanyaka ha yona loko va ta vuyeriwa eka lunghelo leri ro kuma vutomi lebyi nga heriki.

Buku-nsongwa Ya Vutomi

11. (a) I yini “buku-nsongwa ya vutomi,” naswona i mavito ya vamani lama kumekaka eka yona? (b) Ha yini buku-nsongwa ya vutomi yi ta pfuriwa hi nkarhi wa Mfumo wa Gidi ra Malembe?

¹¹ Yohane u vulavule hi “buku-nsongwa ya vutomi.” Leyi i rhekhodo ya lava Yehovha a nga ta va nyika vutomi lebyi nga heriki. Mavito ya vamakwavo va Yesu lava totiweke ni ya lava ntshungu lowukulu swin’we ni ya vavanuna va khale vo tshembeka, vo tanihi Muxe ma tsariwile eka buku-nsongwa leyi. (Eksoda 32:32, 33; Daniyele 12:1; Nhlavutelo 3:5) Loko “lava nga lulamangiki” va pfuxiwa, mavito ya vona ma ta va ma nga si tsariwa eka buku-nsongwa ya vutomi. Hikwalaho buku-nsongwa ya vutomi yi ta pfuriwa hi nkarhi wa Mfumo wa Gidi ra Malembe leswaku ku ta katsiwa mavito ya van’wana lava nga ta faneleka. Lava mavito ya vona ma nga taka ma nga tsariwi eka buku-nsongwa leyi, kumbe buku ya vutomi, va ta “lahleriwa etiveni ra ndzilo.”—Nhlavutelo 20:15; ringanisa na Vaheveru 3:19.

12. I yini lexi nga ta tiyisekisa leswaku vito ra munhu ra tsariwa eka buku-nsongwa ya vutomi leyi pfuriweke, naswona Muavanyisi la vekiweke hi Yehovha u xi veke njhani xikombiso lexinene?

¹² Kutani, i yini lexi nga ta tiyisekisa leswaku vito ra munhu ra tsariwa eka buku-nsongwa leyi pfuriweke hi nkarhi wolowo? Nchumu lowu lavekaka wa fana ni lowu a wu laveka enkarhini wa Adamu na Evha: ku nga ku yingisa Yehovha. Muapostola Yohane u tsalele Vakreste-kulobye lava a va rhandzaka swinene a ku: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:4-7, 17) Emhakeni ya ku yingisa, Muavanyisi la vekiweke hi Yehovha u veke xikombiso lexinene: “Hambileswi [Yesu] a a ri N’wana, u dyondze ku yingisa eka swilo leswi a xanisekeke ha swona; naswona loko a endliwe la hetisekeke u ve ni vutihlamuleri bya ku ponisa hinkwavo lava n’wi yingisaka hilaha ku nga heriki.”—Vaheveru 5:8, 9.

Ku Pfula Tibuku-nsongwa Tin’wana

13. Lava pfuxiweke eku feni va fanele va swi kombisa njhani leswaku va yingisa, naswona i misinya yihi ya milawu leyi va faneleke va yi landzela?

¹³ Xana vanhu lava pfuxiweke va fanele va swi kombisa njhani leswaku va yingisa? Yesu u vulavule hi swileriso swimbirhi leswikulu, a ku: “Xo sungula xi ri, ‘Twana, Wena Israyele, Yehovha Xikwembu xa hina i Yehovha un’we, naswona u fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.’ Xa vumbirhi hi lexi, ‘U fanele u rhandza warikwenu kukota loko u tirhandza.’” (Marka 12:29-31) Nakambe ku ni misinya ya milawu ya Yehovha leyi nga hundzukiki leyi va faneleke va yi landzela, yo tanihi ku tshika ku yiva, ku hemba, ku dlaya hi vomu ni mahanyelo yo biha.—1 Timotiya 1:8-11; Nhlavutelo 21:8.

14. Hi tihi tibuku-nsongwa tin’wana leti nga ta pfuriwa, naswona ku tsariwe yini eka tona?

¹⁴ Kambe, Yohane u vulavule ni hi tibuku-nsongwa tin’wana leti nga ta pfuriwa hi nkarhi wa Mfumo wa Gidi ra Malembe. (Nhlavutelo 20:12) Ku ta va ku ri yini tibuku-nsongwa ta kona? Minkarhi yin’wana, Yehovha u nyike vanhu swiletelo swo karhi ehansi ka swiyimo swo karhi. Hi xikombiso, enkarhini wa Muxe u va nyike milawu leyi nga ni vuxokoxoko leyi loko Vaisrayele a va yi yingisa a swi ta vula vutomi eka vona. (Deteronoma 4:40; 32:45-47) Hi lembe-xidzana ro sungula, vanhu lava tshembekaka va nyikiwe swiletelo leswintshwa leswaku swi va pfuna ku landzela misinya ya milawu ya Yehovha ehansi ka fambiselo ra swilo ra Vukreste. (Matewu 28:19, 20; Yohane 13:34; 15:9, 10) Sweswi Yohane u vika leswaku vafi va ta “avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona.” Kutani, swi le rivaleni leswaku ku pfuriwa ka tibuku-nsongwa leti ku ta paluxa leswi Yehovha a swi languteleke eka vanhu hi nkarhi wa gidi ra malembe. Loko va tirhisa milawu ni swileriso leswi kumekaka eka tibuku-nsongwa leti, vanhu lava yingisaka va ta kota ku hanya nkarhi wo leha, ivi eku heteleleni va kuma vutomi lebyi nga heriki.

15. Hi rihi tsima ro dyondzisa leri nga ta laveka hi nkarhi wa ku pfuxiwa ka vafi, naswona vafi va ta pfuxiwa hi ndlela yihi?

¹⁵ Hakunene ku ta laveka tsima lerikulu ro dyondzisa vanhu timhaka ta Xikwembu! Hi 2005, Timbhoni ta Yehovha emisaveni hinkwayo a ti fambisa tidyondzo ta Bibele ta 6 061 534 hi xiringaniso, etindhawini to hambana-hambana. Kambe hi nkarhi wa ku pfuxiwa ka vafi, handle ko kanakana ku ta fambisiwa tidyondzo ta timiliyoni ta ntsandza-vahlayi, leti sekeriweke eBibeleni ni le ka tibuku-nsongwa letintshwa! Vanhu hinkwavo va Xikwembu va fanele va va vadyondzisi naswona va fanele va tikarhata swinene. A swi kanakanisi leswaku lava pfuxiweke loko va ri karhi va endla nhluvuko na vona va ta hlanganyela enongonokweni lowu lowukulu wo dyondzisa. Kumbexana vanhu va ta pfuxiwa hi ndlela leyi nga ta endla leswaku lava hanyaka va kota ku kuma ntsako wo amukela khale ka swirho swa mindyangu ya vona swin’we ni vanhu lava va va toloveleke, ni ku tlhela va va dyondzisa, kutani na vona va amukela van’wana ni ku tlhela va va dyondzisa. (Ringanisa na 1 Vakorinto 15:19-28, 58.) Timbhoni ta Yehovha leti tlulaka tsevu wa timiliyoni leti twarisaka ntiyiso namuntlha hi ku hiseka, ti tivekela masungulo lamanene yo kuma lunghelo ro tirhisiwa hi nkarhi wa ku pfuxiwa ka vafi.—Esaya 50:4; 54:13.

16. (a) I mavito ya vamani lama nga taka ma nga tsariwi eka buku-nsongwa, kumbe buku ya vutomi? (b) I vamani lava nga ta pfuxeriwa “evuton’wini” lebyi nga heriki?

¹⁶ Malunghana ni ku pfuxiwa ka vafi ka laha misaveni, Yesu u vule leswaku “lava endleke swilo leswinene va pfukela evuton’wini, lava a va hanya hi swilo swo biha va pfukela eku avanyisiweni.” Marito lama nge ‘vutomi’ ni ‘ku avanyisiwa’ i marito lama hambaneke, leswi kombisaka leswaku lava pfuxiweke kutani ‘va hanya hi ndlela yo biha’ endzhaku ka loko va dyondzisiwile hi ku tirhisa Matsalwa lama huhuteriweke ni tibuku-nsongwa, va ta lovisiwa. Mavito ya vona a ma nge tsariwi eka buku-nsongwa, kumbe ebukwini ya vutomi. (Yohane 5:29) Swi ta va tano ni le ka munhu wihi na wihi loyi a a tshembekile, kambe hikwalaho ka swivangelo swo karhi a xandzuka hi nkarhi wa Mfumo wa Gidi ra Malembe. Hambiloko vito ri tsariwile, ri nga ha suriwa. (Eksoda 32:32, 33) Hi hala tlhelo, lava landzelaka swilo leswi tsariweke eka tibuku-nsongwa hi ku tshembeka va ta endla leswaku mavito ya vona ma tshama ma ri kona eka rhekhodo leyi tsariweke, ku nga buku-nsongwa ya vutomi, kutani va hambeta va hanya. Eka vona, ku pfuxiwa ka vona ku ta va ku ve ku pfuxeriwa “evuton’wini.”

Ku Herisiwa Ka Rifu Ni Hayidesi

17. (a) Hi xihi xiendlo xo hlamarisa lexi Yohane a xi hlamuselaka? (b) Hi rini laha Hayidesi yi nga ta va yi nga ha ri na nchumu? (c) Hi rini laha rifu leri vangiweke hi Adamu ri nga ta “lahleriwa etiveni ra ndzilo”?

¹⁷ Endzhaku ka sweswo, Yohane u hlamusela nchumu wun’wana wo hlamarisa swinene! U ri: “Kutani rifu ni Hayidesi swi lahleriwa etiveni ra ndzilo. Tiva leri ra ndzilo ri vula rifu ra vumbirhi. Ku tlula kwalaho, mani na mani la kumekaka a nga tsariwanga ebukwini ya vutomi a a lahleriwa etiveni ra ndzilo.” (Nhlavutelo 20:14, 15) Loko ku hela Siku ra Vuavanyisi ra gidi ra malembe, “rifu ni Hayidesi” swi ta va swi suseriwe makumu. Ha yini leswi swi teka gidi ra malembe? Hayidesi, ku nga sirha leri tolovelekeke ra vanhu hinkwavo, ri ta sala ri nga ha ri na munhu loko ku pfuxiwa munhu wo hetelela la nga emianakanyweni ya Xikwembu. Kambe loko vanhu va ha ri na xidyoho lexi va tswariweke na xona, rifu leri vangiweke hi Adamu ri ta va ra ha ri kona eka vona. Vanhu hinkwavo lava pfuxiweke, swin’we ni ntshungu lowukulu lowu nga ta pona Armagedoni, va fanele va yingisa leswi tsariweke eka tibuku-nsongwa ku kondza nkutsulo wa Yesu wu tirhisiwa hilaha ku heleleke ku susa vuvabyi, ku dyuhala ni swiphiqo swin’wana leswi vanhu va tswariwaka na swona. Kutani rifu leri vangiweke hi Adamu, swin’we ni Hayidesi, swi ta “lahleriwa etiveni ra ndzilo.” Swi ta va swi heriseriwe makumu!

18. (a) Muapostola Pawulo u ku hlamusela njhani ku hlula ka ku fuma ka Yesu tanihi Hosi? (b) Yesu u ta endla yini hi vanhu lava hetisekeke? (c) Hi swihi swilo swin’wana leswi nga ta endleka eku heleni ka gidi ra malembe?

¹⁸ Hikwalaho, nongonoko lowu muapostola Pawulo a wu hlamuselaka epapileni rakwe leri yaka eka Vakorinto wu ta fika emakumu: “Hikuva [Yesu] u fanele a va hosi ku fikela loko Xikwembu xi veke valala hinkwavo ehansi ka milenge ya yena. Rifu [leri vangiweke hi Adamu] i nala wo hetelela la nga ta herisiwa.” Ku ta humelela yini endzhaku ka sweswo? “Loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka xona lexi vekeke swilo hinkwaswo ehansi ka yena.” Hi marito man’wana, Yesu u ta “nyiketa mfumo eka Xikwembu tlhelo Tata wa yena.” (1 Vakorinto 15:24-28) Ina, leswi Yesu a nga ta va a hlule rifu leri vangiweke hi Adamu hi gandzelo ra yena ra nkutsulo, u ta nyika Yehovha, Tata wa yena, vanhu lava hetisekeke. Swi le rivaleni leswaku ku ta va ku ri enkarhini lowu, eku heleni ka gidi ra malembe, laha Sathana a nga ta ntshunxiwa ivi ku va ni ndzingo wo hetelela, laha ku nga ta tiyisekiwa leswaku i mavito ya vamani lama nga ta tshamela makumu eka buku-nsongwa ya vutomi. “Tikarhateni hi matimba” leswaku mavito ya n’wina ma kumeka ma tsariwile eka buku-nsongwa yoleyo!—Luka 13:24; Nhlavutelo 20:5.

[Nhlamuselo ya le hansi]

[Xifaniso lexi nga eka tluka 298]

Mavito ya vanhu “lava nga lulamangiki” lava pfuxiweke eku feni, lava yingisaka leswi tsariweke eka tibuku-nsongwa leti nga ta pfuriwa hi nkarhi wa Mfumo wa Gidi ra Malembe na wona ma nga ha tsariwa eka buku-nsongwa ya vutomi